“Enero 13–19. 1 Nephi 8–10: ‘Umay ken Mairanud iti Bunga,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Enero 13–19. 1 Nephi 8–10,” Umaykayo, Sumurot Kaniak—Para iti Sunday School: 2020
Tagtagainep ni Lehi, ni Steven Lloyd Neal
Enero 13–19
1 Nephi 8–10
“Umay ken Mairanud iti Bunga”
Sakbay ti panangbasam kadagiti kapanunotan iti daytoy a balabala, basaem ti 1 Nephi 8–10 ket panunotem maipapan kadagiti karit ken gundaway a pakaipaspasanguan dagiti tao a sursuruam. Isuratmo dagiti impresion maipapan no ania kadagiti pagbatayan manipud kadagitoy a kapitulo ti nasken nga ipamaysam iti klase.
Isuratmo Dagiti Impresionmo
Yawis ti Panagbibinninglay
Adu ti pakaaramatan ti parmata ni Lehi para iti panawentayo. Iti rugi ti klase, mabalin a kayatmo nga awisen dagiti miembro ti klase a mangibinglay kadagiti nalawag a pannakaammo ken pannakaawatda [insights] bayat ti panagbasada maipapan iti daytoy a parmata. Allukoyem ida a mangiburay kadagiti maitudo a bersikulo ken ti kaipapanan a nasarakanda para iti biagda.
Isuro ti Doktrina
No mapadasantayo ti ayat ti Dios, tarigagayantayo a mangtulong kadagiti dadduma a mangpadas iti daytoy.
-
Gagangay nga ibinglaytayo dagiti banag kadagiti tao nga ay-ayatentayo, ngem no dadduma marigatantayo a mangibinglay iti ebanghelio. Ti panaglilinnawag maipapan iti parmata ni Lehi ket mabalin a makatulong kadagiti miembro ti klase a mangsapul kadagiti gundaway a mangibinglay iti ebanghelio. Mabalinmo ti mangted iti maysa a miembro ti klase iti maysa a bunga ken idawatmo kenkuana a mangallukoy kadagiti dadduma pay iti klase a mangan iti daytoy a bunga a masansan. Kasano a maipada daytoy a banag nga adalen iti padas ni Lehi iti 1 Nephi 8:10–16? Ania ti masursurotayo manipud iti padas ni Lehi a makatulongto kadatayo bayat ti panangibinglaytayo iti ebanghelio? Kas paset daytoy a panaglilinnawag, mabalin a kayatmo nga ipabuya ti video a “Good Things to Share” (ChurchofJesusChrist.org).
-
Insuro ni Elder David A. Bednar, “Ti bunga iti kayo ti maysa a simbolo para kadagiti bendision ti Pannubbot” (“Lehi’s Dream: Holding Fast to the Rod,” Ensign wenno Liahona, Okt. 2011, 34). Ibilang ti panangkontak iti sumagmamano a miembro ti klase a nasapsapa ken panangkiddaw kadakuada a mangpanunot iti 1 Nephi 8:11–16 ket mangpanunot maipapan kadagiti saludsod kas kadagitoy: Kasano nga iladawanko ti kinasam-it nga insangbay ti Pannubbot ni Jesucristo iti biagko? Kasano a nayawisko kadagiti dadduma a mangraman iti kinasam-it daytoy? (kitaen iti bersikulo 15). Kasano nga inawisdak dagiti dadduma a mangsapul kadagiti bendision ti Pannubbot ti Mangisalakan? Ania ti nakaparegtaak nga agaramid bayat ti panangbasak iti 1 Nephi 8:11–16? Awisem dagitoy a miembro a mangibinglay kadagiti sungbatda kabayatan ti klase, ken awisem ti amin a miembro ti klase a mangted kadagiti nalawag a pannakaammo ken pannakaawatda [insights] kabayatan ti panaglilinnawag.
Minerva K. Teichert (1888–1976), Ti Balay ti Lubong, 1954, oil on board, 36 x 48 inches. Brigham Young University Museum of Art
Ti balikas ti Dios ti mangiturong kadatayo iti Mangisalakan ket mangtulong kadatayo a makarikna iti ayatna.
-
Maysa a wagas tapno mangirugi iti panaglilinnawag maipapan iti parmata ni Lehi ket ti panangawis iti sumagmamano a miembro ti klase a mangidrowing iti maysa a panangibagi iti parmata iti pisarra, nga us-usaren ti 1 Nephi 8:19–38 kas pangiwanwan. Mabalinmo nga ipakita ti ladawan ti parmata ni Lehi manipud iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia. Kalpasanna mabalinmo nga awisen ti tunggal miembro ti klase a mangsapul kadagiti bersikulo a mangted iti kayulogan ti maysa kadagiti simbolo iti drowing wenno ladawan—masarakan dagitoy a kayulogan iti 1 Nephi 11:4–25, 35–36; 12:16–18; ken 15:21–33, 36. Bayat ti panangibinglay dagiti miembro ti klase no ania ti nasarakanda, awisem ida a mangilawlawag no ania ti isuro dagitoy a simbolo kadatayo. Kas pagarigan, ania ti isuro kadatayo ti dakkel ken nalawa a pasdek maipapan iti kinapalangguad? Ania ti isuro kadatayo ti landok a pagkaptan maipapan ti balikas ti Dios? Mabalinda pay nga isarita maipapan iti no kasano a natulongan ida ti parmata ni Lehi nga umasideg ken ni Cristo. Kasano a nakitatayon ti bagbagitayo iti parmata?
-
Maysa a napateg a gapu iti mensahe ni Lehi ket ti kinapateg ti balikas ti Dios, a mangisimbolo ti landok a pagkaptan. Tapno matulongan a mangyunay-unay iti dayta a mensahe, mabalinmo a bingayen ti klase iti uppat a grupo ket dutokam ti tunggal maysa a mangsursuro ti maipapan iti uppat a grupo dagiti tao a nakita ni Lehi, kas nailadawan iti “Dagiti Nainayon a Resources” ken iti 1 Nephi 8:21–23, 24–28, 30, ken 31–33. Kalpasanna paibinglay kadagiti miembro ti klase iti tunggal maysa no ania ti nasursuroda. Mabalinmo pay ti mangted iti sumagmamano a minuto tapno utoben dagiti miembro ti klase no ania ti nakaawisan ti riknada nga aramiden tapno masigurado nga “intultuloyda ti kimpet iti landok a pagkaptan” (1 Nephi 8:30).
Ipalgakto ti Dios ti kinapudno kadatayo no sipapasnek a sapulentayo daytoy.
-
Dagiti nangisit nga angep a mangpalidem iti dalan ken dagiti manglalais a timek manipud iti dakkel ken nalawa a pasdek ket mabalin a mangaramid a narigat kadatayo a mangsapul iti kinapudno. Makatulong ti aggigiddan a panangbasa maipapan iti pagwadan ni Nephi kas maysa nga agsapsapul iti kinapudno. Mabalinmo a rugian ti panaglilinnawag babaen ti panangidawat kadagiti miembro ti klase a mangilasin iti sumagmamano kadagiti makatikaw a mensahe nga ipatpatulod ti lubong. Kas pagarigan, ania dagiti nailubongan a kapanunotan nga iballaag dagiti propeta ken apostol iti kallabes unay a sapasap a komperensia? Ibilangmo ti panangilista iti pisarra maipapan kadagiti addang nga innala ni Nephi tapno magun-od ti bukodna a saksi iti kinapudno ti parmata ti amana (kitaen iti 1 Nephi 10:17–19; 11:1). Kasano a masurottayo ti pagwadanna no agsapultayo iti kinapudno?
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti 1 Nephi 11–15, awisem ida a mangammo no ania ti pakainaigan dagiti sumaganad a ladawan iti tagtagainep ni Lehi: ti maladaga a ni Jesus, ti krus, ti ina dagiti mannakiabig, dagiti dadakkel nga ummong a nagtitipon a sangkamaysa iti paggugubatan, ken dagiti libro.
Dagiti Mainayon a Resources
Dagiti video iti Libro ni Mormon
Ibilangmo ti panangipabuya iti maysa a video a mangiladawan kadagiti pasamak manipud kadagitoy a kapitulo (kitaen iti Book of Mormon Videos collection iti ChurchofJesusChrist.org wenno iti Gospel Library app).
Dagiti uppat a grupo ti tattao iti tagtagainep ni Lehi.
-
Grupo 1.“Iti 1 Nephi 8:21–23 masursurotayo maipapan iti umuna a grupo ti tattao a nagtultuloy ken nangrugi iti dana a kumamang iti kayo ti biag. Nupay kasta, idi maipasango dagiti tao iti nangisit nga angep, a mangibagi kadagiti ‘pannulisog ti sairo’ (1 Nephi 12:17), nayaw-awanda iti dalanda, nagalla-allada, ket napukawda. Makita nga awan ti naaramid a pannakadakamat dagitoy a bersikulo maipapan iti landok a pagkaptan. Dagitay di mangikankano wenno mangtagtagilag-an iti balikas ti Dios ket saan a makaaramat iti nadiosan a kompas a mangitudo iti dalan ti Mangisalakan.”
-
Grupo 2.“Iti 1 Nephi 8:24–28 mabasatayo maipapan iti maikadua a grupo ti tattao a nakagun-od iti nailet ken akikid a dana a kumamang iti kayo ti biag. Daytoy a grupo ket ‘inusokda ti nangisit nga angep iti yaasidegda, a kumkumpet iti landok a pagkaptan, agingga a nakaasidegda ken nakiranud iti bunga ti kayo’ (bersikulo 24). Nupay kasta, bayat ti panangab-abi dagiti napintas ti panagkawkawesda nga agyan iti dakkel ken nalawa a pasdek iti daytoy maikadua a grupo ti tattao, ‘nagbainda’ ket ‘nagtatarayda a kimmamang iti maiparit a dana ket napukawda’ (bersikulo 28. … Uray no babaen ti pammati, panagkumit, ken ti balikas ti Dios, in-inut a napukaw daytoy a grupo—nalabit a gapu ta manmanoda laeng a nagbasa wenno nagadal wenno nagsukisok kadagiti nasantuan a kasuratan.”
-
Grupo 3.“Iti bersikulo 30 mabasatayo maipapan ti maikatlo a grupo ti tattao nga ‘intultuloyda ti kimpet iti landok a pagkaptan, agingga a nakaasideg ken nagrukbab ken nakiranudda iti bunga ti kayo.’ Ti kangrunaan a ragup dagiti balikas iti daytoy a bersikulo ket ti agtultuloy a kimpet iti landok a pagkaptan. Ti maikatlo a grupo ket nagtultuloy met nga addaan iti pammati ken kombiksion; nupay kasta, awan ti pakakitaan a nagalla-allada, natnagda kadagiti maiparit a dana, wenno napukawda. Nalabit a daytoy maikatlo a grupo ti tattao ket nagtultuloyda a nagbasa ken nagadal ken nagsukisok kadagiti nasantuan a kasuratan. … Daytoy ti grupo a nasken nga ikarigatanyo ken ikarigatak a pakikappengan.”
-
Grupo 4.“Ti maikapat a grupo ket saan a nangikarigatan nga umasideg iti kayo, a nagtartarigagayda ketdi iti dakkel ken nalawa a pasdek kas maudi a papananda (kitaen iti 1 Nephi 8:31–33).”
(David A. Bednar, “Lehi’s Dream: Holding Fast to the Rod,” Ensign wenno Liahona, Okt. 2011, 34–36.)
Panangpadur-as iti Panangisurotayo
Mangipeksa iti panagtalek babaen kadagiti nangato nga inanamaen. Sumagmamano nga agad-adal ti awanan panagtalek iti kabaelanda nga agadal iti ebanghelio iti bukodda. Ikari kadagiti miembro ti klase a bayat ti panagkagumaanda nga agsursuro iti bukodda, isuronto ida ti Espiritu Santo. Mabalinmo nga isingasing dagiti wagas a mangtulong kadakuada a mangirugi. (Kitaen iti Panangisuro iti Wagas ti Mangisalakan, 29–30.)