Maysa a Pagtuladan para iti Panangisuro

Iti daytoy a resource, masarakamto ti sumaganad a tallo-nga-addang a pagtuladan a naulit iti tunggal balabala: yawis ti panagbibinninglay, isuro ti doktrina, ken yallukoy ti panagsursuro iti pagtaengan. Bayat ti panangisurom, mabalin a pagsusukoten dagiti elemento daytoy a pattern wenno aramiden iti sabali nga urnos. Kas pagarigan, ibilang a ti panangibinglay ket maysa a gundaway a mangisuro iti doktrina, ken ti panangisuro iti doktrina ket nasken a mangiraman kadagiti awis a mangibinglay. Kasta met, a ti panangyallukoy iti panangisuro iti pagtaengan ket mabalin a mapasamak iti unos ti panaglilinnawag iti klase. Palugodan a maaramid a gagangay daytoy a panagbalbaliw, a sursuroten dagiti parikna ti Espiritu tapno maipaay ti kasapulan dagiti tao a sursuruam.

Yawis ti Panagbibinninglay

Kas paset ti tunggal klase, awisem dagiti miembro ti klase a mangibinglay kadagiti nalawag a pannakaammo ken pannakaawat [insights] ken padpadasda iti napalabas a lawas bayat ti panagadalda kadagiti nasantuan a kasuratan nga agmaymaysa ken sangapamiliaan ken panangyaplikar iti no ania ti nasursuroda. Tulongam a makita dagiti miembro ti klase a napateg ti bukodda a panagsursuro iti ruar ti klaseda. Umayto ti bukodda a kumbersion saan laeng a babaen ti panagsursuroda iti Domingo ngem babaen pay kadagiti inaldaw a padasda. No mangngegan dagiti miembro ti klase dagiti padas ti tunggal maysa, ad-adda a maparegtada nga agkalikagum a maaddaan kadagiti kasta met a bukodda a padas.

Saan nga amin ket makabasanto kadagiti kapitulo para iti tunggal adalen, ken adda dagiti makarikna a saanda a komportable a mangibinglay uray dagiti sumagmamano a nakabasan. Siguraduem a marikna ti amin a miembro ti klase a napategda a paset ti klase, adda man wenno awan ti maibinglayda a banag iti adalen.

Isuro ti Doktrina

Nasken nga agpokuska ken dagiti miembro ti klasem iti doktrina—dagiti agnanayon a kinapudno ti ebanghelio—a masarakan kadagiti naituding nga adalen a binatog iti nasantuan a kasuratan. Bayat ti panangilawlawagmo iti doktrina manipud kadagiti nasantuan a kasuratan, ania dagiti bersikulo, adaw, padpadas, saludsod, ken nainayon a resources a mabalinmo nga ibinglay? Kasano a mausarmo dagitoy a resources a makatulong kadagiti miembro ti klase a mangtakuat ken mangawat kadagiti pagbatayan ti ebanghelio? Kasano a maallukoymo dagiti miembro ti klase a mangisurat ken agtignay a mayannurot kadagiti kapanunotan ken impresion a naawatda?

Yallukoy ti Panagsursuro iti Pagtaengan

Iti gibus ti adalen, maaddaan iti kanito a mangsirip iti panaglilinnawag iti sumaruno a lawas. Ibilangmo no kasano a maparegta dagiti miembro ti klase nga agtultuloy nga agsursuro manipud iti Libro ni Mormon iti pagtaengan, agpada nga agmaymaysa ken kadua ti pamiliada.