Panangusar iti Umaykayo, Sumurot Kaniak—Para iti Sunday School

Panagsagana a Mangisuro iti Sunday School

Nasken a maisentro iti panagsursuro iti ebanghelio ti bukod ken sangapamiliaan a panagadal ti pagtaengan. Pudno daytoy kenka ken kadagiti sursuruam. Bayat ti panagsaganam a mangisuro, rugiam babaen dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti panangsukisokmo kadagiti nasantuan a kasuratan ken panagkalikagummo a manggun-od iti inspirasion ti Espiritu Santo.

Umaykayo, Sumurot Kaniak—Para kadagiti Indibidual ken Pamilia ket napateg a paset ti agpada a bukod a panagadal ken ti panagsaganam a mangisuro. Makatulongto kenka daytoy a manggun-od iti naun-uneg a pannakaawat kadagiti pagbatayan iti doktrina a masarakan kadagiti nasantuan a kasuratan. Kabaelamto pay a paregtaen ken awisen dagiti miembro ti klase nga usarenda ti Umaykayo, Sumurot Kaniak—Para kadagiti Indibidual ken Pamilia tapno mapasayaat ti bukod ken sangapamiliaan a panagadalda iti nasantuan a kasuratan (para iti tulong iti panangaramid iti daytoy, kitaen iti “Dagiti Kapanunotan para iti Panangyallukoy iti Bukod ken Sangapamiliaan a Panagadal” iti daytoy a resource). No aramidem, laglagipem nga agbalinka a managrikna kadagiti miembro ti klase a dagiti kasasaadda iti pamilia ket saan a makasuporta iti masansan a sangapamiliaan a panagadal iti nasantuan a kasuratan ken family home evening.

Kabayatan ti panagsaganam, umayto dagiti kapanunotan ken impresion kenka maipapan kadagiti tao a sursuruam, no kasano a bendisionanto dagiti pagbatayan iti nasantuan a kasuratan ti biagda, ken no kasano a maparegtam ida a mangtakuat kadagita a pagbatayan bayat ti panagadalda kadagiti nasantuan a kasuratan para iti bagbagida.

Dagiti Kapanunotan iti Panangisuro

Bayat ti panagsaganam a mangisuro, mabalin a gun-odem ti mainayon a pammaregta babaen ti panagsukisok kadagiti balabala iti daytoy a resource. Saanmo a panunoten a dagitoy a kapanunotan a kas agsasaruno nga addang iti panangiturong no di ketdi kas singsingasing tapno maaddaanka iti bukodmo nga inspirasion. Am-ammom dagiti miembro ti klasem, ket maam-ammomto ida a nasaysayaat kabayatan ti aggigigiddan a panagsursuroyo iti klase. Am-ammo met ida ti Apo, ket Isunto ti mangparegta kenka kadagiti kasayaatan a wagas a pakatulongan a dumur-as dagiti miembro ti klase iti panagsursuro iti ebanghelio nga ar-aramidenda iti pagtaengan.

Adu a dadduma pay a resources ti adda a magun-od nga usarem bayat ti panagsaganam, agraman kadagiti kapanunotan iti Umaykayo, Sumurot Kaniak—Para kadagiti Indibidual ken Pamilia ken dagiti magasin ti Simbaan. Para iti ad-adu pay nga impormasion maipapan kadagitoy ken dadduma pay a resources, kitaen iti benneg a napauluan iti “Dagiti Nainayon a Resources” iti daytoy a resource.

Dagiti Sumagmamano a Banag a Laglagipen

• Ti pagtaengan ti kasayaatan a lugar a pagsursuruan iti ebanghelio. Kas maysa a mannursuro, addaanka iti napateg a responsibilidad a mangsuporta, mangparegta, ken mangpadur-as iti panagsursuro dagiti miembro ti klase iti ebanghelio iti pagtaengan.

• Umun-unegto ti kumbersion dagiti miembro ti klase iti ebanghelio ni Jesucristo bayat ti panangawat ken panangyaplikarda iti pudno a doktrina. Allukoyem ida nga agsurat ken agtignay a mayannurot kadagiti impresion a naawatda manipud iti Espiritu Santo.

• Ti panangisuro ket ad-adda pay ngem iti panag-lecture, ngem ad-adda pay ngem iti panangiturong laeng iti panaglilinnawag. Paset ti akemmo ti mangyallukoy iti pannakiraman a mangpadur-as ken maibatay kadagiti nasantuan a kasuratan. Nasken pay nga ibinglaymo dagiti naparegta a nalawag a pannakaammo ken pannakaawat [insights] a naawatmo bayat ti panagadalmo kadagiti nasantuan a kasuratan.

• Kayat ti Nailangitan nga Ama nga agballigika kas maysa a mannursuro. Impaayannaka iti adu a resources a makatulong kenka, a pakairamanan dagiti teacher council meeting. Kadagitoy a miting mabalinmo ti makiuman kadagiti dadduma pay a mannursuro maipapan kadagiti ania man a karit a mabalin a pakaipasanguam. Mabalinmo pay nga ilawlawag ken yaplikar dagiti pagbatayan iti panangisuro a kas ken ni Cristo.

• Kasayaatan a makasursuro dagiti tao no addaanda kadagiti gundaway a mangisuro. No dadduma, ibilangmo ti panangpalugod kadagiti miembro ti klase, agraman dagiti agtutubo, tapno mangisuro iti maysa a paset ti adalen. Ibataymo daytoy a pangngeddeng kadagiti kasapulan ken kabaelan dagiti miembro ti klase. No awisem ti maysa a miembro ti klase a mangisuro, maaddaanka iti oras a mangtulong kenkuana nga agsagana a nasapsapa babaen ti panangusar kadagiti kapanunotan a masarakan iti daytoy a resource ken iti Umaykayo, Sumurot Kaniak—Para kadagiti Indibidual ken Pamilia. Laglagipem a kas naawagan a mannursuro, sika ti kangrunaan nga akinrebbeng no ania ti maisuro iti klase.

• Iraman daytoy a resource dagiti balabala [outline] iti panangisuro para iti tunggal lawas ti tawen malaksid iti dua a Domingo no maangay ti sapasap a komperensia. Kadagiti Domingo no saan a maangay ti Sunday School gapu iti komperensia iti stake wenno ania man a dadduma pay a gapu, mabalin nga ituloy dagiti pamilia ti panagbasa iti Libro ni Mormon iti pagtaengan a mayannurot iti iskediul a nabalabala iti Umaykayo, Sumurot Kaniak—Para kadagiti Indibidual ken Pamilia. Tapno mapagtalinaed a nakaiskediul ti klasem iti Sunday School, mabalinmo a pilien a laktawan ti maysa nga adalen wenno pagkaduaen ti dua nga adalen. Tapno maliklikan ti pannakatikaw mabalin a tarigagayan dagiti presidente ti Sunday School a mangbalakad kadagiti mannursuro iti Sunday School maipapan kadagitoy a panagbalbaliw iti nasapsapa.