Jab Ankilaō, Ak En Ankilaam̧, jān Harry Anderson

Pāpode 10–16

2 Nipai 6–10

“O Ewi Jon̄an an Ļap Karōk eo an ad Anij!”

Juon wāween eo em̧m̧an n̄an kōpooj eo mak ej katakin ej m̧oktata riiti 2 Nipai 6–10 n̄an eok make. Je jabdewōt im̧we ko kwoj būki, im kōjerbale laajrak eo n̄an pukot ļōmņak ko jet im meļeļe ko n̄an katakin.

Je En̄jake ko Rej Im̧we Eok

Kajjitōk bwe ren Kwaļo̧k

Jekab ekar katakin armej ro an bwe katak ko an Aiseia “remaron̄ barāinwōt ekkar n̄an eok” (2 Nipai 6:5). Komaron̄ jino ilo am̧ kajjitōk ippān ro uwaan kūlaaj eo bwe ren kwaļo̧k jabdewōt katak ko an Jekab ilo 2 Nipai 6–10 ko rej en̄jake remaron̄ ekkar n̄an mour ko aer. Remaron̄ kōmeļeļeiki etke rej lo an katak eo ļap meļeļein.

Katakin Katak ko

2 Nipai 6–8

Irooj ej tūriam̧o̧ n̄an armej ro An im naaj kakūrm̧ool kallim̧ur ko An.

• N̄an leļo̧k jet meļeļe n̄an ennaan eo jān 2 Nipai 6–8, emaron̄ lukkuun jipan̄ ro uwaan kūlaaj eo am̧ n̄an kōm̧m̧ane juon laajrak in iien in m̧akūtkūt ko kar kōmeļeļeiki ilo 2 Nipai 6:8–15. Ta eo m̧akūtkūt kein rej elmakoti kōn Irooj im en̄jake ko An n̄an armej ro An? (barāinwōt lale 2 Nipai 7:1–3; 8:3). Komaron̄ kōmeļeļeiki bwe āinwōt ro uwaan Kabun̄ in, kōj jej armej in bujen an Anij rainin, im jekar aiintok doon jān laļ in n̄an ilowaan kōjparok eo an gospel in. Ta ennaan ko jebta kein ewōr ie n̄an kōj?

2 Nipai 9

Jān Pinmuur eo An, Jisōs Kraist ej bōkļo̧k aolep armej jān mej in kanniōk im jetōb.

• Juon wāween n̄an kam̧wilaļļo̧k ad kam̧oolol kōn Pinmuur eo an Jisōs Kraist ej n̄an ļōmņak kōn ta eo enaaj kar waļo̧k n̄an kōj eļan̄n̄e en kar jab Pinmuur eo. Ro uwaan kūlaaj eo remaron̄ in kejōkļo̧kjeņ kōn men kein ilo aer ekkatak 2 Nipai 9. Komaron̄ kajjitōk ippān ro uwaan kūlaaj eo n̄an jino ekkatak eoon 4–9 im laajrak eo ioon boot eo kōn ta eo enaaj kar waļo̧k eļan̄n̄e en kar jab Pinmuur eo an Kraist. Ekkar n̄an eoon 10–14, ewi wāween an Rilo̧mo̧o̧r eo lo̧mo̧o̧ren kōj jān wāween in ewaļo̧k? Ennaan eo an Elder Jeffrey R. Holland ilo “Kein Jipan̄ ko jet” emaron̄ in jipan̄ ro uwaan kūlaaj eo am̧ meļeļe aikuj eo ad n̄an Pinmuur eo an Jisōs Kraist. Komaron̄ barāinwōt kwaļo̧k pija in alooj eo pedped wōt ioon ennaan eo an—“Where Justice, Love, and Mercy Meet” (ChurchofJesusChrist.org). Ro uwaan kūlaaj eo remaron̄ in kwaļo̧k jabdewōt ļōmņak ak en̄jake ko me ennaan eo an Elder Holland ej im̧we er kōn Rilo̧mo̧o̧r eo.

• Kajjitōk ippān ro uwaan kūlaaj eo n̄an ļōmņak kōn wāween eo remaron̄ kōmeļeļeiki Pinmuur eo an Jisōs Kraist n̄an juon armej eo ejjab jeļā ta meļeļein im etke ej menin aikuj. M̧ool ko rej waļo̧k ilo 2 Nipai 9 emaron̄ jipan̄ kōpooj ro uwaan kūlaaj eo n̄an kain ekōnono in. Bōlen remaron̄ in kappukote eoon 4–12, pukote ewi wāween an Pinmuur eo an Rilo̧mo̧o̧r eo anjo̧ jān mej in kanniōk im jetōb. Pedped wōt ioon ta eo jej ekkatak jān eoon kein, etke katok eo an Rilo̧mo̧o̧r eo kar ņae etan “juon pinmuur ejjeļo̧k jem̧ļo̧kin”? (2 Nipai 9:7).

• Jekab ekar lukkuun bwilōn̄ kōn karōk in pinmuur eo an Anij kōn menin kar tōlļo̧k e bwe en ba “O ļap” āinwōt ekar kōmeļeļeik karōk eo. N̄an jipan̄ ro uwaan kūlaaj eo em̧m̧anļo̧k aer meļeļe en̄jake kein kōn Rilo̧mo̧o̧r eo im Pinmuur eo An, ļōmņak in kajjitōk n̄an lale 2 Nipai 9 kōn kōmeļeļe ko an Jekab (enan̄in aolepāer maron̄ loi ilo eoon 8–20). Ta eo eoon kein rej katakin kōn Anij im karōk eo An? Ta en̄jake ko rekar jipan̄ kōj en̄jake ta eo Jekab ekar en̄jake kōn karōk eo an Anij n̄an ajri ro Nejin? Komaron̄ barāinwōt al juon al kōn ļap eo an Anij, āinwōt “How Great Thou Art” (Hymns, no. 86), n̄an kapenļo̧k ekōnono in.

2 Nipai 9:27–54

Jemaron̄ itok n̄an Kraist im bōk kōjeraam̧m̧an ko raiboojoj an Pinmuur eo An.

• Komaron̄ jino juon ekōnono kōn katak ko an Jekab ilo eoon kein ilo am̧ kajjitōk ippān ro uwaan kūlaaj eo bwe ren kōļmenļo̧kjeņ kōn wāween aer karuwaineneik juon armej bwe en ukweļo̧k im itok n̄an Kraist. Ewi wāween an Jekab kōm̧m̧ane menin ilo 2 Nipai 9:50–53? Ta kōjeraam̧m̧an ko ekar ba renaaj itok n̄an mour ko ad n̄e jenej uwaake naan in karuwainene ko?

• Ilo 2 Nipai 9, Jekab ekar kōjerbale ruo naan ko rekajoor im oktak: “karōk in tūriam̧okake eo an Rikōm̧anm̧an Eļap” im “karōk eo etamkwadik an eo enana” (2 Nipai 9:6, 28). N̄an jipan̄ ro uwaan kūlaaj eo ekkatak jān oktak in, komaron̄ in jin̄aik juon iaļ ioon boot eo im lābōļe Karōk eo an Jemedwōj Ilan̄. Kajjitōk ippān ro uwaan kūlaaj eo n̄an etale 2 Nipai 9:27–52, pukot naan in kapilōk ko Jekab ekar litok n̄an jipan̄ kōj ļoor karōk eo an Jemedwōj Ilan̄. Kajjitōk ippāer n̄an je ta eo rekar loe itōrerein iaļ eo. Ta eo Jekab ekar katakin kōn wāween an Setan aneļo̧k kōj jān karōk eo an Jemedwōj Ilan̄? Ta eo jej ekkatak jān eoon kein kōn ia eo karōk in Jemedwōj Ilan̄ ej tōlļo̧k kōj n̄an im ia Setan enaaj tōlļo̧k kōj n̄ane? (lale 2 Nipai 9:9, 18). Ekkar n̄an eoon kein, ta eo jemaron̄ in kōm̧m̧ane eļapļo̧k ilo ad ļoore karōk eo an Jemedwōj Ilan̄?

• Ilo 2 Nipai 9:28–38, Jekab ekar kakkōļ jet imminene ko im m̧wil ko me rej dāpij kōj jān ļoor karōk eo an Anij n̄an kōj. Ļōmņak im kajjitōk ippān ro uwaan kūlaaj eo n̄an pukoti. Ewi wōt imminene im m̧wil kein āinwōt emakijkij aer waļo̧k rainin? Ta eo ekōm̧m̧an aer lukkuun kauwōtata? Ta eo jej ekkatak jān 2 Nipai 9:50–53 kōn ewi wāween jab po ilo kauwōtata kein?

Kōketak Ekkatak ilo M̧weo

N̄ān jipan̄ ro uwaan kūlaaj eo en̄jake lōke kōn aer riiti jeje ko an Aiseia kar kout jān 2 Nipai 11–24, komaron̄ kōmeļeļeiki bwe Nipai ekar kobaiktok jeje kein n̄an kōkajoorļo̧k tōmak eo an armej ro an ilo Jisōs Kraist. Kajjitōk ippān ro uwaan kūlaaj eo n̄an lale bok ko n̄an riiti wiik eo tok juon āinwōt juon iien em̧m̧an n̄an kalōk tōmak eo aer ilo E.

Kein Jipan̄ ko jet

Ad Aikuji juon Rilo̧mo̧o̧r

Elder Jeffrey R. Holland ekar kwaļo̧k bwebwenato eo kōn juon ritallōn̄ toļ eo ekar ettoto ilo juon eon̄ļo̧k ilo juon to̧ļ ekauwōtata, im ejjeļo̧k juon men ekar maron̄ dāpiji jān an wōtlo̧k im mej. Iien wōt ke lo̧piden pein im addi pein rekar jino pir ioon pok ko ioon eon̄ļo̧k ilo to̧ļ eo, ekar en̄jake an pein ļaddik eo jatin kuul mo̧kjān pein im kanōk lōn̄tak n̄an ijo em̧m̧an. Elder Holland ekar keidi en̄jake eo an ritallōn̄ to̧ļ eo n̄an jekjek ko ad ilo laļ in ebun̄:

“Ekar wōr Adam im Iv ro rekar wōtlo̧k jān Iden, kōn aolep bōd ko me rekar ineeki ippān wōtlo̧k in. … Kōnke raar ļotak tok n̄an laļ in eaar bun̄ im kōnke jenaaj kar bar rubi kien ko an Anij, jej barāinwōt lokjak n̄an ejja kaje ko wōt me Adam im Iv raar jelm̧ai.

“Juon jekjek elukkuun nana! Aolep armej rej wōtlo̧k—aolep em̧m̧aan, kōrā, im ajri rej aolep iien epaakeļo̧k mej eo ilo kanniōk indeeo, aolep iien epaakeļo̧k en̄taan ilo jetōb n̄an indeeo. Ej ta eo meļeļe in mour in ke? En̄in ej tōprak eo āliktata an jeļā an armej? Jej ke aolep baj ettoto ilo juon canyon em̧ōļo ilo juon jikin ilo juon laļ eoktak, kajjojo iaad jej pukōt juon kein jipan̄ edik, kajjojo iaad jej pukot juon men n̄an dāpdep n̄ane—kōn ejjeļo̧k bōtaab en̄jake pok an wererļo̧k ium̧win addin peid, ejjeļo̧k men n̄an lo̧mo̧o̧ren kōj, ejjeļo̧k men n̄an dāpiji, im em̧ool ejjeļo̧k men n̄an jibwe kōj? …

“Uwaak eo n̄an kajjitōk kein ej juon eo alikkar im indeeo jab! … Pinmuur [eo] enaaj kar kadedeļo̧k anjo̧ ioon mej in kanniōk, ilo ejjeļo̧k kalijōkļo̧k letok jerkakpeje n̄an aolep armej eo ekar ļo̧taktok ak naaj ļo̧taktok n̄an laļ in. Kōn tūriiam̧o kake eo enaaj barāinwōt letok jeorļo̧k bōd n̄an jerawiwi ko an juon armej make im aolep, jān Adam n̄an jem̧ļo̧kin laļ, ekkar n̄an ukweļo̧k im pokake n̄an kien ko rekwojarjar” (“Where Justice, Love, and Mercy Meet,” Ensign ak Liahona, May 2015, 105–6).

Kōkōm̧anm̧anļo̧k Ad Katakin

Kōmajikji am̧ kwaļo̧k naan in kam̧ool eo am̧. Kam̧ool eo am̧ eļam waan, em̧ool kōn m̧ool eo emaron̄ ewōr an kareel ekajoor ioon ro kwoj katakin. Ejjab aikuj in kōjerbal naan ko rem̧m̧an ak raitok. Ļōmņak im kwaļo̧k kam̧ool eo am̧ make kōn Rilo̧mo̧o̧r eo ilo am̧ ekōnono 2 Nipai 9.