Adam im Iv, jān Douglas Fryer

Pāpode 3–9

2 Nipai 1–5

“Kōm ar Mour ilo juon Wāween Elemōņōņō”

Jino m̧aanjabpopo eo am̧ ilo jetōb ilo riiti 2 Nipai 1–5 im je en̄jake ko rej im̧we eok. Elōn̄ļo̧k pedped in katak ko ilo jebta kein jān am̧ iien n̄an kōnono ilo juon kūlaaj, kōn menin ļoor Jetōb eo ilo am̧ m̧aanjabpopo im lukkuun ron̄jake ļōmņak ko ro uwaan kūlaaj eo rej kwaļo̧ki n̄an jipan̄ eok ļōm̧ake pedped in katak ta n̄an pedped wōt ioon im ewi wāween tōl ekōnono eo.

Je En̄jake ko Rej Im̧we Eok

Kajjitōk bwe ren Kwaļo̧k

Ej āinwōt bwe ro uwaan kūlaaj eo am̧ rekar kōkkaļļeiki ak je juon noot kōn diktata in juon eoon ilo 2 Nipai 1–5. N̄an jino kūlaaj eo, komaron̄ kajjitōk ippān ro uwaan kūlaaj eo bwe ren kwaļo̧k kōn eoon ko eļap meļeļeir n̄an er. Kajjitōk ippān kūlaaj eo n̄an kwaļo̧k ilo tukaduin juon pedped in katak rekar ekkatak jān eoon ko rekar kwaļo̧k kaki.

Katakin Katak ko

2 Nipai 2:11–30

Jej anemkwoj n̄an m̧akūtkūt n̄an kōj make.

• Emakijkij an, armej ro kōjerbal anemkwoj in kālet eo aer n̄an kōm̧m̧an eļapļo̧k en̄taan n̄an ro jet. Kōn menin etke anemkwoj elukkuun aorōk n̄an Jemedwōj Ilan̄? Bōlen komaron̄ in je kajjitōk in ioon boot eo, im ro uwaan kūlaaj eo remaron̄ in pukōt uwaak ko ilo 2 Nipai 2:11–30 im je uwaak ko aer ioon boot eo. Ewi wāween an rikapo eo kajjieon̄ in kakkure anemkwoj eo ad? Ewi wāween an Rilo̧mo̧o̧r eo jipan̄ kōj “kāālet anemkwōj im mour indeeo”? (2 Nipai 2:27). Ļōmņak in al ippān doon juon al kōn anemkwoj, āinwōt “Know This, That Every Soul Is Free” (Hymns, no. 240), im kajjitōk ippān ro uwaan kūlaaj eo bwe ren kobaikļo̧k n̄an laajrak eo aer ta ko rekar bōki jān al eo.

• Unin tōl eo an wiik in ilo Itok, Ļoor Eō—N̄an kajjojo armej im Baam̧le ko kalikkar emān jekjek ko raorōk me rej letok anemkwoj. En̄in ej juon wāween komaron̄ in kālōk ioon ta eo ro uwaan kūlaaj remaron̄ ekkatak ilo m̧weo: Je emān jekjek ko ioon boot eo. Innām kajjitōk ippān ro uwaan kūlaaj eo bwe ren kwaļo̧k ennaan kein jān 2 Nipai 2 ko me rej katakin etke jekjek kein raorōk n̄an tōpar aorōk eo ad ekwojarjar.

2 Nipai 2:15–29

Wōtlo̧k eo im Pinmuur eo an Jisōs Kraist rej m̧ōttan ko raorōk an karōk eo an Jemedwōj Ilan̄.

• Elōn̄ Rikūrijin ro rej tōmak bwe Wōtlo̧k eo ekar juon jerata im bwe Iv ekar kōm̧m̧ane juon bōd enana. Eoon kein ilo 2 Nipai 2 rej kalikkarļo̧k m̧ool ko kōn Wōtlo̧k eo an Adam im Iv, im rej kam̧ool bwe Jisōs Kraist ej pinmuuri kōj jān Wōtlo̧k eo. Juon wāween n̄an ekōnono kake ļōmņak kein ej kajjitōk ippān ro uwaan kūlaaj eo n̄an etale 2 Nipai 2:15–25 im kōm̧m̧ane juon laajrak in m̧ool ko rekar ekkatak kōn ta eo ekar waļo̧k ilo Jikin Kallib Eden. Ta ļōmņak ko jet rej loi ilo kout eo jān Būreejtōn Dallin H. Oaks ilo “Kein Jipan̄ ko jet”? Ewi wāween an kar Jisōs Kraist pinmuuri kōj jān Wōtlo̧k eo? (lale 2 Nipai 2:6–8, 26–29).

• Ālkin kōm̧m̧ane juon ikkure āinwōt eo m̧oktaļo̧k, komaron̄ kwaļo̧k jejjo kajjitōk ko ālkin wōt im kajjitōk ippān ro uwaan kūlaaj eo bwe ren kwaļo̧k ļōmņak ko aer.

  • Ewi wāween an katak ko an Liai ilo eoon kein kajim̧we jet iaan jameļeļe ko kōn Wōtlo̧k eo?

  • Ilo wāween rot Wōtlo̧k eo ej juon kōjeraam̧m̧an?

  • Ewi wāween an jim̧we meļeļe kōn Wōtlo̧k eo jipan̄ kōj meļeļeļo̧k aikuj ko ad kōn Jisōs Kraist im Pinmuur eo An?

  • Ta juon iaan un ko kwoj kam̧oolol kōn kālet eo an Adam im Iv ilo Jikin Kallib Iden?

  • Ewi wāween an kālet in am̧ n̄an itok n̄an laļ in āinwōt kālet eo an Adam im Iv n̄an bōk m̧ōttan leen wōjke in jeļā em̧m̧an im nana?

  • Ta unleplep eo an mour in? Etke Wōtlo̧k eo ekar menin aikuj n̄an bōk unleplep in?

2 Nipai 4:15–35

Jemaron̄ oktakļo̧k n̄an Anij ilo mōjņo̧ ko ad.

• Jeje ko an Nipai ilo 2 Nipai 4:15–35 remaron̄ bōktok n̄an kōj kōjatdikdik im kaenōm̧m̧an n̄e jej en̄jake ad eddodo kōn en̄taan ko ad im mōjņo̧ ko. Bōlen ro uwaan kūlaaj eo remaron̄ in etale eoon kein ilo ruo iaan ruo im pukot eoon ko me remaron̄ kōjerbali n̄an kaenōm̧m̧an juon armej eo ej en̄jake eddodo jān an en̄taan. Innām kajjojo m̧ōttā rein remaron̄ kwaļo̧k eoon kein ippān kūlaaj eo. Bōlen juon armej ilo kūlaaj eo emaron̄ in kwaļo̧k juon an en̄jake ilo wāween an kar loe kaenōm̧m̧an ilo an kar oktakļo̧k n̄an Anij, āinwōt Nipai ekar kōm̧m̧ane.

• Bar juon wāween n̄an etale 2 Nipai 4 maron̄ kajjitōk ippān jet iaan ro uwaan kūlaaj eo m̧okta jān iien eo im pojaktok n̄an an kwaļo̧k eoon ko im naan ko jān jebta in rekar ļap meļeļeier n̄an er. Kajjitōk ippāer n̄an kwaļo̧k ta eo rej kōm̧m̧ane n̄e rej en̄jake eddodo jān mōjņo̧ ko aer. Juon al kōn aenōm̧m̧an im kōjatdikdik, āinwōt “Where Can I Turn for Peace?” (Hymns, no. 129), maron̄ kobaiktok n̄an ekōnono in. N̄an waanjon̄ak, ro uwaan kūlaaj eo remaron̄ kwaļo̧k ewi wāween an al eo kapenļo̧k waanjon̄ak eo an Nipai ilo an pedped wōt ioon Irooj ilo iien ko rekabwerer.

2 Nipai 5

Lem̧ōņōņō ej waļo̧k ilo mour kōn gospel eo.

• Men̄e apan̄ ko Nipai im armej ro an rekar jelm̧ai, rekar maron̄ kalōk juon jukjukin pād eo ekar pedped wōt ioon pedped in katak ko rej tōlļo̧k n̄an lem̧ōņōņō. Ta pedped in katak ko ro uwaan kūlaaj eo rej loe ilo ekkatak ko aer ilo 2 Nipai 5 ko me rej jipan̄ļo̧k lem̧ōņōņō eo RiNipai ro rekar en̄jake? Komaron̄ in kōpooje juon peba n̄an ro uwaan kūlaaj eo im kajjitōk ippāer n̄an etale 2 Nipai 5 n̄an pedped in katak ko me rej tōlļo̧k n̄an lem̧ōņōņō im je. Ewi wāween an wāween ko an laļ in kappukot lem̧ōņōņō oktak jān ta eo jej loe ilo 2 Nipai 5? Ta kōttōbar ko ro uwaan kūlaaj eo remaron̄ in kōm̧m̧ani n̄an kōjerbali pedped in katak kein?

Kōketak Ekkatak ilo M̧weo

Jiron̄ļo̧k ro uwaan kūlaaj eo bwe 2 Nipai 6–10 ej juon iaan kwaļo̧k ko rem̧m̧an kōn Pinmuur eo an Jisōs Kraist ilo aolep jeje ko rekwojarjar. Komaron̄ in barāinwōt kwaļo̧ke juon eoon kwaar loe ilo jebta kein eo me kwoj m̧ōņōņō in riiti.

Kein Jipan̄ ko jet

Wōtlo̧k eo ekar m̧ōttan wōt karōk eo an Anij.

Būreejtōn Dallin H. Oaks ekar katakin:

“Ke Adam im Iv rekar bōk kien eo im̧aantata, rekar pād wōt ium̧win juon tōre eoktak, ejako aer pād ilo laļ eo an jetōb ak kiiō kōn ānbwinin kanniōk ak rejjab maron̄ mej im ejjeļo̧k aer maron̄ neji. Rekar jab maron̄ kakūrm̧ool kien eo kein kajuon an Jemed ilo aer jab rube likjab ko ikōtaan m̧ōņōņō eo elikio ilo Jikin Kallib in Iden im kapo ko renana im iien ko rem̧m̧an an mour in. …

“… Rikanaan Liai ekar kōmeļeļeiki bwe ‘n̄e Adam eaar jab bōd en kar jab wōtlo̧k’ (2 Ni. 2:22), ak enaaj kar pād wōt ilo ejja nememe eo ilo iien eo kar kōm̧anm̧an e.

“… Wōtlo̧k eo kar karōke, Liai ekar ba, kōnke ‘aolep men kar kōm̧anm̧an ilo ļoļātāt an Eo ejeļā men otemjeļo̧k’ (2 Ni. 2:24).

“Ekar Iv eo ekar m̧oktata rube jon̄ak ko an Iden bwe en maron̄ jino jekjek ko an mour in. An m̧akūtkūt, jabdewōt piktok ko an, ekar juon bōd eutiej juon aiboojoj ejjeļo̧k jem̧ļo̧kin im emenin aikuj n̄an kōjem̧ eo ej tōlļo̧k n̄an mour indeeo. Adam ekar kwaļo̧k māletlet eo an jān an kōm̧m̧an ejja wāween eo wōt. Im āindein Iv im ‘Adam raar wōtlo̧k bwe armej ren kar āinwōt’ (2 Ni. 2:25).

“Jet Rikūrijin rej kōraate Iv kōn m̧akūtkūt eo an, kwaļo̧k ke bwe e im leddik ro nejin rekar ilo jet wāween lo ruweer kōn menin. Ejjab Armej ro Rekwojarjar! Kar letok kōn revelesōn, jej kōjeraam̧m̧an m̧akūtkūt eo an Iv im kautiej māletlet eo an im an peran ilo m̧ōttan in eļap ņae etan Wōtlo̧k eo. …

“Revelesōn eo ekāāl ej kwaļo̧k bwe ro jined im jemed m̧okta rekar meļeļe aikuj eo n̄an Wōtlo̧k eo. Adam ekar ba, ‘En jeraam̧m̧an etan Anij, bwe kōnke bōd eo aō māj ko meja repeļļo̧k, im ilo mour in inaaj lan̄lōn̄, im bar juon alen ilo kanniōk inaaj lo Anij’ (Moses 5:10)” (“The Great Plan of Happiness,” Ensign, Nov. 1993, 72–73).

Kōkōm̧anm̧anļo̧k Ad Katakin

Pukotļo̧k ro rejjab pād. Katakin ej eļapļo̧k jān tōl juon iien ekōnono ilo Jabōt, ebōk jerbal in karejar kōn iakwe im kōjeraam̧m̧an ro jet kōn gospel eo. Bōlen komaron̄ ļōmņak kōn juon eo ejjab pād im leļo̧k n̄an e juon karuwainene ejeno̧lo̧k n̄an bōk koņaan ilo katak eo tok juon. (Lale Teaching in the Savior’s Way, 8–9.)