13–19 Epril. Mosaea 1–3: ‘Fulap long Lav long God mo long Evri Man’” Kam Folem Mi—Blong Sandei Skul: Buk blong Momon 2020 (2020)
13–19 Epril. Mosaea 1–3,” Kam Folem Mi—Blong Sandei Skul: 2020
Minerva K. Teichert (1888–1976), Toktok blong King Benjamin blong Talem Tata, 1935, oel long mesonaet, 36 x 48 inj. Brigham Yang Yunivesiti Miusiom blong Art
13–19 Epril.
Mosaea 1–3
“Fulap long Lav long God mo long Evri Man”
I gat plante prinsipol long Mosaea 1–3 we yu save toktok raon long olgeta wetem klas blong yu. Prea blong Spirit i lidim yu blong yu save wijwan prinsipol nao bae i gat moa mining long olgeta we yu stap tijim.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Blong givim wan janis long ol memba blong klas blong oli tokbaot stadi blong olgetawan, o famli stadi blong olgeta abaot Mosaea 1–3, invaetem olgeta blong serem wetem wan narawan, wan ves we oli bin faenem se i givim insperesen long olgeta.
Stap Tijim Doktrin
Blong kasem toktok blong God, i nidim blong yu rere.
-
Wan wei blong statem wan storian insaed long klas abaot fasin blong rere blong kasem toktok blong God, hem i blong tokbaot ol risal blong stap rere—o blong no stap rere—from ol nara samting. Eksampol, taem ol memba blong klas oli save serem ol eksperiens blong olgeta long hao oli stap rere, o taem oli no stap rere i mekem se oli gat wan eksperiens long skul, o wok, o sam nara aktiviti. Afta we oli serem hemia, yu save invaetem nara haf blong klas blong ridim Mosaea 2:1–9, mo lukaotem ol samting we ol pipol blong King Benjamin oli bin rere from blong save kasem toktok blong God. Nara haf i save luklukgud insaed long ol sem ves, mo oli lukaotem wanem we King Benjamin i bin mekem we i soem hao hem i bin filim abaot ol toktok blong God, mo nid ia blong hem i mas serem ol toktok ia. Afta, askem wanwan grup blong serem ol tingting blong olgeta. ?Wanem yumi stap lanem aot long ol ves ia we i save helpem yumi blong kasem toktok blong God?
Taem yumi stap wok blong ol narafala man, yumi stap wok tu blong God.
-
King Benjamin i bin wan gudfala eksampol blong wan wokman blong God mo long olgeta we oli stap raon long hem. ?Wanem nao ol memba blong klas blong yu oli lanem aot long hem we bae i helpem olgeta long ol traehad blong olgeta blong stap wok blong ol narafala man? Tingting blong statem storian taem yu askem ol memba blong klas blong raetemdaon ol samting we i stap blokem ol pipol taem oli givim seves long ol narafala man—ol risen from wanem yumi no givim seves, o ol risen from wanem seves blong yumi i no helpem tumas man. Afta, oli save stadi long Mosaea 2:10–26 mo mekem wan lis blong ol trutok we King Benjamin i tijim abaot fasin blong givim seves long ol narawan, we i save helpem olgeta blong winim ol samting we i stap blokem olgeta, olsem we i stap long lis. ?Wanem nao wanwan man, woman mo famli i save mekem blong lukluk nomo blong givim seves long evri dei laef blong olgeta? Tingting blong serem stori we i kam long Presiden Thomas S. Monson we i stap long “Sam Moa Risos,” hemia olsem wan tingting.
-
Wan hym olsem “A Poor Wayfaring Man of Grief” (Hymns, namba 29) o wan vidio olsem “The Old Shoemaker” (olfala man blong mekem sus” (ChurchofJesusChrist.org) i save kam sapotem mesej we i stap long Mosaea 2:17—taem yumi stap wok blong ol narafala man, yumi stap wok blong God. ?Olsem wanem nao yu save yusum ol risos olsem blong sapotem mesej blong King Benjamin? Maet ol memba blong klas oli save serem ol eksperiens we oli bin gat taem oli go givim seves long ol narafala man, o taem oli kasem wan seves we i olsem hemia blong Kraes. Olsem pat blong storian blong yufala, tingting blong serem toktok ia we i kam long Henry B. Eyring: “Taem yumi givhan long eniwan, Sevya i filim olsem se yumi go blong givhan long Hem” (“Is Not This the Fast That I Have Chosen?” Ensign o Liahona, Mei 2015, 22). ?From wanem nao yu ting se yumi stap givim seves long God taem yumi stap givim seves long ol narafala pipol?
Blong givim seves long ol narafala man i helpem yumi blong filim lav blong God.
Hapines i kam taem yumi stap obei long ol komanmen blong God.
-
Blong helpem ol memba blong klas blong “tingting long ol blesing mo hapines blong olgeta we oli stap obei long olgeta komanmen blong God,” maet bae i help blong stat wetem mining blong hapines. ?Olsem wanem nao ol memba blong klas oli talem mining blong hapines we i kam taem man i obei long God? Maet oli save tingting se oli gat wan fren we i talem se hem i hapi iven sapos hem i no stap obei long olgeta komanmen. Invaetem olgeta blong ridim Mosaea 2:38–41 mo toktok raon long olsem wanem nao oli save helpem fren blong olgeta blong oli andastanem wanem i defren bitwin hapines blong wol ia mo hapines we i no save finis. ?Wanem eksperiens o eksampol we i kamaot long laef blong ol pipol we ol memba blong klas oli save serem we i wan eksampol blong hapines we i no save finis?
Fasin blong sevem man i kam nomo “tru long nem blong Kraes, we i Lod.”
-
Mesej blong King Benjamin i tekem ol profesi we oli gat paoa mo oli tokbaot gud taem we bae Jisas Kraes i bon, seves blong Hem, mo sakrifaes blong Hem we i pem praes. Yu save askem ol memba blong klas blong oli serem, aot long ol ves long Mosaea 3:1–20 we i bin tajem olgeta bigwan mo i bin helpem olgeta blong andastanem Sevya mo misin blong Hem. Askem olgeta blong serem from wanem ol ves ia i bin tajem olgeta bigwan.
-
Pat ia, Fas Toktok long Buk blong Momon i stap tijim se buk ia i “soem plan blong fasin blong sevem man. Blong helpem ol memba blong klas blong luk hao toktok blong King Benjamin i help blong mekem stamba tingting ia blong Buk blong Momon i kamtru, raetem long bod Jisas Kraes I Mekem se I Posibol blong Gat Fasin blong Sevem Man. Ol memba blong klas oli save luklukbak long Mosaea 3:1–20, mo afta, yu o olgeta, oli save listimdaon ol trutok we oli lanem abaot plan blong fasin blong sevem man. Askem ol memba blong klas wanem oli lanem abaot hao Jisas Kraes i mekem plan blong fasin blong sevem man i posibol. Afta, givim taem long ol memba blong klas blong oli luklukbak long Mosaea 3:18–19 mo serem wanem we yumi mas mekem blong kam ol sent mo blong Lod i sevem yumi. ?Olsem wanem nao Atonmen blong Jisas Kraes i save helpem yumi blong yumi mekem i kamtru? Askem ol memba blong klas blong serem ol filing blong olgeta abaot rol blong Sevya long plan blong fasin blong sevem man.
Stap Leftemap Tingting blong Lanem Samting long Hom
?Ol memba blong klas blong yu oli eva gat wan eksperiens we, taem oli bin tijim wan doktrin long wan toktok, lesen, o skripja, doktrin ia i bin jenisim fasin blong olgeta? Talem long olgeta se long Mosaea 4–6 oli stap rid abaot ol bigfala jenis we ol trutok ia we King Benjamin i bin tijim, i mekem long ol pipol blong hem.
Sam Moa Risos
Givim seves long ol narawan.
Presiden Thomas S. Monson i bin talem:
“Sam yia i pas, mi bin ridim wan atikol we i kam long Jack McConnell, MD. Hem i bin groap long ol hil long Saot Wes Vijinia long Yunaeted Stet, olsem wan long ol seven pikinini blong wan Metodis minista mo wan mama we i stap long haos nomo. Laef blong olgeta i simpol nomo. Hem i tokbaot se long taem we hem i smol pikinini, evri dei, taem famli i sidaon raon long tebol blong kakae, bae papa blong hem i askem wan afta wan, ‘Wanem nao yu bin mekem blong wan tedei?’ Ol pikinini oli gat strong tingting blong mekem wan gud samting evri dei blong mekem se oli save givim wan gud ripot i go long papa blong olgeta, se oli bin helpem wan. Dokta McConnell i singaotem se, fasin ia, i wanem we i moa gud we papa blong olgeta i livim long olgeta, from se samting ia mo ol toktok ia oli bin givim insperesen long hem mo ol brata mo sista blong hem blong stap helpem ol narafala man truaot long laef blong olgeta. Taem oli bin stap groap mo oli gat tingting, wanem i pusum olgeta blong givim seves i jenis, i kam olsem wan filing dip insaed we oli wantem helpem ol narawan.
“Long saed blong gudfala helt wok blong Dokta McConnell … hem i bin krietem wan oganaesesen we hem i singaotem, Volunteers in Medicine (Ol Dokta Volontia), we i givim janis long ol dokta we oli ritae blong save givim fri seves long ol klinik mo wok blong givim seves long olgeta we oli no gat helt insurens. Dokta McConnell i bin talem se, gudfala taem blong hem i spel long hem, stat long taem we hem i stop blong wok, i bin ‘go lus long 60 aoa blong wok we oli no pem hem, be mak blong paoa blong hem i go antap, mo hem i filim wan glad long laef blong hem we i no bin stap bifo.’ [Jack McConnell, “And What Did You Do for Someone Today?” Newsweek, 18 Jun 2001, 13.] …
“Yes, yumi evriwan i no save kam olsem Dokta McConnell, blong stanemap ol helt klinik blong helpem olgeta we oli pua; be nid blong ol narawan oli stap tu, mo wanwan long yumi i save mekem wan samting blong helpem wan narawan. …
“Ol brata mo sista blong mi, raon long yumi, i gat fulap long olgeta ia we oli nidim help blong yumi, gudfala toktok blong yumi, sapot blong yumi, kamfot blong yumi, mo kaen fasin blong yumi—hemia long ol memba blong famli, ol fren, olgeta we yumi save olgeta, o ol strenja. Yumi ol han blong Lod long wol ia, wetem komanmen blong givim seves mo blong leftemap ol pikinini blong Hem. Hem i stap dipen long wanwan long yumi. … Bae yumi askem kwestin ia long yumiwan, kwestin we Dokta Jack McConnell mo ol brata mo sista blong hem oli stap rere blong harem evri naet long taem blong kakae: ‘?Wanem nao mi mekem blong wan tedei?’” (“What Have I Done for Someone Today?” Ensign o Liahona, Nov. 2009, 84–87).
Stap Kam Antap long Fasin blong Yumi blong Stap Tij
Stap wan tul blong Spirit. Stamba tingting blong yu, olsem wan tija, i no blong mekem wan presentesen, be i blong helpem ol narawan blong kasem Tabu Spirit we i lidim olgeta—Tabu Spirit we i tru tija. (Luk long Teaching in the Savior’s Way, 10.)