Kraes mo Olgeta Aposol, i kam long Del Parson

30 Maj–12 Epril

Ista

“Bae Hem I Girap long Ded, wetem Paoa blong Hiling long Ol Wing blong Hem”

Ista Sandei i wan gudfala janis blong ol memba blong klas blong mekem testemoni blong wanwan long olgeta abaot Jisas Kraes mo Taem we Hem i Laef Bakegen long Ded, i kam moa strong. Kipim hemia i stap long maen blong yu taem yu stap stadi long ol skripja blong rere from lesen ia. Lukaotem blong spirit i lidim yu abaot wanem nao bae i tajem hat blong ol pipol insaed long klas blong yu.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Ol memba blong klas blong yu, maet oli bin gat ol eksperiens we oli gat mining ova long ol las tu wik we oli stap ridim wanem we Buk blong Momon i stap tijim olgeta abaot Laef Bakegen long Ded mo Atonmen blong Jisas Kraes. Givim olgeta sam minit blong oli faenem wan skripja we i bin tajem olgeta bigwan, mo afta, invaetem olgeta blong serem wanem we oli bin faenem.

Stap Tijim Doktrin

2 Nifae 9:7–15; Alma 11:41–45; 40:21–23

Laef bakegen long Ded, hem i taem we bodi mo spirit, tufala i joen tugeta bakegen we bae tufala i nomo seperet bakegen.

• Fasin blong komperem samting i wan wei we i wok gud blong stap tijim olgeta prinsipol blong gospel. Mebi yu save invaetem ol memba blong klas blong ridim 2 Nifae 9:7–15 mo Alma 11:41–45 mo faenemaot ol toktok mo ol sentens long ol ves ia we oli stap tij abaot laef bakegen long ded. ?Oli komperem ded long wanem? ?Olsem wanem nao oli tokbaot ded? ?From wanem nao yumi nidim wan bodi we i laef bakegen long ded? (Luk tu long D&K93:33–34). Ol memba blong klas oli save toktok raon long hao oli save yusum fasin blong komperem samting blong tijim wan narawan abaot laef bakegen long ded. Taem oli stap serem ol aedia blong olgeta wetem klas, yu save toktok raon wetem olgeta long from wanem nao oli tekem se ol trutok ia abaot Laef Bakegen long Ded oli impoten tumas.

• Tingting blong invaetem ol memba blong klas blong serem ol taem we oli bin filim se oli glad tumas from save blong olgeta abaot Laef Bakegen long Ded. ?Olsem wanem save ia i save lidim gud laef blong yumi oltaem? Yu save helpem ol memba blong klas blong ansarem kwestin ia taem yu invaetem wanwan long olgeta blong luklukgud insaed long 2 Nifae 9:7–15; Alma 11:41–45; o Alma 40:21–23 mo listimdaon long bod ol trutok we oli faenem abaot Laef Bakegen long Ded. Afta, yu save raetem antap long bod tufala sentens ia mo askem ol memba blong klas blong tingting hevi blong sam minit bifo oli serem olsem wanem bae oli komplitim ol sentens ia: Sapos mi no bin save olgeta samting ia… mo From se mi save olgeta samting ia….

Getsemane, i kam long Michael T. Malm

Mosaea 3:5–7; 15:5–9; Alma 7:11–13

Jisas Kraes i tekem long Hemwan ol sin blong yumi, ol sobodi blong yumi, mo ol samting we yumi slak long olgeta.

• Blong stap tingting hevi mo stap toktok raon long safaring blong Sevya long bihaf blong yumi, i save invaetem Spirit, mo i save givim ol filing blong lav mo tangkyu long Sevya. Blong leftemap fasin blong tingting hevi mo toktok raon long hemia, yu save droem wan jat long bod, semmak long hemia we oli tokbaot insaed long Aotlaen blong wik ia insaed long Kam Folem Mi—Blong Wanwan Man, Woman mo Famli mo invaetem ol memba blong klas blong komplitim jat ia mo yusum Mosaea 3:5–7; 15:5–9; mo Alma 7:11–13 mo eksperiens blong olgetawan bakegen. Olsem we Spirit i talem long yu, yu save invaetem ol memba blong klas blong serem ol filing blong olgeta abaot wanem Jisas Kraes i bin mekem blong olgeta.

• Wan tabu miusik i save invaetem Spirit mo i save kam sapotem doktrin ia we yu stap tijim. Maet ol memba blong klas oli save luklukbak long Mosaea 3:5–7; 15:5–9; mo Alma 7:11–13 mo oli save faenem mo singsing long ol hym we oli filim se oli go wetem ol mesej we oli stap long ol ves ia( mo tu, yu save invaetem wan blong singsing o plei ol hym ia). Skripja indeks long en blong hymbuk i save help tu, mo i gat sam hym we oli putum i stap long “Sam Moa Risos.” Leftemap tingting blong ol memba blong klas blong serem ol sentens blong ol hym mo ol skripja we i stap helpem olgeta blong stap glad moa bigwan long sakrifaes blong Sevya.

Inos 1:1–19; Mosaea 5:1–2; 27:8–28:4; Alma 24:7–19

Atonmen blong Jisas Kraes i save klinim yumi, mo helpem yumi blong kam stret evriwan.

• Wan wei we i wok blong lanem abaot paoa blong Sevya blong jenisim laef blong yumi, hem i blong stadi long ol eksampol blong hao nao Hem i bin jenisim laef blong ol narawan taem oli bin sakem sin mo oli go long Hem. Buk blong Momon i gat fulap long ol eksampol ia: Maet yu save givim wok long wanwan memba blong klas blong ridim abaot wan long ol eksampol ia, olsem Inos (luk long Inos 1:1–19), ol pipol blong King Benjamin (luk long Mosaea 5:1–2), Yangfala Alma (luk long Mosaea 27:8–28:4), o Ol Antae-Nifae-Lihae (luk long Alma 24:7–19), o, oli save tingting long sam nara eksampol we oli stap long ol skripja. Afta, sam long ol memba blong klas oli save talem eksperiens blong olgeta abaot riding blong olgeta long wan sot toktok. Maet bae klas blong yu i glad blong mekem hemia sapos yu givim sam tingting blong helpem nara haf blong klas blong faenem huia nao oli stap tokbaot. Oli save toktok raon tu long ol kwestin olsem: ?Olsem wanem nao ol pipol long ol eksampol ia oli bin jenis? ?Wanem nao rol blong Sevya taem oli bin jenisim laef blong olgeta? Maet samfala memba blong klas oli save tokbaot olsem wanem nao Sevya i bin wokem wan “bigfala jenis … insaed long hat blong [olgeta]” (Mosaea 5:2). Blong lanem moa abaot hao Sevya i stap jenisim laef blong yumi—mo from wanem jenis ia i impoten tumas—yu save serem wetem klas wanem we Presiden Dallin H. Oaks i komperem long atikol we oli listim anda long “Sam Moa Risos.”

Stap Leftemap Tingting blong Lanem Samting long Hom

Blong givim insperesen long ol memba blong klas blong ridim Mosaea 1–3, yu save invaetem olgeta blong tingting long wan taem we oli bin filim blong wantem glad tumas afta we oli ridim o harem wan mesej blong gospel. Invaetem olgeta blong lukaotem ol trutok we oli save stap glad long olgeta taem oli stap ridim Mosaea 1–3.

Sam Moa Risos

Ol hym abaot Atonmen blong Sevya.

• “I Believe in Christ,” Hymns, namba 134

• “Mi Save Ridima Hem I Laef,” STSP, pej 38

• “Thy Will, O Lord, Be Done,” Hymns, namba 188

• “That Easter Morn,” Hymns, namba 198

Ol vidio blong Tabenakol Kwaea long Tempol Skwea we oli stap singsing sam long ol hym ia, oli stap long intanet long ChurchofJesusChrist.org

Analoji: Yumi mas kam moa bitim blong stap klin.

Presiden Dallin H. Oaks i bin serem wan tok blong komperem samting blong eksplenem olsem wanem nao Sevya i stap mekem yumi rere blong gobak long ples we God i stap long hem.

“Yumi stap gat fasin blong tingting long ol risal blong fasin blong sakem sin, se i olsem se i stap klinim yumi nomo long sin, be hemia i no ful samting we i stap. … Wan we i mekem sin, i olsem wan tri we i stap benben isi taem win i blo. Long wan dei we i gat fulap win o fulap ren, tri ia bae i benben i go tajem graon gogo mekem se lif blong hem i kam doti wetem sofmad, semmak olsem sin. Sapos yumi stap lukluk blong stap klinim lif nomo, wanem we i no strong long stamba o branj blong tri ia we i mekem se i save benben i go kasem graon mo i mekem lif i doti, hemia i stap nomo. Semmak, wan we i stap sore nomo from se sin i mekem hem i doti, nao bae i mekem sin bakegen taem we win i blo strong bakegen. Kaen fasin ia blong stap ripitim sin bae i gohed kasem taem tri ia i kam strong moa.

“Taem wan i gotru long rod ia we i mekem wanem we skripja i singaotem ‘wan hat we i fulap long sore mo wan spirit we i wantem sakem sin,’ nao Sevya i mekem moa bitim blong stap klinim man o woman ia long sin. Hem i givim hem wan niu paoa. Fasin ia blong kam strong moa, i nid blong mas gat blong yumi luksave stamba tingting blong kam klin, we i blong gobak long Papa long Heven. Blong Hem i akseptem yumi long ples blong Hem, yumi mas mekem moa bitim blong kam klin nomo. Yumi mas jenisim yumi tu, yumi nomo stap wan we i no strong long fasin mo i stap mekem sin, be yumi kam wan we i stap strong wetem wan spirit bodi ia we i save stap long ples we God i stap long hem” (“The Atonement and Faith,” Ensign, Epril 2010, 33–34).

Stap Kam Antap long Fasin blong Yumi blong Stap Tij

Laef long wan laef we i klin inaf blong Spirit i save lidim yumi. Taem yu laef folem gospel, yu yu inaf blong gat Spirit i stap olsem kompanion blong yu, we Hem nao i ril tija. Taem yu stap lukaotem blong Hem i lidim yu, Tabu Spirit bae i givim yu ol tingting mo ol filing abaot hao blong lukluk long ol nid ia blong olgeta we yu stap tijim olgeta. (Luk long Teaching in the Savior’s Way, 5.)