Inos, taem hem i yangfala boe, wetem papa blong hem, Jekob, mo mama blong hem

Jekob mo Inos, i kam long Scott Snow

23–29 Maj

Inos–Ol Toktok blong Momon

Hem I Wok Tru long Mi blong Mekem Samting we Hem I Wantem

Blong rere blong tij, ridim Inos–Ol Toktok blong Momon mo krietem wan plan blong tij (luk long Teaching in the Savior’s Way, 19). Ol tingting mo ol doktrin insaed long aotlaen ia i save help blong givim sam aedia long yu.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Blong givim wan janis long ol memba blong klas blong oli serem wanem we oli stap lanem insaed long hom, yu save serem olgeta i go long grup, mo givim wok long wanwan grup blong ridim wan long ol japta we i stap long Inos–Ol Toktok blong Momon. Askem olgeta blong serem samfala ves blong japta ia we oli filim se klas i mas toktok raon long olgeta. Raetemdaon ol ves ia long bod, mo jusum samfala blong toktok raon long olgeta.

tijing pikja bokis

Stap Tijim Doktrin

Inos 1:1–17

Yumi save kasem fogivnes from ol sin blong yumi taem yumi praktisim fet blong yumi long Jisas Kraes.

• Hemia samfala kwestin we yu save invaetem ol memba blong klas blong tingting hevi mo toktok raon, taem oli stap stadi, long Inos 1:1–17: ?Wanem nao yumi lanem aot long eksperiens blong Inos abaot fasin blong kam klin aot long ol sin? ?Olsem wanem Inos i soemaot fet we Hem i gat long Jisas Kraes? ?Olsem wanem eksperiens ia i tajem Inos, mo wei we hem i stap lukluk hemwan mo ol narawan?

Inos 1:4–17

Prea we i kam long hat blong yumi, bambae God i ansarem olgeta.

• Blong helpem ol memba blong klas blong go moa dip long hao oli andastanem prea, yu save serem olgeta i go long ol smol grup, mo givim wok long wanwan grup blong stadi wan long ol skripja ia we i stap long Inos 1: ol ves 2–8, 9–11, o 12–17. Afta, askem wanwan grup blong tijim haf blong klas abaot wan samting we oli bin lanem abaot prea aot long ol ves we oli gat wok blong stadi long ol. Eksampol, yu save invaetem olgeta blong oli serem ol toktok mo ol sentens we i tokbaot olsem wanem nao Inos i bin prea.

• Antap long wanem we oli lanem abaot hao Inos i bin prea, yumi save lanem plante tu aot long wanem Inos i bin prea from. Maet ol memba blong klas oli save faenem hu, o wanem nao, Inos i bin prea from long Inos 1:4–17. Folem ol ves ia, ?from wanem Inos i bin wantem blong prea from ol narawan? ?Wanem narafala trutok abaot prea yumi stap lanem aot long Inos?

Jerom–Omnae

Sapos yumi stap obei long olgeta komanmen, bambae yumi kam antap gud.

• Jerom mo olgeta we oli bin raetem buk blong Omnae, oli bin raet abaot nesen blong Ol Man blong Nifae, be mesej blong olgeta i go tu long wanwan man mo woman. ?Wanem nao yumi lanem aot long ol buk blong Jerom mo Omnae long saed blong stret mo gud fasin we i lidim man blong kam antap long laef? (Eksampol, luk long Jerom 1:7–12 mo Omnae 1:5–7, 12–18). I save helpem ol memba blong klas blong talem mining blong fasin blong kam antap gud, mo yusum wan diksonari sapos i posibol, mo olgeta skripja (eksampol, luk long Alma 37:13; 48:15). ?Olsem wanem nao oli komperem mining we i kam long wol, mo mining we i kam long Lod? ?Olsem wanem nao yumi bin luk Lod i stap helpem ol pipol blong hem blong kam antap gud long laef blong olgeta?

• Semmak olsem we Ol Man blong Nifae oli bin wok wetem strong tingting blong tijim olgeta komanmen long ol pipol, ol profet blong Lata-dei tu, oli stap tijim yumi abaot ol komanmen. Afta we oli ridim Jerom 1:9–12, ol memba blong klas oli save toktok raon long ol las tijing blong ol lida blong Jos we i bin givim insperesen long olgeta blong obei long olgeta komanmen. I save help blong ol memba blong klas oli luklukbak long ol las mesej blong konfrens insaed long ol magasin blong Jos, o insaed long Gospel Laebri ap. O oli save luklukbak long ol standet we oli tokbaot insaed long Blong Ol Yut Oli Kam Strong. Sapos i nid, yu save gobak i go long lis blong ol mesej insaed long “Sam Moa Risos.” ?Olsem wanem fasin blong stap obei long olgeta komanmen i save helpem yumi blong “kam antap gud” insaed long laef blong yumi?

Omnae

Lod i tekem plante pipol i go long graon blong promes.

• Buk blong Momon i tekem wan histri we i gat fulap defren kaen samting long hem, mo blong stap folfolem ol defren grup blong ol pipol, samtaem hem i had. Wan wei blong lanem abaot wanwan long ol pipol ia insaed long Buk blong Momon, hem i blong krietem wan jat antap long bod mo invaetem klas blong fulumap jat ia wetem ol infomesen abaot wanwan long ol grup blong pipol ia (olsem Ol Man blong Nifae, Ol Man blong Leman, mo ol pipol blong Sarahemla). Eksampol, jat ia i save gat olgeta heding ia: Nem blong Grup, Wetaem mo Olsem Wanem oli kasem ples, mo Wanem i bin hapen long olgeta. Tugeta, toktok raon long from wanem nao hem i help blong andastanem ol samting we yu bin lanem abaot wanwan grup. Olgeta toktok ia insaed long Gaed long Ol Skripja (ChurchofJesusChrist.org) oli save help: “Koriantuma,” “Jared, Ol Man blong,” “Leman, Ol Man blong,” “Myulek,” “Nifae, Ol Man blong,” mo “Sarahemla.”

Ol Toktok blong Momon 1:1–8

God bambae i wok tru long yumi sapos yumi folem wanem Hem i talem yumi blong mekem.

• Olsem pat blong toktok raon long Ol Toktok blong Momon, yu save invaetem wan memba blong klas blong kam we hem i rere blong serem from wanem nao Momon i bin gat insperesen blong putum ol smol buk blong histri (1 Nifae kasem Omnae) insaed long Buk blong Momon. Memba blong klas ia, i save rere taem hem i ridim Ol Toktok blong Momon mo ol nara risos, olsem Doktrin mo Ol Kavenan 10:8–19, 39–45; aotlaen blong wik ia insaed long Kam Folem Mi—Blong Wanwan Man, Woman mo Famli; mo japta 5 blong Ol Sent, buk 1. Leftemap tingting blong ol memba blong klas blong ridim tu ol ditel blong hao ol 116 pej we oli raetem blong Buk blong Momon oli lus, mo from wanem i bin nid blong putum ol smol buk blong histri blong tekem ples blong ol pej ia we oli lus. ?Wanem trutok nao ol memba blong klas oli lanem aot long hemia long saed blong hao Lod i stap wok tru long man? ?Wanem nao ol memba blong klas oli faenem insaed long Ol Toktok blong Momon 1:1–8 we i givim olgeta insperesen blong folem daereksen we i kam long God iven we oli no andastanem fulwan ol risen blong hem?

  Momon i putum tugeta ol buk we oli wokem long gol

  Momon I Stap Putum Tugeta Ol Buk, i kam long Jorge Cocco

• Momon i bin blesem plante milian laef from se hem i bin folem ol toktok blong Spirit abaot ol smol buk blong histri (luk long Ol Toktok blong Momon 1:7). Tingting abaot sam wei we yu save helpem ol memba blong klas blong yu blong andastanem se oli save blesem ol narawan taem oli stap lukaotem blong stap olsem ol tul long han blong God mo folem ol toktok blong Tabu Spirit. ?Olsem wanem nao God i wok tru long Momon? ?Wanem nao ol memba blong klas oli bin luk we Lod i bin mekem tru long olgeta, o tru long ol narafala pipol taem oli bin mekem folem Spirit i talem mo oli bin wantem blong mekem tingting blong God? Stori abaot Presiden Thomas S. Monson we i stap long “Sam Moa Risos” i givim wan eksampol we i save helpem ol memba blong klas blong tingting long ol eksampol blong stret laef blong olgeta bakegen.

stap lanem samting pikja bokis

Stap Leftemap Tingting blong Lanem Samting long Hom

From se tufala tugeta, jeneral konfrens mo Ista, tufala i stap kam antap long ol nekis wik we i stap kam, leftemap tingting blong ol memba blong klas blong lisin long ol mesej we ol memba blong Fas Presidensi mo Kworom blong Olgeta Twelef Aposol oli stap serem spesel witnes blong olgeta abaot Jisas Kraes.

risos pikja bokis

Sam Moa Risos

Ol vidio blong Buk blong Momon abaot Inos.

Faenem ol vidio, we i soem ol stori we oli stap long buk blong Inos insaed long ol vidio blong Buk blong Momon long ChurchofJesusChrist.org o insaed long Gospel Laebri ap.

Ol mesej blong jeneral konfrens abaot fasin blong stap obei long ol komanmen.

• Thomas S. Monson, “Obei Ol Komanmen,” Ensign o https://www.ChurchofJesusChrist.org/general-conference/2015/10/keep-the-commandments?lang=bis, Okt. 2015

• Dieter F. Uchtdorf, “Stap Laef Folem Gospel Wetem Glad,” Ensign o https://www.ChurchofJesusChrist.org/general-conference/2014/10/living-the-gospel-joyful?lang=bis, Okt. 2014

• Dallin H. Oaks, “I No Gat Narafala God,” Ensign o https://www.ChurchofJesusChrist.org/general-conference/2013/10/no-other-gods?lang=bis, Okt. 2013

“Sekem han blong evri pikinini.”

Taem we Presiden Thomas S. Monson i bin stap olsem wan memba blong Kworom blong Olgeta Twelef Aposol, hem i bin givim wan toktok long wan kam tugeta blong ol pikinini blong Praemeri long wan vilej blong Samoa. Afta long hemia, Spirit i talem long hem se bae hem i mas seken han blong wanwan long ol 247 pikinini we oli bin kam long tetaem ia. Be, hem i bin luksave se bae hem i no gat taem; hem i traem blong mekem tingting ia blong sekhan long ol pikinini i kamaot long maen blong hem, be hem i no save.

Nao, hem i tanem hem i go long tija blong ol pikinini, mo talem: “Mi wantem tumas blong sekhan long wanwan boe mo gel. ?Hemia bae i posibol?

Tija i smael mo i toktok long ol pikinini long lanwis blong Samoa. Oli seksekem hed blong olgeta blong talem yes, mo oli glad tumas from. Nao tija i talem long Elda Monson se taem hem i harem se wan long Olgeta Twelef bae i visitim Samoa, hem i bin promesem ol pikinini se, sapos oli prea wetem hat blong olgeta mo wetem fet, bae Elda Monson i visitim vilej blong olgeta mo bae Spirit i talem long hem blong hem i mas sekhan long evri pikinini (luk long Thomas S. Monson, “Friend to Friend: Talofa Lava,” Friend, May 1972, 12–13).