Kraes I Stap Tijim Ol Disaepol blong Hem, i kam long Justin Kunz

2–8 Maj

2 Nifae 31–33

“Hemia I Rod”

Taem yu stap stadi long 2 Nifae 31–33, gat ol memba blong klas blong yu i stap long maen blong yu, mo tingting long wanem eksperiens nao maet oli save gat wetem ol trutok we Nifae i bin tijim. ?Olsem wanem yu save invaetem olgeta blong tijim, long wanwan long olgeta, wanem oli bin lanem mo wanem oli bin filim abaot ol doktrin ia?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

?I gat eniwan insaed long klas blong yu we i bin gat wan eksperiens we i gat mining long wik ia wetem wan long ol olsem we i stap long Sam Tingting blong Stadi long Kam Folem Mi—Blong Wanwan Man, Woman mo Famli? Givim janis long memba blong oli serem eksperiens blong olgeta.

Stap Tijim Doktrin

2 Nifae 31–32

Jisas Kraes mo doktrin blong Hem i wan wei ia nomo we i go kasem laef we i no save finis.

• Maet bae i gud blong klas blong yu blong luk olsem wanem nao fet, fasin blong sakem sin, baptaes, presen we i Tabu Spirit, mo blong stap strong kasem en i joen long wanwan long olgeta mo Atonmen blong Jisas Kraes. Blong mekem hemia, yu save droem wan rod antap long bod mo invaetem ol memba blong klas blong raetem folem rod ia, samfala prinsipol we oli faenem insaed long 2 Nifae 31. Wanwan memba blong klas i save jusum wan long ol prinsipol ia mo luklukgud insaed long 2 Nifae 31–32 blong faenem wan samting we Nifae i bin tijim abaot prinsipol ia. Afta, oli save serem wetem wanwan long olgeta wanem we oli bin faenem, mo toktok raon long hao hemia i helpem olgeta blong andastanem gud moa ol prinsipol ia. ?Olsem wanem nao we taem yumi stap laef folem ol prinsipol ia, i tekem ol blesing blong Atonmen blong Jisas Kraes i kam insaed long laef blong yumi?

• ?Olsem wanem nao yu statem wan toktok raon long klia mo simpol toktok blong Nifae taem hem i tokbaot “rod” blong fasin blong sevem man? (2 Nifae 31:21). Mebi yu save askem ol memba blong klas wanem bae oli talem sapos oli gat 60 seken nomo blong eksplenem long wan wanem hem i mas mekem blong kasem fasin blong sevem man. Afta, ol memba blong klas oli save rid tru long 2 Nifae 31–32, mo lukaotem ol toktok we i save help. ?Wanem yumi stap lanem aot long ol japta ia abaot stamba rol blong Sevya insaed long fasin o rod ia blong sevem yumi? Ol toktok ia insaed long “Sam Moa Risos” oli save helpem storian ia.

• Samtaem, yumi luk ol prinsipol blong gospel olsem se oli wan mo seperet, be long ril laef, oli joen tugeta. Blong helpem ol memba blong klas blong luk olsem wanem nao ol prinsipol insaed long 2 Nifae 31 oli joen tugeta, invaetem ol memba blong klas blong ridim, olgetawan o long ol smol grup, ol ves 4–21, mo droem wan daegram we i soem olsem wanem fet long Kraes, fasin blong sakem sin, baptaes, presen we i Tabu Spirit, mo fasin blong stap strong kasem en, oli stap bildimap wanwan long yumi, oli tokbaot wanwan long yumi, mo ol narafala samting moa. Leftemap tingting blong olgeta blong oli yusum tingting blong olgeta mo krietem wan samting. Taem oli stap serem daegram blong olgeta wetem klas, askem olgeta blong serem wanem oli bin lanem abaot ol prinsipol ia. ?Olsem wanem nao yumi save yusum ol defren samting ia insaed long evri dei laef blong yumi?

2 Nifae 31:15–20

“Hem we i stap strong kasem en, semfala man ia bae hem i sevem.”

• Ol memba blong klas ia, ?oli andastanem o no wanem i minim blong stap strong kasem en? Hemia i wan aktiviti we i save help. Raetem antap long bod ?Olsem wanem nao mi save sapos mi mi stap strong kasem en? Afta, yu save invaetem ol memba blong klas blong luklukgud long 2 Nifae 31:15–20 blong faenem samfala ansa long kwestin ia. Askem ol memba blong klas blong raetem, antap long bod, eni toktok o sentens we oli faenem, we i save help. ?From wanem nao, blong stap strong kasem en, i wan stamba pat blong doktrin blong Kraes? Mo tu, yu save serem toktok blong Elda Dieter F. Uchtdorf we i stap long “Sam Moa Risos”, o toktok ia abaot fasin blong stap strong kasem en we i stap long pej 6 blong Prijim Gospel blong Mi.

• ?Ol memba blong klas oli save eniwan we i wan eksampol blong fasin blong stap strong kasem en? ?Wanem nao i helpem man o woman ia blong “wokbaot i go wetem strong bilif long Kraes”? (ves 20). Tingting blong serem ol stori abaot ol nara pipol we oli tokbaot olgeta long ol skripja we oli bin stap strong kasem en.

2 Nifae 32:1–6

Tabu Spirit bae i soemaot long yumi wanem nao yumi mas mekem.

• Long 2 Nifae 32, Nifae i tokbaot wan wari we hem i bin luksave se ol pipol blong hem oli bin gat long saed blong fasin blong stap praktisim doktrin blong Kraes. Yu save invaetem ol memba blong klas blong lukaotem wari ia long 2 Nifae 32:1, mo afta, ridim ansa blong Nifae long 2 Nifae 32:2–6. ?Olsem wanem nao ol memba blong klas bae oli talem wetem ol toktok blong olgetawan, wanem we Nifae i bin tijim? ?Wanem eksperiens nao ol memba blong klas oli bin gat wetem Tabu Spirit, o olsem wanem nao ol toktok blong Kraes oli bin soem olgeta wanem oli nidim blong mekem?

2 Nifae 33

Buk blong Momon i winim tingting blong yumi blong mas biliv long Kraes.

• Nifae i bin hop se ol toktok blong hem bae i save winim tingting blong yumi blong “mekem gud fasin [mo] biliv long [Kraes]” (2 Nifae 33:4). ?Wanem skripja o stori long Fas mo Seken Nifae i bin winim tingting blong yumi blong mekem gud fasin mo stap biliv long Kraes? Tingting blong faenem sam hym we klas blong yu i save singsing o lisin long hem blong sapotem ol mesej ia; singsing o lisin long ol hym olsem “I Believe in Christ” o “Have I Done Any Good?” (Hymns, namba 134, 223).

Stap Leftemap Tingting blong Lanem Samting long Hom

Wan wei blong givim insperesen long ol memba blong klas blong stadi long Jekob 1–4 long nekis wik, hem i blong eksplenem se long ol japta ia, bambae oli faenem ol woning blong Jekob abaot tufala sin ia we i kamaot plante long taem blong yumi tedei.

Sam Moa Risos

Doktrin blong Kraes.

Elda Jeffrey R. Holland i tijim: “’Doktrin blong Kraes’ olsem we Nifae i bin tijim long bigfala toktok blong hem, i lukluk nomo long fet long Lod Jisas Kraes, fasin blong sakem sin, baptaes andanit long wota, kasem presen we i Tabu Spirit, mo stap strong kasem en. Long toktok ia, hem i no traem blong tokbaot ful plan blong fasin blong sevem man, evri gud fasin blong wan laef we i stret mo gud, o ol praes we i stap wet long yumi long ol defdefren digri blong glori long heven. Long toktok ia, hem i no tokbaot ol ofis blong prishud, ol odinens blong tempol, o plante narafala tru doktrin. Evriwan ia oli impoten, be olsem we oli yusum insaed long Buk blong Momon, ‘doktrin blong Kraes’ hem i simpol mo i tok stret. Hem i lukluk nomo long ol fasfala prinsipol blong gospel, mo i leftemap tingting blong stap strong kasem en, blong gogohed, mo blong go fored. Hem i tru we, from se ‘doktrin blong Kraes’ i klia gud mo i simpol nao, i mekem se i hem i wok” (Christ and the New Covenant: The Messianic Message of the Book of Mormon [1997], 49–50).

Elda D. Todd Christofferson i talem: “Mi singaot mo askem long evriwan … blong lukaot, tru long prea mo stadi blong ol skripja, blong kasem wan witnes se Jisas Kraes i gat tabu fasin, Hem i mekem Atonmen, mo Hem i laef bakegen long ded. Akseptem doktrin blong Hem taem yu sakem sin, yu kasem baptaes, taem yu kasem presen we i Tabu Spirit, mo afta, taem we truaot long laef blong yu, yu stap folem ol loa mo ol kavenan blong gospel blong Jisas Kraes” (“The Doctrine of Christ,” Ensign o Liahona, May 2012, 89).

Stap strong kasem en.

Elda Dieter F. Uchtdorf i eksplenem:

“Taem mi wan yang boe, ‘stap strong kasem en,’ long mi, hem i minim nao se mi mas traehad moa blong stap wekap kasem en blong ol Jos miting blong yumi. Afta, taem mi kam bigwan smol … wetem fasin blong andastanem man, mi jes luk nao olsem wanem hem i go wetem ol traehad blong ol olfala memba blong mifala blong stap hang i stap kasem en blong laef blong olgeta. …

“ … Blong stap strong kasem en, i no jes blong akseptem nomo ol had situesen blong laef, mo ‘stap hang o wet i stap’ long ples ia. Relijin blong yumi, i wan relijin we i laef; hem i stap helpem ol pikinini blong God folem rod ia we i stret o i no isi, blong stap developem ful paoa blong yumi long laef ia, mo gobak long Hem wan dei. Taem yumi lukluk long wei ia, blong stap strong kasem en i wan samting we i mekem yu glad bigwan mo i gat glori long en, be i no mekem samting i no naes mo i no gat glad long hem. Hemia i wan relijin blong stap glad, i wan relijin we i givim hop, paoa mo i mekem yu yu fri. …

“Blong stap strong kasem en, i minim blong ‘tingting blong [yumi] i longfala blong mekem ol stret fasin’ (Rom 2:7), blong yumi obei ol komanmen (luk long 2 Nifae 31:10), mo blong mekem ol stret mo gud wok (luk long D&K 59:23)” (“Have We Not Reason to Rejoice?” Ensign o Liahona, Nov. 2007, 20).

Stap Kam Antap long Fasin blong Yumi blong Stap Tij

Yumi stap lan tugeta. Olsem wan tija, yu stap mekem moa bitim we blong jes givimaot infomesen—yu stap lanem samting wetem klas blong yu. Serem wetem olgeta wanem nao yu stap mekem blong lanem samting aot long ol skripja.