Stori olsem Parabol blong Olif Tri, i kam long Brad Teare

16–22 Maj

Jekob 5–7

“Lod I Stap Wok Wetem Yumi”

Blong stat blong rere long saed blong spirit, ridim Jekob 5–7 yuwan mo wetem famli blong yu. ?Wanem nao yu bin lanem we bae i helpem gud olgeta ia we yu stap tijim? Aotlaen ia i save givim yu sam moa aedia.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

?Wanem nao ol memba blong klas oli bin faenem insaed long Jekob 5–7 we i bin givim insperesen long olgeta blong “wok long plantesen” ia we oli stap laef long hem? (Jekob 5:15).

Stap Tijim Doktrin

Jekob 5

Lod i stap invaetem olgeta wokman blong Hem blong wok wetem hem insaed long plantesen blong Hem.

• From se stori olsem parabol blong ol olif tri i longwan mo i had blong andastanem, yu save mekem se klas i wok tugeta blong krietem wan sot lukluk long stori ia we i olsem parabol. Eksampol, yu save droem ol stamba samting blong stori olsem parabol ia antap long bod, o yu save krietem wan taem laen blong ol samting we i bin hapen (eksampol, luk long daegram we i stap long en blong aotlaen ia). Ol memba blong klas oli save ademap ol skripja refrens ia, o samting we i tokbaot i go long droing ia, mo toktok raon long wanem nao sam long ol saen ia oli save minim, olsem olif tri we i no wael mo hemia we i wael, Lod blong plantesen, wokman, mo gudfala mo nogud frut. Long taem blong toktok raon long ol samting ia, luklukbak long ol ves 61–75, we i tokbaot wok blong Lod long taem blong yumi tedei. ?Olsem wanem nao yumi stap wok insaed long plantesen blong Lod? ?Olsem wanem nao ol ves ia oli go wetem wok we yumi stap mekem?

• Ol toktok blong “Lod blong plantesen” i save givim kamfot long ol papa mo mama we oli gat ol pikinini we oli mestem rod. Eksampol, ?wanem nao Jekob 5:41, 46–47 i stap talem abaot wei we Papa blong yumi we i stap long Heven i stap filim abaot ol pikinini blong Hem we oli stap mestem rod? ?Olsem wanem nao Hem i stap traem blong sevem olgeta? (luk long ol ves 61–75).

• Jekob 5:61–75 i stap tijim se Lod i stap long saed blong ol wokman blong hem insaed long plantesen blong Hem. Ol memba blong klas oli save ridim olgeta ves ia insaed long ol smol grup, mo toktok raon long ol eksperiens we i bin soem olgeta se Lod i stap wok wetem ol wokman blong Hem blong muvum wok blong Hem i go fored. ?Wanem sam moa niu samting we ol memba blong klas oli ademap we i kamaot long mesej blong Presiden Henry B. Eyring “The Lord Leads His Church”? (Ensign o Liahona, Nov. 2017, 81–84).

  

  Yumi save wok wetem “Lod blong plantesen” long ples ia, long wol ia.

Jekob 6:3–13

Lod, wetem lav mo sore, i tingbaot ol pipol blong Hem.

• Kam Folem Mi—Blong Wanwan Man, Woman mo Famli i stap invaetem yumi blong luklukgud insaed long Jekob 6:3–5 blong faenem ol mesej we Jekob i wantem tokbaot bigwan, mo afta, faenem olgeta mesej ia bakegen insaed long stori olsem parabol blong ol olif tri (luk long Jekob 5). Maet ol memba blong klas bae oli save lanem samting sapos oli harem olgeta we oli bin mekem aktiviti ia, o sapos oli mekem aktiviti ia long taem blong klas. Oli save raetem long bod ol trutok blong gospel we oli faenem insaed long Jekob 6. Afta, anda long wanwan trutok, oli save raetemdaon ol ves we oli kamaot long stori olsem parabol insaed long Jekob 5 we i pasem mesej ia. ?Olsem wanem nao ol memba blong klas oli bin luk ol semfala mesej ia oli kamtru insaed long laef blong olgeta?

• Wan mining blong toktok ia stap tru hem i blong hang strong long wan samting, holem i stap kolosap, mo no muvmuv. Maet yu wantem serem mining ia wetem klas blong yu, mo askem wanem tingting mining ia i stap givim long olgeta abaot Jekob 6:5.

Jekob 7:1–23

Yumi save stanap strong taem ol narafala pipol oli jalenjem bilif blong yumi.

• Plante long yumi i fesem fasin blong agens long fet blong yumi semmak olsem we Jekob i bin fesem taem hem i mitim Serem. Wan wei blong helpem ol memba blong klas blong rere long kaen fasin ia blong agens, hem i blong oli luklukgud insaed long Jekob 7:1–23 blong faenem olgeta prinsipol we i bin helpem Jekob blong stanap strong. ?Wanem nara eksampol blong stanap strong long bilif blong yumi nao yumi save serem—aot long ol skripja, aot long famli histri blong yumi, aot long stret laef blong yumiwan bakegen? Maet i gat olgeta mesej we i kam long ol lida blong Jos we oli bin helpem yumi taem we ol narawan oli bin lukaot blong seksekem yumi aot long bilif blong yumi (eksampol, luk long toktok blong Elda Quentin L. Cook, “Stap Strong long Testemoni Abaot Jisas,” Ensign o www.ChurchofJesusChrist.org/languages/bis/content/general-conference/2016/10/valiant-in-the-testimony-of-jesus , Okt 2016.) Leftemap tingting blong ol memba blong klas blong serem ol mesej we oli faenem se i bin helpem olgeta.

• Taem Jekob i bin fesem Serem, Serem i bin hop blong seksekem Jekob i aot long bilif blong hem, be fet blong Jekob i no seksek (luk long Jekob 7:5). Maet bae ol memba blong klas oli glad blong aktem toktok bitwin Jekob mo Serem, mo yusum Jekob 7:1–23 olsem plei rol blong olgeta. ?Wanem yumi stap lanem aot long ol ves ia abaot ol teknik mo tijing blong olgeta we oli stap agensem wok blong God? ?Wanem yumi stap lanem aot long Jekob long saed blong fasin blong no stap seksek mo aot long bilif blong yumi ?

Jekob 7:24–25

Yumi save trastem God.

• Ol Man blong Nifae, oltaem nomo oli stap laef wetem ol toktok blong faet we i kam long Ol Man blong Leman. Nomata we yumi no fesem evri dei toktok se bae i gat faet, ?wanem denja long saed blong spirit nao yumi stap fesem? ?Wanem nao yumi lanem aot long ansa blong Ol Man blong Nifae from situesen blong olgeta we oli tokbaot insaed long Jekob 7:24–25? Maet bae yu wantem singsing o ridim, mo afta, toktok raon long ol hym blong Jos we i yusum ol faet olsem ol pikja toktok, olsem “Onward, Christian Soldiers” o “Behold! A Royal Army” (Hymns, namba 246, 251).

Stap Leftemap Tingting blong Lanem Samting long Hom

Blong leftemap tingting blong ol memba blong klas blong ridim buk blong Inos, talem long olgeta se buk ia i save tijim olgeta olsem wanem blong mekem prea blong olgeta i gat moa mining.

Stap Kam Antap long Fasin blong Yumi blong Stap Tij

Mekem tijing blong yu i lukluk nomo long doktrin. Mekemsua se ol storian blong yufala insaed long klas i lukluk nomo long fandesen doktrin ia insaed long ol skripja. Yu save mekem hemia taem yu askem ol memba blong klas blong ridim ol skripja, mo afta, serem ol trutok we oli bin faenem, mo tu, ol eksperiens blong olgeta blong laef folem ol trutok ia. (Luk long Teaching in the Savior’s Way, 20–21.)