“9–15 Maj Jekob 1–4 Febwari. ‘Yufala I Stretem Yufala Wetem God tru long Atonmen blong Kraes’” Kam Folem Mi—Blong Sandei Skul: Buk blong Momon 2020 (2020)
“9–15 Maj. Jekob 1–4,” Kam Folem Mi—Blong Sandei Skul: 2020
Mi Fogivim Yu, i kam long Greg K. Olsen
9–15 Maj
Jekob 1–4
Yufala I Stretem Yufala wetem God tru long Atonmen blong Kraes
Jekob 1–4 i tekem plante tijing we i go wetem taem blong yumi tedei. Taem yu stap ridim ol japta ia, tingting long olsem wanem nao bae yu helpem olgeta we yu stap tijim blong oli laef folem doktrin we Jekob i stap tijim.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Blong helpem ol memba blong klas blong serem ol niu aedia blong olgeta long saed blong Jekob 1–4, yu save pasem ol smol pis pepa, mo invaetem ol memba blong klas blong raetemdaon wan skripja refrens we i kamaot long ol japta ia mo oli faenem se i gat mining long olgeta. Putum ol pis pepa ia insaed long wan smol kontena, pikimap sam, mo invaetem ol pipol we oli bin raetem ol refrens ia blong oli serem niu tingting blong olgeta.
Stap Tijim Doktrin
Jekob 1:6–8, 15–19; 2:1–11; 4:18
Ol stret mo gud lida oli wok wetem strong tingting blong gudlaef blong sol blong ol pipol.
-
Yu save statem storian insaed long klas abaot ol bigfala wok blong Jekob long medel blong ol pipol blong hem taem yu askem ol memba blong klas blong oli serem ol eksperiens blong olgeta long wan taem we oli bin gat blesing tru long seves blong wan lida blong Jos. O tingting blong askem wan lokol lida blong Jos—blong bifo o blong tedei—blong i tokbaot wan taem we hem i bin kasem insperesen blong go givim seves long wan. Afta, ol memba blong klas oli save faenem ol toktok o ol sentens insaed long Jekob 1:6–8, 15–19; 2:1–11; mo 4:18 we i save help blong andastanem olsem wanem Jekob i bin filim abaot koling blong hem mo ol pipol we hem i bin stap givim seves long olgeta. ?Long wanem wei nao yumi bin luk ol lida blong yumi oli stap wok strong long ol koling blong olgeta? ?Wanem nao ol ves ia oli stap talem long yumi abaot wei we, yumi, yumi sapos blong sastenem ol lida blong yumi?
Olsem Jekob, ol lida blong Jos, tedei, oli stap “wok strong blong Lod insaed long ol ofis blong olgeta.”
Yu mas stap longwe long fasin blong gat hae tingting, mo yumi go aot helpem olgeta we oli stap long nid.
-
Lod i gat ol strong woning we Hem i givim long Ol Man blong Nifae long saed blong hae tingting. Blong help blong statem storian insaed long klas abaot topik ia, bifo long klas, yu save kontaktem sam memba blong klas mo askem olgeta blong lukaotem sam wei we enemi i stap leftemap lav blong ol rij samting insaed long wol blong yumi tedei. Afta, invaetem sam blong serem long klas wanem we oli bin faenem. Ol memba blong klas oli save wok tutu blong ridim Jekob 2:12–21 mo faenem wanem we Lod i bin tijim abaot wei we yumi sapos blong lukluk ol rij samting blong wol. Afta, oli save droem o krietem wan posta we i tokbaot prinsipol ia. Givim taem long ol memba blong klas blong oli tingting hevi olgetawan long wanem oli save mekem blong praktisim wanem we oli bin lanem aot long mesej blong Jekob.
-
Ol memba blong klas blong yu oli save luklukbak long Jekob 2:12–21 mo raetemdaon kwestin blong olgetawan blong ademap long lis blong Elda Peri. ?Wanem nao toktok blong Elda Peri we i stap long “Sam Moa Risos” i save ademap blong yumi andastanem ol tijing blong Jekob?
Lod i laekem taem man i stap klin.
-
Elda David A. Bednar i tijim se “yumi stap laef “long wan wol we i gohed moa blong jikim fasin blong krietem laef mo daonem praes blong laef blong man” (“We Believe in Being Chaste,” Ensign or Liahona, May 2013, 41–44). ?Olsem wanem nao yu save helpem ol memba blong klas blong yusum Jekob 2:23–35 blong wok agensem ol mesej blong wol long saed blong jastiti? Wan wei blong mekem hemia i blong raetem long bod: ?Wanem nao filing blong Lod long saed blong jastiti?, mo invaetem ol memba blong klas blong oli faenem ansa blong kwestin ia. Sam long olgeta oli save lukluktru long Jekob 2:23–35, mo ol narawan oli save lukluktru long toktok blong Elda Bednar we refrens blong hem oli givim i stap antap. Oli save raetem long bod ol ansa we oli faenem. Blong toktok raon long ol standet mo ol blesing we oli kam wetem fasin blong stap laef folem loa blong jastiti, yu save luklukbak long “Fasin blong Stap Klin long Saed blong Seks” (Blong Ol Yut Oli Kam Strong 35–37) o, soem wan long ol vidio we oli stap long lis anda long “Sam Moa Risos.” ?Wanem nao ol blesing blong stap laef long wan laef we i klin long saed blong seks?
Ol Man blong Nifae oli bin biliv long Jisas Kraes.
-
Jekob i bin wanem yumi blong save se, nomata we hem mo ol pipol blong hem oli bin laef plante handred yia bifo we Sevya i kam mekem seves blong Hem long wol, be oli bin save Hem finis, mo oli bin stap lukluk long Hem finis blong Hem i sevem olgeta. Folem Jekob 4:4–5, ?from wanem nao Ol Man blong Nifae oli bin stap obei long loa blong Moses? ?Wanem nao yumi gat long taem blong yumi tedei we i stap poenem sol blong yumi i go long Sevya? ?Wanem simbol, saen o samting we i semmak we Jekob i bin yusum blong tij abaot Jisas Kraes? (luk tu long Jenesis 22:1–13).
Mi save stap longwe long fasin blong stap blaen long saed blong spirit taem mi lukluk nomo i go long Sevya.
-
?I gat eniwan insaed long klas we i go mekem jekap blong ae i no longtaem i pas? Sapos i gat, yu save askem hem blong tokbaot olsem wanem dokta i jekem se ae blong hem i wok gud o no. Maet ol memba blong klas oli save serem se, long olgeta, i minim wanem blong stap blaen long saed blong spirit. ?Olsem wanem nao we taem yumi blaen long saed blong spirit, i semmak long taem ae blong bodi blong yumi i blaen? Invaetem ol memba blong klas blong oli givim sam wei we yumi save yusum blong jekem se yumi blaen long saed blong spirit o no. Oli save luklukbak tu long Jekob 4:8–18 mo givim sam tingting long wanem yumi save mekem blong kam antap long paoa blong yumi blong save “lukluk” ol samting long saed blong spirit.
-
Elda Quentin L. Cook i givim aotlaen blong fofala wei we ol pipol oli save lukluk “i go i bitim mak” long taem blong yumi tedei (luk long “Sam Moa Risos”). ?Ol toktok blong hem oli ademap wanem long wei we yumi andastanem Jekob 4:13–15? ?Long yu, hem i minim wanem blong lukluk i go bitim long mak ia? ?Olsem wanem yumi save stap longwe long fasin blong lukluk i go bitim long mak ia?
Stap Leftemap Tingting blong Lanem Samting long Hom
Blong givim insperesen long ol memba blong klas blong ridim Jekob 5–7, talem long olgeta se bae oli faenem ansa blong kwestin blong olgeta insaed long Jekob 4:17 taem bae oli ridim ol nekis trifala japta wetem prea.
Sam Moa Risos
Fasin mo lukluk blong yumi long fasin blong kam rij long ol samting blong wol
Taem hem i stap gobak i go long Jekob 2:13–19, Elda L. Tom Perry i tijim: “Yumi nidim blong tekem kaonsel blong Jekob long hat blong yumi. Yumi mas ridim skripja ia olsem se oli raetem i kam stret long yumi long taem blong yumi, from se oli mekem from hemia nao. Ol toktok blong hem oli mas mekem yumi askem ol kwestin abaot sol blong yumi. ?Olsem wanem? ?Oda blong ol samting oli stret insaed long laef blong yumiwan? ?Yumi, yumi stap putum taem, mane o nara samting i go faswan, mo i topwan long ol samting we oli blong taem we i no save finis? ?Weswe? ?Lukluk blong yumi i lukluk long taem we i no save finis? ?O yumi foldaon nao long hol ia blong stap putum taem mo mane faswan long ol samting blong wol ia, mo afta stap fogetem Lod?” (“United in Building the Kingdom of God,” Ensign, May 1987, 34).
Ol vidio abaot Jastiti (ChurchofJesusChrist.org)
-
“I Choose to Be Pure” (Mi jusum blong Mi Stap Klin Evriwan)
-
“Chastity: What Are the Limits?” (Jastiti: ?Wanem Limit blong Hem?)
-
“Law of Chastity” (Loa blong Jastiti)
Lukluk i go i bitim mak ia
Elda Quentin L. Cook i olsem wanem yumi save lukluk “i go i bitim mak”:
“Blong riplesem ol bigfala tingting blong ol man wetem ol trutok blong gospel”
“Long sam pipol, i luk se oli sem we mesej blong Sevya i wan simpolwan nomo. Oli wantem ademap samting we i mekem tingting i fasfas, mo tu, ademap sam samting we i no klia gud blong mekem se i luk se mesej ia i givim moa jalenj long waes, o i go stret moa wetem ol fasin we i stap gohed. … Yumi stap luk i go i bitim mak ia taem yumi no wantem akseptem ol simpol trutok blong gospel, olsem we oli stap.”
“Gospel we i go tumas”
“Yumi stap lukluk i go i bitim mak ia taem yumi stap leftemap wan prinsipol nomo, i nomata se hem i impoten, i go antap evriwan long wan wei we i daonem ol nara prinsipol we oli impoten i semmak, o taem yumi tekem wan posisen we i agensem ol tijing blong ol Brata Lida.”
“Ol aksen blong hiro blong i riplesem konsekresen blong evri dei”
“Sam memba oli stap tokbaot bigwan se bambae oli komitim olgeta moa sapos oli kasem ol bigfala koling, be oli no faenem se hom tijing o visiting tijing [we naoia yumi stap singaotem givhan] i inaf, o i bigwan inaf blong sapotem wok blong olgeta.”
“Leftemap ol rul i go antap ova long doktrin”
“Olgeta we oli stap komitim olgeta blong stap folem ol rul be oli no wantem save long doktrin mo prinsipol, olgeta ia, i gat bigfala janis blong oli save lukluk i go i bitim long mak ia” (“Looking beyond the Mark,” Ensign o Liahona, Maj 2003, 42–44).