Jisas i go helpem wan woman

Bae I Tekem Han blong Yu, I Lidim Yu, i kam long Sandra Rast

24 Febwari–1 Maj

2 Nifae 26–30

“Wan Gudfala Wok mo Wan Sapraes”

Tingbaot se hom i mas stap olsem senta blong fasin blong lanem gospel. Stadi blong yuwan, mo famli stadi long 2 Nifae 26–30 i mas stap olsem stamba wok blong yu rere blong yu tij. Mekem sam plan blong sam wei blong bildimap, mekem i kam strong moa, mo leftemap tingting blong ol pipol insaed long klas blong yu oli stadi olgetawan, mo oli mekem famli stadi.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Long stat blong lesen, givim wan janis long ol memba blong klas blong oli serem wan samting aot long 2 Nifae 26–30 we oli bin faenem se i gat mining long olgeta taem oli bin stap stadi long skripja ia long hom. Eksampol, yu save askem olgeta blong serem, blong sot taem, wan ves we i bin helpem olgeta blong andastanem taem ia we yumi stap laef long hem, mo olgeta jalenj we yumi stap fesem.

tijing pikja bokis

Stap Tijim Doktrin

2 Nifae 26:24–28, 33

Evri samting we Lod i stap mekem, lav we Hem i gat long yumi nao i pusum Hem blong mekem.

• Sapos yu filim insperesen ia blong toktok raon long ol tijing blong Nifae abaot lav we Lod i gat, yu save traem hemia: Afta we yufala i ridim 2 Nifae 26:24 tugeta, invaetem ol memba blong klas blong mekem wan lis blong ol samting we Jisas Kraes i bin mekem blong olgeta, we lav nao i pusum Hem blong mekem samting ia. ?Olsem wanem nao Hem i stap “pulum evri man i kam long Hem”? Blong ansa long wei we Hem i stap soem lav blong Hem long yumi, ?wetem insperesen, wanem nao yumi filim blong mekem?

• Invitesen blong Lod long 2 Nifae 26:24–28, 33 oli ol strong pruf blong lav blong Hem. Wan wei we yu save yusum blong save helpem ol memba blong klas blong faenem ol invitesen ia, hem i blong askem olgeta blong putum evri mesej blong Lod long ol ves ia i stap long wan sentens nomo. Maet samfala memba blong klas bae oli glad blong serem sot sentens blong olgeta. ?Olsem wanem ol ves ia oli lidim tingting blong yumi long wei we yumi stap invaetem ol narawan blong kam long Kraes? Leftemap tingting blong klas blong raetemdaon ol tingting mo ol filing blong olgeta. Blong help blong invaetem Spirit, tingting blong plei wan rekoding blong hym ia abaot lav blong Sevya, olsem “Come unto Jesus” (Hymns, no. 117), mo taem hym i stap plei, ol memba blong klas oli save tingting hevi long hym ia.

2 Nifae 27; 29; 30:3–8

I nid blong gat Buk blong Momon insaed long wok blong God long ol las dei.

• Ol pipol insaed long klas blong yu oli maet nidim smol help blong andastanem profesi long 2 Nifae 27 abaot wan buk we oli silim mo wan man we i save plante samting. Histri stori we i stap long “Sam Moa Risos,” i save help tu. ?Bae i wok long klas blong yu sapos samfala memba blong klas oli rol plei blong sot taem ol samting we oli bin hapen insaed long stori ia mo long 2 Nifae 27:15–22? ?From wanem nao oli bin soem long Nifae ol taem ia we bae i hapen, plante plante yia bifo oli hapen? ?Wanem nao profesi blong Nifae i stap tijim yumi abaot hamas nao Buk blong Momon i impoten? Leftemap tingting blong ol memba blong klas blong oli serem wetem wanwan olsem wanem oli kam wan testemoni blong olgeta abaot Buk blong Momon.

• ?I gat eniwan insaed long klas we i gat eksperiens blogn stap invaetem wan blong ridim Buk blong Momon, mo oli glad blong serem eksperiens ia? ?Wanem nao sam risen blong wan i no akseptem invitesen blong ridim Buk blong Momon? Ansa blong Lod long wan long ol risen ia i stap long 2 Nifae 29:6–11. Yu save invaetem ol memba blong klas blong ridim ol ves ia, mo afta, mekem rolplei long hao oli save ansa wetem lav long wan we i talem se i no nid blong gat Buk blong Momon. ?Wanem nao sam narafala aedia ol memba blong klas oli gat long wei we oli save helpem ol narawan blong “save se Buk blong Momon i wan blesing long olgeta we i kam long han blong God”? (2 Nifae 30:6).

2 Nifae 28

Setan i wantem blong giaman long man.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong lukaotem ol giaman blong Setan we oli tokbaot long 2 Nifae 28. Mebi ol memba blong klas oli save serem wanem we oli faenem, o oli save rid tru long 2 Nifae 28 long klas mo mekem lis blong ol giaman blong Setan we oli save faenem. Bae i save help tu blong letem olgeta oli wok long ol smol grup blong faenem ol skripja we oli sakemaot ol giaman tok ia (sapos oli nidim help, yu save serem ol tingting we oli stap long “Sam Moa Risos”). Afta, ol grup oli save serem wetem wanwan long olgeta wanem we oli bin faenem, mo toktok raon long hao oli save luksave “ol doktrin we oli ol giamanwan, mo oli blong nating mo oli ol krangke doktrin” (2 Nifae 28:9).

stap lanem samting pikja bokis

Stap Leftemap Tingting blong Lanem Samting long Hom

Ol memba blong klas oli save filim insperesen blong ridim 2 Nifae 31–33 sapos oli save ol japta ia we i gat ol las toktok blong Nifae we oli bin raetemdaon, wetem ples we oli save luk we oli tokbaot doktrin blong Kraes.

risos pikja bokis

Sam Moa Risos

“Afta bae man we i gat plante save i talem se: ‘Mi no save ridim buk ia.’” (2 Nifae 27:18).

Long 28 Febwari 1828, Martin Haris, wan fren blong Josef Smit i tekem rod blong hem i go long Niu Yok Siti wetem wan kopi blong ol raeting we oli stap long ol buk we oli wokem long gol, blong hem i soem long olgeta we oli stap skul. Ating hem i wantem se wan i talem long hem se ol buk ia oli tru, o maet hem i tingting se testemoni blong wan bae i helpem olgeta blong boro mane blong save pablisim translesen ia. Nomata wanem we i stap, hem i stap wokem talem se Lod i talem long hem blong hem i mas go long trip ia.

“Long tetaem ia, Josef o Martin, tufala i no save plante long saed blong lanwis we oli bin raetem long ol buk ia. Oli save nomo wanem we enjel Moronae i bin talem long Josef: se hem i wan histri buk blong Amerika bifo. Nao, Martin i nomo lukaotem wan man we i skul we i gat save long lanwis blong Ijip (Josef i bin lanem afta se lanwis long ol buk ia, oli singaotem ‘niufala lanwis blong Ijip’), be hem i go luk plante man we oli skul we oli gat intres long ol ololfala samting, speseli ol ololfala samting blong Amerika.

“… [Aot long ol man blong skul we Martin i bin visitim,] i gat Charles Anthon, wan yang profesa we i stap tijim grama mo lanwis long Kolombia Kolej. Anthon i bin stap putum tugeta ol stori blong ol Indien blong Amerika, mo ol toktok we man i bin givim blong pablisim olgeta, mo hem i wanem tumas blong lukluk ol pepa ia we Martin i givim long hem.

“Martin i talem se Anthon i bin talem se ol raeting ia oli truwan; be hemia kasem taem hem i harem olsem wanem Josef Smit i karem ol buk ia. Hem i talem long Martin blong karem ol stret buk i go long hem. Martin i no wantem, mo Anthon i ansa, i talem wan ves long Aesea, ‘Mi no save ridim wan buk we oli silim.’ Nomata we afta, Anthon i talem se storian blong Martin i no tru abaot miting blong tufala, yumi save hemia: Martin i kambak long ol visit blong hem wetem ol man blong skul long Is, mo i save stret se God i bin singaotem Josef, mo we ol buk ia mo ol raeting ia, oli blong taem bifo. Hem mo Josef i bin luk visit ia blong Anthon, olsem we profesi blong Aesea i kamtru (mo oli tokbaot tu insaed long Buk blong Momon) se “bambae oli olsem buk* we i sat, i fas strong. Sipos yu tekem buk olsem, yu givim long man we i save rid, mo yu askem long hem blong i ridimaot long yu, bambae hem i talem se, ‘Mi mi no save mekem, from we oli fasemtaet buk ya, nao mi no save openem.’’’ [Aesea 29:11; luk tu long 2 Nifae 27:15–18]” (“The Contributions of Martin Harris,” Revelations in Context [2016], 3–4, history.ChurchofJesusChrist.org).

Ol skripja we oli sakemaot ol giaman blong Setan.

Giaman doktrin	Tru doktrin
“From long taem ia hem i no wan God blong ol merikel; hem i bin mekem wok blong hem finis.” (2 Nifae 28:6).	Moronae 7:35–37
“God … hem bae i letem yumi mekem wan smol sin” (2 Nifae 28:8).	Doktrin mo Ol Kavenan 1:31
“Evri samting i oraet long Saeon” (2 Nifae 28:21).	Doktrin mo Ol Kavenan 68:31; 82:14
“Mi mi no wan devel, from i no gat wan” (2 Nifae 28:22).	2 Nifae 2:17; Doktrin mo Ol Kavenan 76:25–27
“Mifala i no nidim moa long ol toktok blong God, from mifala i gat inaf” (2 Nifae 28:29).	2 Nifae 28:30; Ol Toktok blong Bilif 1:9

Stap Kam Antap long Fasin blong Yumi blong Stap Tij

No fraet long ples we i kwaet we i no gat wan i toktok. “I nidim taem blong ansarem ol gudfala kwestin. Oli nidim man i tingting hevi, i lukaotem ansa, mo i kasem insperesen. Taem ia we yu spendem blong stap wet blong kasem ol ansa long wan kwestin, i save kam wan tabu taem blong stap tingting hevi. Stap longwe long temtesen ia blong katem taem ia eli tumas taem yuwan bakegen i givim ansa o yu muv i go long wan nara poen” (Teaching in the Savior’s Way, 31).