“17–23 Febwari. 2 Nifae 11–25: ‘Mifala I Glad long Kraes,’” Kam Folem Mi—Blong Sandei Skul: Buk blong Momon 2020 (2020)
“17–23 Febwari. 2 Nifae 11–25,” Kam Folem Mi—Blong Sandei Skul: 2020
17–23 Febwari
2 Nifae 11–25
“Mifala I Glad long Kraes”
Antap long praktis blong stap putum skripja ia, 2 Nifae11–25 i kam long yuwan, tingting long hao nao bae yu save helpem olgeta we yu stap tijim blong oli yusum o putum olgeta japta ia oli gobak long olgetawan bakegen (luk long 2 Nifae 11:8). Taem we Spirit i toktok long yu, i givim ol tingting mo ol aedia, raetemdaon olgeta.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Bifo yufala i toktok raon long ol spesel ves we i kamaot long 2 Nifae 11–25, bae i help blong askem ol memba blong klas blong oli tingting long maen blong olgeta se oli gat wan fren we i stap traehad blong faenem eni samting we i gat mining, o i givim insperesen long ol raeting blong Aesea. ?Wanem ves nao bae oli serem wetem fren ia blong olgeta?
Stap Tijim Doktrin
Aesea i stap testifae abaot Jisas Kraes.
-
Bae i moa isi blong andastanem ol profesi blong Aesea taem yumi save from wanem nao oli raetemdaon olgeta. Blong statem storian raon long ol profesi blong Aesea long 2 Nifae, yu save invaetem ol memba blong klas blong luklukgud insaed long japta 11 mo raetemdaon wan lis blong samfala stamba tingting blong Nifae blong stap kwotem plante toktok blong Aesea. Oli save serem tu ol skripja we oli faenem long stadi blong olgetawan o famli stadi blong olgeta long 2 Nifae 12–24 we oli filim se oli mekem ol stamba tingting ia oli kamtru long laef blong olgeta. ?Olsem wanem nao we taem yu andastanem ol stamba tingting blong Nifae i helpem ol memba blong klas blong karem moa aot long ol raeting blong Aesea? Leftemap tingting blong olgeta blong kipim olgeta stamba tingting ia i stap long maen blong olgeta taem oli stap toktok raon long ol raeting blong Aesea long klas.
-
From se Aesea i yusum plante lanwis blong ol simbol, hem i isi blong no luksave strong witnes blong hem abaot Jisas Kraes. Hemia i wan aktiviti we i save helpem klas blong yu blong i lukluk nomo long witnes ia. Yu save rere samfala pepa we yu raetem ol skripja refrens ia long olgeta we yu tekem aot long 2 Nifae 12–24 we i stap tij abaot Sevya (eksampol, 2 Nifae 13:13; 14:4–6; 15:1–7; 16:1–7; 17:14; 18:14–15; 19:6–7; 21:1–5; 22:2). Wanwan memba blong klas i save jusum wan long ol pepa ia, stadi long ol ves we oli raetem long pepa, mo raetemdaon long pepa wanem hem i bin lanem abaot Jisas Kraes. Afta, ol memba blong klas oli save pasem pepa blong olgeta i go long wan narawan, mo hem i save ademap sam moa tingting, o niu wei we oli lanem abaot Sevya, aot long ol semfala ves ia. Afta, yu save givim long ol memba blong klas wan janis blong serem wanem we oli bin lanem aot long Aesea, mo aot long wanwan long olgeta we i mekem se oli gat moa hat o tangkyu from Jisas Kraes.
-
Profesi long 2 Nifae 19:6 i tekem plante taetol abaot Jisas Kraes. Tingting blong askem wan blong raetem lis ia long bod mo invaetem ol memba blong klas blong toktok raon long from wanem wanwan long ol taetol ia i tokbaot stret Sevya. ?Olsem wanem nao Hem i fulfilim ol rol ia insaed long laef blong yumi? Blong lanem moa abaot samfala long ol taetol ia, bae i help blong lukluk i go long ol refrens long futnot long 2 Nifae 19:6.
Long ol las dei, bambae ol pipol blong God oli kam wanples mo bae oli stap glad long pis.
-
Samfala pat blong ol profesi blong Aesea oli stret long yumi tedei from se oli tokbaot samfala pat blong wok blong God long las dei. Eksampol, yu save lukgud evri ditel long 2 Nifae 21:10–12, we i tokbaot wan “flag” (standet o bana) we bae oli leftemap blong pulum ol pipol blong God oli kam wanples. ?Olsem wanem nao yumi bin luk Lod i stap pulum ol pipol blong Hem oli kam wanples long saed blong spirit? Maet sam memba blong klas oli save tokbaot wanem i mekem olgeta oli wantem blong kam wanples, o blong oli kam wan wetem ol pipol blong God insaed long Jos. Maet bae oli glad blong krietem o mekem flag blong olgetawan we i listimdaon o i soem samfala trutok blong gospel we oli filim se hemia nao ol pipol oli stap “lukaotem,” mo bae i stap helpem olgeta blong “putum tugeta,” mo “pulum tugeta” (ol ves 10 mo 12)ol pikinini blong God long taem blong yumi. ?Olsem wanem nao yumi stap help wetem wok blong pulum ol pipol oli kam wanples?
-
Wan nara wei blong toktok raon long doktrin ia i blong raetem olgeta stamba toktok ia long bod: Seraot blong Isrel, Kam Tugeta blong Isrel, mo Ol Profesi blong Kraes. Yu save serem ol japta blong 2 Nifae 12–24 i go long ol grup blong memba blong klas, mo invaetem olgeta blong faenem ol ves we oli stap tij abaot ol samting ia, mo raetem ol ves ia anda long ol stret heding antap long bod. ?Wanem mesej ol ves ia oli gat blong talem long yumi? (Bae i save help blong talem long ol memba blong klas se Doktrin mo Ol Kavenan 113:1–6 i save helpem olgeta blong andastanem 2 Nifae 21:1–5, 10.)
-
Ol hym olsem “Antap Antap Tumas,” (STSP, pej 30) o “The Lord Is My Light” (Hymns, no. 89), we oli stanap long ol profesi long 2 Nifae 12:2–5 mo 2 Nifae 22, oli save kam blong sapotem strong ol mesej mo tingting blong toktok blong Aesea.
Ol hom blong yumi, mo “ol grup blong” Saeon bae oli ol ples blong stap sef mo ol ples blong stap haed.
-
Long 2 Nifae 14:4–6 Aesea i talem profesi abaot sefti mo pis we olgeta we oli stret mo gud bambae oli stap glad long hem afta we Lod i “wasemaot” mo “i klinim” sin blong olgeta. Nomata we ol ves ia oli tokbaot ol situesen we bae i stap long taem blong Mileniom, hemia i save helpem ol memba blong klas taem oli stap lukaotem sefti long saed blong spirit long medel blong ol fasin nogud blong ol las dei. Invaetem olgeta blong tingting hevi mo toktok raon se i minim wanem blong gat “wan klaod mo smok” mo “saen blong laet blong faea” long ol “ples blong stap” mo “ol grup blong pipol” blong olgeta (ves 5; luk tu long Eksodas 13:21–22). ?Wanem sam long ol samting we oli save komperem long hot san, strong win mo tanda, mo ren long ves 6? ?Olsem wanem nao bae yumi faenem wan ples blong haed long hem? (Luk tu long D&K 115:6). Maet ol memba blong klas oli save talem sam wei blong meksua se ol hom blong yumi mo Jos i stap olsem ol ples blong kam tugeta blong kasem proteksen long saed blong spirit.
“Raet wei, hem i blong biliv long Kraes.”
-
Bae ol memba blong klas blong yu oli save tingting i go long hat blong Nifae “blong mekem ol pikinini blong mifala, mo tu ol brata blong mifala, blong biliv long Kraes.” ?Olsem wanem nao Nifae i bin “wok strong wetem strong tingting oltaem” blong mekem gol ia i kamtru? (2 Nifae 25:23). Mebi yu save invaetem ol memba blong klas blong luklukgud insaed long 2 Nifae 25:19–29 blong faenem ol trutok abaot Sevya mo gospel blong Hem, we Nifae i bin wantem ol pipol blong hem blong save. Afta, oli save serem wanem oli bin mekem blong tijim olgeta trutok ia long famli blong olgeta o ol fren blong olgeta. Eksampol, ?olsem wanem nao oli bin tijim trutok ia se “hem i tru long gladhat blong God we Lod i sevem mifala, afta evri samting nomo we mifala i save mekem.”? (Toktok ia we i kam long Presiden Dieter F. Uchtdorf we i stap long “Sam Moa Risos” mo i givim sam niu lukluk long saed blong trutok ia.) ?Olsem wanem nao oli bin helpem ol narawan blong oli “glad long Kraes”?
Stap Leftemap Tingting blong Lanem Samting long Hom
Ol memba blong klas oli save gat intres blong save se 2 Nifae 26–30 i save helpem olgeta blong ansa long ol pipol we oli stap talem: “Mifala i no nidim Buk blong Momon.”
Sam Moa Risos
“Long yumi, wan pikinini i bon i kam long wol ia.”
Blong ademap long storian insaed long klas abaot 2 Nifae 19:6, wajem o lisin long Tabenakol Kwaea long Tempol Skwea we i singsing long “For unto Us a Child Is Born” (ChurchofJesusChrist.org)
“From mifala i save se hem i tru long gladhat blong God we Lod i sevem mifala, afta evri samting nomo we mifala i save mekem.”
Taem hem i stap givim tingting blong hem abaot ol toktok blong Nifae long 2 Nifae 25:23, Presiden Dieter F. Uchtdorf i talem:
“Mi stap tingting se samtaem man i intepretem rong toktok ia ‘afta evri samting mifala i save mekem.’ Yumi mas andastanem se ‘afta’ i no minim ‘from.’
“Lod i no sevem yumi ‘from’ evri samting yumi save mekem. ?Eniwan long yumi i bin mekem evri samting we yumi save mekem? ?Olsem wanem? ?God i wet kasem we yumi yusum evri paoa bifo Hem i kam long laef blong yumi wetem gladhat blong Hem blong sevem yumi? …
“Mi sua se Nifae i bin save se gladhat long Sevya i letem mo i mekem yumi save winim sin [luk long 2 Nifae 4:19–35; Alma 34:31]. From hemia nao Nifae i bin wok strong wetem strong tingting blong mekem ol pikinini blong hem, mo tu ol brata blong hem, ‘blong biliv long Kraes, mo blong stretem olgeta wetem God’ [2 Nifae 25:23].
“!Afta evri samting, hemia nao hem i wanem we yumi save mekem! !Mo hemia nao hem i wok blong yumi long wol ia!” (“The Gift of Grace,” Ensign o Liahona, May 2015, 110).
Stap Kam Antap long Fasin blong Yumi Blong Stap Tij
Askem ol kwestin we i stap invaetem testemoni. “Blong askem ol kwestin we i leftemap tingting blong olgeta we oli stap lan blong oli serem testemoni abaot ol prinsipol we oli stap tijim, i save kam wan wei, we i gat paoa, blong invaetem Spirit. Testemoni blong olgeta—mo testemoni blong ol narawan insaed long klas— i gro taem we Spirit i talem witnes abaot trutok” (Teaching in the Savior’s Way, 32).