Adam mo Iv, i kam long Douglas Fryer

3–9 Febwari

2 Nifae 1–5

“Mifala I Bin Laef Folem Fasin blong Stap Hapi”

Blong stat blong rere long saed blong spirit, ridim 2 Nifae 1–5 mo raetemdaon ol tingting mo filing we i kam long yu. I gat fulap prinsipol tumas insaed long ol japta ia, mo yu no gat taem blong toktok raon long olgeta evriwan long wan klas ia nomo, mekem se i gud blong yu folem Spirit long taem we yu stap rere, mo yu luklukgud long ol niu tingting we ol memba blong klas oli serem we bae i helpem yu blong faenemaot wijwan prinsipol nao blong lukluk long hem nomo, mo olsem wanem blong lidim storian ia insaed long klas.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Bae i luk olsem se ol memba blong klas blong yu bae oli makemdaon, o oli raetemdaon wan not abaot wan ves insaed long 2 Nifae 1–5. Blong statem klas, yu save invaetem ol memba blong klas blong oli serem ol ves we i gat mining long olgeta. Invaetem klas blong talem sot wan doktrin prinsipol we oli bin lanem long ol ves we oli bin serem.

Stap Tijim Doktrin

2 Nifae 2:11–30

Yumi fri blong yumiwan nomo i tekem aksen.

• Plante taem tumas, ol pipol oli yusum fridom blong joes blong olgeta blong mekem ol narawan oli safa tumas. ?From wanem hem fridom blong joes hem i impoten long Papa long Heven? Maet yu save raetem kwestin ia long bod, mo ol memba blong klas oli save lukaotem ol ansa insaed long 2 Nifae 2:11–30 mo raetemdaon ol ansa blong olgeta antap long bod. ?Olsem wanem enemi i stap traem blong daonem fridom blong joes blong yumi? ?Olsem wanem nao Sevya i stap helpem yumi blong “jusum fridom mo laef we i no save finis”? (2 Nifae 2:27). Tingting blong singsing tugeta long hym abaot fridom blong joes, olsem “Know This, That Every Soul Is Free” (Hymns, no. 240), mo invaetem ol memba blong klas blong ademap long lis blong olgeta ol nara aedia we oli karemaot long hym ia.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i poenemaot fo stamba kondisen we i mekem se i posibol blong yumi gat fridom blong joes. Hemia i wan wei we yu save ademap moa long wanem ol memba blong klas oli bin lanem long hom: Raetemdaon ol fo kondisen ia long bod. Afta, invaetem ol memba blong klas blong serem ol toktok we i stap long 2 Nifae 2 we i stap tijim from wanem ol kondisen ia oli ol stamba kondisen, o i nid blong gat olgeta blong kasem hae paoa blong yumi.

2 Nifae 2:15–29

Foldaon mo Atonmen blong Jisas Kraes, oli ol stamba pat insaed long plan blong Papa long Heven.

• Plante Kristin man oli stap biliv se Foldaon i wan nogud taem, mo Iv i mekem wan bigfala mistek. Olgeta ves ia long 2 Nifae 2 oli tokbaot klia ol trutok abaot Foldaon blong Adam mo Iv, mo oli testifae se Jisas Kraes i pemaot yumi long Foldaon ia. Wan wei blong toktok raon long ol aedia i blong invaetem ol memba blong klas blong luklukgud insaed long 2 Nifae 2:15–25, mo mekem wan lis blong ol trutok we oli bin lanem abaot wanem i bin hapen insaed long Garen blong Iden. ?Wanem nara aedia o tingting nao oli faenem insaed long kwot o toktok we i kam long Presiden Dallin H. Oaks we i stap insaed long “Sam Moa Risos”? ?Olsem wanem nao Jisas Kraes i bin pemaot yumi long Foldaon? (luk long 2 Nifaei 2:6–8, 26–29).

• Afta we yufala i mekem wan aktiviti olsem hemia fastaem, yu save soem sam moa kwestin olsem olgeta we i kam afta, mo invaetem ol memba blong klas blong serem tingting blong olgeta abaot hemia:

  • ?Olsem wanem nao ol tijing blong Lihae we oli stap long ol ves ia oli stretem sam rong tingting abaot Foldaon?

  • ?Long wanem wei nao, Foldaon ia hem i wan blesing?

  • ?Olsem wanem nao we, taem yumi andastanem gud Foldaon, hem i helpem yumi blong andastanem moa gud nid ia blong yumi blong gat Jisas Kraes mo Atonmen blong Hem?

  • ?Wanem hem i wan risen we yu yu talem tangkyu tumas from joes blong Adam mo Iv, we tufala i bin mekem insaed long garen blong Iden?

  • ?Olsem wanem joes blong yu blong kam long wol ia i semmak long joes blong Adam mo Iv blong tekem mo kakae long frut blong save gud mo nogud?

  • ?Wanem nao i stamba tingting blong laef? ?From wanem nao i nid blong gat taem ia blong Foldaon blong mekem se stamba tingting ia i hapen?

2 Nifae 4:15–35

Yumi save tanem yumi i go long God long taem we yumi no strong.

• Ol raeting blong Nifae long 2 Nifae 4:15–35 i save tekem hop mo kamfot taem yumi filim se ol trabol mo ol wiknes blong yumi oli strong tumas. Maet ol memba blong klas oli save grup tutu mo luklukbak long ol ves ia mo faenem ol ples we oli save yusum blong givim kamfot long wan we i filim se ol hadtaem blong hem oli hevi tumas antap long solda blong hem. Afta, wanwan grup blong tutu memba ia i save serem ol ves ia wetem klas. Maet wan long klas i save serem wan eksperiens abaot wan taem we hem i bin faenem kamfot taem hem i tanem hem i go long God, semmak olsem we Nifae i bin mekem.

• Wan nara wei blong luklukbak long 2 Nifae 4 i save invaetem samfala memba blong klas sam dei bifo klas, blong oli kam we oli rere blong serem ol ves mo sentens blong japta ia we oli gat mining long olgeta. Askem olgeta blong serem wanem we oli stap mekem taem we oli filim se wiknes blong olgeta i strong tumas. Wan hym abaot kamfot mo hop, olsem hym ia, “Where Can I Turn for Peace?” (Hymns, no. 129), i save kam help blong givim tingting long taem blong toktok insaed long klas. Eksampol, ol memba blong klas oli save serem olsem wanem hym ia i soem strong se eksampol blong Nifae blong stap dipen long Lod long taem we tingting i slak, hem i wan gud samting.

2 Nifae 5

Hapines, oli faenem insaed long fasin blong laef folem gospel.

• Nomata long ol jalenj we Nifae mo ol pipol blong hem oli bin fesem, oli bin save bildimap wan sosaeti we i bin stanap long ol prinsipol we i stap lid i go long hapines. ?Wanem prinsipol nao ol memba blong klas oli faenem taem oli bin stadi long 2 Nifae 5 we i mekem se Ol Man blong Nifae oli bin stap hapi? Yu save givim wan pis pepa long ol memba blong klas, mo invaetem olgeta blong luklukgud long 2 Nifae 5 mo faenem ol prinsipol we i stap lid i go long hapines, mo raetemdaon olgeta. ?Olsem wanem nao ol wei we wol i stap lukaotem hapines oli defren long wanem yumi stap faenem long 2 Nifae 5? ?Wanem gol nao ol memba blong klas oli save putum blong oli praktisim wan long olgeta prinsipol ia?

Stap Leftemap Tingting blong Lanem Samting long Hom

Talem long ol memba blong klas se insaed long 2 Nifae 6–10, i gat wan long ol bes toktok aot long evri skripja abaot Atonmen blong Jisas Kraes. Yu save serem tu, wan ves we yu faenem long ol japta ia we i mekem se yu glad tumas taem yu ridim.

Sam Moa Risos

Foldaon i bin pat blong plan blong God.

Presiden Dallin H. Oaks i tijim:

“Taem Adam mo Iv, tufala i kasem fasfala komanmen, tufala i stap bitwin tu ples ia; tufala i nomo stap long spirit wol, be tufala i gat ol bodi blong mit mo bun we i no save ded, mo i save mekem pikinini yet. Tufala i no save mekem folem fas komanmen blong Papa, sapos tufala i no brekem wol ia we i stap bitwin Garen blong Iden mo ol bigfala tes mo gudfala janis we laef long wol ia i givim. …

“ … Profet Lihae i bin eksplenem se ‘sapos Adam i no bin sin bae hem i no foldaon,” (2 Nif 2:22), be bae hem i stap nomo … semmak olsem long taem we afta hem i bin mekem olgeta;

“ … Foldaon i bin stap long plan, Lihae i talem long en, from se “evri samting i bin hapen long waes tingting blong hem we i save evri samting’ (2 Nif 2:24).

“Iv nao i bin faswan blong brekem ol wol blong Iden blong save mekem se yumi fesem ol kondisen blong laef long wol ia. Aksen blong hem, i nomata se i wanem, i bin faswan wan fasin blong brekem loa, be long taem we i no save finis, hem i wan nid we bae i stap blong taem we i no save finis, blong openem doa i go long laef we i no save finis. Adam i bin soem waes tingting blong hem taem hem i bin mekem semmak. Long wei ia nao, Iv mo ‘Adam i bin foldaon blong mekem se man i save stap;’ (2 Nif 2:25).

“Samfala Kristin man oli panisim o jajem Iv from aksen blong hem, mo talem se hem nao wetem ol gel blong hem, oli no stret evriwan from samting ia. !Be i no Ol Lata-dei Sent! From se yumi kasem save tru long revelesen, yumi stap selebretem aksen blong Iv mo stap ona long waes blong hem mo strong paoa long tingting blong hem long taem ia we yumi stap singaotem Foldaon. …

“Revelesen blong tedei i soem se ol fasfala papa mo mama blong yumi, oli bin andastanem se i nid blong gat Foldaon. Adam i talem: ‘Mi blesem nem blong God, from se, from mi bin brekem loa, nao ae blong mi i bin open; mo long laef ia, bae mi gat glad, mo bakegen, long bodi blong mit mo bun, bae mi luk God bakegen’ (Moses 5:10)” (“The Great Plan of Happiness,” Ensign, Nov. 1993, 72–73).

Stap Kam Antap long Fasin blong Yumi blong Stap Tij

Go aot mo helpem olgeta we oli no stap kam long jos. Blong stap tij i moa bitim blong lidim toktok long klas long Sandei; hem i blong givhan wetem lav, mo blesem ol narawan wetem gospel. Mebi yu save tingting long wan we i no stap kam long jos, mo bae yu go stret long hem mo invaetem stret hem blong tekpat long wan lesen we bae i kam yet. (Luk long Teaching in the Savior’s Way, 8–9.)