I no olsem tingting blong mi, be mekem olsem tingting blong yu nomo i kam long Harry Anderson

10–16 Febwari

2 Nifae 6–10

!O Plan blong God blong Yumi i Gud Tumas!

Wan gudfala wei blong yu rere blong tij i blong faswan, yu ridim 2 Nifae 6–10 blong yuwan. Raetemdaon eni tingting o filing we yu kasem, mo yusum aotlaen ia blong faenem sam moa niu tingting mo aedia blong tij.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Jekob i tijim ol pipol blong hem se ol tijing blong Aesea “oli save yusum ol toktok ia long [olgetawan] bakegen” (2 Nifae 6:5). Yu save stat mo askem ol memba blong klas blong serem eni tijing blong Jekob we i stap insaed long 2 Nifae 6–10 we oli filim se oli save yusum insaed long laef blong olgetawan. Oli save eksplenem from wanem oli faenem se tijing ia i gat mining.

Stap Tijim Doktrin

2 Nifae 6–8

Lod i gat bigfala sore long ol pipol blong Hem, mekem se bae Hem i mekem ol promes blong Hem oli hapen.

• Blong andastanem gud wanem i stap long ol mesej ia insaed long 2 Nifae 6–8, bae i help sapos klas blong yu i krietem wan taem laen blong ol samting we oli bin hapen, we oli tokbaot insaed long 2 Nifae 6:8–15. ?Wanem nao ol taem ia oli talem abaot Lod mo ol filing blong Hem from ol pipol blong Hem? (luk tu long 2 Nifae 7:1–3; 8:3). Yu save eksplenem se, olsem ol memba blong Jos, yumi ol kavenan pipol blong God tedei, mo aot long wol, yumi kam wanples insaed long sefti blong gospel. ?Wanem mesej ol japta ia oli gat blong talem long yumi naoia?

2 Nifae 9

Tru long Atonmen blong Hem, Jisas Kraes i stap mekem evri pipol oli fri long ded long saed blong bodi, mo long saed blong spirit.

• Wan wei blong yumi glad moa from Atonmen blong Jisas Kraes, hem i blong tingting long wanem bae i hapen long yumi sapos yumi no gat Atonmen. Ol memba blong klas oli save tingting hevi long olgeta samting ia taem oli stap stadi long 2 Nifae 9. Yu save invaetem ol memba blong klas blong stat blong stadi long ol ves 4–9 mo afta, oli raetemdaon long bod wanem nao bae i hapen sapos i no bin gat Atonmen blong Kraes. Folem ol ves 10–14, ?olsem wanem nao Sevya i bin sevem yumi long trabol ia? Mesej blong Elda Jeffrey R. Holland we i stap long “Sam Moa Risos” i save helpem klas blong yu blong andastanem nid blong yumi blong mas gat Atonmen blong Jisas Kraes. Yu save soem vidio tu we i folem mesej blong hem—“Where Justice, Love, and Mercy Meet” (ChurchofJesusChrist.org). Ol memba blong klas oli save serem eni tingting o filing we mesej blong Elda Holland i givim long olgeta abaot Sevya.

• Askem ol memba blong klas blong tingting long olsem wanem nao bae oli eksplenem Atonmen blong Jisas Kraes long wan we i no save wanem ia Atonmen mo from wanem i nid blong gat Atonmen. Ol trutok we oli faenem long 2 Nifae 9 i save help blong mekem ol memba blong klas oli rere blong save tekpat long kaen storian ia. Maet oli save luklukgud insaed long ol ves 4–12, mo lukaotem olsem wanem Atonmen blong Sevya i winim ded long saed blong bodi mo long saed blong spirit. Folem wanem yumi stap lanem aot long ol skripja ia, ?from wanem sakrifaes ia blong Sevya, yumi stap singaotem “wan atonmen we i no gat en”? (2 Nifae 9:7).

• Jekob i sapraes tumas long plan blong God blong pemaot man, mekem se hem i singaot se : “O, paoa” taem hem i stap tokbaot plan ia. Blong helpem ol memba blong klas blong oli andastanem gud moa olgeta filing ia long Sevya mo long Atonmen blong Hem, tingting blong invaetem olgeta blong luklukgud insaed long 2 Nifae 9 blong faenem ol singaot blong Jekob (kolosap evriwan oli stap long ol ves 8–20). ?Wanem nao ol ves ia oli stap tij abaot God mo plan blong Hem? ?Wanem eksperiens ia i bin helpem yumi blong filim wanem we Jekob i bin filim abaot plan we God i gat long ol pikinini blong hem? Yu save singsing wan song tu abaot paoa blong God, olsem “How Great Thou Art” (Hymns, no. 86), blong mekem se toktok insaed long klas i kam antap moa.

2 Nifae 9:27–54

Yumi save kam long Kraes mo kasem ol bigfala blesing blong Atonmen blong Hem.

• Yu save statem storian insaed long klas abaot ol tijing blong Jekob we i stap long ol ves ia, mo askem ol memba blong klas olsem wanem bae oli invaetem wan blong sakem sin mo kam long Kraes. ?Olsem wanem nao Jekob i mekem hemia long 2 Nifae 9:50–53? ?Wanem blesing nao hem i talem se bae i kam long laef blong yumi sapos yumi akseptem ol invitesen ia?

• Long 2 Nifae 9, Jekob i yusum tufala sentens we i gat paoa mo i no talem sem samting: “plan we i fulap wetem sore blong bigfala Krieta” mo “plan ia blong trik blong nogud wan” (2 Nifae 9:6, 28). Blong helpem ol memba blong klas blong lanem samting aot long tufala defren sentens ia, yu save droem wan rod long bod mo putum taetol, se: Plan blong Papa long Heven. Invaetem ol memba blong klas blong luklukgud insaed long 2 Nifae 9:27–52, mo stap lukaotem kaonsel we Jekob i stap givim long yumi blong helpem yumi folem plan blong Papa long Heven. I gat rod i stap. Nao askem olgeta blong raetemdaon wanem moa nao oli faenem. ?Wanem nao Jekob i stap tijim abaot ol fasin we Setan i stap yusum blong trikim yumi blong go longwe long plan blong Papa blong yumi long Heven? ?Wanem nao yumi lanem aot long ol ves ia long wea nao yumi go long hem sapos yumi folem plan blong Papa long Heven, mo wea nao yumi go sapos yumi stap folem Setan? (luk long 2 Nifae 9:9, 18). Folem wanem i stap long olgeta ves ia, ?wanem nao yumi save mekem blong folem moa plan ia blong Papa blong yumi long Heven?

• Long 2 Nifae 9:28–38, Jekob i givim woning agensem samfala fasin mo aksen we i stap stopem yumi blong stap folem plan we God i gat blong yumi. Tingting blong stap invaetem ol memba blong klas blong faenem olgeta samting ia. ?Wijwan long ol fasin mo aksen nao yu luk se i tru long taem blong yumi tedei? ?Wanem nao i mekem se ol fasin mo aksen ia oli wan bigfala denja tumas? ?Wanem nao yumi save lanem aot long 2 Nifae 9:50–53 abaot ol wei blong stap longwe long ol denja ia?

Stap Leftemap Tingting blong Lanem Samting long Hom

Blong helpem ol memba blong klas blong filim tras long olgetawan blong save ridim ol raeting blong Aesea we Nifae i kwotem long 2 Nifae 11–24, yu save eksplenem se Nifae i bin putum olgeta raeting ia blong mekem se ol pipol oli gat moa strong fet long Jisas Kraes. Invaetem ol memba blong klas blong lukluk long riding blong nekis wik olsem wan janis blong bildimap fet blong olgetawan long Hem.

Sam Moa Risos

Nid blong Yumi blong Gat Wan Sevya

Elda Jeffrey R. Holland i talem stori blong wan man we i stap klaem long ol bigfala ston, we i bin stap hang nomo long wan stip kanion, mo i no gat wan samting i holemtaet hem blong hem i no foldaon mo ded. Stret long taem we han blong hem i nomo save holem ston ia we i gat sanbij antap long hem, hem i filim ol han blong yangfala brata blong hem i holem fored blong han blong hem, mo pulum hem i go long sef ples. Elda Holland i bin komperem eksperiens ia blong man we i stap klaem ia, i kam long situesen blong yumi long wol ia we i stap foldaon:

“I bin gat wan tru Adam mo Iv, we tufala i foldaon long wan tru Iden, mo tekem evri risal we i fas long foldaon ia. … From se bae yumi bon long wol ia we i stap foldaon, mo tu, from se bae yumi stap brekem ol loa blong God, yumi tu, yumi karem ol sem panismen we Adam mo Iv i fesem.

“!Hemia i nogud tumas! Evri man long wol i foldaon long resis ia—evri man, woman, mo pikinini we i stap long wol ia wetem wan bodi blong mit mo bun, i stap folfoldaon i go long wan ded we i no save finis, mo long saed blong spirit, i stap folfoldaon i go long bigfala trabol tingting we i no save finis. ?Hemia nao mining blong laef? ?Hemia nao bigfala en blong eksperiens blong man? ?Olsem wanem? ?Yumi evriwan i stap hang nomo long wan kolkol kanion samples long wan yunives we i no wantem save long man, mo wanwan long yumi i stap lukaotem wan ples blong pusum bigfala blong leg long hem; wanwan long yumi i stap lukaotem wan samting blong hang long hem—mo i no gat samting i stap be filing blong sanbij ia nomo we i stap glis andanit long fingga blong yumi, we i no gat samting blong sevem yumi, i no gat samting blong yumi hang long hem, o i no gat samting nating blong i holem yumi? …

“Ansa long olgeta kwestin ia i wan !No! we i strong mo i no save finis. … Atonmen bae i gat ful viktri ova long ded blong bodi, i givim laef bakegen long ded we i no gat kondisen from long evriwan we i bin bon, o bae i bon i kam long wol ia. Wetem sore, bae hemia i givim fogivnes tu from ol sin blong wanwan man, woman mo pikinini, stat long Adam i go kasem en blong wol, folem ol kondisen blong fasin blong sakem sin mo fasin blong stap obei long ol tabu komanmen” (“Where Justice, Love, and Mercy Meet,” Ensign o Liahona, May 2015, 105–6).

Stap Kam Antap long Fasin blong Yumi blong Stap Tij

Serem testemoni blong yu plante taem. Simpol mo tru witnes blong yu abaot wan trutok i save gat paoa blong lidim tingting blong olgeta we yu stap tijim. Hem i no nid blong toktok blong yu i flas, o i longfala. Tingting blong serem witnes blong yuwan abaot Sevya taem yufala i stap toktok raon long 2 Nifae 9.