Lihae i stap lukluk long Liahona

Lihae mo Liahona, i kam long Joseph Brickey

27 Jenuware –2 Febwari

1 Nifae 16–22

“Bae Mi Mekem Rere Rod Bifo long Yufala”

Taem yu stap ridim 1 Nifae16–22, tingting long olsem wanem nao eksampol blong Nifae, blong stap fesem ol jalenj, i save helpem ol pipol insaed long klas blong yu.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Nifae i luk se i gud tumas blong putum ol skripja i kambak long laef blong hemwan bakegen mo ol pipol blong hem (luk long 1 Nifae 19:23). Tingting blong invaetem ol memba blong klas blong oli serem ol prinsipol we oli bin lanem aot long stori blong wokbaot blong Nifae i go long graon blong promes, we i go tu wetem laef blong olgetawan bakegen.

tijing pikja bokis

Stap Tijim Doktrin

1 Nifae 16:10–16, 23–31; 18:10–13, 20–22

God i yusum ol smol samting blong mekem ol bigfala samting oli hapen.

• ?Yu, o wan insaed long klas blong yu, i save tingting abaot wan samting we i smol we oli save yusum blong mekem wan bigfala samting i hapen? (luk long 1 Nifae 16:29). Yu save invaetem ol memba blong klas blong toktok raon long wanem we oli bin lanem abaot prinsipol ia afta we oli bin ridim ol skripja wanwan, o long grup: 1 Nifae 16:25–31; Alma 37:3–8; mo Doktrin mo Ol Kavenan 64:33; 123:12–17. ?Olsem wanem nao God i yusum ol smol wei blong mekem ol bigfala samting oli hapen insaed long laef blong yumi?

• Klas blong yu bae i lanem samting taem oli toktok raon long wei we Papa long Heven i stap lidim ol rod blong yumi. Blong stat, askem klas blong toktok raon long olgeta prinsipol ia we oli bin mekem se Liahona i wok (luk long 1 Nifae 16:10–16, 23–31; 18:10–13, 20–22; luk tu long Alma 37:38–47). ?Olsem wanem olgeta prinsipol ia, bae yumi save lukluk se oli “ol smol wei”? Ol memba blong klas oli save raetemdaon long bod olgeta samting ia we God i bin givim blong lidim yumi (luk long “Sam Moa Risos” blong gat sam aedia). ?Wanem smol aksen yumi save tekem blong mekem se God i save lidim yumi?

Lihae i stap yusum Liahona

Sapos Yufala I Rere, Yufala I No Mas Fraet, i kam long Clark Kelley Price

1 Nifae 16:18–32; 17:7–16; 18:1–4

Taem yumi stap obei long ol komanmen, God bambae i helpem yumi blong fesem olgeta jalenj.

• Maet ol memba blong klas blong yu oli stap fesem ol wok mo ol jalenj we oli luk se i no posibol blong mekem. ?Olsem wanem yu save yusum eksperiens blong Nifae wetem ol wok we yumi luk se i no posibol blong hem i wokem—hemia blong fidim famli blong hem long waelples, mo blong bildim wan sip—blong helpem olgeta? Ating ol memba blong klas oli save ridim 1 Nifae 16:18–32; 17:7–16; mo 18:1–4, oli save lukaotem ol prinsipol we i save helpem olgeta taem oli fesem wan had jalenj (eksampol: 1 Nifae 16:24–26 i stap tijim se prea mo fasin blong gat tingting i stap daon i letem yumi save kasem insperesen mo daereksen we i kam long God). Maet yu save stat blong givim wan eksampol long olgeta, abaot wan prinsipol we yu bin faenem long ol ves ia. Taem oli stap serem wanem we oli bin faenem, oli save serem tu ol eksperiens blong olgetawan we i go wetem ol prinsipol ia.

1 Nifae 16:18–32; 17:7–22

Fet i lidim man blong tekem aksen.

• Ol eksperiens blong Lihae mo famli blong hem long waelples i soemaot paoa blong fet, mo wanem i kamaot taem man i nomo stap biliv. Blong helpem ol memba blong klas blong faenemaot ol trutok ia, yu save raetem ol kwestin ia long bod: ?Olsem wanem nao Nifae i tekem aksen folem bilif blong hem? ?Olsem wanem nao hem i kasem ol blesing, olsem wan risal? Wanem nao ol risal blong no biliv we Leman mo Lemyul i bin folem? Invaetem ol memba blong klas, we oli stap olsem ol grup, blong lukaotem ol ansa blong ol kwestin ia long 1 Nifae 16:18–32 o 17:7–22 mo blong oli serem wanem nao oli faenem.

1 Nifae 19:22–24

Yumi save yusum ol skripja i kambak long laef blong yumiwan.

• Blong helpem ol memba blong klas blong lanem olsem wanem blong yusum ol skripja i kambak long laef blong olgetawan, oli save ridim ol eksampol long hao nao Nifae i bin mekem hemia. Eksampol, long 1 Nifae 4:1–3 mo 17:23–32, 41–45, ?wanem prinsipol nao Nifae i bin tijim taem hem i yusum ol skripja i kambak long situesen blong famli blong hem bakegen? Stori ia we i kam long Elda Robert D. Hales insaed long “Sam Moa Risos” i soem olsem wanem nao fasin blong stap yusum ol skripja oli kambak long yumiwan bakegen, i save blesem yumi. Tingting blong invaetem ol memba blong klas blong faenemaot ol jalenj we oli stap fesem, o ol memba blong famli blong olgeta i stap fesem, mo afta, faenem ol skripja stori we i save givim olgeta ol niu tingting, mo i save helpem olgeta long ol situesen ia. Folem 1 Nifae 19:22–24, ?olsem wanem nao fasin blong yusum ol skripja oli kambak long yumiwan bakegen i save blesem yumi?

• Blong toktok raon long 1 Nifae 19:22–24 hem i wan bigfala janis blong ol memba blong klas blong serem olsem wanem nao oli stap “yusum ol skripja” long olgetawan bakegen, o long ol famli blong olgeta, mo tu, blong oli serem ol blesing we oli bin kasem taem oli bin mekem olsem. Tingting blong raetemdaon ol aedia blong klas antap long bod long hao nao blong yusum ol skripja long laef blong olgetawan (blong luk sam tingting, luk long lis we i stap long “Sam Moa Risos”). Long wan nara klas long fiuja, yu save invaetem ol memba blong klas blong oli serem ol eksperiens blong olgeta we i tokbaot wan taem we oli bin yusum ol aedia ia we oli stap long lis.

1 Nifae 20-21

Lod bambae i pulum haos blong Isrel i kam tugeta long ol las dei.

• Blong leftemap tingting blong ol memba blong klas blong serem ol tijing we i gat mining we oli faenem long 1 Nifae 20–21, tingting blong raetemdaon ol heding ia olsem antap long bod: Ol Pikinini blong Isrel, Famli blong Lihae, mo Ol Pipol long Taem blong Yumi Tedei. Givim smol taem long olgeta blong oli luklukbak long 1 Nifae 20–21 mo listim daon, anda long wanwan heding, olsem wanem nao ol profesi blong Aesea oli go stret wetem wanwan long ol grup ia.

lanem samting pikja bokis

Leftemap Tingting blong Lanem Samting long Hom

Blong givim insperesen blong ol memba blong klas oli ridim 2 Nifae 1–5, invaetem olgeta blong tingting long wanem nao bae oli talem long ol famli blong olgeta sapos taem blong olgeta blong stap long wol ia, i wan sotfala taem. Poenemaot se ol sam long ol fas japta long 2 Nifae bae i tekem las mesej we Lihae i bin givim long famli blong hem.

risos pikja bokis

Sam Moa Risos

Ol Vidio blong Buk blong Momon

Faenem ol vidio, long Inglis, we i soem ol stori we oli stap long 1 Nifae 16–22 insaed long “Book of Mormon Videos” long ChurchofJesusChrist.org o insaed long Gospel Laebri ap.

Ol “Liahona” blong yumi.

Elda David A. Bednar i bin tijim: “Tabu Spirit i stap wok insaed long laef blong yumi i semmak nomo olsem we Liahona i bin wok long Lihae mo famli blong hem, folem fet mo strong wok blong olgeta, mo hamas oli mekem folem ol toktok blong hem” (“That We May Always Have His Spirit to Be with Us,” Ensign o Liahona, Mei 2006, 31).

Insaed long Oktoba 2005 Jeneral Konfrens, Elda Lowell M. Snow blong Olgeta Seventi i talem: “Jeneral Konfrens ia, i wan Liahona blong taem tedei; hem i wan taem mo wan ples blong kasem toktok blong insperesen mo daereksen blong mekem se yumi kam antap long laef” (“Compass of the Lord,” Ensign o Liahona, Nov. 2005, 97).

Presiden Thomas S. Monson i tijim: “Semfala Lod ia we i bin givim wan Liahona long Lihae, i stap givim long yu, mo long mi, tedei, wan presen we oli no save faenem tumas, mo wan presen we praes blong hem i bigwan, we i stap givim daereksen long laef blong yumi. … Presen ia we mi stap tokbaot, yufala i save long hem olsem petriakel blesing blong yufala” (Thomas S. Monson, “Your Patriarchal Blessing: A Liahona of Light,” Ensign, Nov. 1986, 65).

Stap yusum ol skripja i kambak long laef blong yumiwan.

Elda Robert D. Hales i bin tijim:

“Samfala yia i pas, mi bin stap tijim yang boe blong mifala abaot laef mo eksperiens blong brata blong Jared. Nomata we stori ia, i wan intresting stori, hem i no muv nating. Nao, mi askem hem se, stori ia, i minim wanem long hemwan. Hem i minim fulap samting taem yumi askem ol pikinini blong yumi, ‘?Hem i minim wanem long yu?’ Hem i talem: ‘Yu save; hemia i no defren long wanem Josef Smit i bin mekem insaed long tabu bus taem hem i bin prea, mo afta, hem i kasem wan ansa.’

“Mi talem, ‘Yu yu gat kolosap semfala yia blong Josef. ?Yu yu ting se wan prea olsem bae i save helpem yu?’ Kwiktaem nomo olsem, mitufala i nomo stap storian abaot wan stori we i bin hapen longtaem finis long wan kantri we i stap longlongwe. Mitufala i stap tokbaot boe blong mitufala—stap tokbaot laef blong hem, ol nid blong hem, mo wei we prea i save helpem hem.

“Olsem ol papa mo mama, yumi gat responsabiliti ia blong helpem ol pikinini blong yumi blong ‘yusum evri skripja [yes i tru, evri pat blong gospel blong Jisas Kraes] i kambak long laef blong yumiwan [mo long laef blong ol pikinini blong yumi], … blong gud blong ol famli blong yumi, mo blong ol famli blong yumi oli lanem samting’” (“With All the Feeling of a Tender Parent: A Message of Hope to Families,” Ensign o Liahona, May 2004, 90).

Samfala tingting blong stap yusum ol skripja oli kambak long yumiwan.

• Tingting abaot sam samting we i bin hapen, o sam situesen long taem blong yumi tedei, we oli semmak long hemia we i stap long ol skripja we yu stap ridim.

• Lukaotem insaed long ol skripja, wanem nao ol pipol oli save, wanem oli lanem, mo mekem, we i save helpem yu wetem wan problem blong yuwan, o wan kwestin blong yuwan.

• Faenemaot ol prinsipol aot long stori ia we i save helpem yu long situesen blong yuwan.