I Swit I Bitim Evri Samting we I Swit, i kam long Miguel Ángel González Romero

20–26 Jenuware

1 Nifae 11–15

“Oli Blokem Olgeta Wetem Stret Fasin mo Paoa blong God”

Blong stat blong rere blong tij, ridim 1 Nifae 11–15. Raetemdaon ol tingting mo ol filing blong yu abaot ol skripja mo ol prinsipol we bae yu leftemap tingting blong ol memba blong klas blong toktok raon long olgeta. Ol aedia ia andanit, oli save help.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Olgeta japta ia oli gat ol prinsipol we ol memba blong klas oli save lukluk long olgeta taem oli stap serem gospel wetem ol narawan. Tingting blong raetem ol kaen kwestin ia long bod, mo invaetem ol memba blong klas blong serem ol samting we oli bin faenem insaed long riding blong olgeta long wik ia, we i save help blong ansarem olgeta kwestin ia:

• ?Wanem hem i Apostasi mo Restoresen?

• ?From wanem i nid blong gat Buk blong Momon?

• ?Olsem wanem, miwan, bae mi save save ol trutok blong God?

Stap Tijim Doktrin

1 Nifae 11:1–5, 13–33

God i sendem Jisas Kraes blong soemaot lav blong Hem.

• Wan enjel i soem long Nifae ol simbol mo ol taem blong laef blong Sevya we i soemaot lav blong God. Maet bae yu faenem se bae i helpem yu blong luklukgud long ol simbol mo ol taem ia olsem wan klas, mo toktok raon long hao nao oli soemaot lav we God i gat long yumi. ?I gat eni pikja, vidio, o eni nara tul we yu save soem we i tokbaot o soem sam long olgeta taem ia we oli tokbaot long ol ves ia? (eksampol, luk long biblevideos.ChurchofJesusChrist.org). ?Olsem wanem nao, laef mo Atonmen blong Sevya oli helpem yu blong andastanem lav ia we God i gat long yu?

1 Nifae 12–15

God bae i helpem yumi blong stanap agensem fos blong Setan.

• Ol memba blong klas blong yu, samtaem oli filim se oli olsem ol pipol insaed long visen blong Nifae, we oli stap wokbaot olbaot long ol klaod blong tudak, o oli fesem ol jik blong olgeta ia we oli stap long bigfala haos wetem plante spes. Yu save askem long klas se from wanem nao ol klaod blong tudak oli wan gudfala simbol blong temtesen (luk long 1 Nifae 12:17,) mo from wanem nao bigfala haos wetem plante spes i wan gudfala simbol blong ol krangke tingting mo hae tingting blong wol ia (luk long 1 Nifae 12:18). Afta, yu save serem ol japta 12 kasem 15 long ol memba blong klas, mo invaetem olgeta blong lukaotem ol ves we oli stap tijim olsem wanem nao God bae i helpem yumi blong winim temtesen, fasin blong tingting nating, mo fasin blong gat hae tingting (luk long 1 Nifae 13:34–40; 14:14).

• ?Yu yu save helpem ol memba blong klas blong yu blong oli andastanem gud moa paoa ia we i kamaot long toktok blong God? (luk long 1 Nifae 15:24). Yu save invaetem olgeta blong toktok raon long ol kwestin olsem ia: ?Wanem nao Nifae i lanem abaot paoa blong toktok blong God? ?Olsem wanem nao Setan i stap traem blong daonem toktok blong God? (luk long 1 Nifae 13:26–29). ?Wanem nao Lod mo ol profet blong Hem oli mekem blong holemtaet gud toktok blong Hem? Olsem pat blong toktok insaed long klas, yu save askem, long sam memba blong klas, olsem wanem oli stadi ol skripja mo wanem oli stap mekem blong mekem se toktok blong God i pat blong evri dei laef blong olgeta.

1 Nifae 13

Lod i mekem wan rod i rere blong Jos blong Hem i Kambak long wol.

• Sapos yu mekem wan taem laen, bae i save helpem ol memba blong klas blong andastanem visen blong Nifae long saed blong ol wanem bae i hapen long taem blong Restoresen. Yu save askem ol memba blong klas blong oli raetem wan taem laen antap long bod, mo raetem long hem ol samting we i bin hapen we oli faenem se hem i stap long 1 Nifae 13. ?Wijwan long ol samting ia i bin tekem ples finis? ?Wijwan i stap hapen naoia? Tingting blong serem kwot we i stap long “Sam Moa Risos” we i kam long George Washington, we i fas presiden blong Yunaeted Stet, we i soem se hem i bin luksave paoa o fos blong God long taem blong Revolusen long Amerika; hemia i wan taem we i mekem ol samting oli rere blong Restoresen i hapen.

• ?Olsem wanem nao ol memba blong klas oli save yusum 1 Nephi 13 blong eksplenem long wan we i blong wan nara jos, se from wanem i nid blong gat gospel ia we i bin kambak? (eksampol, luk long 1 Nifae 13:26–29, 35–42). ?Wanem nara skripja nao ol memba blong klas oli save yusum blong helpem ol narawan blong andastanem from wanem i nid blong gat gospel we i kambak? (Blong gat sam eksampol, luk long, “Restoration of the Gospel”). Ol memba blong klas oli save lanem samting aot long wan rol plei we bae i soem olgeta olsem wanem blong eksplenem long wan abaot nid blong gat gospel ia we i kambak, mo olsem wanem gospel ia i bin blesem olgeta.

1 Nifae 13:20–41

Buk blong Momon i stap tijim ol trutok we oli klia mo oli gudfala.

• Bae hem i gud blong yusum 1 Nifae 13:20–41 blong statem toktok raon long topik ia, from wanem yumi nidim Buk blong Momon. Ol memba blong klas oli save raetemdaon sam long ol “klia mo gudfala” samting we oli bin lus long Baebol, mo i kambak tru long Buk blong Momon (blong gat sam eksampol, luk long ol ves 26 mo 39 o ol lis we oli stap anda long “Sam Moa Risos”). Mo tu, yu save invaetem ol memba blong klas blong serem olsem wanem ol “klia mo gudfala samting” we oli kambak i bin helpem olgeta blong kam kolosap moa long God.

  

  Spirit i save helpem yumi blong faenemaot blong yumiwan “ol trutok we oli klia mo oli gudfala”.

• Tingting blong soem vidio ia, “The Book of Mormon—a Book from God” (ChurchofJesusChrist.org) ia i stap tijim abaot from wanem yumi nidim Buk blong Momon. O, yu save invaetem wan memba blong klas blong droem, long bod, wanem we Elda Tad R. Callister i talem, we i stap long “Sam Moa Risos.” Afta, ol memba blong klas oli save serem olsem wanem Buk blong Momon i bin helpem olgeta blong andastanem gospel blong Jisas Kraes i gud moa.

Stap Leftemap Tingting blong Lanem Samting long Hom

Blong leftemap tingting blong ol memba blong klas blong ridim 1 Nifae 16–22 long wik we i stap kam, yu save talem se i gat wan stori long ol japta ia, we i save givim insperesen mo i save helpem olgeta taem oli mas mekem wan samting we oli luk se bae i no posibol blong mekem.

Sam Moa Risos

Ol Vidio blong Buk blong Momon.

Faenem ol vidio, long Inglis, we i soem ol stori we oli stap long 1 Nifae 11–15 insaed long “Book of Mormon Videos” long ChurchofJesusChrist.org o insaed long Gospel Laebri ap.

Han blong God long taem blong Revolusen long Amerika.

George Washington i talem: “Man i mas nogud; hemia man ia we i stap lukluk long wanem i bin hapen long taem blong Revolusen long Amerika mo i no filim bigfala tangkyu i go long Bigfala Man we I Mekem Yunives, we plante taem tumas, Hem i bin stap toktok from yumi” (Leta i go long Samuel Langdon, 28 Sept 1789, founders.archives.gov/documents/Washington/05-04-02-0070).

Buk blong Momon Lis blong Presiden Russell M. Nelson

I kamaot long “Buk blong Momon: ?Bae I Olsem Wanem Sapos Yu No Gat Buk Ia?” (Ensign o https://www.ChurchofJesusChrist.org/languages/bis/content/general-conference/2017/10/the-book-of-mormon-what-would-your-life-be-like-without-it, Okt 2017).

Buk blong Momon i sakemaot tingting ia, se:

• Revelesen i stop wetem Baebol.

• Ol smol pikinini oli nid blong kasem baptaes.

• Oli save faenem hapines long fasin nogud.

• Gud fasin blong wanwan man i inaf blong kam olsem wan god (i nid blong gat ol odinens mo ol kavenan.)

• Foldaon blong Adam i makem ol man wetem “fasfala sin.”

Buk blong Momon i mekem samting i klia blong man i andastanem abaot:

• Laef blong yumi bifo laef ia long wol.

• Ded. Foldaon ia i wan pat we i nid blong stap insaed long bigfala plan blong God blong hapines.

• Laef blong yumi afta long ded, we i stat insaed long paradaes.

• Olsem wanem bodi i laef bakegen long ded mo i joen bakegen wetem spirit, nao i kam wan sol we i nomo save ded bakegen.

• Olsem wanem we jajmen we bae i kam long Lod bae i folem ol wok blong yumi mo ol tingting blong hat blong yumi.

• Olsem wanem oli stap mekem ol odinens: eksampol: baptaes, sakramen, stap givim Tabu Spirit.

• Atonmen blong Jisas Kraes.

• Laef Bakegen long Ded.

• Impoten rol blong olgeta enjel.

• Fasin ia we prishud i no save finis.

• Olsem wanem fasin blong man i folem moa paoa blong toktok i bitim paoa blong naef blong faet.

Yumi nidim Buk blong Momon.

Elda Tadd R. Callister i tijim se:

“Baebol i wan witnes abaot Jisas Kraes; Buk blong Momon i wan narawan. ?From wanem seken witnes ia hem i impoten tumas? Eksampol ia i save help: ?Hamas stret laen nao yu save droem we i pas tru long wan mak nomo we i stap long wan pis pepa? Ansa hem i, plante we plante we i no gat en. Blong smol taem, tingting se wan mak ia i ripresentem Baebol mo ol handred stret laen ia we i go tru long mak ia oli ripresentem ol defren intepretesen blong Baebol, mo we, wanwan long ol intepretesen ia i ripresentem wan defren jos.

“Be, ?wanem i hapen sapos, long pis pepa ia, i gat wan seken mak we i ripresentem Buk blong Momon? ?Hamas stret laen bae yu save droem bitwin tufala mak ia: Baebol mo Buk blong Momon? Wan nomo. I gat wan intepretesen nomo blong ol doktrin blong Kraes we bae i laef tru long testemoni blong tufala witnes ia” (“The Book of Mormon—a Book from God,” Ensign o Liahona, Nov. 2011, 75).

Stap Kam Antap long Fasin blong Yumi blong Stap Tij

Lidim ol toktok wetem insperesen. Evriwan i gat wan samting blong talem blong givhan long storian insaed long klas, be samtaem, i no evriwan i gat janis blong toktok. Lukaotem sam wei blong mekem se moa memba blong klas i gat janis blong serem testemoni blong olgeta. (Luk long Teaching in the Savior’s Way, 33.)