Lihae I Stap Wokbaot Kolosap long Red Si, i kam long Gary Smith

6–12 Jenuware

1 Nifae 1–7

“Bae Mi Go mo Mekem”

Olsem wan Sandei Skul tija, yu stat blong rere taem yu mekem stadi blong yuwan blong ol skripja. Lisingud long Spirit mo raetemdaon ol toktok we Spirit i talem long yu.Kam Folem Mi—Blong Wanwan Man, Woman mo Famlii save kam blong helpem stadi blong yu.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Plante long ol memba blong klas blong yu, maet oli save gud 1 Nifae 1–7, be evri taem we yumi stap ridim ol skripja, yumi save lanem ol trutok we oli go stret wetem situesen blong laef we yumi stap long hem naoia. Blong statem toktok insaed long klas, maet yu save askem ol memba blong klas wanem nao oli bin lanem, o wanem nao i kambak long maen blong olgeta taem we oli bin stadi long wik ia.

Stap Tijim Doktrin

1 Nifae 1; 3–6

Ol skripja oli bigwan mo impoten tumas.

• Wan bigfala mesej insaed long Buk blong Momon, hem i bigfala praes blong toktok blong God. Hemia i save stap olsem wan gudfala mesej blong serem taem klas blong yu i stat blong stadi long Buk blong Momon. Long stat, yu save askem wanwan memba blong klas blong jusum wan japta we i kamaot long 1 Nifae 1; 3–6 mo lukluktru long hem, mo i lukaotem ol wei we toktok blong God i blesem stret ol memba blong famli blong Lihae, o i blesem olgeta tru long wan narawan o wan nara samting. (Bae i wok gud sapos ol memba blong klas oli save mekem aktiviti ia long ol smol grup.) Afta, invaetem sam blong serem wanem oli faenem. ?Wanem nao ol stori ia oli stap tijim yumi long hem long saed blong hamas ol skripja oli impoten?

• Wan long ol gol blong yu, olsem wan tija, i blong leftemap tingting blong wanwan man, woman mo famli blong stadi long gospel aotsaed long klas. Maet yu save invaetem ol memba blong klas blong luklukgud olsem wanem Lihae i bin stadi long ol buk we oli wokem long bras (luk long 1 Nifae 5:10–19), mo afta, yu save askem ol kwestin olsem ia: ?Wanem nao fasin we Lihae i gat wetem ol skripja? ?Wanem nao hem i faenem we i impoten tumas long ol skripja ia? Ol memba blong klas oli save lukluk tu long mesej blong Elda Richard G. Scott “The Power of Scripture” (Ensign o Liahona, Nov. 2011, 6–8) o ridim wan pat blong mesej ia we i stap long “Sam Moa Risos.” ?Olsem wanem yumi save praktisim ol tijing blong Elda Scott taem yumi stap stadi long Buk blong Momon long yia ia?

• Olsem wan klas, yufala i save singsing long wan hym abaot ol skripja, olsem “As I Search the Holy Scriptures” (Hymns, no. 277). Afta, yu save invaetem ol memba blong klas blong serem olsem wanem stadi blong olgetawan blong ol skripja, i bin blesem laef blong olgeta. Mo tu, oli save serem olsem wanem ol skripja i bin givim insperesen long olgeta blong “kam long … God … blong hem i sevem olgeta” (1 Nifae 6:4).

1 Nifae 2:11–19; 3:28–31

Yumi save kasem wan testemoni blong yumiwan taem yumi mekem hat blong yumi i sopsop.

• Nifae, oli savegud hem from strong fet blong hem long Lod, be bae i helpem ol memba blong klas blong luksave se, hem tu, Nifae, i bin wok blong kasem testemoni blong hem—semmak nomo olsem yumi evriwan. Maet ol memba blong klas oli save faenemaot insaed long 1 Nifae 2:16–19 wanem nao i mekem i posibol blong Nifae i kasem wan witnes. Oli save lukluk tu i gobak long ol ves 11–14 blong luk gud from wanem Leman mo Lemyul i no kasem wan witnes. Hemia bae i wan gud taem blong invaetem ol memba blong klas blong serem olsem wanem oli kasem testemoni blong olgeta.

• Samtaem, yumi wantem gat wan merikel blong save kasem, o blong mekem ol testemoni blong yumi oli kam strong moa. Be Leman mo Lemyul, tufala i luk wan enjel ia, be yet, fet blong tufala i no muv bigwan. ?Wanem nao ol memba blong klas oli save lanem aot long eksperiens ia, we oli tokbaot long 1 Nifae 3:28–31, long saed blong wanem i mekem testemoni blong yumiwan i gro strong moa? (luk tu long 1 Nifae 2:16). Tingting blong serem kwot blong Presiden Harold B. Lee we i stap long “Sam Moa Risos.” ?Wanem nao yumi save mekem blong holem strong ol testemoni blong yumi?

1 Nifae 3–4

God bambae i mekem wan rod i rere blong yumi save mekem tingting blong Hem.

• Eksperiens blong ol boe blong Lihae, we i stap long 1 Nifae 3–4, bae yumi luk se i spesel tumas, be plante long yumi i bin gat ol eksperiens ia we yumi folem tingting blong God nomata we yumi luk se i had blong mekem. Taem ol memba blong klas oli bin ridim 1 Nifae 3–4 long wik ia, ?wanem trutok nao oli bin faenem, we i mekem oli tingbaot wan eksperiens we i blong olgetawan nomo? Maet yu save askem ol memba blong klas blong serem ol ves we oli stap tijim ol trutok ia, mo invaetem olgeta blong serem ol eksperiens ia. ?Olsem wanem ol trutok ia oli stap helpem yumi taem we God i wantem luk yumi mekem wan samting we i had blong mekem?

• Yu save serem klas long tri grup, mo givim wok long wanwan grup blong stadi long wanwan wei we ol boe blong Lihae oli yusum blong traem kasem ol buk we oli wokem long bras, aot long Leban (luk long 1 Nifae 3:9–21; 1 Nifae 3:22–31; 4:1–4; mo 1 Nifae 4:5–38). Afta, yu save invaetem wanwan grup blong serem wanem wanwan long ol rod ia i tijim yumi abaot fasin blong mekem tingting blong Lod i kamtru. ?Olsem wanem ol eksampol ia oli go wetem wanwan traehad blong yumi blong mekem tingting blong God i kamtru?

Glad blong Olgeta i Fulwan, i kam long Walter Rane

Stap Leftemap Tingting blong Lanem Samting long Hom

Blong givim insperesen long ol memba blong klas blong ridim 1 Nifae 8–10, yu save serem toktok ia we i kam long Presiden Dieter F. Uchtdorf: “Wetem plante paoa we oli traem blong pulum yumi longwe, ?olsem wanem nao bae yumi putum ae blong yumi i luk nomo glori blong hapines we Lod i promesem long olgeta we oli stap fetful? Mi biliv se ansa i stap long wan drim blong wan profet, plante taosen yia i pas. Profet ia, nem blong hem i Lihae, mo drim blong hem i stap long gudfala Buk blong Momon” (“Three Sisters,” Ensign o Liahona, Nov. 2017, 18–19).

Sam Moa Risos

Ol vidio blong Buk blong Momon.

Faenem ol vidio, long Inglis, we i soem ol stori we oli stap long 1 Nifae 1–7 insaed long “Book of Mormon Videos” long ChurchofJesusChrist.org o insaed long Gospel Laebri ap.

Ol skripja oli gat bigfala paoa i stap.

Elda Richard G. Scott i testifae abaot hamas ol skripja oli impoten:

“Ol skripja oli olsem ol paket blong laet we i saenem gud maen blong yumi mo i givim spes blong heven i lidim mo i givim insperesen long yumi. Oli save kam olsem ki we i openem rod blong yumi kam wan wetem Papa blong yumi we i stap long Heven, mo wetem Pikinini blong Hem we Hem i Lavem Tumas, Jisas Kraes.

“Ol skripja, oli save kam ol top fren we oli neva stap longwe long yumi, o oli neva kam long wan taem nomo long wan yia. Oli stap oltaem nomo blong yumi yusum taem yumi nidim. Taem yumi yusum ol skripja, hemia i stap olsem wan fandesen blong trutok we Tabu Spirit i save wekemap eni taem. Blong stap lanem, stap tingting hevi, stap luklukgud, mo stap lanem ol skripja baehat, i olsem blong fulumap wan kabod wetem ol fren, ol valiu, mo ol trutok we yumi save go from eni taem, long eni ples long wol. …

“Blong stap tingting hevi long wan pat blong wan skripja, i save kam wan ki blong openem doa blong revelesen mo blong Tabu Spirit i lidim mo givim insperesen long yu. Ol skripja i save mekem sol we i gat hadtaem i kam kwaet, i givim pis, hop mo i putumbak tras long yuwan abaot paoa blong yu blong save winim ol jalenj blong laef. Oli gat bigfala paoa blong hilim ol jalenj long saed blong filing taem we fet i stap long Sevya. Oli save mekem bodi blong yumi i kam oraet kwiktaem” (“The Power of Scripture,” Ensign o Liahona, Nov. 2011, 6).

Testemoni blong yumi i mas kam niu evri dei.

Presiden Harold B. Lee i tijim: “Wanem we yu gat olsem wan testemoni tedei, bae i no blong yu tumoro sapos yu no mekem wan samting wetem”” (Teachings of Presidents of the Church: Harold B. Lee [2000], 43).

Stap Kam Antap long Fasin blong Yumi blong Stap Tij

Yusum ol stori mo ol eksampol blong tijim ol prinsipol blong gospel. Plante long ol trutok we oli no save finis insaed long ol skripja, oli stap tijim olgeta tru long ol eksperiens o tru long ol stori we oli stap insaed long ol skripja ia. Taem yu stap rere blong tij, tingting long ol eksperiens we yu bin gat se i save kam olsem wan seken witnes long ol stori insaed long ol skripja mo ol prinsipol ia we oli soemaot. (Luk long Teaching in the Savior’s Way, 22.)