30 Disemba—5 Jenuware .

Ol Fas Pej blong Buk blong Momon

“Wan Narafala Testeman blong Jisas Kraes”

Stadi long olgeta pat ia blong Buk blong Momon taetol pej mo fas toktok; testemoni blong Olgeta Tri Witnes, blong Olgeta Eit Witnes, mo blong Profet Josef Smit; mo “Wan Smol Toktok long saed blong Buk blong Momon.” Taem yu stap rid, lukaotem ol toktok we Tabu Spirit i talem long yu long wei we yu save givim insperesen long klas blong yu blong statem wan stadi, we i gat mining, blong Buk blong Momon.

Raetemdaon Ol Filing mo Ol Tingting blong Yu

Invaetem Man blong Serem Wanem we Oli Gat

Blong stat wetem, yu save invaetem samfala pipol blong serem wan samting we oli bin lanem aot long ol fas pej blong Buk blong Momon, we i mekem se testemoni blong olgeta abaot buk ia i kam antap moa.

Tijim Doktrin

Taetol pej blong Buk blong Momon

Buk blong Momon i save mekem fet blong yumi abaot Jisas Kraes i kam strong moa.

• Sapos yu ridim taetol pej blong Buk blong Momon, we Moronae i bin raetem, i save mekem ol memba blong klas blong yu oli rere blong stadi long Buk blong Momon long yia ia. ?Olsem wanem nao ol mesej long taetol pej i mekem stadi blong olgeta i kam gud moa? Maet yu save raetem wan, o moa long wan kwestin long bod—olsem, ?From wanem yumi gat Buk blong Momon? o ?Long wanem wei nao Buk blong Momon i defren long ol nara buk?—mo invaetem ol memba blong klas blong lukaotem ol ansa taem oli luklukbak long taetol pej olgetawan, o taem oli wok tutu. Afta, oli save serem ol tingting o filing we i kam long maen mo hat blong olgeta. Mo tu, yu save leftemap tingting blong ol memba blong klas blong toktok raon long ol plan we oli gat blong stap stadi long Buk blong Momon long yia ia. Eksampol, ?bae oli lukaot wanem insaed long buk? ?Olsem wanem nao bae oli lanem samting tru long Tabu Spirit taem oli stap stadi?

• Wan long ol impoten stamba tingting blong Buk blong Momon i stap long taetol pej blong hem: “blong winim tingting blong Ol Jiu mo Jentael se Jisas hem i Kraes.” Yu save invaetem ol memba blong klas blong serem samfala pat blong Buk blong Momon we i mekem fet blong olgeta long Jisas Kraes i kam strong moa (oli save ridim tu samfala ples long skripja we oli putum long lis blong “Sam Moa Risos”). Ol memba blong klas oli save ridim sam long ol ves ia long wan we i sidaon long saed blong hem, mo serem olsem wanem Buk blong Momon i givim paoa long testemoni blong olgeta abaot Sevya.

Fas Toktok long saed blong Buk blong Momon.

Buk blong Momon i save helpem yumi blong “kam moa kolosap long God.”

• Pat ia, Fas Toktok long Buk blong Momon i givim ol infomesen we i impoten blong olgeta we oli ridim, blong oli mas andastanem. Ol memba blong klas blong yu bae oli lanem fulap samting sapos oli rid tru long fas toktok ia, mo sapos oli save faenem tri o faef poen we bae i gud blong serem wetem wan we i stap ridim Buk blong Momon blong fas taem. Ol memba blong klas oli save serem wanem oli faenem afta. Oli save mekem rol plei tu blong presentem Buk blong Momon long wan. Ol vidio we oli putum i stap long “Sam Moa Risos,” oli save help tu.

• Maet sam memba blong klas blong yu oli bin gat ol eksperiens we i konfemem se ol toktok blong Josef Smit oli tru, we i talem se: “Wan man bae i kam moa kolosap long God sapos hem i folem ol tijing blong [Buk blong Momon], bitim eni narafala buk.” Yu save askem ol memba blong klas blong serem olsem wanem ol trutok we oli lanem insaed long Buk blong Momon i helpem olgeta blong kam kolosap moa long God. Yu save invaetem ol memba blong klas blong serem ol ansa blong ol trifala kwestin ia we Presiden Russell M. Nelson i askem: “Faswan, ?Bae laef blong yu i olsem wanem sapos i no gat Buk blong Momon? Sekenwan, ?Wanem nao bae yu no save? Mo nambatri, ?Wanem nao bae yu no save gat?” (“Buk blong Momon: ?Bae I Olsem Wanem Sapos Yu No Gat?” (Ensign o Liahona, Nov 2017, 61).

• ?I gat eniwan insaed long klas blong yu we i bin ridim sam pat insaed long Buk blong Momon we i gat ol defren nem blong plan blong fasin blong sevem man, olsem we i stap long Kam Folem Mi—Blong Wanwan Man, Woman mo Famli? Sapos i gat, invaetem olgeta blong serem wanem oli lanem.

“Testemoni blong Olgeta Tri Witnes”; “Testemoni blong Olgeta Eit Witnes”

Yumi evriwan i save kam ol witnes blong Buk blong Momon.

• Taem ol memba blong klas oli stadi long ol testemoni blong Olgeta Tri mo Olgeta Eit Witnes, i save mekem testemoni blong olgeta i kam strong moa, mo i save helpem olgeta blong tingting hevi long olsem wanem nao oli save serem witnes blong olgeta. Yu save askem haf blong klas blong ridim “Testemoni blong Olgeta Tri Witnes” mo nara haf blong ridim “Testemoni blong Olgeta Eit Witnes” mo blong oli serem ol filing mo ol tingting we i kamaot klia long olgeta. ?Long wanem wei nao tufala testemoni ia oli defren? ?Long wanem wei nao oli semsemmak? ?Wanem nao yumi lanem aot long ol witnes ia abaot fasin blong serem testemoni blong yumi? Blong statem toktok raon long, from wanem nao Olgeta Tri Witnes ia oli impoten, yu save serem toktok blong Presiden Dallin H. Oaks o testemoni blong Jon Witma we i stap long “Sam Moa Risos,” o, yu save soem vidio ia “The Testimony of the Three Witnesses” (ChurchofJesusChrist.org).

Olgeta Tri Witnes oli testifae abaot Buk blong Momon.

“Testemoni blong Profet Josef Smit”

Josef Smit, i bin stap olsem wan tul long han blong God blong tekem Buk blong Momon i kamtru long wol ia.

• Maet ol memba blong klas oli savegud finis long stori blong “Testemoni blong Profet Josef Smit,” be maet yu save helpem olgeta blong oli faenem sam niu tijing long hem. Eksampol, yu save invaetem olgeta blong oli raetemdaon ol ki samting we oli bin hapen, we i stap long stori blong Josef Smit. ?Wanem nao yumi save talem, aot long eksperiens blong hem, abaot hamas nao Lod i tekem se Buk blong Momon i impoten?

• Hym ia, long Inglis, “An Angel from on High” (Hymns, no. 13) i tokbaot se bae Buk blong Momon i kam. Afta we yufala i singsing, o yufala i lisin long hym ia, ol memba blong klas oli save faenem ol toktok insaed long “Testemoni blong Profet Josef Smit” we i go wetem, o i tokbaot strong moa sam toktok blong singsing ia.

Stap Leftemap Tingting blong Lanem Samting long Hom

Blong givim insperesen long ol memba blong klas blong ridim 1 Nifae 1–7, invaetem olgeta blong lukaotem samfala aedia o trutok we i stap helpem olgeta wetem situesen blong laef we oli stap long hem naoia—eksampol, wan jalenj blong famli, o wan koling long Jos.

Sam Moa Risos

Samfala pat long Buk blong Momon we oli testifae abaot Jisas Kraes.

• Mosaea 3:5–8

• Alma 5:48; 7:10–13

• Hileman 5:12

• 3 Nifae 9:13–18; 11:6–14

• Moronae 10:32–33

Ol vidio long saed blong Buk blong Momon oli stap long Inglis long ChurchofJesusChrist.org.

• “Book of Mormon Introduction”

• “What Is the Book of Mormon? A 60-Second Overview”

• “A Book of Mormon Story”

Blong luk moa, luk long Evri Vidio blong Buk blong Momon we oli stap long Inglis long ChurchofJesusChrist.org o long Gospel Laebri ap.

Hamas Olgeta Tri Witnes Oli Impoten.

Presiden Dallin H. Oaks i eksplenem from wanem testemoni blong Olgeta Tri Witnes i save winim ol tingting:

“ Testemoni blong Olgeta Tri Witnes blong Buk blong Momon oli stanap wetem strong paoa. Wanwan long olgeta trifala witnes ia i gat bigfala risen mo janis blong sakemaot testemoni blong hem sapos i bin wan giamanwan, o blong talemaot evri ditel sapos i no bin stret. Olsem we yumi save gud, from sam oli no bin agri, mo sam oli bin jalus mo hemia samfala lida blong Jos tu oli involve, wanwan long olgeta trifala witnes ia, oli bin eskomuniketem olgeta long Jos Ia blong Jisas Kraes blong Ol Lata-dei Sent blong kolosap eit yia afta we oli pablisim testemoni blong olgeta. Olgeta tri ia, wanwan i go i folem rod blong hem, mo oli no gat intres blong joenem wan grup blong giaman long man. Be yet, i go kasem en blong laef blong olgeta—ol taem we i stat long 12 kasem 50 yia afta we oli eskomuniket—i no gat wan long olgeta witnes ia we i jenisim testemoni we oli bin pablisim, o i no gat wan i talem wan samting we i save putum kwestin mak se Buk blong Momon i tru o no.” (“The Witness: Martin Harris,” Ensign, May 1999, 36).

Testemoni blong Jon Witma.

Jon Witma, wan long Olgeta Eit Witnes blong Buk blong Momon, i talemaot: “mi neva harem se wan long olgeta tri, o olgeta eit witnes oli tanem baksaed long testemoni ia we oli talemaot. … Nem blong mifala i go kasem evri nesen, lanwis mo pipol olsem wan tabu revelesen we i kam long God. Mo bae i mekem se ol plan blong God bae oli kamtru folem ol toktok we oli stap insaed long buk ia” (insaed long Noel B. Reynolds, ed., Book of Mormon Authorship Revisited: The Evidence for Ancient Origins [1997], 55–56).

Stap Kam Antap long Fasin blong Yumi blong Stap Tij

Lukaotem blong yu kasem insperesen yuwan. Yu no lukluk long ol aotlaen ia olsem ol instraksen we yu mas folem, be yu yusum olgeta blong kasem sam aedia, o blong givim laet blong yu kasem insperesen blong yuwan nomo taem yu stap tingting hevi long ol nid blong olgeta ia we yu stap tijim olgeta.