Wan Paten blong Stap Tij

Long risos ia, bambae yu folem ol trifala step paten ia we oli ripriptim long wanwan aotlaen: invaetem man blong serem wanem oli gat, stap tijim doktrin, mo stap leftemap tingting blong lanem samting long hom. Taem yu stap tij, ol defren pat blong paten ia oli save joen, o oli save stap long defren oda. Eksampol: tekem se blong serem samting i wan janis blong stap tijim doktrin, mo blong stap tijim doktrin, insaed, i mas gat invitesen long man blong serem wanem oli gat. Semmak, blong stap leftemap tingting blong lanem samting long hom i save hapen long ful taem blong storian insaed long klas. Letem ol defren pat blong paten ia oli tekem ples insaed long klas, olsem we oli kam, mo folem ol kwaet toktok blong Spirit blong save lukluk long nid blong ol pipol we yu stap tijim olgeta.

Invaetem Ol Pikinini blong Serem Wanem Oli Gat

Olsem pat blong evri klas, invaetem ol memba blong klas blong serem ol niu tingting mo ol eksperiens we oli bin gat long wik bifo taem oli bin stadi long ol skripja, olgetawan olsem wanwan man, woman, mo olsem ol famli, mo taem oli stap praktisim wanem oli bin lanem. Helpem ol memba blong klas blong luk se wanem oli stap lanem olgetawan aotsaed long klas, hem i impoten. Blong wanwan i jenisim laef blong hem bae i no hapen tru long wanem oli lanem long Sandei nomo, be tu, tru long evri dei eksperiens blong olgeta. Taem ol memba blong klas oli harem eksperiens blong ol narawan, bae oli wantem moa blong gat ol semfala kaen eksperiens olsem tu.

Bae i no evriwan we bae i ridim ol japta blong wanwan lesen, mo iven, sam bae oli filim i stret blong serem samting. Meksua se evri memba blong klas oli filim we oli wan impoten pat insaed long klas, i nomata se oli gat, o oli no gat wan samting blong serem.

Stap Tijim Doktrin

Yu mo ol memba blong klas blong yu i mas lukluk nomo long doktrin—ol trutok we oli no save finis blong gospel—mo oli stap long ol skripja we oli givim wok blong stap ridim mo stadi. Taem yu stap toktok raon long doktrin we oli kamaot long ol skripja, ?wanem ves, kwot, eksperiens, kwestin mo sam moa risos nao yu wantem serem? ?Olsem wanem nao yu save yusum ol risos ia blong save helpem ol memba blong klas blong faenemaot mo andastanem ol prinsipol blong gospel? ?Olsem wanem nao yu save leftemap tingting blong ol memba blong klas blong raetemdaon mo tekem aksen folem ol tingting mo ol filing we oli bin kasem?

Stap Leftemap Tingting blong Lanem Samting long Hom

Long en blong lesen, tekem smol taem blong lukluk tru long wanem bae yufala i toktok raon long hem long nekis wik. Tingting long wanem wei nao bae yu givim insperesen long ol memba blong klas blong gohed blong lanem samting aot long Buk blong Momon long hom, tugeta, wanwan man, woman mo wetem ol famli blong olgeta.