Drim blong Lihae, i kam long Steven Lloyd Neal

13–19 Jenuware

1 Nifae 8–10

“Kam mo Tekem mo Kakae Frut Ia”

Bifo yu ridim ol aedia we oli stap long aotlaen ia, ridim 1 Nifae 8–10 mo tingting long ol jalenj mo ol janis we ol pipol we yu stap tijim oli fesem. Raetemdaon ol filing mo ol tingting we yu kasem abaot wijwan prinsipol nao, aot long ol japta ia, we yu mas lukluk bigwan long olgeta insaed long klas.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Visen blong Lihae, yumi save yusum long plante samting long taem blong yumi tedei. Long stat blong klas, maet bae yu wantem invaetem sam memba blong klas blong oli serem ol niu tingting blong olgeta taem oli stap rid abaot visen ia. Leftemap tingting blong olgeta blong serem sam spesifik ves mo mining blong olgeta we oli faenem blong laef blong olgeta.

Stap Tijim Doktrin

1 Nifae 8:10–16

Taem yumi gat eksperiens long lav blong God, yumi wantem helpem ol narawan tu blong oli gat eksperiens ia.

• Hem i nomol blong serem ol samting we yumi lavem wetem ol pipol we yumi lavem, be samtaem, yumi faenem i had blong serem gospel. Sapos yu mekem ol memba blong klas oli toktok raon long visen blong Lihae, i save helpem olgeta blong faenem sam janis blong serem gospel. Yu save givim, long wan memba blong klas, wan pis frut mo askem hem blong winim tingting blong klas blong kakae frut ia oltaem. ?Olsem wanem nao lesen ia, we i yusum wan samting, i semmak long eksperiens blong Lihae long 1 Nifae 8:10–16? ?Wanem nao yumi save lanem aot long eksperiens blong Lihae we i save helpem yumi blong serem gospel? Olsem pat blong storian insaed long klas, yu save serem vidio ia, “Good Things to Share” (ChurchofJesusChrist.org).

• Elda David A. Bednar i tijim: “Frut ia, long tri, i wan simbol blong ol blesing blong Atonmen” (“Lehi’s Dream: Holding Fast to the Rod” Ensign o Liahona, Oct. 2011, 34). Tingting blong save toktok wetem samfala memba blong klas sam dei bifo, mo askem olgeta blong tingting longtaem long 1 Nifae 8:11–16 mo tingting long ol kwestin olsem: ?Olsem wanem nao bae mi save tokbaot swit filing we Atonmen blong Jisas Kraes i tekem i kam insaed long laef blong mi? ?Olsem wanem nao mi singaotem ol narawan blong testem Atonmen ia we i swit? (luk long ves 15). ?Olsem wanem nao ol narawan oli bin invaetem mi blong lukaotem ol blesing blong Atonmen blong Sevya? ?Wanem insperesen nao i kam long mi, we i talem wanem bae mi mekem, taem mi bin ridim 1 Nifae 8:11–16? Invaetem olgeta memba ia blong serem ol ansa blong olgeta long taem blong klas, mo invaetem evri memba blong klas blong serem ol niu tingting blong olgeta long taem blong toktok.

Minerva K. Teichert (1888–1976), Haos blong Wol, 1954, oel long bod, 36 x 48 inj. Brigham Yang Yunivesiti Miusiom blong Art

1 Nifae 8:19–38

Toktok blong God i stap lidim yumi long Sevya, mo i stap helpem yumi blong filim lav blong Hem.

• Wan wei blong statem toktok raon long visen blong Lihae, invaetem samfala memba blong klas blong oli droem wan pikja we i ripresentem visen ia antap long bod, mo oli yusum 1 Nifae 8:19–38 blong gaedem olgeta. O, yu save soem pikja blong visen blong Lihae we i stap long aotlaen blong wik ia we i stap long Kam Folem Mi—Blong Wanwan Man, Woman mo Famli. Afta, yu save invaetem wanwan memba blong klas blong faenem ol ves we i givim intepretesen blong wan long ol simbol we oli stap long droing, o long pikja—ol intepretesen ia oli stap long 1 Nifae 11:4–25, 35–36; 12:16–18; mo 15:21–33, 36. Taem ol memba blong klas oli stap serem wanem we oli faenem, invaetem olgeta blong toktok raon long wanem nao ol simbol ia oli stap tijim yumi. Eksampol, ?wanem nao, bigfala haos we i gat fulap spes, i stap tijim yumi abaot fasin blong gat hae tingting? ?Wanem nao rel blong aean i stap tijim yumi abaot toktok blong God? Oli save tokbaot tu olsem wanem visen blong Lihae i bin helpem olgeta blong kam long Kraes. ?Olsem wanem nao yumi bin luk yumiwan insaed long visen ia?

• Wan bigfala mesej insaed long visen blong Lihae, hem i hamas toktok blong God i impoten, we simbol blong hem, i rel blong aean ia. Blong help blong tokbaot bigwan mesej ia, yu save seraotem klas long fo grup mo givim wok long wanwan blong lanem abaot ol fo grup blong pipol we Lihae i bin luk, olsem we oli tokbaot long “Sam Moa Risos,” mo insaed long 1 Nifae 8:21–23, 24–28, 30, mo 31–33. Afta, letem ol memba blong klas oli serem wanem we oli bin lanem wetem wanwan long olgeta. Yu save givim sam minit tu long ol memba blong klas blong oli tingting hevi long wanem nao oli filim se oli mas mekem blong meksua se bae oli “holem strong rel blong aean” (1 Nifae 8:30).

1 Nifae 10:17–19

God bambae i talemaot trutok long yumi sapos yumi wok wetem strong tingting blong lukaotem trutok ia.

• Ol klaod blong tudak we oli blokem rod blong yumi, mo ol voes blong jik we oli kamaot long bigfala haos wetem plante spes, i save mekem se i had blong yumi faenem trutok ia. Blong stap ridim tugeta abaot eksampol blong Nifae olsem wan man we i stap lukaot long trutok, i save help. Maet bae yu wantem statem toktok taem yu askem ol memba blong klas blong faenem sam long ol mesej we wol i stap sendem we i mekem tingting i fasfas. Eksampol, ?wanem aedia blong wol nao we, ol profet mo ol aposol, oli givim woning long yumi abaot olgeta long las jeneral konfrens? Tingting blong mekem wan lis long bod, abaot ol step we Nifae i tekem blong kasem witnes blong hemwan se visen blong papa blong hem i tru o nogat (luk long 1 Nifae 10:17–19; 11:1). ?Olsem wanem yumi save folem eksampol blong Nifae taem yumi stap lukaotem trutok?

Stap Leftemap Tingting blong Lanem Samting long Hom

Blong givim insperesen long ol memba blong klas blong ridim 1 Nifae 11–15, invaetem olgeta blong faenemaot hao nao ol pikja ia oli go wetem drim blong Lihae: bebi Jisas, wan kros, mama blong ol woman blong rod, ol plante grup blong ol pipol we oli kam tugeta blong faet, mo ol buk.

Sam Moa Risos

Ol vidio blong Buk blong Momon.

Tingting blong soem wan vidio, long Inglis, we i soem ol stori we oli stap long ol japta ia (luk long “Book of Mormon Videos” long ChurchofJesusChrist.org o insaed long Gospel Laebri ap.

Ol fo grup blong ol pipol insaed long drim blong Lihae.

Grup 1.“Insaed long 1 Nifae 8:21–23 yumi stap lanem abaot fas grup blong ol pipol we oli bin gogohed mo oli stat blong wokbaot long rod ia we i lidim olgeta i go long tri blong laef. Be, taem ol pipol oli kam blong fesem ol klaod blong tudak, we i ripresentem ‘ol temtesen blong devel’ (1 Nifae 12:17), oli lusum rod blong olgeta, oli mestem mo kamaot long rod, mo oli go lus. Luk gud se long ol ves ia, oli no tokbaot rel blong aean. Olgeta we oli no wantem save, o oli no tingting hevi long toktok blong God, oli no save yusum tabu kampas ia we i poenem rod we i go long Sevya.”

Grup 2.“Insaed long 1 Nifae 8:24–28 yumi stap rid abaot seken grup blong ol pipol we oli bin kasem rod ia we i stret mo i no isi we i lidim olgeta i go long tri blong laef. Grup ia i bin ‘gogohed strong tru long klaod blong tudak, oli hang strong long rel blong aean, i go kasem taem we oli kamkamaot mo tekem mo kakae frut blong tri’ (ves 24). Be, taem olgeta ia we oli dresap flas insaed long bigfala haos wetem plante spes oli jikim seken grup ia blong ol pipol, ‘oli bin sem’ mo ‘foldaon i go long ol rod we i no blong folem, mo oli bin lus’ (ves 28). … Nomata oli bin gat fet, komitmen, mo toktok blong God, nambatu grup ia i bin go lus—ating from se oli ridim o stadi, o lukluk long ol skripja wanwan taem nomo. ”

Grup 3.“Long ves 30 yumi save ridim abaot wan nambatri grup blong ol pipol we oli bin tingting strong blong gohed , ‘oli stap holemtaet rel blong aean oltaem, kasem taem we oli kamkamaot, mo oli foldaon i go daon, mo oli tekem mo kakae long frut blong tri.’ Ki toktok long ves ia, hem i stap holemtaet oltaem rel blong aean. Nambatri grup ia tu i bin gogohed wetem fet mo strong tingting; be, oli no tokbaot se oli bin aot long rod, o foldaon long ol rod we i no blong folem, o oli go lus. Maet nambatri grup blong ol pipol ia, oltaem oli stap ridim, mo stap stadi, mo stap luklukgud insaed long ol skripja. … Grup ia nao, yu mo mi i mas traem blong joenem.”

Grup 4.“Nambafo grup i no bin wantem lukaotem tri ia, be oli bin wantem bigfala haos ia wetem plante spes, se hemia nao ples we oli wantem go long hem (luk long 1 Nifae 8:31–33).”

(David A. Bednar, “Lehi’s Dream: Holding Fast to the Rod,” Ensign o Liahona, Oct. 2011, 34–36.)

Stap Kam Antap long Fasin blong Yumi blong Stap Tij

Talemaot fasin blong gat tras long yuwan tru long fasin blong lukluk hae. Sam pipol we oli stap lanem samting, oli no gat tras long olgetawan; oli ting se oli no save stadi long gospel olgetawan. Promesem long ol memba blong klas se, taem oli stap traehad blong lanem samting olgetawan, bae Tabu Spirit i tijim olgeta. Yu save givim tingting long sam wei blong mekem, blong helpem olgeta blong stat wetem. (Luk long Teaching in the Savior’s Way, 29–30.)