King Benjamin i stap tijim ol pipol blong hem

Stap Wok blong God blong Yu, i kam long Walter Rane

“20–26 Epril

Mosaea 4–6

“Wan Bigfala Jenis”

Ridim Mosaea 4–6, mo raetemdaon ol filing blong yu long saed blong spirit. Taem yu bin stap kasem ol filing ia, yu save askem yuwan, olsem we Elda Richard G. Scott i talem: “?I gat moa samting we mi mas save?” (“To Acquire Spiritual Guidance,” Ensign o Liahona, Nov. 2009, 8).

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Yu save statem storian blong klas mo askem ol memba blong klas blong serem eni tijing blong King Benjamin we i stap insaed long Mosaea 4–5 we oli wantem praktisim gud moa insaed long laef blong olgeta.

tijing pikja bokis

Stap Tijim Doktrin

Mosaea 4:1–12

Tru long Jisas Kraes, yumi save kasem mo holemtaet fasin blong kam klin aot long ol sin.

• Sam pipol oli stap mekem mistek long tingting blong olgeta, mo ting se, blong sakem sin, i no nid blong hadwok from; ol narawan, oli biliv se hem i hadwok tumas. Blong helpem ol memba blong klas blong andastanem gud moa wanem i nid blong mekem blong kam klin aot long ol sin, yu save invaetem olgeta blong luklukgud insaed long ol tijing blong King Benjamin long Mosaea 4:1–12, mo lukaotem ol kondisen we Papa long Heven i givim o akseptem blong wan i kam klin aot long ol sin. Ol memba blong klas oli save listimdaon long bod wanem we oli faenem. Askem olgeta blong tingting long wan samting we oli save yusum blong komperem hemia, mo eksplenem wanem we oli bin lanem. Eksampol, oli save komperem fasin blong kam klin aot long ol sin long wan man we man i kaon long hem, mo hem i stap “karemaot” o tekemaot kaon ia. O, oli save komperem fasin blong holemtaet fasin blong sakem sin wetem fasin blong kea gud long wan samting we i nidim blong oli mas lukaotgud long hem oltaem, olsem wan garen, o wan hom.

• Tingting blong askem ol memba blong klas wanem nao bae oli talem long wan we i stap askem hemwan se i gud inaf blong stap traehad blong sakem sin o nogat. ?Olsem wanem nao bae oli helpem wan we i filim se tingting blong hem i slak mo i filim se blong winim sin mo wiknes, i wan samting we i no posibol? Yu save help blong mekem ol memba blong klas oli rere blong tekpat long ol kaen storian olsem taem yu askem olgeta blong spendem sam minit blong luklukgud insaed long ol toktok blong King Benjamin long Mosaea 4:1–12 blong faenem ol trutok we i save helpem wan long ol kaen situesen olsem. Ol memba blong klas oli save serem wanem oli faenem wetem wan we i sidaon kolosap long hem.

Mosaea 4:11–27

Taem yumi stap sakem sin, bambae yumi fulap wetem lav blong God.

• ?Olsem wanem nao yumi save se yumi bin kam klin aot long ol sin blong yumi? King Benjamin i tokbaot sam risal blong tru fasin blong sakem sin—invaetem ol memba blong klas blong yu blong faenem olgeta risal ia long Mosaea 4:13–16. Mo tu, yu save invaetem olgeta blong tingting hevi i gobak long laef blong olgeta bakegen mo skelem sapos oli stap laef gud folem ol tijing we oli tokbaot long ol ves ia, o nogat. ?Wanem saen nao ol memba blong klas oli luk we i talem long olgeta se oli bin jenisim laef blong olgeta? ?Olsem wanem rilesensip blong yumi wetem ol narawan i jenis taem yumi kam long Kraes tru long fasin blong sakem sin? Maet ol memba blong klas oli save serem olsem wanem oli luk hemia i bin, o i stap hapen insaed long laef blong olgeta.

• Mosaea 4:11–12 mo 14–16 i save statem wan storian abaot wanem nao i save givim insperesen long wan stret mo gud fasin blong stap olsem papa mo mama. ?Wanem nao ol ves ia oli stap tij abaot wei blong kam wan moa gud papa mo mama?

• Sapos yu filim insperesen blong toktok raon long ol tijing blong King Benjamin long saed blong fasin blong kea long olgeta we oli pua mo olgeta we oli stap long nid, yu save invaetem ol memba blong klas blong wan afta wan i ridim ol ves long Mosaea 4:16–27. Afta we oli ridim wanwan ves, hem we i ridim ves i talem, wetem toktok blong hem, wanem we King Benjamin i tijim. Oli save yusum mesej blong Elda Jeffrey R. Holland “I No Yumi Evriwan I Ol Man blong Askem Samting?” (Ensign o https://www.ChurchofJesusChrist.org/general-conference/2014/10/are-we-not-all-beggars?lang=bis, Okt. 2014, 40–42) blong kam sapotem storian insaed long klas. ?Olsem wanem nao yumi save folem advaes blong King Benjamin blong no “ron moa kwik bitim paoa we [yumi] gat”? (Mosaea 4:26–27). ?Olsem wanem nao komanmen ia blong “serem ol samting blong [yumi] long olgeta puaman” i go wetem fasin blong kam klin aot long sin?

Mosaea 4:29–30

Yumi mas lukaotgud long tingting, toktok mo aksen blong yumi.

• Samtaem bae yumi luk se bae i moa isi sapos Lod i givim yumi wan ditel lis blong evri sin we man i save mekem. Be yet, Hem i stap talem long yumi blong, yumi mas lukaot gud long yumiwan … mo gohed long fet blong wanem we yumi bin harem long saed blong taem we Lod bae i kam (Luk long Mosaea 4:30). Blong helpem klas blong yu blong toktok raon long prinsipol ia, yu save askem olgeta ol kwestin olsem ia: ?Olsem wanem nao ol tingting, ol toktok mo aksen blong yu i save spolem yuwan mo ol narafala man? ?Long yu, hem i minim wanem blong “gohed long fet”? ?Wanem advaes yumi save serem wetem wanwan long yumi blong helhelpem yumi blong “lukaot gud” long yumi?

Mosaea 5:1–7

Spirit blong Lod i save mekem wan bigfala jenis insaed long hat blong yumi.

• Blong statem wan storian abaot jenis ia, we yumi no save komperem long wan samting, we gospel blong Jisas Kraes i save tekem i kam insaed long laef blong yumi, yu save invaetem ol memba blong klas blong serem sam risen from wanem, plante taem hem i had blong mekem ol jenis we i stap blong oltaem insaed long laef blong yumi. Afta, invaetem olgeta blong ridim Mosaea 5:1–5, we oli lukaotem “bigfala jenis” ia we ol pipol blong King Benjamin oli bin gotru long hem. ?Wanem trutok abaot wan jenis long hat we yumi stap lanem aot long eksperiens blong olgeta? Tingting blong askem sam long ol memba blong klas blong oli serem olsem wanem Tabu Spirit i bin helpem olgeta blong jenisim hat blong olgeta. Yu save wajem tu wan long ol vidio we i stap long “Sam Moa Risos.”

  Kraes i hilim wan woman we i sik

  Sevya i save jenisim hat mo laef blong yumi. Ol Han blong Hilim Man, i kam long Adam Abram

• Afta we yufala i toktok raon long ol trutok insaed long Mosaea 5:1–7, sam long ol memba blong klas oli save askem olgetawan from wanem jenis blong hat blong olgeta i no bigwan, o i no hapen kwik olsem eksperiens blong ol pipol blong King Benjamin. Toktok we i kam long Elda D. Todd Christofferson insaed long “Sam Moa Risos” i tokbaot kwestin ia. ?Wanem nao yumi save lanem aot long jenis blong hat blong Elda Christofferson?

Mosaea 5:5–15

God i stap invaetem mi blong mi mekem ol kavenan wetem Hem.

• Mosaea 5:5–15 i save helpem ol memba blong klas blong andastanem ol blesing we oli kasem taem oli mekem mo kipim olgeta kavenan wetem God. Yu save invaetem olgeta blong luklukbak long olgeta ves ia, mo wetem insaed long maen, ol kavenan blong baptaes mo odinens blong sakramen, mo serem wanem oli lanem. (Luk tu long D&K 20:77, 79.)

stap lanem samting pikja bokis

Stap Leftemap Tingting blong Lanem Samting long Hom

Plante memba blong klas blong yu oli stap gotru, o i no longtaem i pas, oli bin gotru long wan jalenj blong olgetawan, o wan tes. Talem long olgeta se long Mosaea 7–10 bae oli rid abaot wan grup blong ol pipol we oli bin lanem olsem wanem blong trastem Lod long taem blong tes blong laef blong olgeta.

risos pikja bokis

Sam Moa Risos

Ol Vidio long ChurchofJesusChrist.org abaot “wan bigfala jenis” (Mosaea 5:2).

• “Daily Bread: Change” (Evri Dei Bred: Jenis)

• “A Change of Heart” (Wan Jenis long Hat)

• “A Mighty Change: Conversion” (Wan Bigfala Jenis: Jenisim Laef)

Jenis, plante taem i wan samting we i stap hapen.

Elda D. Todd. Christofferson blong Kworom blong Olgeta Twelef Aposol i tokbaot bigfala jenis long hat we oli tokbaot long ol skripja:

“Yu save askem: “?From wanem bigfala jenis ia long hat i no hapen kwik moa wetem mi? Yu mas tingbaot se ol bigfala eksampol blong ol pipol blong King Benjamin, blong Alma mo sam narafala moa insaed long ol skripja, oli hemia nomo—ol bigfala samting, mo i no samting we i hapen evri taem. Long plante long yumi, ol jenis oli hapen sloslo, mo i tekem taem. Blong bon bakegen, i no olsem taem yumi bon i kam long wol ia, be i moa olsem wan rod, wan samting we i stap gogohed blong hapen. Mo blong tekem rod ia, hem i stamba tingting blong laef blong yumi long wol ia.

“Long sem taem, hemia i no mas wan eskius blong stap traehad wanwan taem nomo. Yumi no mas glad blong holemtaet sam spes blong mekem ol nogud samting. Yumi mas stap klin inaf blong tekem sakramen evri wik, mo gohed blong dipen long Tabu Spirit blong rutumaot ol las doti insaed long yumi. Mi testifae se taem yu stap gohed long rod blong bon bakegen long saed blong spirit, gladhat we i pemaot man, gladhat ia blong Jisas Kraes, bae i tekemaot ol sin blong yumi mo mak blong olgeta sin ia insaed long yu; temtesen bae i nomo pulum yu, mo tru long Kraes, bambae yu kam tabu, semmak olsem we Hem mo Papa blong yumi, Tufala i tabu (“Born Again,” Ensign o Liahona, May 2008, 78)

Stap Kam Antap long Fasin blong Yumi blong Stap Tij

Lukaotem sam gudfala eksampol insaed long ol skripja. Taem yu stap ridim toktok blong King Benjamin long ol pipol blong hem, lukaotem ol lesen insaed long ol eksampol blong hem, we bae oli save helpem yu blong kam wan tija we i gud moa. Eksampol, ?wanem nao King Benjamin i bin mekem blong faenemaot sapos ol pipol blong hem oli bin andastanem wanem we hem i bin stap tijim?