Sa vakavulici ira na nona tamata o Tui Penijamini

Minerva K. Teichert (1888–1976), King Benjamin’s Farewell Address, 1935, iboro ena papa, 36 x 48 na idi. Univesiti ni Cakacakaniliga e Brigham Young

13–19 ni Epereli

Mosaia 1–3

“Vakasinaiti ena Loloma Vua na Kalou kei na Tamata Kecega”

E vuqa na ivakavuvuli era tiko ena Mosaia 1–3 e rawa mo veivosakitaka kei na nomu kalasi. Masulaka na veidusimaki mo kila na ivakavuvuli cava ena vakaibalebale cake kivei ira o vakavulica.

Vola na Veika o Uqeti Kina

ivakatakilakila ni veiwasei

Sureta na Veiwasei

Ni gadrevi me soli na madigi ki na lewe ni kalasi mera tukuna na nodra vulica vakai ira yadua se vakamatavuvale na Mosaia 1–3, sureta mera wasea ki vua e dua e dua na tikina ea vakauqeti ira.

ivakatakilakila ni veivakavulici

Vakavulica na iVunau

Mosaia 2:1–9

Na ciqomi ni vosa ni Kalou e gadrevi kina na vakavakarau.

• Dua na sala me tekivutaki kina na veivosaki ni vakavakarau me ciqomi na vosa ni Kalou o ya me veivosakitaki mada na vua eso ni vakavakarau—se sega ni vakavakarau—ki na veika tale eso. Me vakataka, mera wasea na kalasi na gauna era a vakavakarau kina se sega ni vakavakarau ka yaco kina eso na ka ena nodra sasaga e koronivuli se ena dua na cakacaka se itaviqaravi tale eso. Ni oti nodra wasea, mo sureta e veimama na kalasi mera wilika na Mosaia 2:1–9, ka vakasaqara na veika era a cakava na tamata i Tui Penijamini mera vakavakarau ki na nodra ciqoma na vosa ni Kalou. Na ikarua ni veimama mera vakasaqara ena tikina vata ga o ya, na veika a cakava o Tui Penijamini e vakaraitaka tiko na yalona baleta na vosa ni Kalou kei na gagadreva me wasei. Mo qai kerea na ilawalawa e rua oqo mera wasea na nodra vakasama. Na cava eda rawa ni vulica mai na veitikina oqo ena vukei keda meda ciqoma na vosa ni Kalou?

Mosaia 2:10–26

Ni da qaravi ira na tani, eda sa qarava tiko na Kalou.

• A dua dina o Tui Penijamini na ivakaraitaki vinaka ni italai ni Kalou vakakina vei ira era tiko voliti koya. Na cava era rawa ni vulica na nomu kalasi mai vua me vukea nodra sasaga mera qaravi ira na tani? Sa rawa mo tekivuna na veivosaki ena nomu kerea na kalasi mera vola na veivakataotaki vei ira era via qarava eso—me vaka na vuna eda sega ni veiqaravi kina se ni noda veiqaravi e sega sara ni veivukei me vaka e gadrevi. Me ra qai vulica na Mosaia 2:10–26 ka vola na veika dina a vakavulica o Tui Penijamini baleta na nodra qaravi na tamata ka na vukea mera vorata na veivakataotaki era vola. Na cava era rawa ni cakava na tamata yadua kei na matavuvale mera raimatua tiko ki na nodra veiqaravi ena veisiga? Sa rawa mo wasea talega na italanoa nei Peresitedi Thomas S. Monson ena “iKuri ni iVurevure” me dua na vakatutu.

• Na serenilotu me vakataka na “Dua na Turaga Vutugu” (Serenilotu, naba 16) se na vidio “The Old Shoemaker” (ChurchofJesusChrist.org) ena vaqaqacotaka na itukutuku e tiko ena Mosaia 2:17—o ya ni da veiqaravi vei ira na tamata, eda sa qarava tiko na Kalou. O na vakayagataka vakacava na ivurevure vakaoqo me veivaqaqacotaki kina na itukutuku nei Tui Penijamini? Sa rawa ki na lewe ni kalasi mera wasea na gauna eso era a veiqaravi kina vei ira na tamata se a qaravi Vakarisito mai vua e dua tale. Ena nomuni veivosaki, navuca mo wasea na malanivosa oqo mai vei Peresitedi Henry B. Eyring: “Ni da vukea e dua, ena vakila na iVakabula me vaka ga ni da dolele yani me da vukei Koya” (“E Sega Beka ni o Koya Oqo na Lolo Kau sa Digitaka?” Ensign se Liaona, Me. 2015, 22). Cava na vuna o nanuma kina ni da sa qarava tiko na Kalou ena gauna eda qaravi ira kina na tamata?

e rau veimokomoko na marama

Na qaravi ira na tamata ena vukea noda vakila na loloma ni Kalou.

Mosaia 2:38–41

Na bula marau e lako mai ni da maroroya tiko na vunau ni Kalou.

• Ni gadrevi me vukei na kalasi mera “raici ira sa vakalougatataki ka bula marau tiko ni ra sa maroroya na vunau ni Kalou,” ena vukea me tekivu ena kena kilai na ivakamacala ni bula marau. Era na vakamacalataka vakacava na kalasi na marau e lako mai ena talairawarawa vua na Kalou? Ena rawa mera raitayalotaka e dua na nodra itokani e bula marau tiko ni sega ni maroroya na vunau. Sureti ira mera wilika na Mosaia 2:38–41 ka veivosakitaka na sala mera vukei nodra itokani me kila vinaka na kedrau duidui na marau vakavuravura kei na marau tawamudu. Na veika e sotavi se ivakaraitaki cava mai na nodra bula na tamata era rawa ni wasea na kalasi me matanataka na marau tawamudu?

Mosaia 3:1–20

Na veivakabulai e lako duadua ga “mai na yaca i Karisito, na Turaga.”

• Na itukutuku nei Tui Penijamini e oka kina na parofisai kaukauwa ka matata baleta na sucu, cakacaka vakalotu, kei na solibula veisorovaki i Jisu Karisito. Sa rawa mo kerea na kalasi mera wasea na tikina eso mai na Mosaia 3:1–20 e vakauqeti ira vakabibi ka vukea talega mera kila vinaka na iVakabula kei na Nona ilesilesi. Kerei ira mera wasea na vuna e tarai ira kina na veitikina oqo.

• Na ivakamacala taumada ni iVola i Momani e vakavulica ni ivola oqo e “tuva na ituvatuva ni veivakabulai.” Ni gadrevi mera raica na kalasi na kena a veivuke na vunau nei Tui Penijamini me yaco kina na inaki ni iVola i Momani, mo vola ena papa O Jisu Karisito e Cakava me Rawa na Veivakabulai. Sa rawa ki na kalasi mera railesuva na Mosaia 3:1–20, mo ni qai vola ena papa na dina era sa vulica baleta na ituvatuva ni veivakabulai. Taroga na kalasi na cava era sa vulica baleta na sala ea cakava o Jisu Karisito me yaco na ituvatuva ni veivakabulai. Mo qai solia na gauna ki na kalasi mera railesuva na Mosaia 3:18–19 ka wasea na veika meda cakava meda yalododonu kina ka ciqoma na veivakabulai. E veivuke vakacava na Veisorovaki i Jisu Karisito meda rawata oqo? Kerea na kalasi mera wasea na nodra vakila me baleta na ilesilesi ni iVakabula ena ituvatuva ni veivakabulai.

ivakatakilakila ni vuli

Vakayaloqaqataka na Vuli e Vale

Era sa bau sotava beka na kalasi na gauna a veisautaki ira kina na kena vakavulici e dua na vunau mai na dua na vosa, lesoni, se ivolanikalou? Tukuna vei ira ni ra na wilika ena Mosaia 4–6 na veika mana a yaco vei ira na tamata mai na dina a vakavulica vei ira o Tui Penijamini.

ivakatakilakila ni ivurevure

iKuri ni iVurevure

Qaravi ira na Tani

E kaya o Peresitedi Thomas S. Monson:

“Au a wilika ena vica na yabaki sa oti e dua na ivola o Jack McConnell, MD. E a susugi voli ena veiulunivanua ena ceva-i-ra kei Virginia e Amerika ka dua vei ira na le vitu na gone ka luvena e dua na italatala ni lotu Wesele kei tinadra ka dauveisusu voli ga e vale. Na nodratou ituvaki e sega so ni rawa ka. E nanuma lesu o koya ni a se gone, ena veisiga ni ra dau dabe ena teveli ni vakayakavi, ena dau tarogi ira yadudua o tamadra, ‘Na cava o sa bau cakava nikua mo vukea kina e dua?’ Ena veisiga era sa dau gumatuataka sara na gone na ka mera cakava me rawa kina ni ra lai tukutuku vei tamadra ni ra vukei dua. E vakatoka o Vuniwai na ivakarau oqo me ivakananumi vinaka duadua kei tamana, ni veika e namaki oqori kei na ivosavosa oqori e vakauqeti koya kei ira na tacina me ra dau vukei ira na tani ena nodratou bula taucoko. Ni ra sa tubucake ka yalomatua mai, sa veisau na itovo ni veivuke ki na dua na gagadre ni yalo me ra vukei na vakaleqai tu.

“Mai na cakacaka vakavuniwai nei Vuniwai McConnell … ea tauyavutaka na isoqosoqo ni Volodia Vakavuniwai, ka solia vei ira na sa vakacegu mai na veiqaravi vakavuniwai mera laki volodia ena nodra qaravi o ira era cakacaka ka sega tu ni inisua. E kaya o Vuniwai McConnell ni nona gauna galala ni sa vakacegu mai na cakacaka sa cagina ena 60 na auwa ni veiqaravi sega ni saumi ena veimacawa, ia na kaukauwa vinaka ni [yagona] sa qaqaco cake sara ka sa vaka me taleitaka cake tikoga o koya na ka sa yaco tiko ena [nona] bula mai na veigauna sa oti.’ [Jack McConnell, “And What Did You Do for Someone Today?” Newsweek, June 18, 2001, 13.] …

“Dina sara ni da na sega ni rawa ni Vuniwai McConnell taucoko, me tauyavutaki na veivaleniwai mera vukei na dravudravua; ia, ena dau tu ga e veigauna kece na nodra leqa na tani, ka rawa vei keda yadua meda cakava e dua na ka meda vukea kina e dua. …

“Kemuni na taciqu kei na ganequ, eda sa wavoliti tu mai vei ira era gadreva na noda veiqaravi, noda veivakayaloqaqataki, noda veitokoni, noda yalo vinaka, noda yalololoma—se ra lewe ni matavuvale, itokani, veikilai, se vulagi. Eda sa liga ni Turaga e vuravura edaidai, kei na itavi ni veiqaravi ka vueti ira cake na Luvena. O Koya sa vakararavi tu vei keda yadua.… E rawa beka meda tarogi keda ena taro e dau kidavaki iratou o Dr. Jack McConnell kei iratou na tacina kei na ganena ena gauna ni vakayakavi e veisiga: ‘Na cava beka au sa cakava vua e dua nikua?’” (“Na Cava au Sa bau Cakava Vua e Dua Nikua?” Ensign se Liaona, Nove. 2009, 84–87).

Vakatorocaketaki ni Noda Veivakavulici

Mo iyaya ni cakacaka ni Yalotabu. Na nomu inaki vaka-qasenivuli mo kakua ni cakava ga me rawa na nomu veivakavulici ia mo vukei ira na tamata mera ciqoma na veivakauqeti ni Yalo Tabu—o koya na qasenivuli dina. (Raica na Veivakavulici ena iVakarau ni iVakabula, 10.)