na Karisito sa tucaketale kei ira na Nona iApositolo

Karisito kei ira na iApositolo, mai vei Del Parson

30 ni Maji–12 ni Epereli.

Siganimate

“Ena Tucake Tale o Koya … Kauta Lako e Tabana na Veivakabulai”

Sa madigi vinaka ki na nomu kalasi na Sigatabu ni Siga ni Mate me vaqaqacotaki kina na nodra ivakadinadina baleti Jisu Karisito kei na Nona Tucake Tale—ka me veivaqaqacotaki na ivakadinadina yadudua. Mo nanuma tiko oqo ni ko vulica na ivolanikalou mo vakavakarau ki na lesoni oqo. Vakasaqara na veidusimaki vakayalo baleta na veika ena tara na yalodra na tamata ena nomu kalasi.

Vola na Veika o Uqeti Kina

ivakatakilakila ni veiwasei

Sureta na Veiwasei

Era a rairai sotava na lewe ni kalasi eso na veika e vakaibalebale cake ena rua na macawa sa oti ni ra a wilika tiko na veika e vakavulica na iVola i Momani baleta na Tucake Tale kei na Veisorovaki i Jisu Karisito. Solia vei ira e vica na miniti mera raica e dua na itukutuku a vakauqeti ira, ka sureta mera wasea na veika era sa kunea.

ivakatakilakila ni veivakavulici

Vakavulica na iVunau

2 Nifai 9:7–15; Alama 11:41–45; 40:21–23

Na Tucake tale sa kena cokoti vata tawamudu na yago kei na yalo.

• Na vakatautauvatataki ni veika eso sa sala mana ni kena vakavulici na ivakavuvuli ni kosipeli. Sa rawa mo sureta na lewe ni kalasi mera wilika na 2 Nifai 9:7–15 kei na Alama 11:41–45 ka raica na vosa kei na malanivosa tikina eso oqo e vakavulica baleta na tucake tale. Na cava e vakatauvatani ki na mate? E vakamacalataki vakacava na tucake tale? Na cava eda gadreva kina e dua na yago sa vakaturi cake mai na mate? (raica talega na V&V 93:33–34). Sa rawa mera veivosakitaka na kalasi na sala mera vakayagataka kina na veivakatauvatani oqo me vakavulica e dua baleta na tucake tale. Ni ra sa wasea na nodra vakasama ki na kalasi, sa rawa mo ni veivosakitaka vata na vuna e bibi kina vei ira na dina oqo baleta na Tucake Tale.

• Sa rawa mo sureta na lewe ni kalasi mera wasea na gauna era a vakavinavinakataka kina na nodra kila na veika e baleta na Tucake Tale. Ena veivakauqeti vakalevu vakacava na kila oqo ki na noda bula? Sa rawa mo vukea na nomu kalasi mera sauma na taro oqo ena nodra vakasaqara vakai ira yadua ena 2 Nifai 9:7–15; Alama 11:41–45; se Alama 40:21–23 ka vola ena papa na dina baleta na Tucake Tale. Mo qai vola ena papa na yatuvosa e rua oqo ka kerea na kalasi mera vakasamataka vakatitobu ena vica na miniti ni bera ni ra wasea na sala mera vakacavara kina: Kevaka au a sega ni kila na veika oqo… kei na Ena vuku ga niu sa kila na veika oqo….

E masu o Jisu ena Were o Kecisemani

Gethsemane, mai vei Michael T. Malm Malm

Mosaia 3:5–7; 15:5–9; Alama 7:11–13

Sa colata o Jisu Karisito ki Vua na noda ivalavala ca, mosi, kei na malumalumu.

• Ni da vakasamataka vakatitobu ka veivosakitaka na vakararawataki ni iVakabula ena vukuda sa rawa me sureta na Yalo ka uqeta na yalo ni loloma kei na vakavinavinaka vua na iVakabula. Ni gadrevi me uqeti na vakasama vakatitobu kei na veivosaki vakaoqo, sa rawa mo droinitaka ena papa e tautauvata kei na kena e vakaturi tiko ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ka sureta na kalasi mera vakacavara ni ra vakayagataka na Mosaia 3:5–7; 15:5–9; kei na Alama 7:11–13 kei na veika era dui sotava. Ena veidusimaki ni Yalo, sa rawa mo sureta na kalasi mera wasea na nodra nanuma baleta na veika sa cakava o Jisu Karisito kivei ira.

• Na sere vakalou ena rawa me sureta na Yalo ka vaqaqacotaka na vunau o vakavulica tiko. Sa rawa talega vei ira na lewe ni kalasi mera taleva na Mosaia 3:5–7; 15:5–9; kei na Alama 7:11–13 mera raica ka lagata na serenilotu era nanuma ni sema donu ki na itukutuku ena veitikina oqo (sa rawa talega mo sureta e dua me lagata se vakatagitaka na serenilotu). Ena veivuke talega na tuvai vakamatanivola ni ivolanikalou ena daku ni ivola ni serenilotu, kei na serenilotu tale eso e vakaturi tiko ena “iKuri ni iVurevure.” Vakayaloqaqataki ira na lewe ni kalasi mera wasea na veimalanivosa eso kei na ivolanikalou e vukea mera vakavinavinakataka vakatitobu na solibula ni iVakabula.

Inosi 1:1–19; Mosaia 5:1–2; 27:8–28:4; Alama 24:7–19

Na Veisorovaki i Jisu Karisito e vakasavasavataki keda ka vukea meda vinaka vakaoti.

• Dua na sala mana meda vulica kina na kaukauwa ni iVakabula me veisautaka na noda bula o ya meda vulica na ivakaraitaki sa veisautaka kina na nodra bula eso tale ni ra sa veivutuni ka lako mai Vua. Na iVola i Momani sa tu kina e vuqa na ivakaraitaki oqo. Sa rawa mo lesia na lewe ni kalasi yadua mera wilika e dua vei ira na ivakaraitaki oqo, me vakataki Inosi (raica na Inosi 1:1–19), ira na tamata i Tui Penijamini (raica na Mosaia 5:1–2), Alama lailai (raica na Mosaia 27:8–28:4), se ira na Anitai-Nifai-Liai (raica na Alama 24:7–19), se mera vakasamataka eso tale na ivakaraitaki mai na ivolanikalou. Mera qai vakamacalataka vakalekaleka e vica na lewe ni kalasi na veika a sotavi era sa wilika. Era na marautaka na kalasi na cakava oqo ni ra soli ivakatakilakila ki na vo ni kalasi mera vakilakila o cei era vakamacalataka tiko. Sa rawa mera veivosakitaka talega na taro vakaoqo: Era a veisau vakacava na tamata era tukuni tiko ena ivakaraitaki oqo? Na cava na itavi ni iVakabula ena nodra veisau oqo? Sa rawa talega ki na vica na lewe ni kalasi mera veivosakitaka na sala a cakacakataka kina na iVakabula “e dua na veisau levu … ki na [lomadra]” (Mosaia 5:2). Ni gadrevi meda kila vakalevu na sala e veisautaki keda kina na iVakabula—kei na vuna e bibi kina na veisau o ya—sa rawa mo wasea ki na kalasi na vosa vakatautauvata nei Peresitedi Dallin H. Oaks ena “iKuri ni iVurevure.”

ivakatakilakila ni vuli

Vakayaloqaqataka na Vuli e Vale

Ni gadrevi mera uqeti na kalasi mera wilika na Mosaia 1–3, sa rawa mo sureti ira mera tugana na gauna era a marautaka kina ni oti nodra a wilika se rogoca kina e dua na itukutuku ni kosipeli. Sureti ira mera vakasaqara na veika dina mera na marautaka ni ra wilika na Mosaia 1–3.

ivakatakilakila ni ivurevure

iKuri ni iVurevure

Na serenilotu baleta na Veisorovaki ni iVakabula.

• Au Kilai Jisu,” Serenilotu, naba 74

• “Au sa Kila ni Bula Tu,” Serenilotu, naba 76

• “Thy Will, O Lord, Be Done,” Serenilotu, naba 188

• “That Easter Morn,” Serenilotu, naba 198

Na vidio ni nodra lagata eso na sere oqo na Tabernacle Choir ena kune ena ChurchofJesusChrist.org

Vosa vakatautauvata: Meda sa sega walega ni savasava cake.

A wasea o Peresitedi Dallin H. Oaks e dua na vosa vakatautauvata me vakamacalataka na sala e vakarautaki keda kina na iVakabula meda lesu ki na itikotiko ni Kalou:

“Eda dau nanuma tu ga ni isau ni veivutuni me isavai rawarawa ni noda cakacala, ia oya e dua na rai tawacava. … Na tamata e cakacala e sa vaka e dua na vunikau ka kalove rawarawa mai na cagi. Ena siga cagicagi ka ucauca, e kalove vakatitobu sara ki na qele na vunikau ka ra tauvi soso na drauna, me vaka na ivalavala ca. Kevaka eda vakanamata ga ena samaki ni draunikau, na malumalumu ni vunikau ka vakatara me kalove ka vakasosotaka na drauna ena tiko ga. Vakakina, e dua na tamata ka sa lomani koya me vakasosotaki ena ivalavala ca ena cakacala tale ena cagilevu e tarava. Na veirawai ni kena vakayacori tale ena tomani tiko me yacova ni sa vakaukauwataki na vunikau.

“Ni sa lako curuma e dua na tamata na kena icakacaka ka yaco me vaka e sa vakatokai ena ivolanikalou me ‘yaloraramusumusu ka bibivoro,’ sa cakava e levu cake na Turaga mai na nona savai ga na tamata oya ena ivalavala ca. E solia o Koya vei ira na kaukauwa vou. Sa ka bibi ka yaga na veivaqaqacotaki o ya meda kila kina na inaki ni veivakasavasavataki, o ya meda lesu tale vua na Tamada Vakalomalagi. Ni gadrevi meda vakacurumi ki na Nona itikotiko, meda sa sega walega ni savasava sara. E dodonu meda sa veisau mai na dua na tamata malumalumu vakayalo ki na dua na tamata kaukauwa ena ituvaki vakayalo me laki tiko ena itikotiko ni Kalou” (“The Atonement and Faith,” Ensign, Apr. 2010, 33–34).

Vakatorocaketaki ni Noda Veivakavulici

Mo bula kilikili ki na veidusimaki ni Yalo. Ni ko bulataka tiko na kosipeli, sa kilikili kina me nomu itokani na Yalo, o koya sa qasenivuli dina sara. Ni ko vakasaqara na Nona veidusimaki, ena soli vakasama kei na vakanananu vei iko na Yalo Tabu ena sala mo sotava kina na nodra gagadre o ira o vakavulica. (Raica na Veivakavulici ena iVakarau ni iVakabula, 5