Jekope kei Inosi, mai vei Scott Snow

23–29 ni Maji

Inosi–Vosa i Momani

E Cakacaka e Yaloqu Meu Cakava na Lomana

Vakavakarau mo veivakavulici ena nomu wilika na Inosi–Vosa i Momani ka cakava e dua na ituvatuva ni veivakavulici (raica na Veivakavulici ena iVakarau ni iVakabula, 19). Na vakatutu kei na ivunau ena ituvatuva oqo ena soli vakasama talega vei iko.

Vola na Veika o Uqeti Kina

Sureta na Veiwasei

Ni gadrevi me soli na madigi ki na lewe ni kalasi mera wasea na veika era sa vulica tiko mai vale, mo wasei ira vakailawalawa ka lesia na ilawalawa yadua me wilika e dua na wase mai na Inosi–Vosa i Momani. Kerea mera vakatura na tikina eso mai na wase o ya era nanuma me veivosakitaka na kalasi. Vola na veitikina oqo ena papa, ka digitaka e vica me veivosakitaki.

Vakavulica na iVunau

Inosi 1:1–17

E rawa ni vosoti na noda ivalavala ca ni da vakabauti Jisu Karisito.

• Oqo eso na taro mera sureti na lewe ni kalasi mera vakasamataka vakatitobu ka veivosakitaka ni vulici na Inosi 1:1–17: Na cava eda sa vulica mai na veika a sotava o Inosi ena noda a ciqoma na vakabokoci ni noda ivalavala ca? A vakaraitaka vakacava o Inosi na nona vakabauti Jisu Karisito? A veisautaki Inosi vakacava na ka oqo ka sa raici koya kina vakacava kei ira na tamata?

Inosi 1:4–17

Ena saumi mai na noda masu mai na vu ni yaloda.

• Ni gadrevi mera kila vakatitobu na lewe ni kalasi na masu, mo wasea na kalasi vakailawalawa lalai ka sureta na ilawalawa yadua me vulica e dua na itukutuku mai na Inosi 1: tikina e 2–8, 9–11, se 12–17. Mo qai sureta na ilawalawa yadua me vakatavulica na vo ni kalasi ena cava era sa vulica baleta na masu mai na nodra tikina. Me vakataka, nomu sureti ira mera wasea na vosa kei na malanivosa eso e vakamacalataka na ivakarau ni masu nei Inosi.

• Me ikuri ni kena vulici na ivakarau ni masu nei Inosi, sa rawa meda vuli vakalevu talega mai na veika a masulaka o Inosi. Sa rawa ki na lewe ni kalasi mera kila o cei se cava a masulaka o Inosi ena Inosi 1:4–17. E tukuni ena veitikina oqo, na vuna a gadreva kina o Inosi me masulaki ira tale eso? Na dina cava tale baleta na masu eda vulica maivei Inosi?

Jeromi–Omanai

Kevaka eda maroroya tiko na ivakaro, eda na kune vinaka.

• E rau vola o Jeromi kei Omanai na veika e baleta na matanitu o Nifaiti, ia na nodrau itukutuku sa baleti ira talega na tamata yadudua. Na cava eda sa vulica mai na ivola i Jeromi kei Omanai me baleta na ivalavala dodonu ni na kauta mai na kune vinaka? (me vakataka, nomu raica na Jeromi 1:7–12 kei na Omanai 1:5–7, 12–18). Ena vukea na lewe ni kalasi mera kila na ibalebale ni kune vinaka ni vakayagataki na dikisenari kei na ivolanikalou (me vakataka, nomu raica na Alama 37:13; 48:15). E vakatauvatani vakacava na ibalebale vakavuravura kei na ibalebale ni Turaga? E dau vukei ira vakacava na Nona tamata na Turaga mera kune vinaka?

• Me vaka ga ni ra a cakacaka vagumatua na parofita ni Nifaiti mera vakavulica na ivakaro vei ira na tamata, era sa vakavulici keda vakakina na parofita edaidai baleta na ivakaro. Ni wilika oti na Jeromi 1:9–12, mera veivosakitaka na kalasi na nodra ivakavuvuli walega oqo na iliuliu ni Lotu a uqeti ira mera maroroya kina na ivakaro. Ena veivuke ki na kalasi mera taleva na itukutuku ni koniferedi sa oti ena mekasini ni Lotu se ena app ni Gospel Library. Se mera taleva na ivakatagedegede e veivosakitaki tiko ena Me iSakisaki ni iTabagone. Ke gadrevi, sa rawa me raici na itukutuku era tiko ena “iKuri ni iVurevure.” Ena vukei keda vakacava noda talairawarawa ki na ivakaro meda “kune vinaka” kina ena noda bula?

Omanai

Na Turaga a kauti ira mai e vuqa na tamata ki na vanua yalataki.

• Na iVola i Momani era tu kina na veitukutuku makawa veicurumaki, ni rawa me dredre mera kilai tiko na veimataqali kawa tamata era tukuni tiko kina. Dua na sala mera kilai na kawa tamata yadua ena iVola i Momani o ya me caka e dua na ituvatuva ena papa ka sureta na kalasi mera vakacuruma kina na itukutuku ni kawatamata yadua me vakataka na Nifaiti, Leimanaiti, kei ira na kai Saraemala). Me vakataka, na ituvatuva me volai kina na ulutaga oqo: Yaca ni ilawalawa, Na gauna kei na sala cava era a yaco mai kina, kei Na cava a yaco vei ira. Me veivosakitaki vata na vuna e veivukei kina na kena kilai vinaka na veika baleta na kawatamata yadua. Na yaca oqo ena iDusidusi ki na iVolanikalou (ChurchofJesusChrist.org) ena rawa me veivuke: “Korianatuma,” “Jeretaiti,” “Leimanaiti,” “Muleki,” “Nifaiti,” kei na “Saraemala.”

Vosa i Momani 1:1–8

Ena cakacaka maivei keda na Kalou kevaka eda muria na Nona veidusimaki.

• Me tiki ni veivosaki baleta na Vosa i Momani, sa rawa mo sureta na kalasi mera vakavakarau mera mai wasea na vuna a uqeti kina o Momani me vakacuruma na peleti lailai (1 Nifai–Omanai) ena iVola i Momani. Sa rawa vei na lewe ni kalasi oqo me vakavakarau ena nona wilika na Vosa i Momani kei na ivurevure tale eso, me vakataka na Vunau kei na Veiyalayalati 10:8–19, 39–45; ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale; kei na wase 5 ni Yalododonu, voliumu 1. Vakayaloqaqataki ira na lewe ni kalasi me ra okata na itukutuku veiganiti ni 116 na draunipepa a yali ni iVola i Momani kei na vuna a gadrevi kina na peleti lailai me sosomitaka na draunipepa sa yali o ya. Na dina cava era sa vulica na lewe ni kalasi baleta na Nona dau cakacaka na Turaga maivei ira na tamata? Na cava era kunea na lewe ni kalasi ena Vosa i Momani 1:1–8 a uqeti ira mera muria na veidusimaki ni Kalou dina ga ni ra sega tu ni kila vinaka na vuna?

  

  Sa Biuta Vata o Momani na Peleti, mai vei Jorge Cocco

• Sa vakalougatataka o Momani e milioni na tamata baleta ni a muria na veivakauqeti ni Yalo baleta na peleti lailai (raica na Vosa i Momani 1:7). Vakasamataka na sala mo vukea kina na lewe ni kalasi mera kila vinaka ni sa rawa mera vakalougatataki ira eso ni ra vakasaqara mera liga ni cakacaka ni Turaga ka muria na veivakauqeti ni Yalo Tabu. A cakacaka vakacava na Kalou maivei Momani? Na cava era sa raica na lewe ni kalasi a cakava na Turaga maivei ira se so tale ni ra vakarogoca na Yalo ka saga mera cakava na loma ni Kalou? Na italanoa baleti Peresitedi Thomas S. Monson ena “iKuri ni iVurevure”e vakarautaka e dua na ivakaraitaki ena vukea na kalasi mera vakasamataka na ivakaraitaki eso mai na nodra dui bula.

Vakayaloqaqataka na Vuli e Vale

Ena vuku ga ni sa roro tiko mai na koniferedi raraba kei na Siga ni Mate ena vica na macawa mai oqo, vakauqeti ira na lewe ni kalasi mera vakarorogo ki na nodra cauraka na Mataveiliutaki Taumada kei na Kuoramu ni iApositolo Le Tinikarua na nodra ivakadinadina cecere baleti Jisu Karisito.

iKuri ni iVurevure

Vidio mai na iVola i Momani baleti Inosi

Raica na vidio e tukuna tiko na itukutuku ni ivola i Inosi ena Vidio ni iVola i Momani era tiko ena ChurchofJesusChrist.org se na app ni Gospel Library.

Na itukutuku ni koniferedi raraba baleta na kena maroroi na ivakaro.

• Thomas S. Monson, “Karona nai Vunau,” Ensign se Liaona, Nove. 2015, 83–85

• Dieter F. Uchtdorf, “Bulataka na Kosipeli ena Reki,” Ensign se Liaona, Nove. 2014, 120–23

• Dallin H. Oaks, “Me Kakua Vei Iko na Kalou Tani,” Ensign se Liaona, Nove. 2013, 72–75

“Lululu vei ira yadua na gone.”

Ena gauna a lewena tiko kina o Peresitedi Thomas S. Monson na Kuoramu ni iApositolo Le Tinikarua, a laki vosa ki na dua na ilawalawa gone ni Lalai ena dua na koro mai Samoa. Ni oti o ya, a uqeti sara me kidavaki ira vakayadua na 247 na gone era a tiko e kea. Ia, ni raica ni sa lailai na gauna, a saga me sa kakua ni vakasamataka me kidavaki ira ia a sega ni rawa vua.

A rai yani vei nodra qasenivuli ka kaya “Au na via lululu vakayadua sara ga vei ira na cauravou kei na goneyalewa lalai oqo. Ena rawa beka oqo?”

A matadredredre o qasenivuli ka vosa vaka-Samoa vei ira na gone. Era a deguvacu kece mai. A qai kaya o qasenivuli vei Elder Monson ni gauna sa kila kina o koya ni na dua vei ira na iApositolo Le Tinikarua ena gole mai ki Samoa, sa yalataka o koya vei ira na gone ni kevaka era na masu vagumatua ka vakabauta tiko, ena sikova mai na nodra koro o Elder Monson ka na uqeti koya na Yalo Tabu me na lululu vakayadudua vei ira na gone (raica na Thomas S. Monson, “Friend to Friend: Talofa Lava,” Friend, May 1972, 12–13).