Ena Liutaki Kemudou ena Ligamudou, maivei Sandra Rast

24 ni Feperueri–1 ni Maji

2 Nifai 26–30

“E Dua na Cakacaka Talei ka Veivakurabuitaki”

Nanuma tiko ni dodonu me vanua ni veivakavulici vakosipeli na itikotiko. Na nomu vulica vakai iko ka vakavuvale na 2 Nifai 26–30 e dodonu me yavu ni nomu vakavakarau mo veivakavulici. Tuvanaka ena kalasi na sala mo tara cake, vaqaqacotaka, ka vakayaloqaqataka na vuli vaka tamata yadua kei na vakamatavuvale.

Vola na Veika o Uqeti Kina

Sureta na Veiwasei,

Ni sa tekivu na lesoni, solia na gauna ki na lewe ni kalasi mera wasea e dua na ka mai na 2 Nifai 26–30 era raica ni vakaibalebale cake ni ra vuli tiko e vale. Me vakataka, sa rawa mo kerei ira mera wasea e dua na tikina a vukea mera kila vinaka na noda gauna oqo kei na bolebole eda sotava.

Vakavulica na iVunau

2 Nifai 26:24–28, 33

Na veika kece e cakava na Turaga sa naki ni lomana me lomani keda kina.

• Ke o sa uqeti me veivosakitaki na ivakavuvuli ni Nifai baleta na loloma ni Turaga, sa rawa mo tovolea oqo: Ni wiliki oti vata na 2 Nifai 26:24 sureta na lewe ni kalasi mera vola na veika sa cakava vei ira o Jisu Karisito ni sa inaki ni lomana na loloma. E cakava vakacava o Koya me “vakayarayarataki ira kina na tamata kecega ki vua”? Na cava eda vakauqeti meda cakava me idole ki na Nona ivakaraitaki ni loloma?

• Na veisureti ni Turaga ena 2 Nifai 26:24–28, 33 era sa ivakadinadina kaukauwa ni Nona loloma. E dua na sala mera vukei kina na lewe ni kalasi mera kunea na veisureti oqo o ya mera vakalekalekataka na itukutuku ni Turaga ena veitikina oqo ki na dua ga na yatuvosa. Sa rawa ki na vica na lewe ni kalasi mera wasea na nodra ivakaleleka oqo. Ena veivakauqeti vakacava na veitikina oqo ena sala meda sureti ira eso mera lako mai vei Karisito? Vakayaloqaqataka na kalasi mera vola eso na nodra nanuma kei na lomadra. Ni gadrevi me sureti na Yalo, sa rawa me vakatagitaki e dua na serenilotu baleta na loloma ni iVakabula, me vakataka na “Bau Mai Vei Jisu” (Serenilotu, naba 64), ni ra vakasama vakatitobu tiko na kalasi.

2 Nifai 27; 29; 30:3–8

Sa ka yaga bibi sara na iVola i Momani ki na cakacaka ni Kalou ena iotioti ni gauna oqo.

• O ira ena nomu kalasi era na gadreva beka mera vukei mera kila vinaka na parofisai e tiko ena 2 Nifai 27 baleta e dua na ivola sa dregati tu kei na dua na tamata vuku. Ena rawa me veivuke na itukutuku e tiko ena “iKuri ni iVurevure” Ena cakacaka beka ena nomu kalasi ke me vica na lewe ni kalasi mera dramataka na italanoa e tiko ena 2 Nifai 27:15–22? Na cava na vuna a vakaraitaka kina o Nifai na veika oqo ena vuqa na yabaki yani e liu? Na cava beka era vakavulica vei keda na parofisai nei Nifai baleta na bibi ni iVola i Momani? Vakayaloqaqataki ira na kalasi mera veiwasei vakai ira ena sala era a rawata kina na nodra ivakadinadina ni iVola i Momani.

• E dua beka ena nomu kalasi me wasea na gauna a sureta kina e dua me wilika na iVola i Momani? Na cava eso na vuna ena sega kina ni ciqoma e dua na veisureti me wilika na iVola i Momani? Na ka e tukuna na Turaga baleta e dua na vuna e tiko ena 2 Nifai 29:6–11. Sa rawa mo sureta na kalasi mera wilika na veitikina oqo ka dramataka na sala era rawa ni cakava ena loloma vua e dua e kaya ni sega ni yaga na iVola i Momani. Na sala cava era sa vakasamataka tale tiko na lewe ni kalasi mera vukea eso mera “kila [ni iVola i Momani] ni sa ka ni veivakalougatataki vei ira mai na liga ni Kalou”? (2 Nifai 30:6).

2 Nifai 28

E vakasaqara o Setani me veilawakitaki.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura tiko me vakasaqarai na veilasutaki nei Setani e tukuni tiko ena 2 Nifai 28. Sa rawa ki na kalasi mera wasea na veika era sa kunea, se rawa mera vakadeuca na 2 Nifai 28 ena kalasi ka vola na veilasutaki nei Setani era sa kunea rawa. Ena veivuke talega mera cakacaka vakailawalawa mera vakasaqara na ivolanikalou e saqata na lawaki oqo (kera gadreva na veivuke, sa rawa mo wasea na vakatutu e tiko ena “iKuri ni iVurevure”). Mera qai veiwasei na ilawalawa na veika era sa kunea ka veivosakitaka na sala mera kila rawa na “ivakavuvuli vakailasu ka tawayaga ka sesewa” nei vu ni meca (2 Nifai 28:9).

Vakayaloqaqataka na Vuli e Vale

Era rairai uqeti na kalasi mera wilika na 2 Nifai 31–33 ke ra kila ni wase oqo era tiko kina na iotioti ni vosa i Nifai a volai, oka kina e dua vei ira na ivakamacala rawarawa ka kilai vinaka ni vunau i Karisito.

iKuri ni iVurevure

“Ena qai kaya ko koya sa kila ka: Au na sega ni wilika rawa” (2 Nifai 27:18).

Ena Feperueri ni 1828, a gole yani o Martin Harris, na itokani i Josefa Simici, ki na “tokalau ni Siti o New York vata kei na itukutuku volai ni so na yaca ni tamata ena peleti [koula] me vakaraitaka vei ira na daunivola. E rairai a gadreva me vakadeitaka tale ni sa ka dina na peleti, se a rairai nanuma e dua na ivakadinadina me vukea mera dinau me tabaki kina na vakavakadewa. Ena ituvaki cava ga, sa tukuna tikoga ni a uqeti koya na Turaga me gole ena ilakolako oqo.

“Ena gauna o ya, a sega ni dua vei rau o Josefa se o Martin me kila na vosa e volai tu ena peleti. Rau a kila ga na kena me vaka a vakatakila o Moronai na agilosi vei Josefa: ni sa dua na itukutuku makawa kei Amerika. Ia, a sega ni vakasaqara e dua na daunivola e kila tu na vosa vaka-Ijipita (a kila e muri o Josefa ni vosa o ya ena peleti e vakatokai me ‘vosa vaka-Ijipita duatani’), a raica yani o Martin e vica na daunivola era taleitaka na iyau makawa, vakabibi na iyau makawa kei Amerika.

“… [Dua vei ira na daunivola a laki raica o Martin o ya o] Charles Anthon, e dua na parofesa cauravou ni qarama kei na vosa ena Columbia College. Sa dau vakasokumuna tiko o Anthon na kedra italanoa kei na nodra vosa na iTaukei kei Amerika me tabaka vakaivola ka gadreva sara me vakadikeva na ivola e kauta yani vua o Martin.

“A kaya o Martin ni sa vakadeitaka o Anthon ni ra sa dina na yaca ni tamata me yacova ni sa kila na sala a taura mai kina o Josefa Simici. A mani kaya me kauta maivua o Martin na peleti. A sega ni vinakata o Martin, ka mani kaya o Anthon, ka cavuta vou na vosa nei Aisea, ‘Au sega ni rawa meu wilika na ivola e dregati tu.’ Dina ga ni a qai cakitaka e muri o Anthon na itukutuku kece ni nodrau sota kei Martin, oqo ga eda kila: Sa lesu tale mai o Martin ena nona veisiko vei ira na daunivola ena tokalau ka sa vakadeitaka sara ni o Josefa Simici sa kacivi koya na Kalou kei na peleti kei na yaca ni tamata era tu kina sa mai na gauna makawa. Rau sa raica vata kei Josefa ni veisiko o ya vei Anthon sa vakavotukanataki kina na parofisai nei Aisea (ka tukuni sara tale tiko ga ena iVola i Momani) baleta ‘na vosa ni vola sa dregati, era sa solia vua e dua sa kila na wili vola, ka ra kaya, Mo wilika mada oqo; a sa kaya ko koya, Au sa sega ni rawata; ni sa dregati tu’ [Aisea 29:11; raica talega na 2 Nifai 27:15–18]” (“The Contributions of Martin Harris,” Revelations in Context [2016], 3–4, history.ChurchofJesusChrist.org).

Na ivolanikalou e saqata na lawaki nei Setani.

Vunau vakailasu	Vunau dina
“Ni sa sega ni Kalou ni cakamana ena gauna oqo ko koya; sa vakayacora oti na nona cakacaka” (2 Nifai 28:6).	Moronai 7:35–37
“Na Kalou … ena vakadonuya ko Koya ke vakalailai ga na ivalavala ca” (2 Nifai 28:8).	Vunau kei na Veiyalayalati 1:31
“Sa vinaka tu ko Saioni” (2 Nifai 28:21).	Vunau kei na Veiyalayalati 68:31; 82:14
“Au sega ni tevoro, ni sa sega ni dua na tevoro” (2 Nifai 28:22).	2 Nifai 2:17; Vunau kei na Veiyalayalati 76:25–27
“Sa sega ni yaga vei keimami me so tale na vosa ni Kalou, ni sa rauti keimami ga oqo” (2 Nifai 28:29).	2 Nifai 28:30; Yavu ni Vakabauta 1:9

Vakatorocaketaki ni Noda Veivakavulici

Kakua ni rerevaka na vagagalu. “Na taro vinaka ena taura toka na gauna me saumi mai. Era na gadreva na vakasama titobu, na vaqaqara, kei na veivakauqeti. Na gauna o waraka tiko kina na isaunitaro sa gauna tabu ni vakasama vakatitobu. Drovaka na veitemaki mo yalana na gauna ena nomu sauma ga na nomu taro se mo toso tale ki na dua na ulutaga.” (Veivakavulici ena iVakarau ni iVakabula, 31).