era cakacaka na tagane ena were ni veiolive

Na Vosa Vakaibalebale ni Vu ni Olive, mai vei Brad Teare

16–22 ni Maji

Jekope 5–7

Sa Cakacaka Vata kei Keda na Turaga

Tekivuna na nomu vakavakarau mo veivakavulici ena nomu wilika vakai iko kei na nomu matavuvale na Jekope 5–7 . Na cava o sa vulica ena yaga vakalevu vei ira o vakavulica? Na ituvatuva oqo ena vakarautaka vei iko na ikuri ni vakasama.

Vola na Veika o Uqeti Kina

ivakatakilakila ni veiwasei

Sureta na Veiwasei

Na cava era sa kunea na lewe ni kalasi ena Jekope 5–7 a uqeti ira mera “cakacaka ena were ni vaini” era vakaitikotiko kina? (Jekope 5:15).

ivakatakilakila ni veivakavulici

Vakavulica na iVunau

Jekope 5

Na Turaga sa sureti ira na Nona tamata cakacaka mera cakacaka vata kei koya ena Nona were ni vaini.

• Ena vuku ni vosa vakaibalebale ni vei olive e balavu ka veicurumaki, sa rawa mo cakacaka vata vakalasi me lekaleka ga na usutu ni vosa vakaibalebale. Me vakataka, sa rawa mo droinitaka ena papa na gacagaca bibi ni vosa vakaibalebale se cakava e dua na gauna tuvai ni veika e yaco (me vakataka, raica na daiqaramu ena icavacava ni ituvatuva oqo). Sa rawa ki na lewe ni kalasi mera kuria na veitiki ni ivolanikalou se ivakamacala ki na droini ka veivosakitaka na ibalebale ni so na ivakatakarakara, me vakataka na vu ni olive vinaka kei kena ni veikau, na were ni vaini ni Turaga, na tamata cakacaka, kei na vuanikau vinaka kei na vuanikau ca. Ni sa vakacagau na veivosaki, raica na tikina e 61–75, e vakamacalataka tiko na cakacaka ni Turaga ena noda gauna nikua. Sa vakacava tiko na noda veiqaravi ena were ni vani ni Turaga? E semati vakacava na veitikina oqo ki na cakacaka eda vakayacora tiko?

• Sa rawa ki na vosa ni “Turaga ni were ni vaini” me vakacegui ira na nodra itubutubu na gone cidroi. Me vakataka, na cava e vakatura tiko na Jekope 5:41, 46–47 baleta na sala e dau nanumi ira kina na luvena na Tamada Vakalomalagi ena gauna era lako tani kina? E dau tovolea vakacava me vakabulai ira? (raica na tikina 61–75

• E vakavulica naJekope 5:61–75 ni sa dau cakacaka vata na Turaga kei ira Nona tamata cakacaka ena Nona were ni vaini. Sa rawa mera wilika vakailawalawa lalai na lewe ni kalasi na veitikina oqo ka veivosakitaka na nodra sotava na gauna a vakaraitaki kina ni Turaga sa dau cakacaka vata kei ira na Nona tamata cakacaka me tosoi kina na Nona cakacaka. Na veivakararamataki cava era rawa ni kuria na lewe ni kalasi mai na itukutuku nei Peresitedi Henry B. Eyring “Na Turaga sa Liutaka Tiko na Nona Lotu”? Ensign se Liaona, Nove. 2017, 81–84).

  rau taba kompiuta tiko na veiwatini matua kei ira eso

  Eda sa rawa ni cakacaka vata kei na “Turaga ni were ni vaini” eke e vuravura.

Jekope 6:3–13

Na Turaga sa dau nanumi ira na Nona tamata ena loloma veivueti kei na loloma soliwale.

• Sa veisureti tiko naLako Mai, Mo Muri Au—Baleta na Tamata Yadua kei na Matavuvale meda vakasaqara ena Jekope 6:3–5 na itukutuku e vinakata o Jekope me vakamatatataka ka me kunei na itukutuku oqori ena vosa vakaibalebale ni vei vu ni olive (raica na Jekope 5). E rawa ni na yaga vei ira lewe ni kalasi ni ra vakarorogo vei ira a cakava na itaviqaravi oqo se ira sa cakava tiko na itaviqaravi oqo vaka-kalasi. Sa rawa mera vola ena papa na dina ni kosipeli era sa raica ena Jekope 6. Ena ruku ni dina yadua oqori, mera na vola na veitikina mai na vosa vakaibalebale ena Jekope 5 era tukuna tiko na itukutuku oqori. Era sa raica vakacava na kalasi na kena vakaraitaki na itukutuku vata oqo ki na nodra dui bula?

• Dua na ibalebale ni vosa tautauri matua o ya mo vakarogoca vakamatua, vakavinaka, ka vakatudei e dua na ka. Sa rawa mo wasea na ivakamacala oqo ki na nomu kalasi ka taroga na veivakararamataki cava sa soli vei ira baleta na Jekope 6:5.

Jekope 7:1-23

Eda sa rawa ni tudei tu ena gauna era bolea kina na tamata na noda vakabauta.

• E vuqa vei keda sa sotava oti na kena saqati na noda vakabauta me vakataki Jekope ni a sotavi Seremi. Dua na sala mera vakavakarau na kalasi ki na veisaqasaqa vakaoqo o ya mera vakasaqara ena Jekope 7:1–23 na ivakavuvuli a vukei Jekope me tudei tu ena qaqa. Na ivakaraitaka cava ni tudei qaqa tu ena noda vakabauta eda rawa ni wasea—mai na ivolanikalou, noda tuva kawa, se ena noda bula? E rairai a vukei keda na nodra itukutuku na iliuliu ni Lotu ena gauna era a saga kina eso mera vakayavalata na noda vakabauta (me vakataka nomu raica na, Quentin L. Cook, “Gumatua ena iVakadinadina Baleti Jisu,” Ensign se Liaona, Nove. 2016, 40–43). Vakayaloqaqataki ira na lewe ni kalasi mera wasea na itukutuku eso era sa vukei kina vakalevu.

• Ena gauna sa vakasaurarataki Jekope kina o Seremi, sa vakabauta sara o Seremi ni sa na vakayavalata na vakabauta nei Jekope, ia na vakabauta nei Jekope a sega ni vakayavalati rawa (raica na Jekope 7:5). Era na marautaka na lewe ni kalasi kera dramataka na nodrau a sota o Jekope kei Seremi, ni ra vakayagataka na Jekope 7:1–23 me nodra vosa. Na cava eda sa vulica mai na veitikina oqo baleta na nodra iwalewale kei na veivakavulici o ira sa dau saqata na cakacaka ni Kalou? Na cava eda sa vulica maivei Jekope baleta na sala meda kakua ni vakayavalati rawa ena noda vakabauta?

Jekope 7:24–25

Meda nuitaka ga na Kalou.

• Era a bula sotava na Nifaiti na nodra valuti tikoga maivei ira na Lemanaiti. Dina ga ni da sega ni sotava e veisiga na vakarerevaki ni veivaluvaluti, na ka rerevaki vakayalo cava eda sotava tiko? Na cava eda vulica mai na ka era cakava na Nifaiti ena mataqali ivakarau vaka oya, e tukuni tiko ena Jekope 7:24–25 Sa rawa mo ni lagata se wilika ka qai veivosakitaka na sere ni Lotu e vakayagataka na ivalu me vosa vakatautauvata, me vakataka na “Cavu Tu Nai Valu” se “Mataivalu Ni Tui” (Serenilotu, naba 147, 151).

ivakatakilakila ni vuli.

Vakayaloqaqataka na Vuli e Vale

Mera vakayaloqaqataki na lewe ni kalasi mera wilika na ivola i Inosi, tukuna ni sa rawa me vakavulica vei ira na sala me vakaibalebale cake kina na nodra masu.

Vakatorocaketaki ni Noda Veivakavulici

Me usutu ni nomu veivakavulici na ivunau. Raica me vakatabakidua na veivosaki ena vunau e vakayavutaki ena ivolanikalou. Sa rawa mo cakava oqo ena nodra wilika na kalasi na ivolanikalou ka qai wasea na dina era sa kunea, kei na veika era sa sotava ni ra bulataka na dina oqori. (Raica na Veivakavulici ena iVakarau ni iVakabula, 20–21

na daiqaramu ni vosa vakaibalebale ni vu ni olive