E vakavulici ira na Nona tisaipeli o Jisu

E vakavulici Ira na Nona Tisaipeli na Karisito, maivei Justin Kunz

2–8 ni Maji

2 Nifai 31–33

“Sai Koya Oqo na Sala”

Ni ko vulica na 2 Nifai 31–33, mo vakasamataki ira tiko na nomu kalasi ka rogoca na veika era sa bau sotava baleta na dina a vakavulica o Nifai. O na sureti ira vakacava mera veivakavulici vakai ira ena veika era sa dui vulica ka vakila baleta na vunau oqo?

Vola na Veika o Uqeti Kina

ivakatakilakila ni veiwasei

Sureta na Veiwasei

A dua beka ena nomu kalasi a sovata e dua na ka a vakaibalebale cake vua ena macawa oqo mai na vakatutu ni vuli ena Lako Mai, Mo Muri Au—Baleta na Tamata Yadua kei na Matavuvale? Solia na gauna ki na kalasi mera wasea na veika era sa sotava.

ivakatakilakila ni veivakavulici

Vakavulica na iVunau

2 Nifai 31–32

O Jisu Karisito ga kei na Nona vunau sa sala duadua ga ki na bula tawamudu.

• E rairai na vinaka ki na kalasi mera raica na sala e veiwekani kina na vakabauta, veivutuni, papitaiso, na isolisoli ni Yalo Tabu, kei na vosota ki na ivakataotioti vata kei na Veisorovaki i Jisu Karisito. Ni gadrevi me caka oqo, mo droinitaka e dua na gaunisala ena papa ka sureta na kalasi mera vola ena gaunisala eso na ivakavuvuli era tiko ena 2 Nifai 31. Mera digitaka na lewe ni kalasi yadua e dua na ivakavuvuli ka vakasaqara ena 2 Nifai 31–32 na veika a vakavulica o Nifai baleta na ka oqo. Mera qai wasea vakai ira na veika era sa kunea ka veivosakitaka na kena rawa ni vukei ira mera kila vinaka cake kina na ivakavuvuli oqo. E kauta mai vakacava na veivakalougatataki ni Veisorovaki i Jisu Karisito ni da bulataka na ivakavuvuli oqo ki na noda bula?

• O na tekivuna vakacava na veivosaki baleta na ivakamacala matata ka rawarawa i Nifai baleta “na sala” ni veivakabulai? (2 Nifai 31:21). Sa rawa mo taroga na kalasi na cava era na kaya ke soli ga vei ira e 60 na sekodi mera vakamacalataka na cava mena cakava e dua me vakabulai kina. Mera qai vakadeuca na kalasi na 2 Nifai 31–32, mera raica na itukutuku e rawa ni veivukei. Na cava e rawa ni da vulica mai na veiwase oqo baleta na usutu ni ilesilesi ni iVakabula me vakabulai keda? Na itukutuku e tiko ena “iKuri ni iVurevure” ena veivuke ki na veivosaki oqo.

• Eso na gauna eda raica na ivakavuvuli ni kosipeli era duatani ka duidui, ia na kena ka dina ni ra sa veisemati. Ni gadrevi mera raica na kalasi na kena veisemati tiko na ivakavuvuli e tiko ena 2 Nifai 31 sureta na kalasi, vakayadudua, se vakailawalawa lalai, mera wilika na tikina e 4–21 ka cakava e dua na daiqaramu me vakaraitaka ni vakabauta na Karisito, veivutuni, papitaiso, na isolisoli ni Yalo Tabu, kei na vosota ki na ivakataotioti era veituvatuvai cake, veisemati, kei na veika tale eso. Vakayaloqaqataki ira mera dau cakava na ka vou. Ni ra wasea na nodra daiqaramu ki na kalasi, kerea mera wasea na veika era sa vulica baleta na ivakavuvuli. E rawa vakacava ni da cakava me tiki ni noda bula e veisiga?

2 Nifai 31:15–20

“Ko koya sa vosota me yacova na ivakataotioti, ena vakabulai.”

• Era sa kila vinaka tiko beka na kalasi na ibalebale ni vosota ki na ivakataotioti? Oqo e dua na itaviqaravi me na veivuke. Vola ena papa Meu na kila vakacava keu sa vosota tiko ki na ivakataotioti? Mo qai sureta na kalasi mera vakasaqara ena 2 Nifai 31:15–20 na isaunitaro dodonu. Kerea na kalasi mera vola ena papa na vosa se malanivosa veivukei era sa raica. Cava na vuna sa tiki bibi kina na vosota ki na ivakataotioti ena vunau i Karisito? Sa rawa mo wasea talega na itukutuku nei Elder Dieter F. Uchtdorf ena “iKuri ni iVurevure” se na itukutuku baleta na vosota ki na ivakataotioti ena tabana e 6 ni Vunautaka Noqu Kosipeli.

• Era kila tiko beka na kalasi e dua e ivakaraitaki vinaka ni vosota ki na ivakataotioti? Na cava sa vukei koya na tamata oqo me “toso ki liu ka tudei vei Karisito”? (tikina 20). Sa rawa mo wasea na kedra italanoa eso e tiko ena ivolanikalou era sa vosota ki na ivakataotioti.

2 Nifai 32:1–6

Ena vakatakila vei keda na Yalo Tabu na veika dodonu meda cakava.

• Ena 2 Nifai 32, a veivakaroti o Nifai baleta e dua na kauwai e raica ni dredre vei ira na nona tamata mera bulataka na vunau i Karisito. Sa rawa mo sureta na kalasi mera vakasaqara na kauwai oqo ena 2 Nifai 32:1 ka wiliki na isaunitaro nei Nifai ena 2 Nifai 32:2–6. Era na tokaruataka tale vakacava na kalasi ena nodra vosa ga na veivakavulici nei Nifai? Era sa sotava vakacava na kalasi na gauna a vakatakila kina na Yalo Tabu se na vosa i Karisito vei ira na veika e gadrevi mera cakava?

2 Nifai 33

E vakauqeti keda na iVola i Momani meda vakadinata na Karisito.

• Sa nuitaka tiko o Nifai ni na vakauqeti keda na nona vosa meda “kitaka na ka vinaka [ka] vakabauti [Karisito]” (2 Nifai 33:4). Na itukutuku se italanoa cava mai na 1 kei na 2 Nifai sa vakauqeti keda tiko meda caka vinaka ka vakabauti Karisito? Sa rawa mo raica eso na serenilotu me lagata se rogoca me qaqaco kina na itukutuku oqo, me vakataka na “Au Kilai Jisu” se “Na Caka Vinaka?” (Serenilotu, naba 74, 131).

ivakatakilakila ni vuli.

Vakayaloqaqataka na Vuli e Vale

Dua na sala mera uqeti kina na kalasi mera vulica na Jekope 1–4 ena macawa mai oqo o ya mo vakamacalataka ni tiko ena wase oqo na ivakaro nei Jekope baleta e rua na ivalavala ca sa caka vakalevu tu ena gauna oqo.

ivakatakilakila ni ivurevure

iKuri ni iVurevure

Na ivunau i Karisito.

E vakavulica o Elder Jeffrey R. Holland: “Na ‘vunau i Karisito’ a vakavulica o Nifai ena nona vosa cecere, vakaiusutu ki na raicimatua ni vakabauta na Turaga o Jisu Karisito, veivutuni, papitaiso ena tabadromuci, ciqoma na isolisoli ni Yalo Tabu, ka vosota ki na ivakataotioti. E sega ena ivakaro oqo, me kovuta na ituvatuva taucoko ni veivakabulai, na ivakarau dodonu kece ni bula Vakarisito, se na isau ni veika vinaka oqo sa waraki keda tu mai ena veimatanitu lagilagi. E sega ena ivakaro oqo, me lewa na ilesilesi ni matabete, na cakacaka vakalotu ni valetabu, se vuqa na vunau dina tale eso. Era sa ka bibi kece sara oqo, ia na kena vakayagataki ena iVola i Momani, ‘na vunau i Karisito’ e rawarawa ka dodonu. E raicamatua na imatai ni ivakavuvuli ni kosipeli sa kovuti kina, oka kina na vakatakilai ni yaloqaqa ki na ivakataotioti, na gugumatua, kei na toso ki liu. Sa dina sara, na matata kei na rawarawa ni ‘vunau i Karisito’ sa kune kina na kena kaukauwa” (Christ and the New Covenant: The Messianic Message of the Book of Mormon [1997], 49–50).

E kaya o Elder D. Todd Christofferson: “Au sa kerekere vei kemuni kece … mo ni vakasaqara ena masumasu kei na vulici ni ivolanikalou, [na] ivakadinadina ni ituvaki vakalou, na Veisorovaki, kei na Tucake Tale nei Jisu Karisito. Ciqoma na Nona ivunau ena veivutuni, papitaiso, ciqoma na isolisoli ni Yalo Tabu, ka qai muria tiko ena nomu bula taucoko na lawa kei na veiyalayalati ni kosipeli i Jisu Karisito” (“Na Vunau i Karisito,” Ensign se Liaona, Me 2012, 89).

Vosota Me Yacova na iVakataotioti

E vakamacalataka o Peresitedi Dieter F. Uchtdorf:

“Niu a se gonetagane na ‘vosota me yacova na ivakataotioti’ e kena ibalebale vei au meu yadra tikoga me yacova ni sa oti na soqoni ni Lotu. E muri niu sa laki itabagone … au semata na ka oqo kei na noqu kila vakaitabagone na nodra sasaga tikoga o ira na noda lewenilotu lomani qase sara me ra gugumatua tikoga ki na iotioti ni gauna ni nodra bula. …

“… Na vosota me yacova na ivakataotioti e sega walega ni kena sagai me vinaka tu ga na bula ena gauna dredre se ‘toso tikoga ki liu.’ Eda lewena tiko na lotu e bula, na nodra vukei na luve ni Kalou ena sala sa qiqo ka rabalailai me ra yacova rawa kina na kedra ituvaki dina ka lesu tale Vua ena dua na siga. Ena rai oqo, na vosota tiko me yacova na ivakataotioti sa veivakabulai ka lagilagi, e sega ni ka wale ka butobuto. Oqo e dua na lotu mamarau, e tiko kina na inuinui, na kaukauwa kei na veivueti. …

“Na vosota me yacova na ivakataotioti e gadrevi kina na ‘gumatua tiko ena ivalavala vinaka’ (Roma 2:7), muria tiko na vunau (raica na 2 Nifai 31:10), ka qaravi vakadodonu na itavi (raica na V&V 59:23)” (“E Sega Li ni Kilikili Meda Marau?” Ensign se Liaona, Nove. 2007, 20).

Vakatorocaketaki Noda Veivakavulici

Eda sa vuli vata. O iko o qasenivuli, ka sega walega ni ko soli itukutuku tiko—o sa vuli vata tale tikoga kei ira na kalasi. Wasea vei ira na veika ko sa cakava tiko mo vuli mai na ivolanikalou.