17–23 ni Feperueri

2 Nifai 11–25

“Eda Reki ena Vukui Karisito”

Me ikuri ni kena vakatauvatani na 2 Nifai 11–25 kivei iko, sa rawa mo vukei ira na tamata mera vakatauvatana na wase oqo kivei ira (raica na 2 Nifai 11:8). Ni sa vakauqeti iko na Yalo ena vakanananu kei na vakasama, volai ira sara.

Vola na Veika o Uqeti Kina

Sureta na Veiwasei

Ni bera ni veivosakitaki na tikina bibi eso mai na 2 Nifai 11–25, ena veivuke sara mera raitayalotaka na kalasi e dua na nodra itokani sa sasagataka tiko me kila e dua na ka vakaibalebale cake se veivakauqeti ena itukutuku nei Aisea. Na tikina cava e rawa ni ra wasea vei itokani oqo?

Vakavulica na iVunau

2 Nifai 11–24

E vakadinadinataki Jisu Karisito o Aisea.

• Ena rawarawa cake me kilai vinaka na parofisai nei Aisea ena noda kila na vuna era a volai kina. Me tekivu na veivosakitaki ni parofisai nei Aisea ena 2 Nifai, mo sureta na kalasi mera vakasaqara ena wase 11 ka vola e vica na inaki nei Nifai me vola vakalevu na vosa nei Aisea. Sa rawa mera wasea talega na itukutuku era sa kunea ena nodra vulica vakayadua se vakamatavuvale na 2 Nifai 12–24 era nanuma kina ni sa rawati na kena inaki. Na kena kilai vinaka na inaki nei Nifai e sa vukea vakacava kina na kalasi mera vakavukui sara ena veika sa vola o Aisea? Vakayaloqaqataki ira mera dau nanuma tiko na inaki oqori ni ra veivosakitaka ena kalasi na veika a vola o Aisea.

• Ena vuku ga ni a vakayagataka vakalevu o Aisea na vosa ivakatakarakara, e rawarawa sara me na raibaleti kina na nona ivakadinadina kaukauwa i Jisu Karisito. Oqo e dua na itaviqaravi ena vukea na kalasi me raicamatua na ivakadinadina oqo. Sa rawa mo vakarautaka eso na pepa era volai tu kina na veitiki ni ivolanikalou mai na 2 Nifai 12–24 e vakavulica na veika baleta na iVakabula (me vakataka na, 2 Nifai 13:13; 14:4–6; 15:1–7; 16:1–7; 17:14; 18:14–15; 19:6–7; 21:1–5; 22:2). Mera qai digitaka na lewe yadua ni kalasi e dua na pepa, vulica na tikina era volai tiko kina, ka qai vola ena pepa na veika e sa vulica baleti Jisu Karisito. Mera qai veisau pepa na lewe ni kalasi kei na dua tale ka mera qai kuria kina na vakanananu se raikiloma eso tale era sa vulica baleta na iVakabula mai na tikina vata ga. E rawa ni ko qai solia ki na lewe ni kalasi na gauna mera wasea na veika era vulica maivei Aisea vakakina vakai ira e vakatitobutaka nodra vakavinavinaka baleti Jisu Karisito.

• Na parofisai e tiko ena 2 Nifai 19:6 e tukuna tiko e vica na itutu i Jisu Karisito. Sa rawa mo kerea e dua me vola na itutu oqo ena papa ka mera veivosakitaka na kalasi na vuna e veiganiti kina na icavuti eso oqo me tukuna na iVakabula. E sa vakayacora vakacava na Karisito na ilesilesi oqo ki na noda bula? Ni gadrevi me vulici vakalevu e baleta eso na icavuti oqo, ena veivuke na kena raici na itukutuku ena botoni 2 Nifai 19:6.

2 Nifai 12:2–5; 21:10–12; 22

Ena veisiga emuri, era sa na vakasokumuni mai na tamata ni Kalou ka ra marautaka na vakacegu.

• E vica na tiki ni parofisai nei Aisea sa baleti keda sara tikoga baleta ni ra vakamacalataka tiko na ituvaki ni cakacaka ni Kalou ena veisiga emuri. Me ivakaraitaki, e rawa ni ko dikeva na 2 Nifai 21:10–12, e vakamacalataka tiko e dua na “drotini” (ivakatakilakila se kuila) ena vakarewa mera vakasokumuni na tamata ni Kalou. Eda sa raica vakacava ni sa vakasokumuni ira tiko vakayalo na Nona tamata na Turaga? Sa rawa beka mera tukuna eso ena kalasi na cava e yaco mera vinakata kina na soqoni se duavata kei ira na tamata ni Kalou ena Lotu. Era na rairai lasata sara mera cakava ga na nodra kuila e volai se vakaraitaka eso na dina ni kosipeli era nanuma ni ra dau “vakasaqara” na tamata ka vukea na “vakasoqoni” ka “soqona vata” (tikina e 10 kei na 12) o ira na luve ni Kalou ena noda gauna. Eda na veivuke vakacava ki na vakasokomuni?

• Dua tale na sala ni kena veivosakitaki na vunau oqo o ya me volai na ulutaga oqo ena papa: Veiseyaki o Isireli, Vakasokomuni o Isireli, kei na Parofisai i Karisito. Sa rawa mo lesia na wase eso mai na 2 Nifai 12–24 ki na ilawalawa eso ena kalasi ka sureta mera vakasaqara na veitikina era vakavulica na veika oqo ka vola na veitikina oqori ena ruku ni kedra ulutaga donu sa tu ena papa. Na itukutuku cava mai na veitikina oqo e tu me noda? (Ena rawa me veivuke me tukuni ki na kalasi ni rawa ni veivuke na Vunau kei na Veiyalayalati 113:1–6 mera kila kina na 2 Nifai 21:1–5, 10.)

• Na serenilotu me vakataka na “E Ulunivanua” (Serenilotu, naba 4) se “Noqu Rarama na Turaga” (Serenilotu, naba 45), era sa yavutaki vakatikina ena parofisai ena 2 Nifai 12:2–5 kei na 2 Nifai 22, ena rawa me vaqaqacotaka na itukutuku kei na yalo ni vosa nei Aisea.

2 Nifai 14:4–6

Na noda itikotiko kei na “isoqosoqo” kei Saioni sa rawa me vanua ni veitaqomaki kei na idrodro.

• Ena 2 Nifai 14:4–6 e parofisaitaka kina o Aisea na veitaqomaki kei na vakacegu era na rekitaka na tamata ivalavala dodonu ni sa “savata tani” ka “savata laivi” na Turaga na nodra ivalavala ca. Dina ga ni veitikina oqo e vakamacalataka na ituvaki ena yaco ena Mileniumi, e rawa ni vukea na kalasi ni ra vakasaqara na veitaqomaki vakayalo ena loma ni veika butobuto ena veisiga emuri. Sureta mera tugana ka veivosakitaka na ibalebale ni kena tiko “na o kei na kubou” kei na “buka waqa” ena nodra “itikotiko” kei na “vei vavakoso” (tikina e 5; raica talega na Lako Yani 13:21–22). Na cava eso na ka e rawa ni vakatauvatani ki na katakata, cava, kei na uca e tukuni tiko ena tikina e 6? Me da na kunea vakacava na ivakaruru? (raica talega V&V 115:6). E rairai ni rawa mera vakatura na lewe ni kalasi na sala me tutaki kina na noda itikotiko kei na veisoqoni ni Lotu me veivanua ni tataqomaki vakayalo.

2 Nifai 25:19–29

“Sa sala dodonu me vakabauti Karisito.”

• Sa rawa ki na nomu kalasi mera vakasamataka na gagadre nei Nifai “me da vakauqeti ira kina na noda kawa, kei ira talega na wekada, mera vakabauti Karisito.” Ena sala cava a “cakacaka vagumatua” kina o Nifai me rawata kina na lalawa oqo? (2 Nifai 25:23). Sa rawa ki na lewe ni kalasi mera vakasaqara ena 2 Nifai 25:19–29 na dina baleta na iVakabula kei na Nona kosipeli a gadreva o Nifai mera kila na nona tamata. Mera sa qai wasea na veika era sa cakava me vakavulici kina na dina oqo ki na nodra vuvale se itokani. Me vakataka, na sala cava era sa vakavulica kina na dina ni “da sa vakabulai ena loloma soli wale, ni sa oti sara na veika kece eda rawa ni cakava”? (Na itukutuku nei Peresitedi Dieter F. Uchtdorf ena “iKuri ni iVurevure” e rawa ni soli raikiloma eso ki na dina oqo.) E sa vukei ira vakacava eso mera “reki ena vukui Karisito”?

Vakayaloqaqataka na Vuli e Vale

Era na rairai taleitaka na lewe ni kalasi mera kila ni sa rawa ni vukei ira na 2 Nifai 26–30 mera tukuna vei ira na tamata era kaya mai, “Keimami sega ni gadreva na iVola i Momani.”

iKuri ni iVurevure

“Ni sa sucu mai vei keda e dua na gone.”

Me vukea na veivosaki baleta na 2 Nifai 19:6, sarava se vakarorogo ki na Mormon Tabernacle Choir ni ra lagata na “For unto Us a Child Is Born” (ChurchofJesusChrist.org).

“Eda sa kila ni da sa vakabulai ena loloma soli wale, ni sa oti sara na veika kece eda rawa ni cakava.”

Ena nona vakamacalataka na vosa nei Nifai ena 2 Nifai 25:23, a kaya kina o Peresitedi Dieter F. Uchtdorf:

“Koya gona, au kaya kina ni so beka na gauna eda dau nanuma cala na malanivosa ‘ni sa oti sara na veika kece eda rawa ni cakava.’ Sa dodonu me da kila deivaka ni ‘oti” e sega ni tautauvata kei na ‘baleta.’

Eda sega ni vakabulai ‘baleta’ na veika eda rawa ni cakava. Sa dua beka vei keda sa cakava kece sara na ka eda rawa ni cakava? E dau wawa li na Kalou me yacova ni da sa vakayacora noda veisasaga ni bera ni qai dau takoso mai kei na Nona loloma vakalou ki na noda bula? …

“Au vakadeitaka ni kila tu o Nifai ni loloma vakalou ni iVakabula e vakadonuya ka vakatara vei keda meda vorata na ivalavala ca [raica na 2 Nifai 4:19–35; Alama 34:31]. Oqo na vuna sa cakacaka sara kina vakaukauwa o Nifai me vakauqeti ira kina na nona kawa kei ira na wekana ‘mera vakabauti Karisito, ka veivinakati tale kei na Kalou’ [2 Nifai 25:23].

“Me kena itinitini, sai koya oqori na ka eda rawa ni cakava! Ka sa ikoya oqori na noda itavi ena bula oqo!” (“Na iSolisoli ni Loloma Soliwale,” Ensign se Liaona, Me 2015, 110).

Vakatorocaketaki ni Noda Veivakavulici

Taroga na ka e sureta na ivakadinadina. “Ni tarogi na taro ka na uqeti ira na vuli mera wasea nodra ivakadinadina ni ivakavuvuli e vakavulici ena rawa ni sala kaukauwa ni kena sureti na Yalotabu. … Na nodra ivakadinadina—kei na nodra ivakadinadina na vo ni lewe ni kalasi—ena tubu cake ni sa cakacaka na Yalotabu me tukuna na ka dina” (Veivakavulici ena iVakarau ni iVakabula, 32).