Kakua ni Yaco na Noqu Lewa, Nomuni Lewa Ga, mai vei Harry Anderson.

10–16 ni Feperueri

2 Nifai 6–10

“A Ka Levu Vakaidina na Nona iTuvatuva na Noda Kalou!”

Dua na sala mo vakarautaki iko kina mo veivakavulici o ya mo wilika mada e liu na 2 Nifai 6–10 . Vola na vakauqeti vakayalo o sa ciqoma, ka vakayagataka na ituvatuva oqo mo kunea na ikuri ni veivakararamataki kei na vakasama ni veivakavulici.

Vola na Veika o Uqeti Kina

Sureta na Veiwasei

A vakavulici ira na nona tamata o Jekope me ra cakava na ivakavuvuli nei Aisea me “vakatautauvatataki vei kemudou” (2 Nifai 6:5). Sa rawa mo tekivu ena nomu kerea na kalasi mera wasea e dua na ivakavuvuli nei Jekope e tiko ena 2 Nifai 6–10 era nanuma ni rawa mera vakatauvatana ki na nodra bula. Sa rawa mera vakamacalataka na vuna e vakaibalebale cake kina na ivakavuvuli o ya.

Vakavulica na iVunau

2 Nifai 6–8

Sa loloma veivueti tikoga na Turaga vei ira na Nona tamata ka na cakava na Nona yalayala.

• Me kilai vinaka na itukutuku ena 2 Nifai 6–8, ena veivuke ki na kalasi mera cakava e dua na gauna tuvai ni veika a yaco e tukuni tiko ena 2 Nifai 6:8–15. Na cava e tukuna tiko na veika sa yaco oqo baleta na Turaga kei na nona nanuma baleti ira na Nona tamata? (raica talega na 2 Nifai 7:1–3; 8:3). Sa rawa mo vakamacalataka ni oi keda na lewe ni Lotu, eda sa tamata veiyalayalati ni Kalou ena gauna nikua, ka da sa vakasokumuni tiko e vuravura taucoko ena veitaqomaki ni kosipeli. Na itukutuku cava me noda nikua mai na wase oqo?

2 Nifai 9

Mai na Nona Veisorovaki, sa sereki ira na tamata kecega o Jisu Karisito mai na mate vakayago kei na vakayalo.

• Dua na sala me titobu kina na noda vakavinavinakataka na Veisorovaki o ya meda vakasamataka na cava beka ena yaco vei keda ke sega na Veisorovaki. Sa rawa ki na kalasi mera vakasamataka vakatitobu na veika oqo ni ra vulica na 2 Nifai 9. Sa rawa mo sureta na kalasi mera tekivu ena nodra wilika na tikina e 4–9 ka vola ena papa na veika ena rawa ni yaco kevaka e sega na Veisorovaki i Karisito. E tukuni tiko ena tikina e 10–14, a vakabulai keda vakacava na iVakabula mai na ilavaki mate oqo? E rawa ni veivuke ki na kalasi na itukutuku nei Elder Jeffrey R. Holland ena “iKuri ni iVurevure” mera kila vinaka ni da sa gadreva dina na Veisorovaki i Jisu Karisito. Sa rawa talega mo vakaraitaka na vidio e yavutaki tiko na nona itukutuku—“Where Justice, Love, and Mercy Meet” (ChurchofJesusChrist.org). Sa rawa ki na kalasi mera wasea na vakasama eso se nanuma sa veivakauqeti tiko kina na itukutuku nei Elder Holland baleta na iVakabula.

• Kerei ira na kalasi mera raica na sala mera vakamacalataka kina na Veisorovaki i Jisu Karisito vua e dua e sega tu ni kila se na vuna e gadrevi kina. Ena rawa me veivuke na dina era tiko ena 2 Nifai 9 mera vakavakarau na kalasi ena dua na mataqali veivosaki vakaoqo. Sa rawa talega me ra vakasaqara ena tikina e 4–12, na kena qaqa rawa na Veisorovaki ni iVakabula vei mate vakayago ka vakayalo. Vakayavutaki mai na veika eda sa vulica mai na ivolanikalou oqo, cava na vuna e vakatokai kina na solibula ni iVakabula me “dua na veisorovaki tawayalani”? (2 Nifai 9:7).

• A kurabui vakalevu o Jekope ena ituvatuva veivueti ni Kalou ka kaya kina vakaoqo “A ka levu” kei na “Ka levu sara” ni tukuna tiko na ituvatuva. Ni gadrevi mera kila vinaka na kalasi na vakanananu oqo baleta na iVakabula kei na Nona Veisorovaki, sa rawa mo sureti ira mera vakasaqara ena 2 Nifai 9 na veivakalagilagi nei Jekope (ka vuqa era tiko ena tikina e 8–20). Na cava era vakavulica na tikina oqo baleta na Kalou kei na Nona ituvatuva? Na veika cava a sotavi sa vukea meda vakila na vakanananu nei Jekope baleta na ituvatuva ni Kalou vei ira na Luvena? Sa rawa me lagati talega na sere ni cecere ni Kalou, me vakataka na “Noqu Kalou Au Kurabui ka Galu” (Serenilotu, naba 44), me qaqaco kina na veivosaki oqo.

2 Nifai 9:27–54

Sa rawa meda lako maivei Karisito ka ciqoma na veivakalougatataki lagilagi ni Nona Veisorovaki.

• Sa rawa mo tekivuna na veivosakitaki ni ivakavuvuli i Jekope ena veitikina oqo ena nomu kerea na kalasi mera raitayalotaka ni ra sureta e dua me veivutuni ka lako maivei Karisito. A cakava vakacava qo o Jekope ena 2 Nifai 9:50–53? Na veivakalougatataki cava a kaya ni na yaco ki na noda bula ni da ciqoma na veisureti oqo?

• Ena 2 Nifai 9, a vakayagataka o Jekope e rua na malanivosa kaukauwa ka veibasai: “na nona ituvatuva loloma na Dauniveibuli cecere” kei na “nona inaki qaseqase na vu ni ca” (2 Nifai 9:6, 28). Ni gadrevi mera vukei na kalasi mera vulica na veibasai oqo, mo droinitaka ena papa e dua na gaunisala ka vola kina iTuvatuva nei Tamada Vakalomalagi. Sureta na kalasi mera vakasaqara ena 2 Nifai 9:27–52, na ivakasala nei Jekope a solia me vukea noda muria na ituvatuva nei Tamada Vakalomalagi. Kerei ira me ra vola ena yasa ni gaunisala na ka era sa kunea. Na cava e vakavulica o Jekope baleta na veibacani nei Setani meda lako tani mai na ituvatuva nei Tamada Vakalomalagi? Na cava eda vulica mai na veitikina oqo baleta na vanua ena muataki keda kina na ituvatuva nei Tamada Vakalomalagi kei na vanua ena muataki keda kina o Setani? (raica na 2 Nifai 9:9, 18). E tukuni tiko ena veitikina oqo, na cava eda rawa ni cakava vakalevu cake meda muria kina na ituvatuva nei Tamada Vakalomalagi?

• Ena 2 Nifai 9:28–38, a veivakaroti o Jekope me qarauni e vica na itovo kei na ivakarau ni bula e dau tarovi keda meda muria na ituvatuva ni Kalou. Sa rawa mo sureta na kalasi mera vakasaqara na itovo oqo. Na itovo se ivakarau ni bula cava vei ira oqo e vaka me sa caka tu ena gauna nikua? Cava na vuna era sa rui rerevaki sara kina? Na cava eda sa vulica mai na 2 Nifai 9:50–53 ena noda rawa ni drotani mai na ka rerevaki oqo?

Vakayaloqaqataka na Vuli e Vale

Ni gadrevi me vukei na kalasi mera yalonuidei tiko ni ra wilika na itukutuku i Aisea e tukuna tiko o Nifai ena 2 Nifai 11–24, mo vakamacalataka ni mai okata o Nifai na itukutuku oqo o ya me qaqaco na nodra vakabauti Jisu Karisito o ira na tamata. Sureta na kalasi mera raica na iwiliwili ni macawa mai oqo me madigi ni nodra tara cake na nodra vakabauti Koya.

iKuri ni iVurevure

Eda sa Gadreva Dina E Dua na iVakabula

A talanoataka o Elder Jeffrey R. Holland e dua na daukaba baba vatu sa lili tu ena dua na tutuna baba sobu, ka sega na ka e ra me tarova nona lutu ka mate. Ni sa cawadru tiko na ligana mai na tutuna baba nukunuku oqo, a vakila na ligai tacina gone ni sa qumia na ligana ka dreti koya cake. A vakatauvatataka kina o Elder Holland na ka a sotava o daukaba baba vatu ki na keda ituvaki ena vuravura sa baba sobu tiko oqo.

“A yaco dina na nodrau lutu o Atama kei Ivi mai Iteni, kei na revurevu kece ni lutu o ya a lako vata kaya. … Ena vuku ni noda a sucu mai ena vuravura ituvaki lutu tu vakaoya vakakina ni o keda talega eda na rawa ni vakacala na lawa ni Kalou, eda a totogitaki talega ena veibeitaki e tautauvata na kena rau a sotava o Atama kei Ivi.

“Sa dua dina na leqa levu! Na kawatamata taucoko ena dua na lutu galala—na tagane, yalewa, kei na gone era tu kina era vakatoqiqi kece tu yani ki na mate vakayago, ka dromu vakayalo tiko yani ena yaluma tawamudu. Sai koya beka oqori na inaki ni bula? Oqo beka na icavacava levu ni bula ni kawatamata? Eda lili tu beka ga ena dua na buca batabata ena dua na vanua ena dua na vuravura veivakawaleni, eda vakasaqaqara ibiubiu ni yava kece tu, eda dui vaqara kece tu e dua na ka meda kukube kina—e sega tale ni dua na ka, ia na vakilai walega ni masiraki ni nukunuku ena noda iqaqalo, sega na ka me vakabulai keda, sega na ka meda kukube kina, sa qai sega sara na ka me kukube mai veikeda? …

“Na isau ni veitaro oqori e dua na sega tawamudu ka sega ni vakacalai rawa! … [Na] Veisorovaki oya ena rawata na qaqa taucoko me rawai kina na mate vakayago, ka sega ni wasea na nona solia na vakaturicake tale kina na tamata yadua a sa sucu se me na qai sucu mai ki na vuravura oqo. Mai na loloma veivueti ena vakarautaka talega na veivosoti ki na ivalavala ca yadua ni tamata kece mai vei Atama ki na ivakataotioti kei vuravura me vakatau ki na veivutuni kei na talairawarawa ki na ivakaro kece vakalou” (“Lewa Dodonu, Loloma,” Ensign se Liaona, Me 2015, 105–6).

Vakatorocaketaki Noda Veivakavulici

Cavuta vakawasoma na nomu ivakadinadina Na nomu ivakadinadina, rawarawa ka dina baleta na dina vakayalo sa rawa me veivakauqeti kaukauwa vei ira o vakavulica. E sega ni gadrevi me titobu se balavu na nomu ivakadinadina. Sa rawa mo wasea na nomu ivakadinadina vakai iko me baleta na iVakabula ni caka tiko na veivosaki 2 Nifai 9.