O Liai kei na Liaona, maivei Joseph Brickey

27 ni Janueri–2 ni Feperueri

1 Nifai 16–22

“Kau na Vakarautaka na Sala Vei Kemudou”

Ni ko wilika na 1 Nifai 16–22, vakasamataka na sala ena rawa me veivuke ki na nomu kalasi na ivakaraitaki nei Nifai ni sotava na bolebole.

Vola na Veika o Uqeti Kina

Sureta na Veiwasei

E raica o Nifai na yaga ni nona vakayagataka vua kei ira nona tamata na ivolanikalou (raica na 1 Nifai 19:23). Sa rawa mo sureta na kalasi mera wasea na ivakavuvuli era sa vulica mai na italanoa ni ilakolako nei Nifai ki na vanua yalataki e vakatautauvata tiko ki na nodra bula.

Vakavulica na iVunau

1 Nifai 16:10–16, 23–31; 18:10–13, 20–22

Sa dau vakayagataka na Kalou na veika lalai me rawati kina na veika cecere.

• Ena rawa beka vei iko se dua ena kalasi, me vakasamataka e dua na ka lailai me rawati kina e dua na ka cecere? (raica na 1 Nifai 16:29 Sa rawa mo sureta na kalasi mera veivosakitaka na veika era sa vulica baleta na ivakavuvuli oqo ni ra wilika oti vakai ira yadua se vakailawalawa na ivolanikalou oqo: 1 Nifai 16:25–31; Alama 37:3–8; and Vunau kei na Veiyalayalati 64:33; 123:12–17. Sa vakayagataka vakacava tiko na Kalou na veika lalai me rawati kina na veika cecere ki na noda bula?

• Ena vinaka ki na nomu kalasi mera veivosakitaka na sala e dau dusimaka kina na Kalou na noda sala. Mo tekivu, mo kerea na kalasi mera veivosakitaka na ivakavuvuli e vakavuna me cakacaka kina na Liaona (raica na 1 Nifai 16:10–16, 23–31; 18:10–13, 20–22; raica talega na Alama 37:38–47). E rawa vakacava ki na ivakavuvuli oqo me okati me “veika lalai”? Sa rawa ki na kalasi mera vola ena papa na veika sa vakarautaka na Kalou meda dusimaki kina (raica na “iKuri ni iVurevure” me baleta na vakasama eso). Na cava na veika lalai e rawa ni da cakava meda ciqoma kina na veidusimaki ni Kalou?

Kevaka Dou sa Vakarau Dou na sega ni Rere, maivei Clark Kelley Price

1 Nifai 16:18–32; 17:7–16; 18:1–4

Ni da maroroya na vunau, ena vukei keda na Kalou meda sotava noda bolebole.

• Era sotava tiko beka nomu lewe ni kalasi na veika dredre kei na bolebole e vaka me sega ni rawai rawa. O na vakayagataka vakacava na veika dredre a sotava o Nifai ni sa vaka me sega ni rawata—nona vakania nona matavuvale ena lekutu kei nona tara na waqa—me vukea na kalasi? Sa rawa mera wilika na kalasi na 1 Nifai 16:18–32; 17:7–16; kei na 18:1–4, ka mera raica na ivakavuvuli mena vukei ira ni ra sotava e dua na ibolebole dredre (me vakataka na, 1 Nifai 16:24–26 e vakavulica ni masu kei na yalomalumalumu eda na ciqoma kina na veivakauqeti kei na veidusimaki ni Kalou). Sa rawa mo tekivu ena nomu solia e dua na ivakaraitaki ni ivakavuvuli o kunea ena veitikina oqo. Ni ra sa wasea na veika era sa raica, sa rawa mera wasea talega na veika era sa dui sotava.

1 Nifai 16:18–32; 17:7-22

Na vakabauta e veimuataki ki na kena cakacakataki.

• Na veika a sotava o Liai kei na nona matavuvale ena lekutu sa vakaraitaka tiko na kaukauwa ni vakabauta kei na revurevu ni tawavakabauta. Ni gadrevi mera vukei na kalasi mera raica na dina oqo, mo vola na taro eso oqo ena papa: A cakacakataka vakacava o Nifai na nona vakabauta? A vakalougatataki vakacava kina o koya? Na revurevu cava rau a sotava o Leimani kei Lemueli ena vuku ni nodrau tawavakabauta? Sureta na lewe ni kalasi mera vakasaqara vakailawalawa na isau ni taro era tiko ena 1 Nifai 16:18–32 se 17:7–22 ka mera wasea na veika era sa raica.

1 Nifai 19:22–24

Sa rawa meda vakatauvatana na ivolanikalou vei keda.

• Ni gadrevi mera vukei na kalasi mera vakatauvatana na ivolanikalou kivei ira, mera na wilika na ivakaraitaki a cakava kina o Nifai. Me vakataka, ena 1 Nifai 4:1–3 kei na 17:23–32, 41–45, na ivakavuvuli cava a vakavulica o Nifai ena nona vakatauvatana na ivolanikalou ki na veika ni nona matavuvale? Sa vakaraitaka tiko na itukutuku nei Elder Robert D. Hales ena “iKuri ni iVurevure” na noda rawa ni kalougata ni da vakatauvatana na ivolanikalou kivei keda. Sa rawa mo sureta na kalasi mera raica na bolebole era sa sotava tiko se nodra matavuvale ka mera raica na itukutuku mai na ivolanikalou ena vakararamataki ira ka veivukei ena gauna vakaoqori. E tukuna na 1 Nifai 19:22–24, eda na kalougata vakacava ni da vakatauvatana na ivolanikalou kivei keda?

• Na veivosakitaki ni 1 Nifai 19:22–24 ena rawa me madigi cecere ki na kalasi mera wasea na sala mera na “vakatauvatana kina na ivolanikalou” kivei ira kei na nodra matavuvale, vakakina nodra vakalougatataki ni ra sa cakava. E rawa me volai ena papa na nodra vakasama na kalasi mena vakatauvatani vakacava na ivolanikalou kivei ira (me baleta na vakatutu eso, raica na lisi e tiko ena “iKuri ni iVurevure”). Ena dua tale na gauna ni kalasi, sa rawa mo sureta na lewe ni kalasi mera wasea na gauna era vakayagataka kina na vakasama eso sa volai oti tu ena lisi.

1 Nifai 20–21

Ena vakasokumuna na Turaga na kawa i Isireli ena iotioti ni gauna.

• Ni gadrevi mera vakayaloqaqataki na kalasi mera wasea na ivakavuvuli vakaibalebale cake era raica ena 1 Nifai 20–21, mo vola na ulutaga vakaoqo ena papa: Luvei Isireli, Matavuvale nei Liai, kei ira Na Tamata ena Noda Gauna Nikua. Solia e dua na gauna mera taleva kina na 1 Nifai 20–21 ka vola ena ruku ni ulutaga yadua na sala e vakayagataki kina na parofisai nei Aisea kivei ira na ilawalawa oqo.

Vakayaloqaqataka na Vuli e Vale

Ni gadrevi mera uqeti na lewe ni kalasi mera wilika na 2 Nifai 1–5,ka sureti ira mera vakasamataka na ka mera wasea ki na nodra matavuvale kevaka sa lekaleka nodra bula e vuravura. Mo vakamatatataka ni imatai ni vica na wase ni ka 2 Nifai e tiko kina na iotioti ni itukutuku nei Liai ki na nona matavuvale.

iKuri ni iVurevure

Vidio ni iVola i Momani

Raica na vidio e tukuna tiko na cakacaka ni veigauna mai na 1 Nifai 16–22 ena Vidio ni iVola i Momani era tiko ena ChurchofJesusChrist.org se ena app ni Gospel Library.

Na noda “Liaona.”

E vakavulica o Elder David A. Bednar: “Na Yalo Tabu e cakacaka vakadodonu ena noda bula me vaka na cakacaka ni Liaona vei Liai kei na nona matavuvale, me vaka na noda vakabauta kei na gugumatua kei na vakarorogo” (“Me Rawa Kina ni Tikoga Kei Keda na Nona Yalotabu,” Ensign se Liaona, Me 2006, 31).

Ena koniferedi raraba ni Okotova 2005, a kaya kina o Elder Lowell M. Snow ena Vitusagavulu: “Na koniferedi raraba sara mada ga sa dua na Liaona vou, oqo e dua na gauna kei na vanua me ciqomi kina na veidusimaki kei na veivakasalataki vakayalo ena vakasaututaki keda” (“Na Kabasi ni Turaga,” Ensign se Liaona, Nove. 2005, 97).

E vakavulica o Peresitedi Thomas S. Monson: “Na Turaga vata ga a solia na Liaona vei Liai sa vakarautaka vei iko kei au nikua e dua na isolisoli duatani sara ka yaga sara me mai dusimaka na noda bula. … Na isolisoli au tukuna tiko oqo o ya na nomu veivakalougatataki vakapeteriaki” (Thomas S. Monson, “Your Patriarchal Blessing: A Liahona of Light,” Ensign, Nov. 1986, 65).

Noda vakatauvatana na ivolanikalou kivei keda.

E vakavulica o Elder Robert D. Hales:

“Ena vica na yabaki sa oti au a vakavulici neirau cauravou lailai tiko ena veika ni bula kei na ka a sotava o taci Jareti. E dina ga ni taleitaki sara na italanoa oqo, ia a sega ni malele mai kina o koya. Oti au a mani taroga se cava na ibalebale ni italanoa oqo ki vua. Sa vakaibalebale cake sara ni da taroga vei ira na luveda, ‘Na cava na kena ibalebale vei iko?’ A kaya, ‘Iko kila, e sega ni duidui mai na ka a cakava o Josefa Simici ena veikau ni a masu ka saumi mai.’

“Au a kaya, ‘O voleka ni yabaki vata tiko kei Josefa. Ena veivuke beka vei iko na mataqali masu a cakava o koya?’ Vakasauri ga, keirau sa sega ni veivosakitaka e dua na itukuni makawa mai na dua na vanua yawa sara. Keirau sa veivosakitaka tiko na luvei keirau tagane—na nona bula, nona gagadre, kei na sala ena vukei koya kina na masu.

“Oi keda na itubutubu, sa noda ilesilesi meda vukei ira na luveda mera ‘vakatauvatani ki na ivolanikalou taucoko [vakaidina sara, na tiki taucoko ni kosipeli i Jisu Karisito] kivei keda [vakakina vei ira na luveda], … me baleta [na] sautu kei na kila [ni noda matavuvale]’” (“With All the Feeling of a Tender Parent: A Message of Hope to Families,” Ensign se Liahona, May 2004, 90).

Vakatutu ni vakatauvatani na ivolanikalou.

• Vakasamataka na cakacaka ni veigauna se na ituvaki ni noda gauna sa tautauvata ena kena e tiko ena ivolanikalou o ni sa wilika tiko.

• Vakasaqara na veika era kila tu na tamata, vulica, se cakava ena ivolanikalou ena vukea me wali na nomu leqa se vakatataro.

• Raica ka kila na ivakavuvuli mai na italanoa o ya e rawa ni vukei iko ena ituvaki ni nomu bula.