Atama kei Ivi, maivei Douglas Fryer

3–9 ni Feperueri

2 Nifai 1–5

“Keimami sa Bula ena iValavala ni Bula Marau”

Tekivuna na nomu vakavakarau vakayalo ena nomu wilika na 2 Nifai 1–5 ka vola na veika o sa uqeti kina. E vuqa sara na ivakavuvuli era tiko ena wase oqo mai na kena e rawa ni veivosakitaki ena dua na gauna ni kalasi, mo sa qai muria ga na Yalo ena nomu vakavakarau ka vakarorogo matua ki na nodra veivakararamataki na lewe ni kalasi me vakadeitaka na ivakavuvuli me raicimatua kei na sala mo dusimaka kina na veivosaki.

Vola na Veika o Uqeti Kina

Sureta na Veiwasei

E rairai ni so vei ira na lewe ni kalasi era sa makataka se vola e dua na ka baleta e dua na tikina ena 2 Nifai 1–5. Me tekivu na kalasi, sureta na kalasi mera wasea na tikina eso e vakaibalebale cake vei ira. Sureta na lewe ni kalasi mera tukuna vakalekaleka e dua na ivakavuvuli vakaivunau era sa vulica mai na tikina era sa veiwasei kina.

Vakavulica na iVunau

2 Nifai 2:11–30

Sa soli tu vei keda na galala meda bula lewai keda ga.

• Sa dau vakavuqa, nodra vakayagataka na tamata nodra galala mera vakararawataki ira vakalevu na tamata. Sa qai bibi vakacava na bula galala vua na Tamada Vakalomalagi? Sa rawa mo vola na taro oqo ena papa, ka mera vakasaqara na kalasi na isaunitaro ena 2 Nifai 2:11–30 ka vola na nodra isaunitaro ena papa. E dau saga vakacava o vu-ni-ca me vakamalumalumutaka na noda bula galala? E dau vukei keda vakacava na iVakabula meda “digitaka na bula sereki kei na bula tawamudu”? (2 Nifai 2:27). Sa rawa mo ni lagata vata na serenilotu baleta na bula galala, me vakataka na “Know This, That Every Soul Is Free” (Serenilotu Vakavalagi, naba 240), ka sureta na kalasi mera vola talega na veivakararamataki tale eso era rawata mai na serenilotu.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatakilai kina e va na ituvaki yaga e rawa kina na bula galala. Oqo e dua na sala o rawa ni tara cake kina na veika era sa vulica mai vale na lewe ni kalasi: Vola na va na ituvaki ena papa. Mo qai sureta na kalasi mera wasea na itukutuku mai na 2 Nifai 2 e vakavulica na vuna sa bibi kina na ituvaki e va oqo me yacovi kina na keda icavacava vakalou.

2 Nifai 2:15–29

Na Lutu kei na Veisorovaki i Jisu Karisito sa tiki bibi ni ituvatuva nei Tamada Vakalomalagi.

• E vuqa era lotu Vakarisito era vakadinata ni Lutu a dua na leqa rerevaki ka a cakava o Ivi e dua na cala levu. Na veitikina ena 2 Nifai 2 e vakadeitaka na dina baleta na Lutu nei Atama kei Ivi, ka ra vakadeitaka kina ni ko Jisu Karisito sa vueti keda mai na Lutu. Dua na sala me veivosakitaki kina na veivakasama oqo o ya mera sureti na kalasi mera vakasaqaqara ena 2 Nifai 2:15–25 ka vola na dina era sa vulica ena veika a yaco ena were ko Iteni. Na veivakararamataki cava tale eso era sa raica ena vosa nei Peresitedi Dallin H. Oaks ena “iKuri ni iVurevure”? A vueti keda vakacava o Jisu Karisito mai na Lutu? (raica na 2 Nifai 2:6–8, 26–29).

• Ni sa caka oti e dua na itaviqaravi me vaka na kena e liu, sa rawa mo vakaraitaka e vica na taro me vaka na kena oqo ka sureta na kalasi mera wasea nodra veivakararamataki:

  • E vakadodonutaka vakacava na veivakavulici nei Liai mai na veitikina oqo baleta eso na vakasama cala baleta na Lutu?

  • Ena sala cava sa veivakalougatataki kina na Lutu?

  • Ena vukei keda vakacava noda kila vakadodonu na Lutu meda kila vinaka cake kina ni da sa gadrevi Jisu Karisito kei na Nona Veisorovaki?

  • Na cava e dua na vuna o sa vakavinavinakataka kina na nodrau digidigi o Atama kei Ivi ena were ko Iteni?

  • A tautauvata vakacava na nomu digidigi mo lako mai ki vuravura ki na nodrau digidigi o Atama kei Ivi me rau kania na vuanikau ni kila na vinaka kei na ca?

  • Na cava na inaki ni bula? Na cava na vuna a yaga kina na Lutu me rawati kina na inaki oqo?

2 Nifai 4:15–35

Eda rawa ni gole vua na Kalou ena noda malumalumu.

• Na itukutuku nei Nifai ena 2 Nifai 4:15–35 ena rawa ni kauta maivei keda na inuinui kei na vakacegu ni da sa uabaleti ena noda sasaga bula kei na malumalumu. Mera veisa vakayarurua na kalasi ka dikeva lesu na veitikina oqo ka raica na itukutuku era rawa ni vakayagataka mera vakaceguya kina e dua e colata tu na nona rarawa. Sureti ira na veisa yadua mera wasea ena kalasi na nodra nanuma. Sa rawa vua e dua ena kalasi me wasea na gauna a kune vakacegu kina ena nona gole vua na Kalou, me vaka a cakava o Nifai.

• E dua na sala me talevi lesu kina na 2 Nifai 4 o ya mera sureti na lewe ni kalasi mera vakavakarau tiko mai ki na gauna e tarava mera mai wasea na tikina kei na malanivosa eso mai na wase oqo a vakaibalebale cake vei ira. Kerei ira mera wasea na veika era dau cakava ni ra dau uabaleti ena nodra malumalumu. Sa rawa me oka ena veivosaki oqo e dua na serenilotu ni vakacegu kei na inuinui, me vakataka na “Meu Gole Tu Kivei?” (Serenilotu, naba 71), e rawa ni mai kuri ni veitalanoa oqo. Me vakataka, sa rawa ki na lewe ni kalasi mera wasea na sala e veivaqaqacotaki kina na serenilotu baleta na ivakaraitaki nei Nifai ni a vakararavi vua na Turaga ni gauna edau yalolailai kina.

2 Nifai 5

E kune na bula marau ena kena bulataki na kosipeli.

• Dina ga ni sotava o Nifai kei ira na nona tamata na bolebole eso, era a rawa ga ni tara cake e dua na itikotiko e yavutaki ena ivakavuvuli e mua ki na marau. Na ivakavuvuli cava era sa raica na lewe ni kalasi ena nodra vulica na 2 Nifai 5 a rawa kina mera marau na Nifaiti? Sa rawa mo vakarautaka na tiki ni pepa vei ira na lewe ni kalasi ka sureta mera vakasaqara ena 2 Nifai 5 na ivakavuvuli e veimuataki ki na marau ka vola ena pepa. E duidui vakacava na marau e vakasaqara o vuravura mai na kena eda raica ni tiko ena 2 Nifai 5? Na lalawa cava era rawa ni tuvanaka na kalasi mera bulataka kina e dua na ivakavuvuli oqo?

Vakayaloqaqataka na Vuli e Vale

Vakamacalataka ki na kalasi ni tiko ena 2 Nifai 6–10 e dua vei ira na vunau vinaka duadua ena ivolanikalou kece baleta na Veisorovaki i Jisu Karisito. Sa rawa mo wasea talega e dua na tikina o raica ena wase oqo e dau ka marautaki vei iko mo wilika.

iKuri ni iVurevure

Na Lutu e tiki ni nona ituvatuva na Kalou.

E vakavulica o Elder Dallin H. Oaks:

“Ena gauna rau sa ciqoma kina o Atama kei Ivi na isevu ni ivakaro, rau sa tekivu bula vou tiko, sa sega tale ni rau tiko ena vuravura ni yalo ia e rau se vakayago tikoga ka sega ni rawa me rau mate ka sega ni rawa me rau vakatubu kawa. Sa sega ni rawa me rau cakava na isevu ni ivakaro nei Tamada vakavo ga na kena vakacacani na ilati e tu ena tadrua ni totoka ni Were ko Iteni kei na veivakatovolei ca kei na madigi totoka ni bula vakayago. …

“… A vakamacalataka na Parofita o Liai ni ‘kevaka me a sega ni talaidredre o Atama ke a sega ni lutu tani’ (2 Ni. 2:22), ia sa na rairai tiko ga ena ituvaki vata ga a buli kina.

“… A tuvai na Lutu, e kaya o Liai, baleta ni ‘sa caka na veika kece ena lewa yalomatua i Koya sa kila na ka kecega’ (2 Ni. 2:24).

“Sai koya ko Ivi a cala taumada ki na yalayala kei Iteni me rawa ni tekivuna na ituvaki ni bula vakayago. Na nona itovo o ya, se cava ga na tuvaki, a cala taumada ia sa lagilagi yaga tawamudu me dolavi na sala ki na bula tawamudu. A vakaraitaka o Atama na yalomatua ena nona vakaitavi talega kina. Sa yaco kina me ‘lutu ko Atama [kei Ivi] me sucu kina na tamata’ (2 Ni. 2:25).

“Eso na lotu Vakarisito era vakacacani Ivi ena ka a cakava, ka kaya ni o koya kei ira na luvena yalewa era sa vakacacani kina. Sega ni o ira na Yalododonu Edaidai! Ena itukutuku ni ivakatakila, eda marautaka na ka a cakava o Ivi ka doka na nona vuku kei na yaloqaqa ena cakacaka cecere o ya e vakatokai na Lutu. …

“Mai na ivakatakila ena gauna oqo e vakaraitaka ni oi rau na isevu ni noda itubutubu rau sa kila vinaka tu na yaga bibi ni Lutu. A kaya kina o Atama, ‘Me vakarokorokotaki tikoga na yaca ni Kalou, ena noqu talaidredre sa tadola rawa kina na mataqu, ia meu kila na marau ena bula oqo, ka raica tale na Kalou ena yagoqu’ (Mosese 5:10)” (“The Great Plan of Happiness,” Ensign, Nov. 1993, 72–73).

Vakatorocaketaki Noda Veivakavulici

Gole yani kivei ira era sega tiko ni yaco mai. Na veivakavulici e sega walega ni liutaka tiko na veivosaki ena Sigatabu; ia sa oka talega kina na veiqaravi ena loloma kei na veivakalougatataki ena kosipeli. Sa rawa mo vakasamataka mada e dua e sega tiko ni lako mai ka mo na sureti koya vakavinaka me mai vakaitavi ena lesoni e tarava. (Raica na Veivakavulici ena iVakarau ni iVakabula, 8–9.)