Ena Veiqaravi ni Nomu Kalou, maivei Walter Rane

20–26 Epereli

Mosaia 4–6

“E Dua na Veisau Levu”

Wilika na Mosaia 4–6, ka vola na nomu vakauqeti vakayalo. Ni sa vakauqeti na yalomu, o na taroga beka, me vaka a kaya o Elder Richard G. Scott, “E tiko tale beka na ka meu kila?” (“Na Rawati ni Veidusimaki Vakayalo,” Ensign se Liaona, Nove. 2009, 8).

Vola na Veika o Uqeti Kina

Sureta na Veiwasei,

Sa rawa mo tekivuna na veivosaki ni kalasi ena nodra kerei na kalasi mera wasea e dua na ivakavuvuli nei Tui Penijamini mai na Mosaia 4–5 era gadreva mera na bulataka vakavinaka ena nodra bula.

Vakavulica na iVunau

Mosaia 4:1–12

Ena vuku i Jisu Karisito, eda sa ciqoma kina na vakabokoci ni noda ivalavala ca.

• Eso era nanuma cala tiko ni veivutuni e sasagataki ga vakalailai; ka so era vakabauta ni sa dua na sasaga levu. Ni gadrevi mera kila vinaka na lewe ni kalasi na veika e gadrevi me vakabokoci kina na ivalavala ca, sa rawa mo sureti ira mera vakasaqara ena ivakavuvuli nei Tui Penijamini ena Mosaia 4:1–12, na ilavaki ena vakayacora kina na Tamada Vakalomalagi na vakabokoci ni noda ivalavala ca. Sa rawa ki na lewe ni kalasi mera vola ena papa na veika era sa kunea. Kerea mera vakasamataka e dua na vosa vakatautauvata me vakamacalataka na veika era sa vulica. Me vakataka, mera vakatauvatana na vakabokoci ni ivalavala ca ki vua e dua a dinau “sa bokoci” se tagutuvi na nona dinau. Se rawa mera vakatauvatana na vakabokoci ni noda ivalavala ca ki na karoni e dua na ka e gadrevi me vakavinakataki tikoga, me vakataka na iteitei se dua na vale.

• Sa rawa mo taroga na lewe ni kalasi ena cava mera kaya vua e dua e vakataroga tiko se sa yaga dina beka na veivutuni. Era na vukea vakacava e dua sa yalolailai ka nanuma ni sega ni rawa me vakadrukai na ivalavala ca kei na malumalumu? Sa rawa mo vakarautaka na lewe ni kalasi ena mataqali veivosaki vakaoqo ena nomu kerea mera vakasaqara mada ena vica na miniti na vosa nei Tui Penijamini ena Mosaia 4:1–12 me baleta na dina ena rawa ni vukea e dua e solegi tu ena dua na ituvaki vakaoqo. Mera qai wasea na lewe ni kalasi vei koya e yasana na dina era sa kunea vua e dua.

Mosaia 4:11–27

Ni da sa veivutuni, eda sa na vakasinaiti ena loloma ni Kalou.

• Eda na kila vakacava ni da sa ciqoma na vakabokoci ni noda ivalavala ca? A vakamacalataka o Tui Penijamini na veika e salamuria mai na veivutuni—sureti ira na lewe ni kalasi mera raica ena Mosaia 4:13–16. Sa rawa mo sureti ira talega mera vakasamataka vakatitobu na nodra dui bula ka vakadikeva na itagede era sa bulataka tiko kina na ivakavuvuli ena veitikina oqo. Na ivakatakilakila cava era sa raica na kalasi ni sa saumaki tiko na nodra bula? E veisau vakacava na noda veimaliwai kei ira na tamata ni da lako vei Karisito ena veivutuni? Sa rawa ki na kalasi mera wasea na nodra raica ni sa yaco oqo ki na nodra bula.

• Ena rawa me vakauqeta naMosaia 4:11–12 kei na 14–16 na kena veivosakitaki na veika e vakauqeta na veisusugi ena bula dodonu. Na cava era vakavulica vei keda na veitikina oqo ena sala meda itubutubu vinaka cake kina?

• Ke o sa vakauqeti me veivosakitaki na ivakavuvuli i Tui Penijamini me baleta na nodra vukei na dravudravua kei na vakaleqai, mo sureti ira na kalasi mera veitarataravi yadua mai ena wilika na veitikina ena Mosaia 4:16–27. Ni sa wiliki oti na veitikina yadua, me qai vakalekalekataka ga vakai koya a wiliwili na veika a vakavulica o Tui Penijamini. Na itukutuku nei Elder Jeffrey R. Holland “Eda sa Sega Li ni Dravudravua Kecega?” Ena rawa me vakayagataki na (Ensign se Liaona, Nove. 2014, 40–42) me tokona na veivosaki oqo. Eda na muria vakacava na ivakasala nei Tui Penijamini o ya meda kakua ni “cici vakatotolo cake mai na kaukauwa sa tu [vei keda]”? (Mosaia 4:26–27). E veisemati vakacava na ivakaro meda “wasea na [noda] iyau vei ira na dravudravua”

Mosaia 4:29–30

Meda qarauna na noda vakasama, vosa, kei na ivalavala.

• Eso na gauna e vaka me dau rawarawa cake ke solia vei keda na Turaga na matailalai ni ivalavala ca kece. Ia, e kaya o Koya vei keda, “Ni qarauni kemuni vinaka … ka tiko ga ena vakabauta ni veika ko ni sa rogoca me baleta na nona lako mai na noda Turaga” (Mosaia 4:30). Me vukea na lewe ni kalasi mera veivosakitaka na ivakavuvuli oqo, sa rawa mo taroga vakaoqo: E vakayaco ka vakacava vei keda kei ira na tamata na noda vakasama, vosa, kei na ivalavala? Na cava na ibalebale meda “tiko ga ena vakabauta”? Na ivakasala cava eda rawa ni veiwasei kina vakai keda me vukea noda “qarauni” keda?

Mosaia 5:1–7

Na Yalo ni Turaga ena rawa me vakavuna e dua na veisau levu ki na yaloda.

• Me tekivutaki e dua na veivosaki baleta na veisau tawa-vakatauvatani rawa e kauta mai na kosipeli i Jisu Karisito ki na noda bula, sa rawa mo sureta na lewe ni kalasi mera wasea na vuna eso e dau dredre kina meda cakava na veisau me tudei ena noda bula. Mo qai sureti ira mera wilika na Mosaia 5:1–5, ka vakasaqara na “veisau levu” a yaco vei ira na tamata i Tui Penijamini. Na dina cava baleta na veisau ni yalo eda vulica mai na kena a yaco vei ira? Sa rawa mo kerea e vica na lewe ni kalasi mera wasea na sala a vukei ira kina na Yalo Tabu mera veisautaka na yalodra. Sa rawa talega me saravi e dua na vidio e vakaturi tiko ena “iKuri ni iVurevure.”

  

  Na iVakabula ena rawa me veisautaka na yaloda kei na noda bula. Na Liga Veivakabulai, maivei Adam Abram

• Ni oti na veivosakitaki ni dina e tiko ena Mosaia 5:1–7, eso na lewe ni kalasi era na vakataroga tiko na vuna e sega sara ni cecere se totolo na veisau ni yalodra me vaka a yaco vei ira na tamata i Tui Penijamini. Na itukutuku nei Elder D. Todd Christofferson ena “iKuri ni iVurevure” ena sauma na taro oqo. Na cava eda rawa ni vulica maivei Elder Christofferson baleta na saumaki vou?

Mosaia 5: 5–15

Sa sureti au na Kalou meu veiyalayalati kei Koya.

• Ena rawa me veivuke naMosaia 5:5–15 ki na lewe ni kalasi mera kila vinaka na veivakalougatataki era na ciqoma ena gauna era na cakava ka maroroya na nodra veiyalayalati kei na Kalou. Sa rawa mo sureti ira mera taleva na veitikina oqo ka vakasamataka tiko na veiyalayalati ni papitaiso kei na cakacaka vakalotu ni sakaramede ka mera wasea na veika era sa vulica. (Raica talega na V&V 20:77, 79.)

Vakayaloqaqataka na Vuli e Vale

Ena vuqa beka na lewe ni nomu kalasi era sa sotava tiko se sa sotava oti e dua na sasaga dredre se veivakatovolei. Tukuna vei ira ni ra na wilika ena Mosaia 7–10 e dua na ilawalawa era a vulica mera nuitaka tiko na Turaga ena gauna ni nodra vakatovolei.

iKuri ni iVurevure

Na vidio era tiko ena ChurchofJesusChrist.org baleta na “veisau levu” (Mosaia 5:2).

• “Daily Bread: Change”

• “A Change of Heart”

• “A Mighty Change: Conversion”

Na veisau e dua na ivakarau me vakayacori.

A vakamacalataka o Elder D. Todd Christofferson na veisau levu ni yalo e tukuni tiko ena ivolanikalou:

“O ni na taroga beka, Na cava beka e sega ni yaco totolo kina vei au na veisau levu oqo? E dodonu mo ni nanuma tiko, na nodra ivakaraitaki cecere na tamata i Penijamini na Tui, ko Alama kei ira tale eso na tamata ena ivolanikalou—era sa totoka dina ka sega ni dau vakawasoma. Ni vuqa vei keda, na veisau e dau yaco vakamalua ka taura e dua na gauna. Ni da sucu vou tale, e sega ni vaka noda sucu mai vakayago, ia e dua na ka vakaituvatuva. Na ka sa yaco ena ituvatuva oqo sai koya na iusutu ni inaki ni bula vakayago oqo.

“Ena gauna vata oqo, me da sa kakua ni laki tiko vakacegu sara ena dua na bula vakawelewele. Meda kakua ni vakacegu tiko meda cakava na veika butobuto. Meda kilikili kaya ena noda vakaivotavota ena sakaramede ena veimacawa ka tomana tikoga na veitokani ni Yalo Tabu me ciluma laivi mai tuba na iotioti ni veitiki ni veika tawa savasava mai lomada. Au vakadinadinataka ni ena nomu lakova tikoga na sala ni sucu vou vakayalo, ena kauta tani na nomu ivalavala ca era tu vei iko, ena malumalumu na sasaga ni veitemaki, ia ena vukui Karisito ena yaco meda savasava me vaka ni rau savasava o Koya vata kei Tamada” (“Sucu Tale,” Ensign se Liaona, Me 2008, 78).

Vakatorocaketaki Noda Veivakavulici

Vakasaqara na ivakaraitaki vinaka ena ivolanikalou. Ni ko wilika na itukutuku nei Tui Penijamini vei ira na nona tamata, vakasaqara na lesoni ena nona ivakaraitaki ena rawa me vukea mo qasenivuli vinaka cake. Me vakataka, na cava a cakava o Tui Penijamini me kila kevaka era sa kila vinaka na nona tamata na ka e vakavulica tiko?