Minerva Teichert (1888-1976), Ammon before King Limhi, 1949-1951, iboro ena mesanaiti, 35 15/16 x 48 idi. Vale ni Maroroi Cakacakaniliga e Brigham Young University, 1969.

27 ni Epereli–3 ni Me

Mosaia 7–10

“Ena Kaukauwa ni Turaga”

Sa rawa me ivurevure vinaka na ituvatuva oqo, ia e dodonu me veitokoni ga, ka sega ni sosomitaka, na veivakauqeti o ciqoma ni ko vulica tiko na Mosaia 7–10

Vola na Veika o Vakauqeti Kina

Sureta na Veiwasei

Ena rawa me laki veivuke na veivosakitaki vaka-kalasi na veivakalougatataki era sa ciqoma na kalasi ni ra sasagataka mera cakava nodra itikotiko me usutu ni vuli kosipeli. Na veitikina cava mai na Mosaia 7–10 era sa vakasamataka vakatitobu na kalasi se veivosakitaka ena nodra itikotiko ena loma ni macawa? Ena vakayaco-ka vakacava oqo ki na nodra bula?

Vakavulica na iVunau

Mosaia 7:14–33

Kevaka eda gole vua na Turaga, nuitaki Koya, ka qaravi Koya, ena sereki keda o Koya.

• Ni ra vulica na lewe ni kalasi na Mosaia 7:14–33, ena rawa ni uqeti ira na veika era a sotava na tamata i Limiai mera veivutuni kina ka gole vua na Turaga mera sereki. Ni gadrevi me uqeti e dua na veivosaki, sureta e dua na lewe ni kalasi me vakarautaki koya me mai vakamacalataka vakalekaleka ena kalasi na sala era a vesuki bobula kina na tamata i Limiai. Eso tale mera wasea na veika era sa vulica mai vei Limiai baleta na vakabauta kei na nuitaka tiko na iVakabula. Na cava eda rawa ni vulica ena veivakananumi nei Limiai ena sala a sereki ira kina na Nona tamata na Kalou? (raica na tikina 19–20). Sa rawa mo kerea na lewe ni kalasi mera wasea na itukutuku mai na ivolanikalou se veika era sa sotava a uqeti ira kina mera nuitaka tiko na Kalou.

• Sa nodra madigi na lewe ni kalasi mera uqeti ira eso mera gole vua na Kalou ena gauna era vesuki tu kina ena ivalavala ca se na veivakararawataki tale eso. Ena rawa me vukei ira ena nodra vulica na sala a vakauqeti ira kina na nona tamata o Limiai. Sa rawa mera wilika mada e liu na ivakamacala ena Mosaia 7:20–25 baleta na nodra vesuki tu na tamata i Limiai ka mera vakasamataka e dua era kila ni vesuki tu ena ivalavala ca. Mera qai raica na dina a vakavulica o Limiai ena Mosaia 7:18–20, 33 me vukei ira nona tamata. Eda na muria vakacava na ivakaraitaki i Limiai ni da vakayaloqaqataki ira noda daulomani mera nuitaka ga na Kalou?

• Me vukei na kalasi mera kila vinaka na veivuke e solia vei keda na Kalou ni da sotava na veika ca, sa rawa mo ni lagata ka veivosakitaka na serenilotu “Na Noda iVakabula” (Serenilotu, naba 5) se dua tale na sere e vakamacalataka tiko na sala e dausereki keda kina na iVakabula. Na cava e vakuria na Mosaia 7:17–20; Ica 12:27; kei na 2 Korinica 12:7–10 meda kilamatata na veika oqo? Sa rawa talega ki na kalasi mera wasea na gauna era a sereki kina mai vua na Turaga, ena veika lalai mada ga, baleta ni ra a vakaraitaka ni ra vakabauti Koya.

Mosaia 7:26–27

E buli na tamata me ucuya na Kalou

• Ena veitikina oqo, a vakamacalataka o Limiai eso na dina a vakavulica o Apinatai a dredre mera ciqoma na tamata. Na dina cava era rawa ni raica na kalasi ena veitikina oqo? Era vakayaco-ka vakacava na dina oqo ena sala eda raica kina na Kalou vakakina oi keda?

Mosaia 8:12–19

Sa vakarautaka na Turaga na parofita, daurairai, kei na daunivakatakila me ra bula kina na kawatamata.

• A vakamacalataka rawa o Amoni vei Limiai na ilesilesi ni dua na daurairai ka vakadinadinataka na kedra bibi na parofita, daurairai, kei na daunivakatakila. Sa rawa mo vakadeitaka oqo ena noda gauna nikua, ni o iratou na Mataveiliutaki Taumada kei na Kuoramu ni iApositolo Le Tinikarua era sa tokoni mera parofita, daurairai, ka daunivakatakila. Ena rawa vakacava, me vakataki Amoni, me da vosa doudou baleta na kena gadrevi o ira na parofita, daurairai, kei na daunivakatakila? (raica Mosaia 8:13–18). Sa rawa talega ki na kalasi mera vakaraitaka ena initaneti raraba mera vukei kina eso mera kila vinaka na ilesilesi ni dua na parofita, daurairai, ka daunivakatakila ena noda gauna. Na cava eda a rogoca ena koniferedi raraba sa oti eda rawa ni wasea vei ira na noda itokani, lewe ni matavuvale, kei ira na wekada me vakavulica vei ira na kena gadrevi e dua na parofita?

• Ni sa yaco na inaki ni kena wiliki na Mosaia 8:12–19, sa rawa mo ni vakaraitaka na nomuni ivakadinadina baleti ira na parofita, me vaka a cakava o Amoni, se nomuni vakavinavinakataka na ivakatakila mai vei ira na parofita, me vaka a cakava o Limiai (raica na Mosaia 8:19).

• Na parofita o Josefa Simici sai koya na daurairai ka tu ena ulu ni iitabagauna oqo (raica na V&V 21:1). Sa rawa mo kerea na kalasi mera wasea na veika era sa vulica mai na ivakamacala nei Amoni baleta na daurairai (raica na Mosaia 8:13–18). Me ra qai veivosakitaka na sala eso a daurairai kina o Josefa Simici.. (D&C 135:3 and Moses 6:36 e rawa ni veivuke ena veivosaki oqo.)

Mosaia 9:14–19; 10:6–10

E rawa ni da sotava na noda bolebole “ena kaukauwa ni Turaga.”

• E laurai vakarua na malanivosa “ena kaukauwa ni Turaga” ena itukutuku nei Senifi baleti ira nona tamata kei na nodra veivaluvaluti kei ira na Leimanaiti—ena Mosaia 9:14–19 kei na 10:6–10. Sa rawa ki na kalasi mera vakasaqara na veitikina oqo ka wasea na ibalebale ni malanivosa oqo. Eda na rawata vakacava oqo “ena kaukauwa ni Turaga”? Vakayaloqaqataki ira na kalasi mera wasea na gauna era a gumatua kina ki na bolebole eso ena kaukauwa ni Turaga.

Mosaia 10:11–17

Na noda digidigi ena rawa me vakauqeti ira na itabatamata.

• Sa rawa mo sureti ira na kalasi mera wilika vakanomodi na Mosaia 10:11–17 ka raica na sala a vakayaco-ka kina vei ira na Leimanaiti na nodra digidigi kei na nodra vakabauta na nodra qase. Na cava e sa tukuna tiko na kena vakayaco-ka tiko vei ira eso na noda digidigi? Na ivakamacala cava eda vinakata vei keda kei na noda matavuvale ena dua se rua na itabatamata e tarava? Sa rawa ki na kalasi mera vola eso na ka era gadreva mera okata ena ivakamacala vakaoqori.

• Ena rawa ni veivuke na lesoni ivakaraitaki ni dua na ka—me vakataka na tuvai ni domino—me vakaraitaka na kena vakayaco-ka na nodra digidigi na tamata ki na nodra rawa iyau. Mo qai sureta na kalasi mera wilika na Mosaia 10:11–17 ka veivosakitaka na kena a vakayaco-ka vakalevu ki na nodra vakabauta kei na itovo na Leimanaiti na nodra digidigi na nodra qase e liu ena veisenitiuri sa oti. Na italanoa nei Elder Donald L. Hallstrom e tiko ena “iKuri ni iVurevure,” e dua tale na ivakaraitaki o rawa ni wasea. Sa rawa vei ira na lewe ni kalasi mera vakasamataka na italanoa eso ni nodra kawa ni matavuvale baleta e dua na tamata ivalavala dodonu a vakauqeti ira na itabatamata ena veika vinaka.

Vakayaloqaqataka na Vuli e Vale

Era vulica na kalasi ena macawa oqo na veika ca a yaco vei ira na luvedra na Leimanaiti ena vuku ni nodra digidigi. Vakaraitaka ki na kalasi ni ra na wilika ena Mosaia 11–17 na nona ivalavala dodonu e dua na tamata a veisau kina e vuqa na bula ni tamata.

iKuri ni iVurevure

Na noda digidigi ena vakayaco-ka ki na veitabatamata

E wasea o Elder Donald L. Hallstrom na nodrau yalodina o tukana kei buna era a vakalougatataki kina na itabatamata muri mai:

“E rua na luvedrau na tubuqu mai na yasana vei tamaqu, e dua na tagane (o tamaqu) ka dua na yalewa. … A vakamau o [luvedrau yalewa] ena 1946 ka mani bukete ni oti e va na yabaki. E dua na ka talei dina vei ira na itubutubu me ra vakaluveni yalewa (na kena oqo sa ikoya ga e yalewa) me sa na vakasucu ena imatai ni gauna. E sega ni dua e kila ni drua na gone e buketetaka tiko. E ka ni rarawa, a mate o koya kei rau na drua ni a vakasucu.

“E kavoro na yalodrau na tubuqu. Ia na nodrau rarawa, rau a vagolea sara vua na Turaga kei na Nona Veisorovaki. Ni rau sega ni vakataotaki ena ka sa mai yaco oqo se o cei me beitaki, rau sa vakanamata me rau bula dodonu ga. Rau sega ni vakaiyau na tubuqu; rau sega ni wili me dua vei ira na rawati ira; rau sega ni vakaitutu cecere ena Lotu—erau rua ga na Yalododonu Edaidai yalodina. …

“Na nodrau yalodina o Tukaqu o Art kei Buqu o Lou, vakabibi ni rau dau sotava na veika dredre, sa mai veivakauqeti oqo ki na ikava ni itabatamata era tarava mai. Sa mai dewa vakadodonu ka vakabibi sara, vei luvedrau tagane (o tamaqu) kei na marama tinaqu; ni luvedrau yalewa duabau na noqu itubutubu, o koya e gone duadua, a mate ena gauna ni nona vakasucu. E se qai yabaki 34, ka takali yani ni oti e 10 na siga na nona a vakasucu, biuti iratou tu mai e 4 na gone, 10 na siga ki na yabaki 8. Mai na ivakaraitaki era raica rawa mai na itabatamata sa sivi yani, rau gole yani na noqu itubutubu—sega tale na lomalomarua—ki vua na Turaga me rau vakacegui” (“Gole Vua na Turaga,” Ensign se Liaona, Me 2010, 78–79).

Vakatorocaketaki ni Noda Veivakavulici

Vakarorogo. “Na vakarorogo sa ivakaraitaki ni loloma. … Kerea na Tamada Vakalomalagi me vukei iko mo kila na cava era kaya tiko na nomu lewe ni kalasi. Ni ko sa wanonova matua na veika era kaya tiko kei na veika era na sega beka ni kaya ko na qai kila vinaka cake na ka era vinakata, na nodra vakatataro, kei na nodra gagadre” (Veivakavulici ena iVakarau ni Turaga, 34).