“25–31 ni Me. Mosaia 29–Alama 4: ‘Era sa Tudei ka Sega ni Yavalati Rawa,’” Lako Mai, Mo Muri Au—Baleta na Matawilivola ni Sigatabu: iVola i Momani 2020 (2020)

“25–31 ni Me. Mosaia 29–Alama 4,” Lako Mai, Mo Muri Au—Baleta na Matawilivola ni Sigatabu: 2020

Sa Vunau Tiko o Alama Lailai, maivei Gary L. Kapp

25–31 ni Me.

Mosaia 29–Alama 4

“Era sa Tudei ka Sega ni Yavalati Rawa”

Ena gauna nei Alama, o qasenivuli ni kosipeli a sega ni raici me “vinaka cake na ivakavuvuli mai vua sa vuli; era sa tautauvata kecega” (Alama 1:26). Ni ko vakavakarau mo veivakavulici, vakasamataka vakatitobu na ivakavuvuli oqo e baleti iko kei na nomu kalasi.

Vola na Veika o Uqeti Kina

Sureta na Veiwasei

Era sa rairai raica tiko na kalasi na tautauvata tiko ni veika a yaco ena Mosaia 29–Alama 4 kei na veika era yaco tiko e vuravura nikua se ena nodra dui bula. Solia vei ira e vica na miniti mera taleva na wase oqo mera raica kina e dua na kena ivakaraitaki. Sureti ira mera wasea na veika era sa kunea vei koya e toka e yasana.

Vakavulica na iVunau

Mosaia 29:11–27; Alama 2:1–7

Sa rawa meda dauveivakauqeti vinaka ena noda itikotiko.

Ke yaga ki na kalasi na kena veivosakitaki na sala mera dauveivakauqeti vinaka ki na itikotiko raraba, sa rawa mo sureti ira mera vakasamataka eso na ka e sotava tiko na itikotiko raraba ka mera vola e vica ena papa (me kakua ni veivosakitaki vakamatailalai na veika oqo). Sa rawa ki na kalasi mera taleva na Alama 2:1–7 mera raica na veika era sotava tiko na Nifai kei na cava era a cakava kina. Na cava a rawa ni yaco ke ra a sega ni tukuna na nodra nanuma “na lewe ni lotu”? Na veika cava tale eda sa vulica meda lewenivanua vinaka kina mai na itukutuku oqo, ena Mosaia 29:26–27, kei na italanoa mai na “iKuri ni iVurevure”? Sa rawa mera vakasamataka na kalasi e dua na ka mera cakava mera veivakauqeti vinaka ena nodra itikotiko raraba e semati tiko ena veika ena papa.

Alama 1:2–9, 26

Eda rawa ni kila ka lako tani mai na ivakavuvuli lasu.

Na ivakaraitaki i Kitioni ni a vorati Neori ena rawa me vakauqeta na kalasi. Sa rawa mo kerea e dua me taleva tiko mai na itukutuku kei Kitioni me mai wasea ki na kalasi (raica na Mosaia 19:1–8; 20:15–22; 22:1–9; kei na Alama 1:2–9). Yavutaki ena railesu oqo, mera vola na kalasi eso na ivakarau veivakauqeti nei Kitioni. Me vakataka, ni sa rogoca o Kitioni na ivakavuvuli lasu nei Neori, a vorati Neori o Kitioni ena “vosa ni Kalou” (tikina e 9). Ena nodra vulica na ivolanikalou, era sa rairai raica beka na kalasi na ivolanikalou e saqata na ivakavuvuli nei Neori e tiko ena Alama 1:3–6. Sureti ira me ra wasea na ivolanikalou era sa raica. E vica tale na ivolanikalou era vakaturi tiko ena “iKuri ni iVurevure.” Eda na vakataki Kitioni cake vakacava ni da taqomaka na dina?
Na ivakavuvuli lasu nei Neori e vakamacalataki tiko ena Alama 1:3–6, ena rawa ni vukea meda kidava rawa kina na ivadi e vakayagataka o Setani me lawakitaki keda kina. Me vakataka, e dau vunia tu na nona lasu ena loma ni dina. Sa rawa mo sureta na kalasi mera vakasaqara ena Alama 1:3–4 veilasutaki nei Setani kei na dina e vakayagataka me ra taleitaki sara kina. Na cava eso na lasu e waki vata kei na dina era rawai kina na tamata nikua? Eda na vukea vakacava na noda matavuvale kei ira eda lomana mera kila na dina mai na ka cala?
Sa rawa ki na kalasi mera lagata se wilika na serenilotu baleta na yalomalumalumu, me vakataka na “Mo Yalomalumalumu” (Serenilotu, naba 72), ka veivosakitaka na duidui ni kena itukutuku mai na itukutuku nei Neori ena Alama 1:2–9. Sa rawa mera veidutaitaka vata kei na ivakavuvuli nei Neori baleti ira na qasenivuli ni kosipeli ni vakatauvatani ki na veika a vakavulica ka bulataka o Alama kei na iliuliu eso ni Lotu (raica na Alama 1:26; 4:15–20). Na cava beka na inaki ni lomai Neori? A duidui vakacava mai vei Alama? Vakayaloqaqataki ira na kalasi mera vakasamataka vakatitobu na nodra dui inaki ni lomadra ni ra veiqaravi ena Lotu. Na cava e vakaturi tiko ena Alama 1:26 baleta na noda itavi na vuli tiko?

Alama 1:19-30; 4:6-15

Na dokadoka ena rawa me vakavuna na noda “lutu mai na [noda] rawa-ka.”

Na veivosakitaki ni Alama 1 kei na Alama 4 ena rawa ni vukea na kalasi mera kila vinaka na kena dau vakayaco ca na dokadoka ki na tamata yadua vakakina na Lotu. Sa rawa mo wasea na kalasi ki na rua na ilawalawa ka kerea e dua na ilawalawa me vulica na ituvaki ni Lotu e tukuni tiko ena Alama 1:19–30, ka me vulica na ikarua ni ilawalawa na ituvaki ni Lotu ni oti e vica na yabaki, ka tukuni tiko ena Alama 4:6–15. Kerea na ilawalawa yadua mera wasea na ituvaki ni Lotu kei ira na lewena me vaka a tukuni tiko ena veitikina era sa wilika. Sa rawa mera tuvanaka vata e dua na sala taleitaki mera cakava kina—me vakataka, e rawa ni ra droinitaka e dua na iyaloyalo se vakarautaka e dua na drama lekaleka. Ni ra sa veiwasei oti na ilawalawa e rua, kerea mera veivosakitaka na veika era sa vulica baleta na vakayaco ca ni dokadoka ena Lotu kei ira na lewena kei na veivakalougatataki ni yalomalumalumu. Na lesoni cava mai na itukutuku oqo me noda ena gauna nikua?

Alama 4:12–20

Na “vosa ni Kalou” kei na “ivakadinadina savasava” e veisautaka na yalo.

E vuqa na tamata era rawa ni kila na yaloi Alama ni a “yalorarawa sara vakalevu” (Alama 4:15) baleta na nodra valavala butobuto kei na nodra malumalumu na nona tamata. Sa rawa ki na kalasi mera vakasamataka e dua na daulomani era sa lomaleqataka tiko ka vakananumi koya tiko ni ra wilika na Alama 4:12–20. Ni oti nodra wiliwili na kalasi, sa rawa mo taroga vakaoqo me uqeta na veivosakitaki ni veitikina oqo: Na cava e vakamarautaki ira na tamata ni ra sotava na veituvaki dredre? Na cava na ibalebale ni malanivosa oqo vei iko “ia sa sega ga ni biuti koya na Yalo ni Turaga”? (Alama 4:15). Na solibula cava a cakava o Alama me vukei ira na nona tamata, kei na solibula cava eda dau kerei ena so na gauna meda cakava? Na ivakaraitaki cava eda sa raica kina na kaukauwa ni “ivakadinadina savasava”? (Alama 4:19). Eda na wasea vakacava na noda ivakadinadina ka sega ni da veivakavulici se vakalelewa kina? Mo na solia e dua na gauna vei na lewe ni kalasi mera vola na nodra ivakadinadina vei ira nodra daulomani.
Ena rawa me yaga ki na kalasi ni ra veivosakitaka na cava na “ivakadinadina savasava” Era tiko ena vidio “Apostle Testimony Montage” (ChurchofJesusChrist.org) eso na ivakaraitaki totoka sara. Ena rawa vakacava ki na ivakadinadina oqo, se so tale eda sa rogoca, “me vakayavalati [keda] [meda] nanuma na [noda] itavi”? (Alama 4:19). Ena vukei keda vakacava na ivakadinadina oqo meda vorata rawa na dokadoka kei na veileti?

Vakayaloqaqataka na Vuli e Vale

Sa rawa mo vakamacalataka ki na kalasi ni ra na wilika ena Alama 5–7 na “ivakadinadina savasava” nei Alama ka raica na kena vakayaco vinaka vei ira na tamata (raica na Alama 4:19).

iKuri ni iVurevure

“Cakava me vakilai na nomu veivakauqeti.”

Ni oti ga na nona kacivi o Sister Belle S. Spafford me Peresitedi Raraba ni iSoqosoqo ni Veivukei ena 1945, era a sureti na iliuliu ni iSoqosoqo ni Veivukei ki na soqoni ni dua na matabose cecere ni marama kilai levu. Sa vuqa mai na yabaki na nodra lewena tiko na iliuliu raraba ni iSoqosoqo ni Veivukei na matabose oqo, ia eratou nanuma ni sa vaka me ratou sega tiko ni kauwaitaki mai na matabose oqo. Ni oti nona veivosaki kei rau na nona daunivakasala, a vakatura o Sister Spafford kivei Peresitedi George Albert Smith, na Peresitedi ni Lotu, me sa bokoca na iSoqosoqo ni Veivukei na nona lewena tiko na matabose oqo.

Ni ratou sa veivosakitaka na vakatutu, a kaya o Sister Spafford, “Ni kila, Peresitedi Smith, e sega sara ga ni dua na ka keitou rawata mai na Matabose.”

E muri e qai tukuna vakaoqo:

“A raici au ena kurabui o Peresitedi. A kaya, ‘Sister Spafford, o nanuma tu beka ga o iko na veika mo na taura? O nanuma beka ni na vinaka talega mo dau vakasamataka na veika mo na solia yani? Au vakabauta,’ a tomana, ‘ni tiko vei ira na marama Momani na veika mera solia yani vei ira na marama ni vuravura oqo, ka mera vuli talega maivei ira. Ia mai na nomudou via bokoca nomudou lewena na matabose, au vakatura mo kauta e vica na nomu lewe ni matabose gugumatua ka gole ki na soqoni oqo.’

“A qai kaya mai vakamatata, ‘Mera vakila na nomudou veivakauqeti’” (Belle S. Spafford, A Woman’s Reach [1974], 96–97).

A talairawarawa o Sister Spafford ki na ivakasala oqo. A veiqaravi o koya ena vuqa na yabaki ena matabose o ya ka yaco me digitaki me dua na kena iliuliu.

Oqo na ivolanikalou e vakacala na ivakavuvuvli lasu nei Neori.

Vakatorocaketaki ni Noda Veivakavulici

Vakadeitaka ni ko sa vakavulica tiko na vunau dina. “Mo tarogi iko tiko e veigauna ‘Na sala cava era na vukei kina na noqu lewe ni kalasi mai na veika au sa vakavulici ira tiko kina me ra tara cake na nodra vakabauti Karisito, mera veivutuni, mera cakava eso na veiyalayalati ka muria tiko nodra veiyalayalati kei na Kalou, ka ciqoma na Yalo Tabu?’” (Veivakavulici ena iVakarau ni iVakabula, 20).