Minerva K. Minerva Teichert (1888-1976), Escape of King Limhi and His People, 1949-1951, iboro ena mesanaiti, 35 7/8 x 48 idi. Vale ni Maroroi Cakacakaniliga e Brigham Young University, 1969.

11–17 ni Me.

Mosaia 18–24

Eda sa ia Oqo na Veiyalayalati Kei Koya

Ni ko sa wilika na Mosaia 18–24, vakasamataki ira o vakavulica. Na cava o kila me baleti ira? Na Yalo Tabu sa rawa me vakauqeta na nomu vakasama ka vukea mo kila na dina ni kosipeli sa ganiti ira.

Vola na Veika o Uqeti Kina

Sureta na Veiwasei

Sureta na kalasi mera vakatura eso na ivakavuvuli, se itukutuku ni dina, era a kunea ni ra vulica tiko na Mosaia 18–24. (Eso na ivakavuvuli era tiko ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale.) Vakayaloqaqataki ira mera wasea na veitikina mai na Mosaia 18–24 e vakavulica na ivakavuvuli oqo. Na veika cava era sa sotava oti ena dina oqo?

Vakavulica na iVunau

Mosaia 18:1–16

Na papitaiso e oka kina na veiyalayalati me qarava na Kalou ka mo ivakadinadina baleti Koya

• Ni ko wilika na Mosaia 18 ka vakavakarau mo veivakavulici, o na rawa ni vakauqeti mo vukea na kalasi mera taleva ka tugana na nodra veiyalayalati ni papitaiso. Oqo e dua na sala mo cakava kina: Sureta na kalasi mera cakacaka vata ka vola ena papa e vuqa na malanivosa e rawa ni ra nanuma e semati tiko ki na ivakamacala nei Alama baleta na veiyalayalati ni papitaiso. Ni sa oti, sa rawa mera wilika na kalasi na Mosaia 18:8–10 ka kuria e dua na ka e sega tiko ni volai. (Sa rawa mera semata kina na malanivosa eso mai na V&V 20:37, 77, kei na 79.) Ena veivuke ena nodra tarogi na ibalebale ni malanivosa yadua kei na cava era rawa ni cakava mera maroroya tiko na tiki ni veiyalayalati o ya ni papitaiso. Sa dau vakalougatataki keda vakacava na Turaga ni da sasagataka meda maroroya noda itavi ni veiyalayalati?

• Ni ra sa vakavakarau na daumuri Alama mera papitaiso, a vakavulica vei ira o Alama ni lako mai “ki na lomanibai ni Kalou” e gadrevi kina na cakava e dua na veiyalayalati me muria na Kalou ka karoni ira na Luvena (raica na Mosaia 18:8–9). Sa rawa ki na lewe ni kalasi mera wasea na gauna a vaqaqacotaki kina o ira se e dua era kila mai vua e dua ni ra vakayacora tiko na nodra veiyalayalati ni papitaiso e vakamacalataki tiko ena Mosaia 18:8–10. Me vakataka, na gauna cava a vakacegui ira kina e dua se vukei ira ena nodra icolacola bibi? Era sa vakauqeti keda vakacava na veika sa sotavi oqori meda maroroya tiko ga na noda veiyalayalati? Sa rawa mo vakavotuya ki na kalasi na nona a tu o Apinatai me “ [dua na ivakadinadina ni] Kalou ena veigauna kecega, kei na veika kecega, kei na veivanua kecega” (tikina e 9). Na cava eda rawa ni vulica mai na nona ivakaraitaki ni da vakasaqara meda vakayacora na itavi ni noda veiyalayalati ni papitaiso?

Ni da sa papitaiso, eda sa veiyalayalati meda qarava na Kalou kei ira na tamata.

Mosaia 18:17–31

Era sa duavata na tamata ni Kalou.

• E vakamacalataki enaMosaia 18:17–31 na vunau a solia o Alama vei ira na nona tamata me vukea mera duavata ni ra sa lewe ni Lotu i Karisito. Me vukea na kalasi mera vakasamataka na kena vakayagataki vei ira na vunau oqo, mo kerei ira mera vakasaqara vakailawalawa lalai na veitikina oqo ka vola na vunau era kunea kina. Ena veivuke vakacava na kena vakamuri na vunau oqo mera duavata kina na lewe ni tabanalevu? E tiko beka na lalawa mera cakava na kalasi vakai ira yadua se vakailawalawa mera muria kina na nodra ivakaraitaki na tamata nei Alama?

• Eso era vakataroga voli, na vuna eda gadreva kina na lotu? Ni gadrevi mera vukei na kalasi mera sauma na taro oqo, mo droinitaka e dua na vale ni Lotu ena papa ka vola e rukuna na taro oqo. Mera qai vakasaqaqara na kalasi ena Mosaia 18:17–31 ka vola ena papa na isaunitaro dodonu era raica ena veitikina oqo. Sa rawa mera kune isaunitaro talega mai na vosa nei Elder Christofferson ena “iKuri ni iVurevure.” Sa rawa mera dramataka e vica na lewe ni kalasi na isaunitaro era na kaya vua e dua na itokani e sega ni vakabauta ni dodonu me tiko e dua na lotu vakayavutaki. Cava na vuna meda vakavinavinaka kina ni da lewena na Lotu?

• Dina ni da vakasamataka tu ni tamata taucoko era gadreva na lako mai lotu, e ka ni rarawa, ni sega ni vakakina eso. Na cava eda vulica mai vei ira na tamata i Alama ena Mosaia 18:17–31 ena vukei keda meda tauyavutaka e dua na itikotiko era na mai vinakati taucoko kina na tamata?

Mosaia 21–24

Sa rawa ni vakamamadataka na Turaga na noda icolacola.

• Na icolacola era colata tiko na lewe ni kalasi e duidui mai na nodra icolacola na tamata ni Limiai se tamata i Alama ena nodra tiko vakavesu. Ia na itukutuku ni veika sa yaco oqo sa nona talega e dua e vakila na yalodruka ni bolei se ituvaki dredre. Sureta na kalasi mera wasea na veika era sa vulica mai na Mosaia 21–24 baleta e dau vukei keda vakacava na Kalou e loma ni noda vakatovolei. (Ena ivakaleka ni itukutuku eso oqo, raica na L. Tom Perry, “Na Kaukauwa ni Veisereki,” Ensign se Liaona, Me 2012, 94–97.) Sa rawa ki na kalasi mera wasea na gauna, era a vakataki ira kina na tamata i Alama, era a sotava na yalayala ni Kalou vei ira ni a kauta laivi na nodra icolacola ka sikovi ira ena nodra rarawa (raica na Mosaia 24:14).

• Ena rawa ni vakaibalebale cake vei ira na lewe ni kalasi mera taura e vica na miniti mera vola kina na nodra dui bolebole era sa sotava ka tugana na sala e vukei ira kina na Turaga me colata na nodra icolacola. Era tiko beka na itukutuku mai na Mosaia 21–24 e vakauqeti ira mera gole vua na Turaga ena veigauna ni dredre? E semati vakacava na yalayala ni Turaga vei ira na tamata i Alama ena Mosaia 24:14 ki na veiyalayalati eda cakava vua na Turaga ena papitaiso? (raica na Mosaia 18:8–10).

Vakayaloqaqataka na Vuli e Vale

Ni gadrevi mera wilika na lewe ni kalasi na Mosaia 25–28, kerea mera vakasamataka e dua sa lako tani mai na kosipeli. Tukuna vei ira ni ra wilika na wase oqo, era rawa ni kunea na raikiloma ena sala mera vukea kina na tamata o ya me lesu mai.

iKuri ni iVurevure

Na cava eda gadreva kina na Lotu?

E kaya o Elder D. Todd Christofferson: “Au kila ni tiko eso era nanuma ni ra sa daulotu se yalosavasava ia era besetaka mera vakaitavi ena lotu se ena gadrevi ni veika vakaoqo. Na cakacaka vakalotu vei ira sa ka ni tamata yadua. Ia na Lotu mada ga ea tauyavutaka o Koya ka sa usutu ni noda bula vakayalo—o ya o Jisu Karisito. Sa bibi sara meda tu vakadua ka vakananuma mada na vuna a digitaka kina o Jisu Karisito e dua na lotu, na Nona Lotu, Na Lotu i Jisu Karisito ni Yalododonu Edaidai, me vakayacori mai kina na Nodrau cakacaka kei Tamana.”

A qai wasea o Elder Christofferson na vuna sa mai tauyavutaka kina na Turaga e dua na Lotu (raica “Na Vu ni Lotu,” Ensign se Liaona, Nove. 2015, 108–11):

• “Me vunautaki yani na itukutuku vinaka ni kosipeli i Jisu Karisito ka vakayacori na cakacaka vakalotu ni veivakabulai—sa kena ibalebale, mera kau mai na tamata vei Karisito.”

• “Me tauyavutaki e dua na itikotiko ni Yalododonu era veitokoni vakai ira ena ‘sala qiqo ka rabailailai sa basika ki na bula tawamudu’ [2 Nifai 31:18]. … Ni da duavata ena vakabauta, eda veivakavulici ka veilaveti cake vakai keda yadua ka sasaga meda rawata na ivakarau taucoko ni bula vakatisaipeli.”

• Me “vakayacori ena veimacawa na veivakacegui kei na veivakavoui, sa gauna ka vanua meda guilecava vakadua na vuravura—na Siga ni Vakacecegu.”

• “Me rawati na veika yaga a sega ni rawa me rawata na tamata yadua se ilawalawa lalai [oka kina] na sotavi tiko na dravudravua vakaloloma, … [kau] na kosipeli ki na vuravura taucoko … [tara ka cakacakataki] na valetabu, na vale ni Turaga, na vanua mena qaravi kina na cakacaka vakalotu kei na veiyalayalati bibi sara.”

• Me caka me vakarautaki na idola ni matabete, ena yaco kina “na ilesilesi ni matabete ni Lotu me maroroya na savasava ni vunau ni iVakabula kei na dodonu ni Nona cakacaka vakalotu ni veivakabulai, … me vukea nodra vakarautaki o ira era gadreva tu mera na ciqoma, lewa dodonu na ilalavaki kei na kilikili o ira era kerea mai, ka qai vakayacori ira … [ka] kilai rawa na ka dina kei na ka lasu.”