Sa soli ivakadinadina o Apinatai vei Tui Noa

Sa Tu e Matai Tui Noa o Apinatai, maivei Andrew Bosley

4–10 ni Me.

Mosaia 11–17

“Na Rarama … Ka Sega ni Vakabutobutotaki Rawa”

Sa rawa me raici na ivakaraitaki ni vakavulici ni kosipeli nei Apinatai. Na cava o raica ena Mosaia 11–17 ena vukea mo qasenivuli vinaka cake?

Vola na Veika o Uqeti Kina

ivakatakilakila ni veiwasei

Sureta na Veiwasei

Ni gadrevi ki na kalasi mera wasea na ka era sa vulica ena nodra vulica vakai ira yadua se vakamatavuvale na ivolanikalou, sureti ira mera vakacavara na yatuvosa oqo: Keu meu na digitaka e dua na tikina mai na Mosaia 11–17 meu wasea vua e dua au lomana, sai koya na tikina .

ivakatakilakila ni veivakavulici

Vakavulica na iVunau

Mosaia 11–13; 17

Eda rawa ni tutaka na dina, ena gauna mada ga ni da tu taudua.

• Dina ga ni ra na sega ni vakarerei mera vakamatei na lewe ni kalasi ena vuku ni nodra ivakadinadina, ena rairai saqati beka ga na nodra vakabauta. Sa rawa mera raica na veika sa yaco se itukutuku ena Mosaia 11–13 kei na 17 e veivakayaloqaqataki mera tutaka na dina. Na cava a vakayaloqaqataki rau o Apinatai kei Alama me rau doudou kina? Ena rawa vakacava meda qaqa ka tudei tiko ena kena taqomaki na dina? Na vosa era tiko ena “iKuri ni iVurevure” ena soli vakasama.

• Ni gadrevi ki na kalasi mera vuli mai na ivakaraitaki eso ni kena taqomaki na dina ena yaloqaqa, mo vola ena papa O Ira Era Tutaka na Dina . Sa rawa mo tekivuna ena kena veivosakitaki o Apinatai, mo sureta na kalasi mera wasea na veika a vakauqeti ira baleti Apinatai ni ra wilika na veika baleti koya ena macawa oqo. Mera qai cavuta na yacadra na tagane kei na yalewa—mai na ivolanikalou, nodra matavuvale, se veika era dui sotava—era nanuma ni ra sa ivakaraitaki ni tamata era tutaka na dina. Na veika cava eda sa vakauqeti meda cakava ena vuku ni ivakaraitaki oqo?

Mosaia 12:19–37

Ni da vulica na ivolanikalou, ena gadrevi meda vakayagataka na yaloda meda kila vinaka.

• Ni ra sa vulica na Mosaia 12:19–37 ena macawa oqo, ena rawa ni ra veivakararamataki na kalasi ena ibalebale ni noda vakayagataka na yaloda me kila vinaka na vosa ni Kalou. Kerea e vica vei ira me ra wasea na nodra nanuma. Se mo vakayagataka e dua na gauna ena kalasi mo ni vakasaqara vata na veitikina oqo ka veivosakitaka na veika era vakatura ena sala me vakaibalebale cake kina na vuli ivolanikalou. Me vakataka, na cava na vuna e bibi kina me kilai vinaka na vosa ni Kalou kei na kena “maroroi”? (Mosaia 12:29).

• Na cava era rawa ni vulica na nomu kalasi ena kena veidutaitaki na nodra nanuma kei nodra ivalavala na bete nei Noa vata kei na noda rawa ni vulica na kosipeli? Sureti ira mera wilika na Mosaia 12:19–37, ka vakasaqara na veivunauci nei Apinatai vei ira na bete nei Noa. Na cava a kaya o Apinatai baleta na noda vulica na kosipeli ena gauna nikua? Kerea na kalasi mera wasea na ka era cakava mera vakayagataka na yalodra me kila vinaka ka kuria kina me vakaibalebale cake kina na nodra vulica na kosipeli.

  e rau wili ivolanikalou na veitamani

  E okati ena vuli kosipeli mana na kena vakayagataki na yaloda me kila vinaka.

Mosaia 13:28 -15:11

Na veivakabulai e lako mai ena vakabauti Jisu Karisito kei na Nona Veisorovaki.

• Mera uqeti o ira na ivavakoso lomatarotaro me baleta na lako mai ni iVakabula, a cavuta o Apinatai e dua na parofisai veivakauqeti sara maivei Aisea (raica na Mosaia 14). E vica toka na sala e rawa ni ra taleva na kalasi na wase oqo. Sa rawa mera wilika e vica na tikina ena dua na gauna ka veivosakitaki ira, se mo wasea vakailawalawa lalai na kalasi mera veivosakitaka na veitikina e vakaibalebale cake, oka kina na ivakamacala e botona, me kunei kina na ikuri ni veivakararamataki. Vakayaloqaqataki ira mera wasea na ka era sa vulica baleta na iVakabula mai na wase oqo.

• Era sa kila vinaka tiko beka na nomu kalasi na ibalebale ni o Jisu Karisito sa “vakaceguya na gagadre ni lewa dodonu”? (Mosaia 15:9). Ni gadrevi mera kila vinaka, sa rawa mo tekivuna ena nomuni wilika vata na “Lewa Dodonu” kei na “Dauloloma veivueti, Loloma veivueti” ena iDusidusi ki na iVolanikalou (scriptures.ChurchofJesusChrist.org) se “Lewa Dodonu” kei na “Loloma veivueti” ena topics.ChurchofJesusChrist.org. Sa rawa me dua e volodia me vola vakalekaleka ena papa na ibalebale ni vosa yadua oqo. Mo ni qai wilika vata na Mosaia 15:1–9 . Sa vakaceguya vakacava o Jisu Karisito na lewa dodonu? Sa solia vakacava mai vei au o Koya na Nona loloma veivueti? Na vidio era vakaturi tiko ena “iKuri ni iVurevure” era sa vakayagataka tiko na italanoa kei na vosa vakatautauvata me vakamacalataki kina na loloma veivueti ni iVakabula; ni saravi e dua na vidio oqo ena vukei ira na lewe ni kalasi mera vakasamataka eso tale na vosa vakatautauvata e vakamacalataka na sala sa vakaceguya kina o Jisu Karisito na lewa dodonu.

Mosaia 11; 12:33–37; 13:11–26

E dodonu me volai e yaloda na vunau.

• Sa rawa mo vukea na kalasi mera kila vinaka na bibi ni kena vakayacori na vunau me “volai e [yaloda]” ena nodra tarogi se cava nodra nanuma ni ibalebale ni malanivosa oqo. Mo qai kerea mera veidutaitaka na vunau a vakavulica o Apinatai ena Mosaia 12:33–37 kei na 13:11–26 vata kei na nodra ivalavala ca era cakava tiko o Noa na Tui kei ira na nona tamata (raica na Mosaia 11:1–7, 14–15). E duidui vakacava me vakayacori na vunau me “volai e [yaloda]” mai na noda kilai ira wale tu ga? (Mosaia 13:11). Eda na kila vakacava ni ra sa volai tu e yaloda na vunau? Na ivakaraitaki cava eda rawa ni wasea?

ivakatakilakila ni vuli.

Vakayaloqaqataka na Vuli e Vale

Era sa vakila beka na lewe ni kalasi na ka a rairai vakila o Apinatai—ni nodra sasaga mera wasea na kosipeli sa takiveiyaga? Tukuna vei ira ni ra na wilika ena Mosaia 18–26 na vua ni cakacaka vakaitamera nei Apinatai.

ivakatakilakila ni ivurevure

iKuri ni iVurevure

Na veivakavulici vakaparofita baleta na tutaka na dina.

E vakavulica o Peresitedi Russell M. Nelson, “O ira na tisaipeli dina i Jisu Karisito era sa tuvakarau me ra kilai tani, tukuna na lomadra, ka duatani mai vei ira na tamata e vuravura.”… E sega ni rawarawa se yaco vakataki koya na bula vakatisaipeli mana vakaoya. Sa dodonu me vakoti tu na noda rai vua na iVakabula kei na Nona kosipeli. E cakacaka bibi toka vakavakasama ni da segata me da raici Koya tiko ena noda vakasama kecega . Ia ni da vakayacora, ena dro na noda vakatitiqa kei na rere” (“Vagolea Mai na Mana nei Jisu Karisito ki na Noda Bula,” Ensign se Liaona, Me 2017, 40–41).

E kaya o Peresitedi Thomas S. Monson: “Meda sa qai dau yaloqaqa tiko ga ka tu vakarau meda tutaka na veika eda vakabauta, kevaka meda sa qai tu taudua ga ena veigauna eso, meda sa qai vakayacora ena yaloqaqa, ka vaqaqacotaki ni da sa kila ni ka dina na noda sa sega ni tu taudua ga ena gauna eda sa tu vata kina kei na Tamada Vakalomalagi” (“Bolea Mo Tu Taudua,” Ensign se Liaona, Nove. 2011, 67).

A vakavulica o Gordon B. Hinckley: “A volavola o Paula kivei Timoci: ‘Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma, kei na yalomatua. O koya mo qai kakua ni maduataka na kena itukutuku ni noda Turaga’ (2 Tim. 1:7–8). Au vinakata sara ga me ra cakava kece na lewenilotu na ka oqo mera vola ena dua na vanua me rawa ni imatai ni ka era na raica ni ra yadra mai ena mataka. Ena solia vei keda na doudou meda na tukuna yani, ena solia vei keda na vakabauta meda na tovolea, ka na vaqaqacotaka na noda vakadinadinataki Jisu Karisito” (Nodra iVakavuvuli na Peresitedi ni Lotu: Gordon B. Hinckley [2016], 338).

Na vidio baleta na lewa dodonu kei na loloma veivueti era tiko ena ChurchofJesusChrist.org.

• “Handel’s Messiah: Debtor’s Prison”

• “The Mediator”

• “Where Justice, Love, and Mercy Meet”