Na Saumaki Mai nei Alama Lailai, maivei Gary L. Kapp

18–24 ni Me.

Mosaia 25–28

“Era sa Vakatokai Mera Tamata ni Kalou”

Na sala vinaka duadua ni vakavakarau me vakavulici na Mosaia 25–28 o ya me wiliki na wase oqo ka bulataka na ivakavuvuli era vakavulica. Ni ko cakava, sa na vakauqeti iko na Yalo mo vakavulica na veika e bibi duadua ki na nomu kalasi.

Vola na Veika o Uqeti Kina

Sureta na Veiwasei

Eso na lewe ni kalasi era rairai sasaga dredre tiko mera vulica na ivolanikalou vakai ira yadua ka vakamatavuvale. Ena veivuke beka na veika era sotava na vo ni kalasi? Sa rawa mo tekivuna na kalasi ena nomu sureta na kalasi mera wasea e dua na ka vinaka era a cakava ena gauna ni nodra vulica na ivolanikalou vakai ira yadua se vakamatavuvale.

Vakavulica na iVunau

Mosaia 26:15–31; 27:23–37

Sa solia wale na Kalou na nona veivosoti vei ira sa veivutuni.

• Na veivutuni kei na veivosoti sa ulutaga e vakabibitaki tikoga ena wase oqo. Sa rawa mo vakadikeva na ulutaga oqori ena nomu vola ena papa na Veivutuni kei na Veivosoti ka kerea na kalasi mera vola ena ruku ni ulutaga oqori na nodra nanuma kina. Mera qai vakasaqara ena Mosaia 26:22–24, 29–31; kei na 27:23–37 na vosa kei na malanivosa e vakavulica vei ira na veivutuni kei na veivosoti. Sa rawa mera vakuria na kalasi na vosa kei na malanivosa oqo ena papa. Na cava na nanuma ni Kalou baleti ira era veivutuni ka vakasaqara mera vosoti?

• Eso era na lomatarotaka ke sa veiraurau beka nodra veivutuni me vosoti ira kina na Kalou. Ni gadrevi me vukei e dua ena nomu kalasi e vakasama tu beka vakaoqori, mo sureta na kalasi mera raitayalotaka ni ra sa Alama Qase ka dua na lewe ni Lotu mai Saraemala sa tarogi ira ena sala me na vosoti kina na nona ivalavala ca (sa rawa me dramataki na vakasama oqo). Na cava a vulica o Alama mai vua na Turaga ena Mosaia 26:15–31 ena rawa ni vukea na lewe ni Lotu oqo? (raica talega na Moronai 6:8; V&V 58:42–43). Ena rawa me veivuke talega na itukutuku oqo nei Peresitedi Henry B. Eyring: “Kevaka o sa vakila beka na veivakauqeti ni Yalo Tabu nikua, sa rawa mo vakadeitaka ni sa ivakadinadina ni sa cakacaka tiko na Veisorovaki ena nomu bula” (“Gifts of the Spirit for Hard Times,” Ensign, June 2007, 23).

Mosaia 27:8–24

Sa daurogoca na Kalou na noda masu ka na sauma mai ena Nona lewa.

• E vuqa vei keda e rawa ni kila vinaka na yaloi Alama Qase, ni luvena tagane a “veisaqasaqa tiko vua na Kalou” (Mosaia 27:11). Sa rawa ki na kalasi me veivosakitaka na sala mera vakayagataka kina na itukutuku e tiko ena Mosaia 27:8–24 me solia na inuinui vua e dua sa lakosese tiko e dua na lewe ni nona matavuvale. Ni da sa kila vinaka ni sega ni rawa meda lewa me yaco na cakamana se vorata na nona galala e dua, na ka dodonu cava eda rawa ni masulaka ni dua eda lomana sa lakosese? (raica talega na Alama 6:6

Mosaia 27:8–28:4

Na tagane kei na yalewa yadua mera na sucu vou tale.

• Oqo eso na taro ena rawa ni vukea na kalasi mera vulica na veika e baleta na sucu vou: Na cava na ibalebale ni sucu vou vakayalo? (raica na Bible Dictionary, “Conversion”). Eda na saga vakacava meda veimaliwai yani kei ira na tamata ni da sa sucu vou vakayalo? Ni gadrevi mera sauma na kalasi na taro oqo, sa rawa mo sureti ira mera vakasaqara ena Mosaia 27:22–28:4 na ivakatakilakila ni o Alama kei iratou na luvei Mosaia e ratou sa sucu vou vakayalo.

• E tiko na italanoa ni nona saumaki vou na tamata yadua, ni a kaya o Alama, “ni sa dodonu me sucu tale na tamatakecega ” (Mosaia 27:25; vakuri ena vosa kala). Sa rawa ki na vica na lewe ni kalasi mera wasea na sala era a saumaki vou kina ki na kosipeli i Jisu Karisito—ena veituvaki vakayalo qaqa ena nodra bula se dua na gauna veivakarautaki vakaituvatuva, e dredre ena so na gauna ka na kilai ga ena kena sa vakadinadinataki. Sa rawa mo solia talega na gauna ki na kalasi mera vola na veika era sa sotava. (Ke sa sega na gauna me vakayacori oqo ena kalasi, mo vakatura mera cakava ga mai vale.) Me vakamatatataki ni noda saumaki vou ena toso tikoga, ka mera taleva na lewe ni kalasi na veigauna eso na veika era sa vola ka semata na veika vou e sotavi.

• O Alama kei ira eso ena ivolanikalou taucoko era dau vakayagataka na vosa vakatautauvata ni sucu vou me vakamacalataka na veisau e kauta mai na kosipeli i Jisu Karisito ki na noda bula. E vakatauvatana na veisau oqo o Elder David A. Bednar ki na vuki na kiukaba me dua na pikeli ni kakana (raica na “iKuri ni iVurevure”). Me vukea na kalasi mera vakasamataka vakatitobu na ka e vakavulica na vakatauvatani ni saumaki vou, mo kauta mai ki na kalasi e dua na kiukaba kei na dua na pikeli. Se mo sureta e dua me kauta mai e dua na gonelailai ka veivosakitaka na vuna e dua kina na vosa vakatautauvata vinaka na sucu ena vuku ni ka a yaco vei Alama kei iratou na luvei Mosaia. (Raica na Mosaia 27:23–28:7.)

Sa Marau o Tamana, mai vei Walter Rane

Vakayaloqaqataka na Vuli e Vale

Ni gadrevi mera uqeti na kalasi mera wilika na Mosaia 29–Alama 4 ena macawa mai oqo, mo na vakaraitaka vei ira ni ena wase oqo, a soli vei ira na tamata i Nifai e dua me matataki ira ena nodra matanitu. Na cava eda rawa ni vulica mai na veika era sotava ni da sasagataka meda vakauqeti ira na noda itikotiko raraba ena caka vinaka?

iKuri ni iVurevure

E dua na ivakarau ni cakacaka ni bula taucoko.

E vakatavulica o Elder D. Todd Christofferson: “Ni da sucu tale, sa dua na ka vakaituvatuva e levu cake mai na dua na ka e a yaco ka sega ni vakataka na noda sucu mai vakayago. Kei na vakaitavi ena ivakarau ni cakacaka oqo sa usutu ni inaki ni bula vakayago” (“Sucu Tale,” Ensign se Liaona, Me 2008, 78).

Na saumaki vou kei na pikeli.

E wasea o Elder David A. Bednar na vosa vakatautauvata oqo baleta na sucu vou vakayalo kei na vuki na kiukaba me pikeli:

“Na pikeli e dua na kiukaba sa veisautaki ena kena muri e dua na kena icakacaka kei na ikabakaba eso. Na imatai ni ikabakaba ena iwalewale ni kena veisautaki na kiukaba ki na pikeli o ya na kena vakarautaki ka vakasavasavataki. …

“Na ikalawa e tarava ena iwalewale ni veisau oqo sai koya na kena tonidromu ka tonimoce tu ena wai vakamasima vakalevu me dua toka na gauna balavu. … Ena qai rawa walega ni vuki me pikeli na kiukaba kevaka ena tonimoce tu vakadua ena waimasima me yacova na gauna yalataki. Na ivalavala oqo ni kena maroroi ena veisautaka na kiukaba me raibasikati ka vaka na ikanakana ni pikeli. Na kena dau vakasuasuataki se toni vagauna ena wai masima ena sega ni yaco kina na veisau e vinakati. Ia ni tonimoce tu vakadua ka vakabalavu ena basika kina na veisau oqo.

“Na iotioti ni kalawa ena iwalewale e gadrevi kina na kena dregati na pikeli vinaka ena tavaya sa vakawainimate ka vakasavasavataki tu. Era dau maroroi na pikeli ena tavaya ni kakana, ka ubi tu ena wai masima katakata, ka qai biu ena dua na tavu wai katakata. Me na kau tani na duka taucoko mai na pikeli kei na tavaya me rawa ni taqomaki ka maroroi vinaka kina na kakana. …

“Me vaka ga na kena vakarautaki ka vakasavasavataki na kiukaba ni bera ni qai veisau me pikeli, sa vakakina na nodaru vakarautaki o iko kei au ena ‘vakabauta kei na ivakavuvuli vinaka’ (1 Timoci 4:6) ka qai vakasavasavataki ena cakacaka tabu vakalotu kei na veiyalayalati e qaravi ena dodonu ni Matabete i Eroni. …

“Me vaka ga na kena veisau me pikeli e dua na kiukaba ni tonidromu ka tonimoce tu ena waimasima, sa vakakina na nodaru sucuvou ko iko kei au ni sa curumi kedaru ka daru luvuci ena kosipeli i Jisu Karisito. … Na iwasewase ni iwalewale ni veisau oqo e gadrevi kina na gauna, na sasaga, kei na vosota vakadede. …

“… Na tonidrumo ena tavu waikatakata e rawa kina me maroroi ka taqomaki tu ena dua na gauna balavu na pikeli. Ena sala vata oqo, e daru na vakasavasavataki tiko ga kina ni daru sa savai ena dra ni Lami, sucu tale ka ciqoma na veicakacaka tabu vakalotu ka doka tiko na veiyalayalati e qaravi ena dodonu ni Matabete i Melikiseteki” (“E Dodonu Mo Sucu Tale,” Ensign se Liaona, Me 2007, 19–21).

Vakatorocaketaki Noda Veivakavulici

Vakavakarau ena nomu nanumi ira tiko na tamata. “Ni ko sa vakavakarau, raica me dusimaka na nomu ituvatuva na nomu kilai ira vinaka na tamata o vakavulica. … O ira na qasenivuli sa Vakarisito e sega ni dua tikoga na ivakarau se iwalewale era cakava; era sa yalataka mera vukei ira na tamata mera tara cake nodra vakabauti Jisu Karisito ka yaco mera vakataki Koya vakalevu cake” (Veivakavulici ena iVakarau ni iVakabula, 7).