Ko ni Sega ni Guilecavi, maivei Jon McNaughton

3–9 ni Jiune.

Alama 5–7

“Ko ni Sa Vakila Li na Veisau Levu Oqo e Lomamuni?”

Ni ko sa wilika na Alama 5–7, vakasamataki ira na lewe ni nomu kalasi era bulataka tiko na ivakavuvuli ena wase oqo. Sa rawa mo raica na sala mera okati kina ena veivosaki ena Sigatabu.

Vola na Veika o Vakauqeti Kina

Sureta na Veiwasei

Solia e vica na miniti ki na kalasi mera vakananuma na veika era sa wilika ena Alama 5–7 ka raica e dua na dina era gadreva mera wasea ena kalasi. Mo qai kerea mera wasea vei koya e toka e yasana.

Vakavulica na iVunau

Alama 5:14–33

E dodonu me yaco vei keda—ka vakila tikoga—e dua na veisau levu ni lomada.

• Era sureti na lewe ni kalasi mera vakasamataka na taro oqo era tiko ena Alama 5:14–33 ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Sa rawa mo tekivuna na veivosaki ena veitikina oqo ena nodra wasea na kalasi na taro cava mai na veitikina oqo e vakaibalebale cake vei ira. Sa rawa mo sureti ira mera cakacaka vakailawalawa ka railesuva na Alama 5:14–33 ka raica na ibalebale ni kena yaco e dua na veisau levu ni lomadra mai vua na iVakabula kei na Nona Veisorovaki. Sa rawa mera raica talega na veivakalougatataki e lako mai ni sa veisau e dua na yalo. Na vosa vakatautauvata cava tale eso era sa vakayagataki me vakamacalataka na veisau e tukuna tiko o Alama? (Kena ivakaraitaki, raica na Joni 3:1–7; 2 Korinica 5:17; Dale G. Renlund, “Maroroi ni Yalo sa Veivutuni,” Ensign se Liaona, Nove. 2009, 97–99.) Eda na maroroya vakacava na yaloda sa veisau ena noda bula taucoko? (raica na Alama 5:26).

  

  Ni da gole vua na Kalou, e rawa ni yaco vei keda na “veisau ni lomada.”

Alama 5:44–51

Eda na rawata na ivakadinadina baleta na iVakabula kei na Nona kosipeli mai vua na Yalo Tabu.

• Me vakataki Alama, era sa rawata na kalasi na nodra ivakadinadina baleta na iVakabula kei na Nona kosipeli. Ni gadrevi mera vulica na ka ea cakava o Alama me rawata kina na nona ivakadinadina mai vua na Yalo, mo veisoliyaka yani na tiki ni pepa eso ka volai toka e cake na iVakadinadina Mera qai cakacaka yarurua na kalasi mera taleva na Alama 5:44–51 ka vakayagataka na veika era sa vulica mai na veitikina oqo mera vola na kena “cakacakataki” e dua na ivakadinadina. Me vakataka, na “gacagaca” ni kena cakacakataki sai koya na dina sa buli kina na noda ivakadinadina. Na “ivakasala” ni kena cakacakataki sai koya na veika eda gadreva meda rawata kina e dua na ivakadinadina. (Raica na itukutuku nei Elder Dieter F. Uchtdorf ena “iKuri ni iVurevure” baleta eso na vakasama.) Na “gacagaca” kei na “ivakasala” cava e rawa ni ra kuria ki na kena cakacakataki mai na veika era sotava se veika era sotavi ena ivolanikalou? Sureti ira na veisa yarurua mera wasea na veika era sa vulica kei na cava era sa cakava tiko mera sureta kina na Yalo Tabu me vakadinadinataka na dina kivei ira.

Alama 6

Eda soqoni vata mai na Yalododonu meda mai rogoca na vosa ni Kalou ka cakava na Nona cakacaka.

• Me vakananumi ira na kalasi ena bibi ni soqoni vata mai vakalewe ni Yalododonu, e rawa mo sureti ira mera raitayalotaka e dua era kila e nanuma ni sega ni yaga na nona lewena e dua na lotu. Na cava era rawa ni wasea mai na Alama 6 me vakavulica na tamata oqo baleta eso na veivakalougatataki ni kena leweni e dua na lotu? Eda na rawata vakalevu cake vakacava na inaki ni vakasokumuni e vakamacalataka tiko o Alama?

Alama 7:7–16

A colata taucoko vei Koya na iVakabula na noda ivalavala ca, mosi, kei na vakaleqai.

• Era tiko beka eso ena kalasi era gadreva vakatotolo mera kila na veika e vakavulica na Alama 7:7–16 —ni a sega ni colata walega na iVakabula ki Vua na noda ivalavala ca ia na noda mosi, rarawa, tauvimate, kei na malumalumu. O na vukei ira vakacava mera kila na ka oqo? Sa rawa mo cakava e dua na ituvatuva ena papa ena iulutaga Na veika a vakararawataki kina na iVakabula kei Na Vuna a vakararawataki kina o Koya. Sa rawa ki na kalasi mera vakacavara na ituvatuva ni ra wilika oti na Alama 7:7–16. Ena veivuke talega me raici na veika tale eso ea vakararawataki kina na iVakabula ena gauna ni Nona bula (raica na ivakaraitaki ena “iKuri ni iVurevure”).

• Ni oti na kena veivosakitaki na veika ea vakavulica o Alama ena Alama 7:7–16, e rawa mera wasea na kalasi na gauna ea vakacegui ira kina na iVakabula, sa kena ibalebale ni a vukei ira o Koya (raica na “iKuri ni iVurevure” baleta na ivakaraitaki ni sala sa dau vakacegui keda kina na iVakabula). E rawa talega ni o wasea na veimalanivosa eso oqo mai vei Peresitedi Dallin H. Oaks: “Na noda iVakabula sa vakatakila mai ni sa ‘lako sobu mai ki ra sara’ (V&V 88:6). … E rawa beka ni da kaya ni sa lako sobu mai ki ra sara, sa toka kina o Koya ena dua na itutu vinaka me laveti keda kece ka solia vei keda na kaukauwa eda gadreva me da vosota kina na noda vakararawataki. Meda na kerea ga” (“Vaqaqacotaki ena Veisorovaki i Jisu Karisito,” Ensign se Liaona, Nove. 2015, 64).

• A kaya o Alama ni nona lako mai na Dauveivueti “sa ka bibi cake mai na” veika cava ga. Sa rawa ki na kalasi mera raitayalotaka ni ra tiko ena dua na kalasi ni itukutuku makawa ka veivosakitaki tiko na veika bibi duadua a yaco. Na veitikina cava mai na Alama 7 e rawa mera wasea me tokona kina na veika e tukuna tiko o Alama ena tikina e 7? Na ivakasala cava i Alama vei ira na nona tamata ena rawa me vukei keda meda vakavakarau ki na lako mai ni iVakabula?

Vakayaloqaqataka na Vuli e Vale

Mera vakayaloqaqataki na lewe ni kalasi mera wilika na Alama 8–12, sa rawa mo wasea vei ira ni wase oqo e talanoataki tiko kina e rua na tagane. E dua vei rau a lomana na Lotu kei na kena ikarua e dauveivakacacani, ia e rau qai taqomaka vakaukauwa ruarua na vakabauta.

iKuri ni iVurevure

Rawata noda dui ivakadinadina

A solia o Elder Dieter F. Uchtdorf na ituvatuva vakaivolanikalou oqo me “ciqomi kina e dua na ivakadinadina ni tamata yadua e teivaki titobu ena ivakadinadina ni Yalo Tabu”:

“iMatai: Gagadre mo vakadinata. E vakayaloqaqataki keda na iVola i Momani: ‘Kevaka [mo] ni yadra mada ka vakayadrata na yagomuni, mo ni vakatovotovotaka kina na noqu vosa, ka vakatovotovotaka vakalailai na vakabauta, … io kevaka mada ga ko ni gadreva [mo] ni vakabauta’ (Alama 32:27). … Sa yalataka na Kalou na veivuke e vakalou kevaka mada ga eda gadreva me da vakabauta, ia me gagadre dina sara ka sega ni gagadre vakailasu.

“iKarua: Vakasaqara na ivolanikalou. Taroga eso na taro; vakasamataka; vakasaqara ena ivolanikalou na kena isau. E dua tale, e tu ena iVola i Momani na ivakasala vinaka me baleti keda: ‘Kevaka ko ni sa vakatara me tei e lomamuni’ ena kena vulici vagumatua na vosa ni Kalou, na sorenikau vinaka ‘ena tubu cake mai e lomaseremuni’ kevaka ko na sega ni vorata ena tawavakabauta. Na sorenikau vinaka oqo sa ‘vakalevutaka na [yalomu]’ ka ‘vakararamataka na [nomu] kila ka’ (Alama 32:28).

“iKatolu: Cakava na loma ni Kalou; maroroya na vunau. … Eda gadreva me da lako mai vei Karisito ka muria na Nona ivakavuvuli. E vakavuvulitaka vakaoqo na iVakabula, ‘Sa sega ni noqu na noqui vakavuvuli, sa nona ga ka talai au mai. Kevaka e dua na tamata sa via cakava na loma i koya, ena kila se sa ka mai vua nai ivakavuvuli’ [Joni 7:16–17; vaka ikuri ena vosa kala]. …

“iKava: Vakasamataka vakatitobu, lolo, ka masu. Ni gadrevi me ciqomi na kila-ka mai vua na Yalo Tabu, e dodonu meda kerea vua na Tamada Vakalomalagi [raica na Alama 5:45–46; Moronai 10:3–4]” (“Na Kaukauwa ni iVakadinadina Yadua,” Ensign se Liaona, Nove. 2006, 38–39).

Na rarawa cava a sotava o Jisu Karisito?

• Veitemaki (raica na Maciu 4:1–10)

• Via kana kei na via gunu (raica na Maciu 4:2; Joni 19:28)

• Mate ni dua na daulomani (raica na Maciu 14:10–13)

• Biu taudua (raica na Maciu 26:55–56)

• Vakalialiai (raica na Maciu 27:29–31, 39–44)

• Dravudravua (raica na Luke 9:58)

• Volitaki (raica na Marika 14:43–46)

• Mosivutugu duadua ka sega ni vosota rawa e dua (raica na Luke 22:39–44; Mosaia 3:7; V&V 19:16–19)

Na rarawa cava tale eso a sotava na iVakabula?

E dau vakacegui keda vakacava o Jisu Karisito?

• Vosota na noda ivalavala ca ka vagalalataka na noda ora (raica na Inosi 1:5–6)

• Vakamalumutaka na yalodra na tamata (raica na Mosaia 21:15)

• Vakaukauwataki keda meda colata rawa na noda icolacola (raica na Mosaia 24:14–15)

• Vueti keda mai na noda malumalumu (raica na 3 Nifai 17:6–7)

• Cakava na ka malumalumu me kaukauwa ka vakacegui keda (raica na Ica 12:27–29)

• Vukei keda meda raica na rarawa ena kena ituvatuva matau (raica na V&V 121:7–10

Ena sala cava tale eso sa vakacegui keda kina o Jisu?

Vakatorocaketaki Noda Veivakavulici

Torocake me vaka e dua na qasenivuli sa Vakarisito. Me vaka ni ko qasenivuli, sa ka bibi mo tugana na sala eso mo na vukei ira na vuli mera tara cake nodra vakabauta na Tamada Vakalomalagi kei Jisu Karisito. Navuca mo vakayagataka na taro ni vakadikevi iko e tiko ena tabana e 37 ni Veivakavulici ena iVakarau ni iVakabula me vakauqeti iko.