Vakavulica na Vunau Dina, mai vei Michael T. Malm

8–14 ni June.

Alama 8–12

Ena Lako Mai ko Jisu Karisito Me Sereki Ira na Nona Tamata

Tekivuna nomu vakavakarau ni veivakavulici ena nomu wilika na Alama 8–12. Mo qai taleva na ituvatuva oqo baleta na ikuri ni vakasama mena vakayaloqaqataki ira na kalasi mera wasea na veika era sa vulica.

Vola na Veika o Uqeti Kina

Sureta na Veiwasei

Solia e vica na miniti ki na kalasi me raica mada na nodra vulica vakai ira yadua ka vakamatavuvale na ivolanikalou. Sa veivakauqeti vakacava na nodra vuli ki na digidigi era cakava ena macawa oqo? Kerea e vica na lewe ni kalasi me ra wasea na nodra nanuma.

Vakavulica na iVunau

Alama 8

Na noda sasaga meda wasea na kosipeli ena gadrevi kina meda guta tikoga ka vosota.

• E vuqa na tamata e dau dredre mera wasea na kosipeli—vakabibi ena gauna era vakuwai mai kina me vakataki Alama. Na ivakaraitaki nei Alama ena rawa me ra nuitaka ga na Kalou ka yaloqaqa mera tomana na wasea nodra ivakadinadina vei ira na tani. Mo vakasamataka mada na taro ni veivosaki oqo: Na cava eda vulica mai na itukutuku ni agilosi kivei Alama ena Alama 8:15? Na cava a cakava o Alama baleta na itukutuku oqo, e tiko ena Alama 8:14–32, e vakauqeti keda meda wasea tikoga na kosipeli ni da dau vakuwai mai? Na ivakasala cava o na kaya vua e dua a saga me wasea na kosipeli ia a vakuwai mai? Na itukutuku nei Elder Jeffrey R. Holland ena “iKuri ni iVurevure” e rawa ni veivuke ena veivosaki oqo.

• Na kedrau italanoa o Alama kei Amuleki e vakaraitaka tiko na bibi ni nodra sasaga na lewenilotu ena cakacaka ni kaulotu. Na cava era vulica na lewe ni kalasi mai na Alama 8:19–30 baleta na nodra veimaliwai na lewenilotu kei ira na daukaulotu tudei? (raica talega Alama 10:1–12).

  

  Ni da wasea na kosipeli kivei ira eda lomana ena rawa me ka rekitaki.

Alama 9:18–30

Sa lewai ira na luvena na Kalou me vaka na levu ni rarama kei na kila-ka sa tu vei ira.

• E tiko e dua na veivakaroti bibi ena veitikina oqo kivei ira kece na lewe ni Lotu—ena gauna eda sa ciqoma kina na rarama kei na kila-ka, sa namaki meda na vakamareqeta, susuga cake, bulataka, ka vakalougatataki ira kina na tamata. Ni gadrevi ki na kalasi mera vakadikeva na nanamaki oqo, sa rawa mo kerea mera wilika na ivakavuvuli nei Alama ena Alama 9:18–30 ka wasea na itukutuku era raica baleta na ilesilesi sa nodra ena vuku ni veika era sa kila tu. Na cava na vuna sa rawa meda cudruvi vakalevu cake ni da sa ivalavala ca ki na rarama cecere? Solia na gauna ki na kalasi mera tugana na cava era rawa ni cakava mera dina cake kina ki na rarama kei na kila-ka era sa ciqoma. Sa rawa mo vakatura mera wilika na Vunau kei na Veiyalayalati 50:24 ni ra tugana tiko.

Alama:11–12

Na ituvatuva ni Turaga e ituvatuva ni veisereki.

• Sa rawa mo tekivuna na veivosaki ni ivunau oqo ena nomu sureta e dua na lewe ni kalasi me droinitaka ena papa e dua na daiqaramu ni ituvatuva ni veisereki. Mo qai wasewasea na Alama 11–12 vei ira na lewe ni kalasi ka sureta mera vakasaqara na dina mera vakuria ki na daiqaramu. Me vaka, e sereki keda mai na cava na ituvatuva ni Kalou? (raica na Alama 11:38–45). Eda kalougata vakacava ni da kila na dina oqo baleta na ituvatuva ni veisereki?

• Ni gadrevi mera wasea na kalasi na cava e vakavulica na Alama 11–12 baleta na ituvatuva ni veisereki, sa rawa mo vola ena papa na veiulutaga oqo: Na Lutu, Na Dauveisereki, Veivutuni, Mate, Tucake Tale, kei na Siga ni Lewa. Sa rawa mera digitaka na kalasi e dua vei ira na ulutaga oqo ka vakasaqara ena Alama 11–12 na dina era sa vulica mai kina. Sureta na kalasi mera vola na dina era sa raica, vata kei na kena tiki ni ivolanikalou, ena ruku ni ulutaga e tiko ena papa. Me veivosakitaki va-kalasi na kena kilai na dina oqo ni na uqeta na noda bula kei na vakatulewa eda cakava.

• Ena rawa ni yaga ki na nomu kalasi e dua na veivosaki e kena usutu na Alama 12:31–32, ka a vakavulica kina o Alama ni oti na Lutu, a solia na Kalou vei Atama kei Ivi na vunau—ia oqo walega ni oti Nona vakavulici rau ena Nona ituvatuva. Ena noda kila na ituvatuva ena vakayaco-ka vakacava ki na noda raica se vakila baleta na vunau? Sa rawa mo vakamacalataka eso na vunau; me vakataka, ena vukea vakacava na noda kila na ituvatuva ni Kalou meda maroroya ka vakatabuya na Siga ni Vakacecegu se talairawarawa ki na lawa ni tiko savasava?

• Eso na lewe ni kalasi era na vakataroga beka na itukutuku ena Alama 11:26–39, ni a kaya kina o Amuleki ni dua ga na Kalou. Na ivolanikalou oqo e vakamatatataki iratou na lewe ni Lewetolu Vakalou ni sa “dua ga na Kalou” ia e ratou sa duidui tamata: Joni 17:20–23; 2 Nifai 31:21; kei na 3 Nifai 19:29. Ena rawa ni veivuke na itukutuku oqo mai vei Elder Jeffrey R. Holland: “Sa dodonu meda kaya ni Ratou sa duabau ga ena veika kecega kei na veika tawamudu e kilai rawa vakavo ga ni da sega ni vakabauta ni Ratou sa tolu na tamata cokoti vata ena dua ga na vatuka” (“Na Kalou Dina Duadua Ga kei Jisu Karisito O Koya Ko ni A Tala Mai,” Ensign se Liaona, Nove. 2007, 40).

Alama 12:9–14

Kevaka eda na sega ni vakaukauwataka na yaloda, eda na rawa ni ciqoma na veika lelevu ni vosa ni Kalou.

• E dua na itukutuku e vakavulica o Alama kei Amuleki ena vica na gauna o ya na ituvaki ni yaloda ena vakauqeta na levu ni dina eda rawa ni ciqoma mai vua na Turaga. Ni gadrevi mera kila na lewe ni kalasi na dina ni ivakavuvuli oqo, sa rawa mera veisa yarurua se vakailawalawa ka wilika na Alama 12:9–14 ka veivosakitaka na revurevu ni tiko na yalo kaukauwa. (Sa rawa mo kerea mera wilika na Alama 8:9–11; 9:5, 30–31; kei na 10:6, 25.) Na cava na kena ibalebale me malumu na yalo? (raica na Jeremaia 24:7; Alama 16:16; Ilamani 3:35). Ena vukei keda vakacava noda yalomalua meda kila vinaka cake kina na vosa ni Kalou?

• A vakavulica o Alama ni gauna eda vakaukauwataka kina na yaloda, eda na ciqoma “na iwase lailai ga” ni vosa ni Kalou (Alama 12:10). Sa rawa mera wasea na lewe ni kalasi na veika ea yaco ena ivolanikalou e vakaraitaka tiko na ivakavuvuli oqo. E dau vakayalomaluataki keda vakacava na Turaga me rawa ni da tomana noda vuli vakalevu tiko mai Vua? Na veika cava eda sotava e rawa meda wasea?

• Ni gadrevi mera kila vinaka na lewe ni kalasi na ibalebale ni kena tiko na yalomalua, sa rawa mo wasea eso na ivakaraitaki e tiko ena “iKuri ni iVurevure.”

Vakayaloqaqataka na Vuli e Vale

Ni gadrevi mera vakauqeti na kalasi mera wilika na Alama 13–16 ena macawa oqo, sa rawa mo tukuna vei ira ni ra na raica na sala ea yaco kina na vosa nei Alama ki na bula nei Sisoromi kei ira na tamata nei Amonaia.

iKuri ni iVurevure

Mo tu ena yaloqaqa.

E veivakayaloqaqataki vakaoqo o Elder Jeffrey R. Holland kivei ira era dauvakacacani ni ra wasea se taqomaka na kosipeli:

“Kevaka e se bera ni yaco oti, o ni na raica ni dua na siga ena yaco mo ni na gadrevi kina mo ni taqomaka na nomuni vakabauta se dua beka mo ni sotava na ivakarau ni veivakalolomataki baleta walega ni o lewena na Lotu i Jisu Karisito ni Yalododonu Edaidai. Na gauna vaqori ena gadrevi kina na yaloqaqa kei na vakarokoroko mai vei iko.

“…O ni na vakataroga lo tu beka kevaka ena yaga beka me tutaki ena yaloqaqa na bulasavasava e koronivuli se na lako ki kaulotu me laki vosabecitaki kina na noda vakabauta vakamareqeti se me da veivorati kei na vuqa na ka ena veitikotiko ka dau vakasewasewana ena vuqa na gauna na noda yalodina vakalotu. Io, e ganita sara. …

“Kemuni na noqu itokani, vakauasivi vei kemuni na noqu itokani gone, mo yaloqaqa. Na loloma savasava Vakarisito ka drodro mai na buladodonu dina e rawa ni veisautaka na vuravura. …

“Ni qaqa. Ni bulataka ena yalodina na kosipeli kevaka sara mada ga era sega ni bulataka o ira era tu vakavolivoliti kemuni. Taqomaka na nomu vakabauta ena vakarokoroko kei na yalololoma, ia mo taqomaka” (“Na iSau—kei na Veivakalougatataki—ni Bula Vakatisaipeli,” Ensign se Liaona, Me 2014, 6–9).

Era a vakamalumalumutaka na yalodra.

Na vosa mai na koniferedi raraba oqo era tukuni tiko kina na nodra ivakaraitaki eso ea vakamalumalumutaki na yalodra mai vua na Turaga:

• Na kedratou italanoa na matavuvale na Hatfield ena itukutuku nei Peresitedi Russell M. Nelson, “Na iSau ni Kaukauwa ni Matabete” (Ensign se Liaona, Me 2016, 66–67).

• Na italanoa kei Harold Gallacher ena itukutuku nei Peresitedi Thomas S. Monson “Na Kaci Bibi ni Veiqaravi” (Ensign se Liaona, Me 2005, 55).

• Na italanoa kei Tevita ena itukutuku nei Peresitedi Dieter F. Uchtdorf “Vuli mai vei Alama kei Amuleki” (Ensign se Liaona, Nove. 2016, 73–74).

Vakatorocaketaki ni Noda Veivakavulici

Raica yani ena mata ni Kalou. Saga mo raici ira na lewe ni nomu kalasi me vaka e raici ira tiko mai na Kalou, ka na vakatakila vei iko na Yalo na kedra yaga vakalou kei na gunirawa. Ni ko cakava oqo, o na dusimaki ena nomu sasaga mo na vukei ira kina (raica na Veivakavulici ena iVakarau ni iVakabula, 6).