Droini kei Alama kei Amuleki rau sa sereki mai na valeniveivesu, maivei Andrew Bosley

15–21 ni Jiune.

Alama 13–16

“Curu Ki na iVakavakacegu ni Turaga”

Na saumaki vou tudei ena gadrevi vakalevu cake mai na lesoni ni Matawilivola ni Sigatabu ena veimacawa. Vakayaloqaqataka na kalasi mera vakasaqara mera sotava na veika vakayalo ena loma ni macawa.

Vola na Veika o Uqeti Kina

Sureta na Veiwasei

Na cava e rawa ni vakauqeta na kalasi mera veiwasei vakai ira ena veika era sa sotava ni ra vulica ka bulataka tiko na kosipeli? Sa rawa mo sureti ira mera wasea e dua na veivakararamataki era kunea ena Alama 13–16 era kurabui kina se sega tu ni bau vakasamataka tu e liu. Ni ra sa wasea, taroga nodra nanuma ena kena veisautaka na nodra bula na veivakararamataki oqo.

Vakavulica na iVunau

Alama 13:1–19

Na cakacakatabu vakalotu ena vukei ira na luve ni Kalou mera sereki maivei Jisu Karisito.

• Eso na lewe ni nomu kalasi era rairai sa raica e dua na ka sa vakatitobutaka kina na nodra vakavinavinakataka na matabete ni ra vulica na Alama 13. Sureti ira me ra wasea na veika era raica. Sa rawa mo ni wilika vata talega na tikina e 2 kei na 16 ka taroga “E vukei iko vakacava na matabete kei na cakacaka vakalotu mo ‘rai yani ki vua na Luvena [na Kalou] [mo] sereki kina’?” Ke na veivuke, era tiko eso na cakacaka vakalotu ena Tudei ena Vakabauta, 109–10.

  

  Ena vukei keda na cakacaka vakalotu ni matabete meda raici Jisu Karisito yani meda sereki.

• E vuqa na tamata mai Amonaia era a daumuri Neori, ni dau vunautaka na ivakavuvuli lasu baleta na nodra ilesilesi na bete. Ni gadrevi ki na kalasi mera vulica na inaki dina ni matabete, sa rawa mo kerea mera veidutaitaka na vakasama nei Neori baleta na veika mera cakava na bete (raica na Alama 1:3–6) ki na veika e vakavulica o Alama (raica na Alama 13:1–12). Ena sala cava e tautauvata kina na ivakavuvuli ki na vakasama ni vuravura me baleta na kaukauwa kei na veiliutaki? E duidui kina vakacava na ivakavuvuli nei Alama?

• Na wiliki ni Alama 13:1–19 ena rawa ni tekivu kina e dua na veivosaki baleta na “vakarautaki mai na tekivu kei vuravura” baleta na noda ilesilesi ena cakacaka ni Turaga. Na cava e vakatura tiko na Alama 13:3 baleta na sala meda na raica se tokona kina na ilesilesi oqo? (raica talega na V&V 138:56

Alama 13

Sa sureti keda tiko na Turaga meda curuma yani na Nona vakacegu.

• A vakavulica o Alama ni na vukei keda na matabete meda “curu ki na ivakavakacegu ni Turaga” (Alama 13:16). Me tekivu na veivosaki baleta na vakasama oqo, mo kerea na kalasi mera wilika na Alma 13:6, 12–13, 16, kei na 29 ka wasea na veika e vakavulica na veitikina oqo baleta “na ivakavakacegu ni Turaga.” Sa rawa mera raica talega na nodra bula raraba na tamata era “curu ki na ivakavakacegu ni Turaga.” Na cava eda rawa ni cakava meda sotava kina na ivakavakacegu ni Turaga ki na noda bula eke?

Alama 14

Ena gauna ni noda vakatovolei kei na veika rarawa, e dodonu meda nuitaka tikoga na Turaga.

• NaAlama 14 sa madigi vinaka me veivosakitaki kina na sala meda yalodina tikoga kina ena gauna eda sotava kina se noda daulomani na veivakacacani se vakatovolei ena gauna mada ga eda saga tiko kina meda bula dodonu. Sa rawa mo tekivu ena nomu sureta na kalasi mera raitayalotaka ni ra dauvolitukutuku era mai tauri itukutuku ni veika e yaco ena Alama 14. Na mataqali taro cava era na tarogi Alama se Amuleki kina me baleta na veika a yaco? Me vakataka, “Cava na vuna e vakatara kina na Turaga me yaco kina vei iko se so tale na tamata ivalavala dodonu mo ni sotava na rarawa?” se “Na ivakasala cava mo na solia vei ira sa sotava tiko na veivakatovolei dredre?” Ena vuku ni veika eda sa kila mai na Alama 14, rau na sauma vakacava o Alama kei Amuleki na taro oqori?

• E vuqa vei keda eda rawa ni kila na yaloi Amuleki ni a vakadinadinataka na nodra vakararawataki na tamata yalodina nei Amonaia: eda “ [sa] mosi talega” (Alama 14:10), ka da gadreva meda cakava kina e dua na ka. Na cava eda sa vulica mai na veika a kaya o Alama ena vuku ni veika oqo? (raica na Alama 14:8–13). Sa rawa mo wasea na itukutuku nei Peresitedi Spencer W. Kimball ena “iKuri ni iVurevure.” Sa rawa ki na lewe ni kalasi mera vakalekalekataka na usutu ni itukutuku nei Peresitedi Kimball ena nodra vosa ga.

Alama 15:16, 18

E gadrevi na solibula ena bula vakatisaipeli.

• E vakaturi tiko enaituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale na veika sa kauta laivi o Amuleki kei na veika sa rawata ni sa ciqoma na kosipeli. Sa rawa talega ki na kalasi mera wasea na veika era sa vola, se mera vola na veika oqo ena kalasi. Sa rawa ni ra veivuke na ivolanikalou oqo: Alama 10:4–5; 15:16, 18; 16:13–15; kei na 34:8. Cava na vuna sa lomai Amuleki kina me sa solibula vakaoqo? Cava na vuna sa lomada kina meda cakava? Eda na muria vakacava na ivakaraitaki nei Alama, ka a “vaqaqacotaki [Amuleki] vua na Turaga”?

Alama 16:1–10

Na nodra vosa na parofita ena yaco kece sara.

• E tukuni enaAlama 16 na ivakaraitaki ni dua na tamata a nuitaka e dua na parofita kei ira na tamata era a sega ni vakanuinui kina. Ni gadrevi mera vulica na kalasi na ivakaraitaki oqo, sa rawa mo vola ena papa e rua na ulutaga: Soramu kei na Ira na Tamata i Amonaia. Sa rawa mera wilika na kalasi na Alama 16:1–10 ka vola ena ulutaga yadua na vosa kei na malanivosa e vakamacalataka na nodra nanuma na tamata oqo baleta na vosa nei parofita Alama. Na cava eda sa cakava tiko meda vakaraitaka vua na Tamada Vakalomalagi ni da sa vakabauta tiko na nodra vosa na parofita era bula tiko?

Vakayaloqaqataka na Vuli e Vale

Sa rawa mo taroga na kalasi se ra bau diva tu mera vinaka cake ena wasea na kosipeli. Na wiliki ni Alama 17–22 ena rawa ni uqeti ira ena vakasama eso mera rawata kina na lalawa oqo.

iKuri ni iVurevure

E sega ni dau sa tarova tu ga na Kalou na veika ca.

E dua na gauna a kaya kina o Peresitedi Spencer W. Kimball ena vuqa ni veika ca e sega ni vakamacalataki rawa e yaco tu e vuravura:

“A rawa beka vua na Turaga me a tarova na veika ca oqo? Na kena isau na io. E kaukauwa sara na Turaga, kei na lewa me taura na noda bula, taqomaki keda mai na mosi, tarova na vakacalaka taucoko, … ka vakakina mai na [noda] mate, kevaka e vinakata. Ia e sega ni vinakata. …

“Kevaka mera vakabulai kece o ira na tauvimate era masulaki, kevaka mera taqomaki o ira kece na yalododonu ka ra vakarusai o ira na tamata ca, ena tagutuvi na parokaramu taucoko nei Tamada kei na yavu taumada ni ivakavuvuli ni kosipeli, ena bokoci laivi na galala ni digidigi. Sa na sega ni dua na tamata me na bula ena vakabauta. …

“… Ia kevaka me da na sogolati keda mai na rarawa kei na lomaleqa, eda sa na vakatikitikitaki ira sara tikoga na wekada talei ka dau ni ivurevure. Na vakararawataki ena rawa ni ra kilai yalodra kina na yalododonu ni ra vulica na vosota, na vakararawataki vakabalavu, kei na vakatulewa vakai ira. …

“… Dina ga au sega ni vakabulai ira taucoko na tauvimate ena kaukauwa ni matabete kau sa na vakavinavinaka ga. Ena rawa beka meu na vakabulai ira era a dodonu mera mate. Au na rawa beka ni vakacegui ira ka dodonu mera rarawa mai na nodra vakararawataki. Au rerevaka deu na tarova na lewa ni Kalou.

“Kevaka beka me tu vei au na kaukauwa tawayalani, ka yalani tu na noqu rai kei na kila vakavinaka, keu a rawa beka ni vakabulai Apinatai mai na yameyame ni buka ena nona a vakamai bulabula, keu a vakayacora vakakina au na rairai vakamavoataki koya sara kina vakaca. E a mate o koya me vaka e dua na maritire ka dolei vua na isolisoli ni maritire—o ya na bula vakalou.

“Au a vinakata sara ga meu taqomaki Paula maivei ira na kena meca kevaka me a sega ni yalani na noqu kaukauwa. Au a rawa sara ga ni vakabulai koya mai na ‘voto ni kau sa vakalauti kina na lewena.’ [2 Korinica 12:7.] Keu a vakayacora au sa na vakatanitaka na parokaramu ni Turaga. …

“Au ririkotaka kevaka beka meu a tiko ena Valeniveivesu e Carthage ena 27 ni Jiune, 1844, ena rawa beka meu vagolea tani na sicini ka a laubasikata na yagoi koya na Parofita [Josefa Simici] kei Peteriaki [Hyrum Smith]. Au a rawa beka ni vakabulai rau mai na rarawa kei na mosi, ia ka kauta tani mai vei rau na mate ni maritire kei na kena idole. …

“Mai na kaukauwa tawayalani vakaoqo, e a rawa sara ga meu a taqomaka na Karisito ena mosi mai Kecisemani, na vosa veivakacacani, na isala vakavotona, na veivakalialiai ena veilewai, na mavoa ni yagona. E a rawa meu qarava na nona mavoa ka vakamacataka, ka solia vua na wainigunu batabata ka sega ni waiwiwi gaga. Au a rawa ni vakabulai koya mai na rarawa kei na mate, ka yaco me vakayali e vuravura na nona solibula ni veisorovaki. …

“Ni da sotava na leqa vakacalaka e dodonu me da vakararavi ga vua na Kalou, ka kila ni se vakacava ga na yalani ni noda rai ena sega ga ni vakadaroi rawa na nona inaki” (Nodra iVakavuvuli na Peresitedi ni Lotu: Spencer W. Kimball [2006], 14–17, 20).

Vakatorocaketaki Noda Veivakavulici

Sureta na vuli gugumatua. “Ni o vakavakarau mo veivakavulici, o sega ni vakasama vaqo, ‘Na cava beka meu cakava meu veivakavulici?’ taroga, ‘Na cava me ra cakava na noqu lewe ni kalasi me ra vuli kina?’” (Veivakavulici ena iVakarau ni iVakabula, 29).