O Amoni kei Tui Lamonai, mai vei Scott M. Snow

22–28 ni Jiune.

Alama 17–22

“Au na Qisi Kemudou Mo Dou iYaya ni Cakacaka”

Ni bera ni ko vukea eso mera kila na dina e tiko ena ivolanikalou, e gadrevi mo na kila taumada vakai iko na dina. Wilika na Alama 17–22 ka vakananumi ira tiko na lewe ni nomu kalasi.

Vola na Veika o Vakauqeti Kina

Sureta na Veiwasei

Me solia vei ira na lewe ni kalasi na madigi mera wasea e dua na ka era vulicaena vuli vakai ira yadua se vakamatavuvale, mo sureti ira mera digia e dua na tamata e tukuni ena Alama 17–22 ka vakacavara e dua na yatuvosa me vakaoqo: “Ea vakavulici au o Apisi ” se “Ea vakavulici au o Lamonai .”

Vakavulica na iVunau

Alama 17:1–4

Ena vaqaqacotaki na noda vakabauta ni da vakasaqara vagumatua meda kila na dina.

• Era sa rairai rogoca beka vakavuqa na kalasi na bibi ni itovo vakosipeli rawarawa. Ena rawa ni veivuke naAlama 17:1–4 mera raica na kaukauwa mana ni itovo oqo ki na noda bula. Sa rawa mo kerea e veimama na kalasi mera vakasaqara ena veitikina oqo na ka e ratou a cakava na luvei Mosaia kei na ikarua ni veimama mera vakasaqara na vua eso ni veika e ratou a cakava. Na cava na vua ni noda cakava na veika oqo ki na noda bula?

• Me dua veivosaki titobu baleta eso na itovo a vaqaqacotaki iratou na luvei Mosaia, mo vola ena papa Vakasaqara na iVolanikalou, Masu, kei na Lolo. Ena qai rawa mera vakasaqara na kalasi ena ivolanikalou e vakavulica na veivakalougatataki e yaco mai ena kena vulici na ivolanikalou, masu, kei na lolo (na Topical Guide se Guide to the Scriptures e rawa ni veivuke). Sa rawa mera vola ena papa na ka era sa raica ka veiwasei vakai ira ena vakasama me vakatorocaketaki kina na nodra vuli ivolanikalou, masu, ka lolo mera toro voleka kina vua na Kalou.

Alama 17–18

Sa rawa ni veivuke na noda loloma mera vakarautaki kina eso mera ciqoma na kosipeli.

• E vuqa tu na sala ni kena wasei na kosipeli, ka ra na mana kece sara ke sa inaki ni lomada na loloma. Sa rawa vei ira na lewe ni kalasi mera raica na veitikina oqo ena Alama 17–18 a vakaraitaka kina o Amoni na inaki ni lomana me wasea kina na kosipeli. Na dina cava tale eso baleta na wasei ni kosipeli eda vulica mai na nona ivakaraitaki? Sa rawa ki na kalasi mera wasea na gauna a vakamalumalumutaka kina na yalo ni dua na tamata na loloma dina ka rawa vua me ciqoma vagumatua na itukutuku ni kosipeli. (Na itukutuku nei Peresitedi Dallin H. Oaks ena “iKuri ni iVurevure” e rawa ni veivuke me ra kilamatata na kalasi na bibi ni kena vakadeitaki me yavutaki na noda igu mai na loloma.

Ammon Saves the King’s Flocks, mai vei Minerva K. Teichert

Alama 18:22

Na kena vakavulici ka vulici vakaidina na dina ni kosipeli ena rawa ni veisautaka na yalo.

• Ena gauna rau sa rawata kina o Amoni kei Eroni na veivakabauti nei Tui Lamoni kei na tamana, a rawa kina me rau vukei rau me rau kila kina na bibi ni dina ni kosipeli. Ena veivuke beka ke ra vola na lewe ni kalasi na dina a vakavulica o Amoni kivei Lamonai (raica na Alama 18:24–39) ka vakatauvatana ki na veika a vakavulica o Alama vei tamai Lamonai (raica na Alama 22:1–16). Me veimama na kalasi mera qarava na imatai ni lisi kei na ikarua ni veimama ena lisi tale ka dua. Cava na vuna e veimuataki kina na kena kilai vinaka na dina oqo me rau vakadinata ka nuitaka kina o Lamonai kei tamana na Tamada Vakalomalagi kei na Luvena, o Jisu Karisito?

• Na itukutuku ni nodrau vakavulica o Eroni kei Amoni na Tui o Lamonai kei tamana e solia e dua na madigi cecere me veivosakitaki kina na mana ni vakavulici kei na vulici ni kosipeli. Na ivakavuvuli cava ni veivakavulici era raica na lewe ni kalasi? (raica, me kena ivakaraitaki, Alama 18:24–28 kei na Alama 22:7–13). Na ivakavuvuli cava ni vuli era kunea ena ivakaraitaki nei Tui Lamonai kei na tamana? (raica, me kena ivakaraitaki, Alama 18:25–31; 22:17–18).

• Ni gadrevi me vulici na sala sa dau uqeta kina na noda bula na kosipeli, mera vakasaqara na kalasi na Alama 18:40–41; 20:1–15; kei na Alama 22:15–18, 25–27 me kilai kina na ituvaki ni yalodrau o Tui Lamonai kei tamana kei na ka rau a cakava ni rau sa kila vinaka na dina ni kosipeli ka rau sa saumaki kina. E vukei keda vakacava na dina oqo meda gole kina vei Karisito? Na cava eda rawa ni vukei keda kina vakai keda kei ira eda lomana mera kila vinaka ka bulataka na dina oqo?

Alama 19–22

Ena rawa me veivakauqeti sara na noda ivakadinadina vei ira na tamata.

• Ni ra sa vulica vakai ira yadua na Alama 19–22, era sa rairai vakasamataka vakatitobu na kalasi na mana vakalevu ni nona ivakadinadina e dua kivei ira eso. Vakayaloqaqataki ira mera wasea na veika era sa vulica. Na itukutuku cava e tukuna tiko na Alama 19–22 baleta na noda sasaga vakatamata yadua meda wasea na kosipeli? E rawa ni veivuke na italanoa nei Peresitedi Gordon B. Hinckley ena “iKuri ni iVurevure” me vakamatatataka na tikina oqo.

• Na cava eso na ivakatautauvata vinaka o rawa ni wasea me vakaraitaka na cava e rawa ni yaco ni da wasea noda ivakadinadina vei ira eso? E rawa ni ivakaraitaki na sokidi ni wai ni lutuka na vatu se na isi me tubu kina na valawa. Ni talevi eso na ivakaraitaki era a wasea kina eso na nodra ivakadinadina ena Alama 19–22, sa rawa ki na kalasi mera wasea na sala a vakayaco-ka kina vei ira na nodra ivakadinadina eso.

Vakayaloqaqataka na Vuli e Vale

Sa rawa mo tarogi ira na kalasi kera sa bau vakasamataka tu na sala me tudei ka gugumatua tu kina na nodra sa saumaki vou tiko. Era na wilika ena Alama 23–29, e dua na ilawalawa tamata era a ciqoma na kosipeli ka “sega ni lutu tani tale” (Alama 23:6).

iKuri ni iVurevure

Wasea na kosipeli ena loloma.

A wasea o Peresitedi Dallin H. Oaks e dua na lesoni bibi ea vulica mai na dua na ka ea sotava ni se cauravou:

“Au a lesi meu laki sikova e dua na lewenilotu sa sega tu ni lotu, e dua na tamata vuku vakacakacaka ka qase sara vei au. Niu taleva lesu na ka au a cakava, au raica ni vakalailai ga noqu lomana ka kauwaitaka na turaga au a sikova oqo. Au a cakava ga ni noqu itavi, ena gagadre me 100 na pasede noqu ripote ni veituberi ena vuvale. Dua na yakavi, ni vakarau cava toka na vula, au a qiriti koya ke rawa ni keirau gole yani kei noqu itokani me sikovi koya. Na ka rarawa a kaya mai sa dua na lesoni au na sega ni guilecava rawa.

“‘Sega, au sega ni vakabauta niu taleitaka mo drau gole mai na yakavi nikua,’ a kaya mai. ‘Au sa rui oca vakalevu. Au sa vakaisulu tu ni moce. Au wilivola tiko, kau sega ni vinakata meu vakataotaki mo rawa ni ripotetaka ni 100 na pasede na nomu veituberi ena vuvale ena vula oqo.’ E gaga sara ga vei au na nona vosa baleta niu kila sa kidava rawa o koya na noqu inaki kocokoco.

“Au nuitaka ni sega ni dua eda gole yani kina ena veisureti me rogoca na kosipeli vakalesuimai me vakila ni da cakava tiko ena dua tale na inaki ia meda cakava ena loloma dina vei ira kei na veinanumi meda wasea e dua na ka eda kila ni sa iyau talei” (“Sharing the Gospel,” Ensign, Nov. 2001, 8).

Sa dau sega ni kilai na noda veivakauqeti.

A tukuna o Peresitedi Gordon B. Hinckley e dua na italanoa ni nona laki ripote vua nona peresitedi ni kaulotu e dua na daukaulotu ni sa mai cava na nona veiqaravi. A kaya o daukaulotu:

“E sega ni dua na ka au a rawata ena noqu cakacaka. Au sa vakaotia noqu gauna kei na ilavo nei tamaqu. Sa vakalusi gauna sara ga. … Au a papitaisotaka rawa ga e dua na tamata ena loma ni rua na yabaki au tiko kina eke. O ya e dua na cauravou yabaki tinikarua ena tikina lolovira kei Tennessee.”

Sa qai saga tiko o peresitedi ni kaulotu me vakaraica yani na cauravou lailai a papitaisotaka o daukaulotu oqo. A tubu cake o cauravou, vakamau, ka toki yani ki Idaho. Era a laki kaulotu na luvena, kei na luvedra a laki kaulotu. A gole yani o peresitedi ni kaulotu ki Idaho ka taroga na lewe ni matavuvale o ya baleta na nodratou kaulotu. A qai kaya e muri, “Au a qai kila, ena nona papitaiso na cauravou lailai o ya ena tikina lolovira mai Tennessee mai vua na daukaulotu a nanuma ni sa druka, e sivia e 1,100 na tamata era sa mai lewena na Lotu” (Teachings of Gordon B. Hinckley [1997], 360–61).

Vakatorocaketaki ni Noda Veivakavulici

Me tiko na nodra gauna ni veiwasei na vuli tiko. “Ni ra wasea na vuli tiko na veika era sa vulica, e sega walega ni ra vakila na Yalotabu ka vaqaqacotaka na nodra dui ivakadinadina, ia era vakayaloqaqataki ira talega na vo ni lewe ni kalasi me ra raica vakataki ira na dina. … Dau solia eso na gauna ni veiwasei vei ira na gonevuli ena veilesoni yadua—ena so na gauna, o na raica beka ni veivosaki sara ga oqo na lesoni” (Veivakavulici ena iVakarau ni iVakabula, 30).