Era Buluta Nodra iYaragi ni iValu na Anitai-Nifai-Liai, mai vei Jody Livingston

29 ni June–5 ni Julai

Alama 23–29

Era “Sega ni Qai Lutu Tani Tale”

Ni o wilika tiko na Alama 23–29, nanuma mera vukei na tani me ra vulica na dina eso e tiko ena wase oqo, o na gadreva mo sotava na veika vakaibalebale ni veika dina oqori vakai iko.

Vola na Veika o Uqeti Kina

Sureta na Veiwasei

Sa rawa mo sureti ira na lewe ni kalasi me ra vola ena vava ni volavola na tikina eso e laurai levu vei ira ena nodra vuli yadudua se vakamatavuvale. Taura e vica na miniti ka sureti ira me ra veivosakitaka e dua na dina era sa vulica mai na veitikina oqori era sa vola.

Vakavulica na iVunau

Alama 23–25; 27

Na saumaki ni noda bula vei Jisu Karisito kei na nona kosipeli ena veisautaka noda bula.

• Ni da sa tisaipeli i Jisu Karisito, eda tovolea kece tiko meda vakatitobutaka na noda saumaki. E rairai na kedra italanoa na Anitai-Nifai-Liai e rawa ni vakayaloqaqataki ira o vakavulica ena nodra sasaga me ra kitaka na ka oqo. O rawa ni tekivu ena nomu vola ena vava ni volavola e dua na taro me vakaoqo: Na cava na kena ibalebale meda saumaki? se Na cava beka eso na veisau e yaco ena nodra bula na tamata ni ra sa saumaki? Era rawa ni vakasaqara na isaunitaro ena veitikina oqo: Alama 23:6–7, 17–18; 24:17–19; 25:15–16; kei na 27:26–30. Sa rawa me ra wasea na raiyawa eso mai na so tale na tikina era sa wilika ena Alama 23–25 kei na 27. Na lewe ni kalasi era rawa ni raica talega na isaunitaro e veivuke ki na veitaro oqo ena itukutuku nei Elder David A. Bednar “Saumaki vua na Turaga” (Ensign se Liaona, Nove 2012, 106–9; raica talega na “iKuri ni iVurevure”). Na veisau cava soti era sa cakava na Anitai-Nifai-Liai ena vuku ni nodra saumaki mai? E vakauqeti keda vakacava nodra ivakaraitaki meda vakatitobutaka na noda saumaki vei Jisu Karisito kei na Nona kosipeli?

• O na vakauqeti ira vakacava na lewe ni kalasi me ra biuta laivi na ivalavala lasu ka buluta na nodra iyaragi ni talaidredre, me vaka era vakayacora na Anitai-Nifai-Liai? Vakasamataka mo railesuva na Alama 23:5–7 vata kei ira. Na cava soti eso na ivalavala vinaka e vukei keda meda vakatorocaketaka na kosipeli? Na cava e rawa ni matataka na nodra “iyaragi kecega ni … talaidredre” na Leimanaiti ena noda gauna oqo? E rawa vakacava ni da “buluta vakatitobu ena qele”? (Alma 24:17). Sureti ira na lewe ni kalasi mera tugana na cava na ivakarau lasutaki se iyaragi ni talaidredre e gadrevi mera biuta tu mai me rawa ni ra bulataka vakataucoko na kosipeli.

Alama 24:7–16

Mai na Veisorovaki i Jisu Karisito, sa rawa ni da vosoti ke(spacing)da veivutuni. (P.4 in Galley, 1st subheading - File 26 in Trados)

• Kevaka o sa vakauqeti me veivosakitaki ena kalasi na veivutuni, na kedra itukutuku na Anitai-Nifai-Liai ena Alama 24 e sa dua na ivakaraitaki veivakauqeti me taurivaki. Mo lesia vei ira yadua na lewe ni kalasi e dua na tikina me ra wilika mai na Alama 24:7–16 ka kerei ira mera vola ena vava ni volavola e dua na ka era sa vulica mai na tikina me baleta na veivutuni. E rawa ni ra qai vaqara na ivolanikalou oqo me ra raica kina na ikuri ni raikiloma eso me baleta na veivutuni: Aisea 53:5–6; 2 Nifai 2:6–8; kei na Mosaia 5:2. (P.4 in Galley, 3rd para., 6th line - File 26 in Trados)

Alama 24:13–15; 26; 29

Na kosipeli e kauta mai na reki.

• Ena Alama 23–29, na vosa “reki” e basika vaka 24, me yaco kina na veiwase oqo me dua na vanua vinaka me vulici na kena vakavu reki—na bulataki ni kosipeli—kei na kena veiwasei. O rawa ni wasea vakailawalawa na lewe ni kalasi ka kerei ira na ilawalawa yadua me ra railesuva eso na tikina oqo, ka vakasaqara na cava na vuna e reki kina o Amoni, ratou na luvei Mosaia tagane, kei Alama: Alama 24:13–15; 26:12–22; kei na 29: 1–17. Era rawa ni vola na lewe ni kalasi ena vava ni volavola na veika era sa kunea. Na cava eda vulica mai na veitikina oqo ena sala e vakavu reki kina vei keda na kosipeli?

• E vakatavulica o Peresitedi Russell M. Nelson: “Ni vakanamata na noda bula ki na ituvatuva ni veivakabulai ni Kalou … kei Jisu Karisito kei na Nona kosipeli, eda na rawa ni vakila na reki veitalia na cava e yaco tiko—se sega ni yaco tiko—ena noda bula. Na reki e yaco mai Vua vakakina ena Vukuna. Sai Koya na ivurevure ni reki kecega” (“Reki kei na Bulabula Vakayalo,” Ensign se Liaona, Nove. 2016, 82). E rawa ni ra wasea na lewe ni kalasi na veika era sa sotava ka sa vukei ira ni kila vakamatata na dina ni vosa nei Peresitedi Nelson.

• E rau kune reki vakalevu o Alama kei Amoni ena wasei ni kosipeli. E rawa ni o sureti ira na lewe ni kalasi mera raica na veitikina ena Alama 26 kei na 29 ka rawa ni vakauqeta e dua na tamata gone me laki kaulotu—se veivakauqeti vua e dua me wasea na kosipeli vei ira tale eso. Nanuma mo vakarautaka e vica na miniti vei ira na lewe ni kalasi me ra tuva e dua na ka e rawa ni ra cakava mera wasea kina na kosipeli. Sureti ira me ra cakava na nodra tuvatuva ka, ena kalasi emuri e rawa ni o vakauqeti ira me ra veivosakitaka na nodra sasaga.

• Ni vukei ira na tani o Alama mera veivutuni, e a vakananumi ena loloma ni Kalou (raica na Alama 29: 10–13). E rairai o rawa ni solia vei ira na lewe ni kalasi e vica na gauna mera vulica na veitikina oqo ka vola na veika a nanuma o Alama. Na cava e vakananumi keda ena nona vinaka na Kalou? Eda sa raica vakacava na vinaka ni Kalou ena noda bula?

Alama 26–27

E rawa ni da iyaya ni cakacaka ena liga ni Kalou.

• Me vukea na lewe ni kalasi me vakadikeva na cava e kena ibalebale me da “iyaya ni cakacaka ena liga ni Kalou” (Alama 26:3), o na vakaraitaka na veimataqali iyaya ni vakatagi se na iyaya ni cakacaka. E rawa talega mo sureta na lewe ni kalasi me ra kauta mai eso na iyaya ni cakacaka ka ra dau vakayagataka. Era yaga vakalevu vakacava na iyaya ni cakacaka oqo? Eda vakataka vakacava na iyaya ni cakacaka ena cakacaka ni Kalou? O rawa ni sureti ira na lewe ni kalasi mera kunea na sala cava e ratou iyaya ni cakacaka kina o Amoni kei ira na nona itokani daukaulotu ena liga ni Kalou (raica, me ivakaraitaki, Alama 26:1–5, 11–12). Na raikiloma cava eda rawata mai na Vunau kei na Veiyalayalati 4 me baleta na iyaya ni cakacaka ena Ligana? O ira na lewe ni kalasi e rawa talega ni ra wasea na nodra vakila na reki e lako mai ni ra sa iyaya tiko ni cakacaka ena liga ni Kalou.

Vakayaloqaqataka na Vuli e Vale

E vuqa na vakasama lasu ka liutaki ira vakatani na luve ni Kalou nikua era matau talega ena gauna nei Alama. Tukuna vei ira na lewe ni kalasi ni ena Alama 30–31 era na raica na sala a sauma kina o Alama kei ira tale eso na veivakavuvuli lasu oqo.

iKuri ni iVurevure

Saumaki vua na Turaga

E a vakatavulica o Elder David A. Bednar:

“Na usutu ni kosipeli i Jisu Karisito sa okata e dua na veisau vakayavutaki ka tudei ena noda bula ka na rawa ni yaco ena nona Veisorovaki na iVakabula. Na saumaki dina ena kauta mai vua e dua na veisau ni vakabauta, yalo, kei na bula me muria na loma ni Kalou (raica na Cakacaka 3:19; 3 Nephi 9:20) ka oka kina na yalayala tugani me tisaipeli i Karisito.”

Ni cavuqaqataka oti na Alama 23:6–8, a tomana ni vakamacalataka o Elder Bednar e:

“Rua na ulutaga lelevu e tiko ena veitikina oqo: (1) na kilai ni veika dina, ka na vakadewataki me ivakadinadina, kei na (2) saumaki vua na Turaga, kau sa kila tu me saumaki kivua na iVakabula kei na Nona kosipeli. Eda raica ni rau semati vata na ivakadinadina kei na saumaki vua na Turaga ena kauta mai na tudei kei na gumatua ka na veimaroroi vakayalo.

“Era sega ni qai lutu laivi ka ra sa vakasuka na ‘nodra iyaragi ni talaidredre, ka ra sa sega tale ni qai vorata tiko na Kalou.’ Me biu laivi na veika vakamareqeti ni “iyaragi ni talaidredre” me vaka na kocokoco, dokadoka, kei na vakaduiduile, ena gadrevi vakalevu sara kina na vakabauta kei na kilaka. Na yalodina, yalomalumalumu, veivutuni, kei na talairawarawa e liutaka na kena biu laivi na iyaragi ni talaidredre. E se tiko beka ga vei kedaru na iyaragi ni talaidredre ka tarovi kedaru tiko mai na saumaki dina vua na Turaga? Ke vakakina, sa dodonu me daru sa veivutuni sara ga oqo.

“Nanuma tiko ga ni ra a sega ni saumaki na Leimanaiti vei ira na daukaulotu ka ra vakavulici ira se ki na parokaramu totoka ni Lotu. Era sega ni saumaki ki na nodra ivakarau ni bula na iliuliu se ki na maroroi ni itovo se nodra ivakarau na nodra qase. Era sa saumaki vua na Turaga—vei koya na iVakabula kei na Nona itutu vakalou kei na vunau — ia era sega ni qai lutu laivi ” (“Saumaki Vua na Turaga,” Ensign se Liaona, Nove. 2012, 107–9).

Vakatorocaketaki Noda Veivakavulici

Vakasaqara na veidusimaki mai vei ira na nomuni iliuliu. “O ira na nomuni iliuliu vaka matabete kei na veimataisoqosoqo era gadreva tu mera vukei iko mo rawaka. Kerea na nodra veivakasalataki ni ko tovolea mo vakavinakataka na itavi vaka qasenivuli ka tugana voli na nodra gagadre o vakavulici ira tiko” (Veivakavulici ena iVakarau ni iVakabula,5).