sorenikau ena liga ni gone

13–19 ni Jiulai

Alama 32–35

“Tea na Vosa Oqo e Lomamuni”

Se cava ga na levu ni gauna o sa wilika kina na Alama 32–35, mo ni wilika tale ni ko ni vakavakarau mo ni veivakavulici. Mo doladola tu ki na raikiloma vovou mai vua na Yalotabu.

Vola na Veika o Uqeti Kina

ivakatakilakila ni veiwasei

Sureta na Veiwasei

Me vukei ira na lewe ni kalasi mera wasea na veika era sa vulica mai na kena wiliki na Alama 32–35 mai vale, ko rawa ni solia vei ira e vica na miniti me ra railesuva kina na veiwase oqo ka vola ena vava ni volavola na ikau kei na ulutaga era raica. Me veivosakitaka na kalasi, na cava era vakaibalebale kina na ikau kei na ulutaga eso oqo.

ivakatakilakila ni veivakavulici

Vakavulica na iVunau

Alama 32:1–16

E rawa ni da digitaka meda yalomalumalumu.

• Me liutaka e dua na veivosaki me baleta na yalomalumalumu me vaka e vakatavuvulitaka na Alama 32:1–16, sa rawa mo tekivu ni o sureti ira na lewe ni kalasi me tukuna na ka sotavi ka rawa ni yalomalumalumu kina e dua na tamata (Alama 32:2–5 e solia e dua na kena ivakaraitaki). Eso na lewe ni kalasi era na yalorawarawa beka me ra wasea na veika era a sotava ena vulici ni yalomalua. E rawa vakacava ni dua na veivakalougatataki na “nodra mai vakayalomalumalumutaki” (Alama 32:12.)? Na itukutuku me baleta na yalomalumalumu ena “iKuri ni iVurevure” ena rawa ni veivuke me susuga e dua na veitalanoa. O rawa talega ni wilika na Vunau kei na Veiyalayalati 112:10 se lagata e dua na serenilotu ni yalomalumalumu, me vaka na “Mo Yalo Malumalumu” (Serenilotu, naba 72), vaka kalasi.

Alama 32:17–43; 33

Eda cakacakataka na vakabauti Jisu Karisito ena kena teivaki ka bucina cake na nona vosa ena yaloda.

• Ena so na gauna eda nanuma ni sokalou walega e veika eda cakava ena veivanua me vaka ena dua na vale ni lotu (raica na Alama 32: 5, 9, 11), ia na ivakamacala i Alama baleta na sokalou e rabailevu sara. Me ivakaraitaki, e a vakavulica ni vakatuburi kei na bulataki ni vakabauti Jisu Karisito e dua na iwalewale ni sokalou e rawa ni dau yaco ena taudaku ni dua na ituvatuva matau. Me vukea na nomu kalasi me ra kila na ivakavuvuli oqo, e rawa ni o droinitaka e dua na iyaloyalo ni dua na sorenikau kei na dua na vunikau ena vava ni volavola ka veitalanoataka na veitaro oqo: Na cava e matataka na sorenikau (raica na Alama 32:28; 33:22–23). Eda rawa ni tea vakacava na sorenikau—se ivakadinadina i Jisu Karisito kei na nona Veisorovaki—e lomada ka vakania vakavinaka? (raica Alama 32:36–43; 33). Na veika sotavi cava e rawa ni da wasea baleta na noda sasaga me da muria na iVakabula e sa kauta mai na vua vinaka? E veivakauqeti vakacava na ivakavuvuli nei Alama ena sala me da sokalou kina vua na Tamada Vakalomalagi kei Jisu Karisito?

• Na “vakatovotovo” a vakamacalataka o Alama me vukei ira na Soramaiti ni tara cake na vakabauti Jisu Karisito e rawa talega ni vukei keda meda vulica na dina ni so tale na ivakavuvuli ni kosipeli. Me vukei ira na kalasi mera kila vakavinaka na vakatovotovo nei Alama, o ni rawa ni veitalanoataka na cava na vakatovotovo. E tiko beka e dua ena kalasi ka sa cakava oti e dua na vakatovotovo e liu ka rawa ni veivuke ena ivakamacala oqo. Na cava na inaki ni sakaramede? E rawa vakacava ni dua na vakatovotovo e tautauvata kei na ka a sureti ira kina na tamata o Alama mera cakava ena Alama 32:26–36? E rawa beka ni ra wasea na lewe ni kalasi na sala eso ka ra sa “vakatovotovotaka” kina na vosa ni Kalou. Era sa yaco vakacava ni kila ni sa vinaka “na vosa [ni Kalou]”? (Alma 32: 28).

• Na cava e rawa ni kaya ko Alama vua e dua e vinakata me rawata se vakaqaqacotaka e dua na ivakadinadina i Jisu Karisito? Mo vakadikeva na taro oqo, o rawa ni wasea na kalasi ki na rua na ilawalawa. Sa rawa ni wilika e dua na ilawalawa na Alama 32:26–36 me kila kina na ka e rawa ni kaya o Alama vua e dua ka tovolea tiko me rawata e dua na ivakadinadina, ka rawa ni wilika na ikarua ni ilawalawa na Alama 32:36–43 me laurai kina na cava e rawa ni kaya vua e dua sa malumalumu nona ivakadinadina. Ia e dua na tamata mai na ilawalawa yadua me veivukevuke ni matataki Alama ka vakatasuasuataka na sala mo vukea kina e dua me rawata se vaqaqacotaka e dua na ivakadinadina.

Alama 31:13–23; 33:2–11; 34:17–29

E rawa ni da so Kalou ena masu, ena dua ga na gauna kei na vanua cava ga.

• Sa rawa mo vukea na kalasi me veidutaitaka na ivakavuvuli nei Alama kei Amuleki me baleta na masumasu kei na sokalou vata kei na nodra vakasama lasu eso na Soramaiti. Sa rawa mera railesuva na lewe ni kalasi na Alama 31:13–23 ka vola ena vava ni volavola na veika era vakabauta ko ira na Soramaiti me baleta na masumasu kei na sokalou. Ka rawa mera qai vakaraica na dina eso ena Alama 33:2–11 kei na 34:17–29 ka veibasai kei na vakabauta eso oqori. Na cava e vakatavulica vei keda na veitikina oqo me baleta na sala eda rawa ni vakavinakataka kina na noda masu kei na noda sokalou?

• E rawa ni o vakauqeta e dua na veitalanoa me baleta na masu ena nomu vola na vosa eso me vaka na O cei? Na cava? Ena gauna cava? Evei? Na cava na vuna? kei na E vakacava? ena vava ni volavola. E rawa ni vakasaqara na lewe ni kalasi ena Alama 33:2–11 kei 34:17–29 mera kunea na isau ni taro eso oqo me baleta na masu. Me ivakaraitaki, era rawa ni sauma na taro: Evei e rawa ni da masu kina? Na cava e rawa ni da masulaka? Era rawa talega ni kunea na isaunitaro ena qaqa ni dua na sere me baleta na masu, me vaka “Bera Ni Ko Gole Yani?” se “Talei Niu Masu” (Serenilotu, naba 78, 80). Eda na vakatorocaketaka vakacava na noda masu?

Alama 34:9–17

Na Veisorovaki ni noda iVakabula e sa “tawayalani ka tawamudu.”

• E vakayagataka vakavica o Amuleki na vosa “tawayalani” kei na “tawamudu” me vakamacalataka na solibula ea cakava o Jisu Karisito me mai sorovaka kina na noda ivalavala ca. O rawa ni sureti ira na lewe ni kalasi me ra kunea na veivosa oqo ena Alama 34:9–14 ka qai vakaraica ena dua na ivolanivosa. Ena sala cava e tawayalani ka tawamudu kina na solibula ni iVakabula? (raica na Iperiu 10:10; 2 Nifai 9:21; Mosaia 3:13). Me vaka ena Alama 34:15–17, na cava me da cakava meda ciqoma kina na veivakalougatataki ni isoro ni iVakabula? Na cava na kena ibalebale mo “vakatovotovotaka na nomu vakabauta ki na veivutuni”? (Alma 34:17).

Alama 34:32–35

“Kakua ni lokuyarataka na siga ni nomuni veivutuni.”

• Na vosa vakatautauvata me vaka oqo e rawa ni vukei ira na lewe ni kalasi mera vakasamataka na veika rerevaki ni da lokuyarataka na noda veivutuni: sureti ira mera raitayaloyalotaka ni ra sa ciqoma na veisureti me ra vakaitavi ena dua na soqo e gadrevi kina na vei yabaki ni vuli kei na vakavakarau, me vaka e dua na veisivisivi ni Olimipiki se dua na vakatasuasua vakaivakatagi (digitaka e dua na ka e vakaibalebale ki vei ira na nomu kalasi), ia na veika sa yaco oqo ena vakayacori ni mataka. Veitalanoataka vata kei na kalasi na cava na vuna era na rairai sega ni rawa-ka kina ena soqo kevaka sara mada ga era vakayagataka na vo ni siga nikua me vakavakarau kina. E semati vakacava na ivakaraitaki oqo ki na ivakaro ni qaqarauni nei Amuleki ena Alama 34:32–35? Na cava na vuna e rerevaki kina meda vakadaroya na noda sasaga me da veivutuni ka veisau? Sureti ira na lewe ni kalasi mera tugana na veika era rawa ni cakava mera “vakarautaki ira ki na bula tawamudu” (tikina 33) ka caka ituvatuva me ra cakava sara vakatotolo.

ivakatakilakila ni vuli

Vakauqeta na Vuli e Vale

Me vakauqeti ira na lewe ni kalasi me ra wilika na Alama 36–38 ena macawa mai oqo, sa rawa ni o vakaraitaka ni a “rarawa me baleta na nodra caka ca na nona tamata,” ko Alama ka soqoni ira na luvena tagane ka vakavulica vei ira “me baleta na veika sa dodonu” (Alama 35:15–16). Na wase e vica ka tarava oqo ni Alama e solia e dua na itukutuku ni veika sa vakauqeti kina ko Alama me vakavulici ira na luvena tagane.

ivakatakilakila ni ivurevure

iKuri ni iVurevure

Na cava na kena ibalebale meda yalomalumalumu?

“Na yalomalumalumu sai koya na vakilai vinaka sara ni nomu vakararavi vua na Turaga—na kena kilai vakamatata ni ko sa gadreva e veigauna na Nona veitokoni. … E sega ni ivakatakilakila ni malumalumu, ririko, se rere; e sa dua na ivakaraitaki ni o kila na vanua e koto kina na nomu kaukauwa dina” (Tudei ena Vakabauta [2004],86).

E a vakamacalataka o Elder Quentin L. Cook: “Ni da vakasamataka sara ga na Kalou na Tamada kei na Karisito, na Luvena, o cei o Rau, kei na veika Erau sa vakayacora ena vukuda, ena vakasinaiti keda ena vakarokoroko, qoroqoro, na vakavinavinaka kei na yalomalumalumu. … Na yalomalumalumu talega e oka kina na vakavinavinaka me baleta na noda veivakalougatataki kei na veivuke vakalou sega ni wiliki rawa. Na yalomalumalumu e sega ni so na rawaka tawakilai se na vorati sara mada ga ni bolebole lelevu eso. Sai koya na ivakatakilakila ni veivaqaqacotaki vakayalo. Sai koya na veivakadeitaki malua ni noda rawa ni vakararavi vua na Turaga ena veisiga kei na veiaua, qaravi Koya, ka rawata na Nona inaki” (“Na Tawamudu ena Veisiga,” Ensign se Liaona, Nove. 2017, 52, 54).

iVolanikalou baleta na vakabauta:

• 1 Korinica 12:9

• Iperiu 11:1–6

• Jemesa 2:14–18

• Ica 12:6

• Moronai 7:33; 10:11

• Vunau kei na Veiyalayalati 63:9–11.

Vakatorocaketaki Noda Veivakavulici

Vakanamata ki na ivolanikalou. E dina ni vuqa tu na ikuri ni ivurevure ka rawa ni vakavutuniyautaka e dua na veitalanoa, nanuma tiko ni sa ivurevure ni ivunau na ivolanikalou. Vukei ira na lewenilotu mera kunea na dina ena ivolanikalou. (Raica na Veivakavulici ena iVakarau ni iVakabula,21.)