masu tiko e dua na turaga

iTaba mai vei Joshua Dennis

20–26 ni Jiulai

Alama 36–38

“Mo Rai Yani Vua na Kalou Mo Bula Kina”

Ni ko vakavakarau mo veivakavulici, nanuma tiko ni o ira na lewe ni kalasi era sa rairai sotava oti e dua na ka vakaibalebale ena Alama 36–38. Na cava o rawa ni cakava mo tara cake kina na veika a sotavi oqori?

Vola na Veika o Uqeti Kina

ivakatakilakila ni veiwasei

Sureta na Veiwasei

E dua na sala me vakayaloqaqataki ira na lewe ni kalasi me ra wasea na veika era sa vulica mai na ivolanikalou oya me wase na kalasi ki na tolu na ilawalawa, ka lesia ki na ilawalawa yadua e dua na wase mai na Alama 36–38. Sureti ira na ilawalawa yadua me ra raica ka wasea e dua na tikina veivakauqeti mai na nodra wase.

ivakatakilakila ni veivakavulici

Vakavulica na iVunau

Alama 36

Eda sa rawa ni sucu va-Kalou ni da yalomalumalumu ka veivutuni tu.

• Eso na lewe ni nomu kalasi era na vakataroga beka na cava na vuna era sega kina ni sotava e dua na veisau levu me vakataki Alama. Sa rawa ni vukei ira na nomu wasea na veika e vakavulica o Elder David A. Bednar: “Ki na vuqa vei keda, na saumaki e sa dua na ivalavala tudei ka sega ni dua na ka vakavudua e yaco mai na ka e vakilai vakaukauwa se vakasauri” (“Saumaki Vua na Turaga,” Ensign se Liaona, Nove. 2012, 107–8). E dina ni so na ka me baleta na saumaki nei Alama e sega ni tu duadua, na veika e a sotava e vakavulica na ivakavuvuli kece eda gadreva meda vakayacora ki na noda dui saumaki tikoga. Sa rawa mo sureti ira na lewe ni kalasi me ra vakasaqaqara ena Alama 36 mera raica na veivakavuvuli oqo ka tuvai ira ena vava ni volavola. Na cava soti tale e sa vukei keda meda saumaki vakalevu cake ki na kosipeli i Jisu Karisito?

• A vakayagataka na malanivosa “sucu va-Kalou” o Alama me vakamacalataka na nona saumaki. Me vukei ira na lewe ni kalasi mera kila vakavinaka na ivakavuvuli oqo, ko na rawa ni sureti ira mera wilika na tikina oqo yadudua se yarurua, ka vakasaqara na veika e vakaibalebaletaka na sucu va-Kalou: 1 Joni 4:7; Mosaia 5:7; 27:25–26; kei na Alama 5:14; 22:15. Kerei ira na lewe ni kalasi me ra wasea na veika era sa vulica. Sa qai rawa me ra vakasaqara na Alama 36, ka raica na isau ni taro oqo: Na cava era vakila ka vakarautaka na tamata ni ra sa sucu va-Kalou? Me vukei ira na lewe ni kalasi ni tugana na ivakarau ni nodra sucu voli va-Kalou, sa rawa mo wasea na itukutuku nei Peresitedi Ezra Taft Benson kunei ena “iKuri ni iVurevure.”

Alama 37

Era sa taqomaki na ivolanikalou “me baleta na inaki vuku.”

• Ena rairai vukei ira na lewe ni kalasi na vulici ni vosa i Alama ni soli ivolatukutuku tabu tu kivua na luvena o Ilamani me ra wasea kina na veika era sa vakila ena kaukauwa ni ivolanikalou ena nodra bula. Vakayaloqaqataki ira mera railesuva na Alama 37 ka raica na itukutuku eso a solia o Alama kivei Ilamani me baleta na ivolanikalou (raica vakabibi na tikina e 1–19 kei na 43–47). Eda na vakaraitaka vakacava ni sa ka tabu vei keda na ivolanikalou? E rawa vakacava vei keda, me vakataki Alama, meda vakavulici ira na noda daulomani me ra “maroroya ka vakatabuya na veika kece oqo”? (Alma 37:2). E “vakaraitaka tu vakacava na kaukauwa ni [Kalou]” kivei keda na ivolanikalou? (Alma 37:14).

• E dua na sala me vulici me baleta na kalougata ni kena tiko na ivolanikalou o ya me dikevi kina na ka e a tukuna o Alama ena Alama 37 me baleta na ivolatukutuku tabu kei na veika tale eso a vakanuinuitaka vei Ilamani. O rawa ni cakava e dua na lisi ni veika tabu eso ena vava ni volavola: na peleti i Nifai kei na peleti parasa (Alama 37:2–20), na peleti e ruasagavulu kava nei Ica kei na ivakavakadewa (Alama 37:21–37), kei na Liaona (Alama 37:38–47). Era rawa ni wilika na lewe ni kalasi na veitikina oqo me ra vulica kina na cava a vakavulica o Alama me baleta na veiyaya oqori. Na sala cava soti e rawa ni vakalevutaka kina na noda vakanananu na ivolanikalou? (raica na Alama 37:8). Na cava e rawa ni da vulica mai na vosa nei Alama me baleta na kalougata ni kena tiko na ivolanikalou ena noda bula nikua?

  wili ivolanikalou tiko na marama

  Sa vakavulici keda na ivolanikalou ena ivakarau ni muria na Kalou.

Alama 37:6–7, 41–42

“Ena dau rawa na ka lelevu mai na veika lalai ka rawarawa.”

• Me vakavulici na bibi ni “veika lalai ka rawarawa” ena cakacaka ni Kalou, a solia o Alama e rua na ivakaraitaki: na ivolanikalou, kei na Liaona (raica Alama 37:6–7, 41–42; raica talega na 1 Nifai 17:41). Ni oti na nodra railesuva na ivakaraitaki eso oqo, de rawa mera wasea na lewe ni kalasi na ivakaraitaki mai na nodra bula ni veika lalai ka rawarawa ena cakacaka ni Kalou. Sa rawa beka mo veitaratara taumada kei na dua se rua na lewe ni kalasi ka kerea me ra kauta mai ki na kalasi e dua na iyaya lailai ka sa kauta mai na veika cecere ki na nodra bula. Sa rawa mo wasea na itukutuku nei Peresitedi Dallin H. Oaks ena “iKuri ni iVurevure.” Me vukei ira na lewe ni kalasi mera vakaitaukeitaka na ivakavuvuli oqo, sa rawa mo taroga na taro eso oqo: Na cava na vuna eda dau lutu kina mai na vakayacori ni veika lalai ka rawarawa? Eda na vakauqeti keda vakacava kei na noda matavuvale meda vorata na malele oqo?

Alama 37:38–47

Sa rawa ni tuberi keda ena veisiga na vosa i Karisito.

• Na vakatautauvatataki ni vosa ni Kalou ki na Liaona ena rawa ni vakauqeti ira na lewe ni kalasi me ra gugumatua cake ka vakawasomataka na wiliki ni ivolanikalou. Me tubera e dua na veitalanoa me baleta na ka oqo, e rawa mo sureti ira na lewe ni kalasi me ra wilika na Alama 37:38–47 mera veisasa, ka vakasaqara na veika e tautauvata kina na Liaona kei na vosa ni Kalou. O rawa ni bolei ira me ra kunea e dua na ka e tautauvata ena veitikina yadua. Ko qai rawa ni vola na naba ni veitikina yadua ena vava ni volavola ka kerei ira na lewe ni kalasi me ra vola tikiva na naba na veika e tautauvata era raica. Na cava e vakatura na veivakatauvatani oqo me baleta na ivakarau ni noda vulica na ivolanikalou?

Alama 38

Na wasei ni noda ivakadinadina baleti Jisu Karisito e rawa ni vakaukauwataki ira eda lomana.

• Na vosa nei Alama vei Sipiloni na luvena tagane e solia e dua na ivakaraitaki vinaka ena ivakarau mera vaqaqacotaki ka vakayaloqaqataki kina o ira eda lomana ena bulataki ni kosipeli. Me ra qai wilika na lewe ni kalasi na wase oqo ka vakatakila na sala a vakaukauwataki Sipiloni kina o Alama. Alma 38 e lekaleka—e rawa sara mada ga mo lewa me wiliki vakalasi. Ka rawa ni qai veiwaseitaka na lewe ni kalasi na veitikina era raica ni vakaibalebale se solia vei ira na vakasama ni kena vaqaqacotaki na nodra dui lewe ni matavuvale kei na itokani.

ivakatakilakila ni vuli

Vakauqeta na Vuli e Vale

Era sa bau vakanananutaka vakadua na lewe ni kalasi se ra na vakasalataka vakacava e dua na daulomani ka cakava e dua na cala bibi? Vakamacalataka ni ra na kunea na raiyawa veivukei ena Alama 39–42.

ivakatakilakila ni ivurevure

iKuri ni iVurevure

Na saumaki sa vaka e dua na sucu vou.

E vakatavulica o Peresitedi Ezra Taft Benson: “Ni da sa lako curuma na veisau levu oqo, ka na yaco walega ena vakabauti Jisu Karisito kei na cakacaka ni Yalotabu vei keda, sa vaka sara ga eda sa yaco me dua na tamata vou. Sa na vaka sara ga e dua na sucu vou vakayago. E udolu vei kemuni sa sotava oti na veisau vakaoqo. Ko ni sa biuta laivi na bula ni ivalavala ca, e so vei ira sa ka levu sara, ka sa liviraki na nomuni bula ena dra i Karisito, ka sa yaco mo ni savasava. Ko sa sega ni vinakata ni lesuva tale na bula makawa. Ko sa qai tamata vou vakaidina. Oqo na ka e vakaibalebaletaki ena veisau ni yalo” (“A Veisau Levu ni Yalo,” Ensign, Oko. 1989, 4).

Na veika lalai ka rawarawa

E vakavulica o Peresitedi Dallin H. Oaks:

“Au a vakananumi ena kaukauwa ni veika lalai ka rawarawa ena loma ni dua na gauna mai na dua na ka au a raica ena dua na taubale vakamataka. … Na tutunisala simede vavaku ka kaukauwa [esa] kakaca tiko. Sa ikoya beka oqo na revurevu ni so na igu levu ka kaukauwa mai rukuna? E sega, na kakaca oqo e vu mai na tubu malua, lailai ni dua vei ira na wakanikau ka kadre tiko mai na vunikau ka tokatikiva. …

“E vakakina na revurevu kaukauwa ena loma ni dua na gauna ni veika lalai ka rawarawa eda vakatavulici kina ena ivolanikalou kei ira na parofita bula. Vakasamataka na vuli ivolanikalou ka da sa vakavulici meda vakasotara vata ki na noda bula e veisiga. Se vakasamataka na vei masu yadua kei na masu tekiduru vakavuvale ka sa itovo tudei ni Yalododonu Edaidai ka yalodina. … Dina ga ni veitovo yadua oqori ena vaka me lalai ka rawarawa, ena loma ni dua na gauna era sa yaco me veilaveti ka veivakatuburi kaukauwa vakayalo. E dau yaco oqo baleta ni veika lalai ka rawarawa yadua oqori e sureta na veitokani ni Yalo Tabu, na Daunivakadinadina ka vakararamataki keda ka dusimaki keda ki na dina” (“Na Veika Lailai ka Rawarawa,” Ensign se Liaona, Me 2018, 90).

Vakatorocaketaki Noda Veivakavulici

Sureti ira na vuli mera veivakavulici vakai ira. Ni ra wase ivakadinadina se wasea na nodra raiyawa na lewe ni kalasi, era na rairai dolele yani se vakauqeta e dua tale na lewe ni kalasi ena sala o na rairai sega ni cakava vakakina. (Raica na Veivakavulici ena iVakarau ni iVakabula30).