“6–12 ni Julai. Alama 30–31: ‘Na Mana ni Vosa ni Kalou,’” Lako Mai, Mo Muri Au—Baleta na Matawilivola ni Sigatabu: iVola i Momani 2020 (2020)

“6–12 ni Julai. Alama 30–31,” Lako Mai, Mo Muri Au—Baleta na Matawilivola ni Siga Tabu: 2020

Na Veika Kece sa Tukuna ni Dua Tiko na Kalou (Alama kei Korio, mai vei Walter Rane

6–12 ni Julai

Alama 30–31

“Na Mana ni vosa ni Kalou”

Ni wiliki oti na Alama 30–31 ka vakasaqarai na veivakauqeti ni nomu bula vakai iko, vakarorogo ki na veivakauqeti me baleta na itukutuku cava ena vakalougatataki ira na lewe ni nomu kalasi.

Vola na Veika o Uqeti Kina

Sureta na Veiwasei

Kevaka o vakila ni ra tu vasuka na lewe ni kalasi mera veiwasei, e rawa ni o solia vei ira e vica na miniti mera railesuva na Alama 30–31 se e dua na itukutuku era sa cakava ni ra vulica tiko e vale ena macawa oqo. Ka ra qai wasea vata kei na dua na itokani se na kalasi e dua na itukutuku kaukauwa era kunea.

Vakavulica na iVunau

Alama 30:6–31

Na meca e saga me dabui keda ena ivakavuvuli lasu.

Ni o vakasamataka na gagadre ni nomu kalasi, ena vukei ira beka mera kila vakamatata na duidui ni dina ni kosipeli kei na ivadi nei Setani kevaka o vakayagataka e dua na lesoni ivakaraitaki? Ke vakakina, mo vakaraitaka vei ira na ivakatayaloyalo eso, me vakataka na ilavo ni qito se kakana ni vakatatalo, vata kei na ilavo dina se kakana dina. Eda na kila vakacava ni ra sega ni ka dina na veika lasutaki? Era rawa ni qai dusia na kalasi na ivakavuvuli lasu nei Korio ena Alama 30:6–31. Na cava e rawa ni veibacani baleta na vei ivakavuvuli oqo? Na cava e solia vei keda na dina ni kosipeli era sega ni rawa ni solia na vakatayaloyalo nei Setani? Sureti ira na lewe ni kalasi mera wasea na cava a vukei Alama me raica vakamatata na ivakavuvuli dina mai na ivunau lasu (raica na Alama 30:32–54). Na veisala cava tale era sa kunea na lewe ni kalasi ni veivuke?
Me vukei ira na lewe ni kalasi ni vulica na sala mera taqomaki ira kina mai na revurevu ni ivunau vakailasu, sa rawa ni o railesuva na ivakamacala ni dua na meca i Karisito ena ituvatuva ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Na veitikina cava ena Alama 30:6–31 e vakaraitaka ni sa rauti Korio na ivakamacala oqo? Na nona ivakavuvuli cava so e sa tautauvata kei na ivakavuvuli vakailasu ena gauna edai? (raica na Alama 30:12–18, 23–28). E rawa vakacava ni da levea na noda lawakitaki mai vei ira na ivakavuvuli oqo?

Alama 30:39–46

Na ka kecega sa vakadinadinataka na Kalou.

Baleta ni da bula tiko ena dua na vuravura e tautauvata ki na gauna i Alama, ka a vakavulica kina eso na tamata ni sa sega na Kalou, na ivakadinadina i Alama ena Alama 30:39–44 e rawa ni veivuke vei ira na lewe ni nomu kalasi. Sa rawa mo sureti ira me ra wilika na veitikina oqo ka vola ena vava ni volavola na dina kei na ivakadinadina a solia o Alama ka vakadinadinataka ni tiko e dua na Kalou. Na ivakadinadina cava tale e tiko vei keda ni bula tiko na Kalou? Me tiki ni veivosaki, sa rawa mo wasea na itukutuku nei Peresitedi M. Russell Ballard ena “iKuri ni iVurevure.” E rawa talega mo sureta e dua me vakarautaki koya me lagata e dua na serenilotu me baleta na nona vinaka na Kalou, me vaka na “Noqu Kalou Au Kurabui ka Galu” (Serenilotu, naba 44), se sa rawa mo ni lagata vata na serenilotu.
Me vaka e tukuna ko Alama vei Korio, sa kila ko koya ni ko Korio sa “biuta tani na Yalo ni Kalou, ka sa sega na nona tikina vei [koya]” (Alama 30:42). Vakasamataka mo kerei ira na lewe ni kalasi me ra vakasaqaqara na Alama 30:39–46, me kunei eso tale na vosadusidusi ki na Yalo Tabu. Na itavi cava e cakava na Yalo Tabu me vakadinadinataka kina vei keda ni bula dina na Kalou kei Jisu Karisito? Eda na rawa vakacava ni vukei ira ka tu na nodra vakatitiqa kei na taro eso ni vaqara dina mai vua na Yalo Tabu?

Vakatarogi Alama Tu o Korio, mai vei Robert T. Barrett

Alama 31

Na vosa ni Kalou e tu kina na kaukauwa me vueti ira na tamata ki na ivalavala dodonu.

E tiko beka ena lewe ni nomu kalasi eso ka rawa ni wasea na ka e sa sotava ni a vukei koya “na mana ni vosa ni Kalou” (Alama 31: 5) se dua tale era kila ni vakayaco veisau ki na nodra bula? Sa rawa mo veitaratara taumada kei ira na lewe ni kalasi me ra na rawa ni vakavakarau ni wasea na veika era sa sotava. Vakayaloqaqataki ira me ra wasea na tikina mai na Alama 31 ka sema kei na veika era sa sotava. Sa rawa talega ni wasea na vo ni lewe ni kalasi na sala eso e sa mai “kaukauwa sara kina na vosa ni Kalou ki na [nodra] vakanananu” (Alama 31: 5). E rawa ni yaga vei ira na lewe ni kalasi na kena wiliki na ivolanikalou tale eso me ra vakadinadinataka na kaukauwa ni vosa ni Kalou (raica na “iKuri ni iVurevure” me baleta e vica na kena ivakaraitaki).
Ni ra vulica na lewe ni nomu kalasi na Alama 31 ena macawa oqo, e rawa ni ra vakauqeti mai na ivakaraitaki nei Alama ni masulaki ira tiko na Soramaiti. Navuca mo tarogi ira ena veika era sa vulica mai na wase ni ivola oqo me baleta na dodoliga yani vei ira na lewe ni matavuvale se itokani ka ra sa biuta na salatu ni kosipeli se voraki tiko ena nodra vakabauta. E rawa talega ni o kerei ira me ra vakasaqara vata na Alama 31 ka lisitaka ena vava ni volavola na veika era sa raica me baleti Alama ka sa vukei koya me vueti ira na Soramaiti. Eda na vakayagataka vakalevu cake vakacava na vosa ni Kalou ena noda sasaga ni vueti ira na tani? (Me baleta na ikuri ni vakasama, sa rawa mo wasea na qaqanivosa nei Elder Jeffrey R. Holland ena “iKuri ni iVurevure.”)
Na cava era kunea na lewe ni kalasi ena Alama 31:30–38 e rawa ni vukei ira era sa vakararawataki baleta na nodra ivalavala ca na so tale me vakataki Alama?

Vakauqeta na Vuli e Vale

Kerei ira na lewe ni kalasi na ivunau se ivakavuvuli ni kosipeli cava e rawa me ra vakavulica mera saqata kina na ka lasu e raica rawa vei ira na Soramu o Alama. Tukuna vei ira ena nodra wilika na Alama 32–35 era na raica rawa na sala a vakayagataka kina o Alama na vosa ni Kalou me vukei ira na Soramaiti ni raica na kena gadrevi na veisau.

iKuri ni iVurevure

Na ivolanikalou eso me baleta na kaukauwa ni vosa ni Kalou.

Na veika kece sa tukuna ni dua tiko na Kalou.

E vakavuvulitaka o Peresitedi M. Russell Ballard ni “ivakadinadina tawamudu” a solia o Alama me baleta na bula tiko ni Kalou e se “tikoga me vakadinadinataka vei keda nikua” (raica na Alama 30: 44):

“Era kaya na daunivuka ni ra saravi vuravura tu mai maliwalala na kena totoka vakasakiti kei na kena rairai bulabula tu. A vola na veika a sotava e maliwalala o Jake Gam na Seneta mai Amerika: ‘E sa dredre vei au meu vakamacalataka rawa na totoka ni vuravura. E sa dua na ka vakatubuicegu, veivakurabuitaki, ka vakayalo talega me saravi tu na vuravura mai maliwalala ni ko vuka voli me ruasagavulu-kalima na totolo ni gauna ni rorogo. Au rawa talega ni rai yani ki na vakaturubuto ni maliwalala ka raica e bilioni na kalokalo kei na vuravura sokomuni eso ka milioni vakacaca tu na yawa ni kedra yabaki-rama. E sa vakaitamera sara ga na vuravura me dredre kina ni kilai rawa. Ia au sa kila tu na liga ni Kalou ena veika kecega. Au sa vakilai koya ena vitu taucoko na siga ni noqu tiko e maliwalala. Au kila ni sa bulia na Kalou na vuravura oqo kei na lagilevu. … Au kila ni bula tiko na Kalou ka sa Dauniveibuli vei keda taucoko’ (ivola vei M. Russell Ballard, 3 ni Maji, 1988)” (“Na Loloma ni Kalou Me Baleti Ira na Luvena,” Ensign, Me 1988, 58).

Vakamamautaki ira tiko na tani ena vosa ni Kalou.

E vakavulica o Elder Jeffrey R. Holland:

“Eda sa susugi ira dina tiko beka na itabagone kei ira na lewenilotu vou ena sala era na tokoni kina ni basika mai na lomaocaoca ni bula oqo? Se da solia tiko vei ira e dua na mataqali kakana kamica vakalotu—ka lala tu ena kakana vakayalo? … Ena dua na vulai batabata kaukauwa ni vica na yabaki sa oti, a raica o Peresitedi Boyd K. Packer ni ra sa mate ena viakana e dua na iwiliwili vinaka ni dia ni sega na kedra ia e sinai tu na ketedra ena co. Ena nodra gadreva tu mera veivuke, era veivakani na veitabana ena ka tawayaga ni sa gadrevi tu na veika maucokona E rarawataki ni ra vakani ira na dia ia era a sega ni vakamamautaki ira. …

“O Setani e sega ni vukimalua ena nona ivakavuvuli; na cava meda va ya kina? Se da vakasalataki ira tiko na luveda e vale se duri tu e matadra na vakarorogo e valenilotu, meda kakua sara ni cakava me dredre ni kilai na noda vakabauta. … Soli ivunau ka yavutaki mai na ivolanikalou. Vakatavulica na ivunau vakatakilai mai” (“A iVakavuvuli sa Lako Mai Vua na Kalou,” Ensign, May 1998, 26–27).

Vakatorocaketaki Noda Veivakavulici

Vukei ira na vuli mera kunea na dina vakataki ira. E dua na nomu itavi vaka-qasenivuli o ya mo dusimaki ira na nomu dauvuli me ra kunea na dina ena ivolanikalou. Ena rawa sara me ra kila vakamatata ka vakamareqeta na ivakavuvuli eso kevaka era raica rawa vakataki ira na veivakavuvuli oqo ka sega ni rogoca walega ni tukuna na qasenivuli.