Yalewa, Ko Sa Tagi Ena Vuku ni Cava? mai vei Mark R. Pugh

27 ni Jiulai –2 ni Okosita

Alama 39–42

“Na iTuvatuva Cecere ni Marau”

Na ivakavuvuli nei Alama ena Alama 39–42 sa vutuniyau vakaivunau ka vakamatatataka na dina bibi eso. Ni ko vulica na veiwase oqo, tugana na dina cava e rawa ni vakaibalebale vakalevu duadua ki na nomu kalasi kei na veika o rawa ni cakava me vukea na nodra kunea na veidina oqo.

Vola na Veika o Uqeti Kina

Sureta na Veiwasei

Me solia vei ira na lewe ni kalasi e dua na madigi me ra wasea na nodra nanuma kei na ^{raikiloma eso} me baleta na Alama 39–42, o rawa ni sureti ira me ra railesuva vakalekaleka na veiwase oqo ka raica e dua na ka sa tukuna ko Alama se cakava ka a vakauqeti ira. (P.34 in Galley, para 1, line 2 - File 26 in Trados)

Vakavulica na iVunau

Alama 39

Na ivalavala ca ni veidauci e sa ka vakasisila ena mata ni Turaga.

• Na cava e rawa ni da vulica mai na itukutuku ni a sotava o Korianitoni na ivalavala ca kei na veivutuni? E rawa beka ni ra wilika na lewe ni kalasi na Alama 39:1–14, eso me ra vaqara na cala cava ea cakava o Korianitoni, eso tale me vaqara na cava ea rawa ni muataki koya me ivalavala ca, ka so tale me vaqara na ivakasala ka solia vua ko Alama. Ni ra wasea tiko na veika era sa raica, e rawa ni ra veitalanoataka se rawa vakacava ni da levea na cakacala vakaoqo.

• Ni ra vakayaco ivalavala ca ni veidauci na tamata, e vakawasoma ni ra dau vakila na yalolailai se taqaya ka rawa ni vakila ni sa sega ni levu na kedra yaga. Na ivakavuvuli cava ena Alama 39–42 e vakauqeti ira na lewe ni kalasi me ra vakila na inuinui e veimuataki ki na veivutuni? Na wasei ni vosa nei Sister Joy D. Jones ena “iKuri ni iVurevure” ena rawa ni vukei ira na lewe ni kalasi me ra kila deivaki na duidui ni bula kilikili kei na keda yaga ena mata ni Kalou. (Raica talega na Lynn G. Robbins, “Me Yacova ni Vakavitusagavulu na vitu,” Ensign se Liaona, Me 2018, 21–23.)

• Me tiki ni nomuni veitalanoa, e rawa ni veivuke vei ira na lewe ni kalasi me ra veitalanoataka na ivakatagedegede ni Turaga me baleta na tiko savasava. Na nomuni veitalanoa e rawa ni veivuke cake ke vakanamata ki na ivakavuvuli ka sega ena dua na ituvatuva me caka se kua. Me ivakaraitaki, e rawa ni o sureta na lewe ni kalasi me ra raica na ivakavuvuli e a vakatavulica o Alama vei Korianitoni ena Alama 39. Me kena ikuri, sa rawa mera railesuva na “Savasava ni Veiyacovi” ena Me iSakisaki ni iTabagone vata kei na veitaro vakaoqo ena vakasama: “Kevaka mo na vakalekalekataka kece sara na ivakasala oqo ena dua na ivakavuvuli, na cava beka oya?” se “Na ivakavuvuli cava soti o raica eke ena vukea mo bulataka na lawa ni tiko savasava?” Era rawa talega ni railesuva na lewe ni kalasi na iwasewase oqo ena Me iSakisaki ni iTabagone, ka vaqara na veivakalougatataki ni kena bulataki na lawa ni tiko savasava kei na vua eso ni talaidredre ki na lawa oqo. E duidui vakacava na ivakavuvuli oqo mai na veika e vakavulica o vuravura? E tara vakacava na ivakavuvuli oqo na sala eda vakasamataka kina na lawa ni tiko savasava? E rawa ni yaga ki na nomu kalasi na nodra wilika na itukutuku nei Sister Wendy Nelson ena “iKuri ni iVurevure” ni ra sauma tiko na veitaro oqo.

• Eso na gauna e dau rawarawa na vakabauta ni noda digidigi ena sega ni tarai ira tale eso—ni sa ka vuni na noda ivalavala ca. Na cava e a vakavulici Korianitoni kina o Alama ena Alama 39:11–12 me baleta na revurevu ni nona digidigi? Sureti ira na lewe ni kalasi me ra tugana ko cei ena rawa ni tarai ena digidigi era sa cakava tiko, se vinaka se ca. Era rawa talega ni wasea e sa vukei ira vakacava na nodra ivalavala kei na ivakaraitaki eso tale mera digitaka na dodonu.

Alama 40–42

Na Veisorovaki i Jisu Karisito esa rawa kina na yavu ni veivakabulai.

• O Alama e a vakavulici Korianitoni ena dina eda gadreva kece meda taura dei, e oka kina na veika dina me baleta na inaki ni bula, na vuravura ni yalo, na tucake tale, kei na veilewai. Nanuma mo tomika e dua na ivakavuvuli nei Alama ka solia e rua na miniti vei ira na lewe ni kalasi me ra vakasaqara ena Alama 40–42 (yadudua se veisasa) ka vola na dina e vuqa me baleta na ulutaga o ya era kunea rawa. Era rawa ni veiwaseitaka vakai ira se vata kei na kalasi na veika era sa kunea. Mo tokaruataka na iwalewale oqo me baleta na veiulutaga tale eso ke veirauti na gauna. Cava na vuna era sa bibi kina na veidina vakatabakidua oqo me taura dei o Korianitoni na luvei Alama?

• Na vakamacala nei Alama me baleta na ituvaki ni yalo ni oti na bula oqo e rawa ni vakabibitaka ena nodra vakasama na lewe ni kalasi na noda lako mai vua na iVakabula ka veivutunitaka na noda ivalavala ca ena bula oqo. Rawa ni o vola na Yalododonu (Yaloveivutuni) kei na Tamata ca (Tawaveivutuni ena vava ni volavola ka sureti ira na lewe ni kalasi me ra vaqaqara ena Alama 40:11–26 ka tuva ena na vava ni volavola na veivosa se na veimalanivosa e a vakayagataka o Alama me vakamacalataka na ituvaki ni ilawalawa yadudua ni tamata oqo ni ra sa mate. Ena vakauqeti keda vakacava meda veivutuni na veivakavuvuli oqo? Eso tale na ka me baleta na ka e yaco ena vuravura ni yalo, raica na 1 Pita 3:18–20; 4:6 kei na Vunau kei na Veiyalayalati 138:29–37.

• Na cava e lako mai na nodra vakasama na nomu lewe ni kalasi ni ra rogoca na vosa “vakalesui” se “veivakalesuimai”? Sureti ira mera vakasaqara na Alama 41 ka e vakacava na nona vakayagataka o Alama na veivosa oqo. Na cava e vakaibalebaletaka kina o koya? Na cava ena vakalesui mai vei keda? Na cava na vuna ena veivuke kina me raici na ituvatuva ni Tamada Vakalomalagi me dua na “ituvatuva ni veivakalesuimai”? (tikina e 2).

• Eso na nomu lewe ni kalasi era rawa ni wasea na taro ena rairai tiko ena vakasama nei Korianitoni—e dodonu se veiraurau li me dua na Kalou dauloloma e totogitaka na Luvena? (raica na Alama 42:1). E rawa beka ni o kerei ira na lewe ni kalasi mera tugana se ra na sauma na taro oqo ka vakasaqara na isau ni taro ena Alama 42:7–26.

• Ke o vakila ni na veiganiti, me yaga ki na nomu lewe ni kalasi mera kunea e dua na tikina ena Alama 42 ni ra rawa ni vakatakarakarataki ira kina ki na dua na droini rawarawa se ivakatakarakara ka vakamacalataka na cava na vuna eda gadreva kina na Veisorovaki ni iVakabula. Mera wasea na lewe ni kalasi na veika era sa droinitaka, ka me tovolea na vo ni kalasi mera raica na tikina e matataka. Ka rawa ni ra qai veitalanoataka na cava era sa vulica me baleta na bibi ni isoro ni iVakabula.

  

  Eda rawa ni ciqoma e dua na ivakadinadina ni sa noda iVakabula ko Jisu Karisito.

iKuri ni iVurevure

Sa ka talei sara na yalo kecega.

E a vakatavulica o Sister Joy D. Jones:

“Meu vakamatatataka mada na gadrevi ni kena veidutaitaki na rua na vosa bibi oqo: yaga kei na kilikili. E rau sega ni tautauvata. Na ibalebale ni yaga oya meda vakamareqeti keda me vaka e cakava vei keda na Tamada Vakalomalagi, ka sega ni vaka e vakamareqeti keda o vuravura. Na keda yaga bibi a vakadeitaki tu mai ni bera na tadu mai ki vuravura. ‘Na loloma ni Kalou sa tawamudu ka na gumatua sara ki na ivakataotioti.’

“E yasa kadua, na kilikili ena rawati ena vuku ni talairawarawa. Ke da sa caka cala, eda sa sega ni kilikili, ia e sega ni takiveiyaga na keda yaga! Eda na veivutuni tikoga ka saga meda vakataki Jisu ka semata dei tiko na keda yaga. Me vaka e vakavulica o Peresitedi Brigham Young: ‘Ke lailai, na yalo sa lailai sara ka tu qo i vuravura … sa vuravura taucoko na kena yaga.’ Se cava tale, sa tikoga na keda yaga ena mata ni Tamada Vakalomalagi” (“Yavubula Tawayalani, ” Ensign se Liaona, Nove. 2017, 14).

Na rai ni vuravura ena gagano e sa sega ni sala vata kei na rai ni Kalou.

E veidutaitaka o Sisita Wendy Nelson na ivakarau ni rai ni vuravura me baleta na veiyacovi—“veiyacovi vakavuravura”—vata kei na ka e vakatoka me “ilesilesi va-Kalou ni bula vakawati veivolekati”:

“Ena veiyacovi vakavuravura, sa yaco ga na ka e rawa. Ena bula vakawati veivolekati, sa bibi sara na qaqarauni me levei kina na ka cavaga kei na ka kecega—mai na ivosavosa ki na sereivakatagi ki na iyaloyalo yavala—ka vakacudruya na Yalotabu, na yalomu, se nei watimu.

“Ni sa garogaro ka vakamatea na loloma na veiyacovi vakavuravura, e sa vakavurea e levu cake na loloma na bula vakawati veivolekati.

“Na veiyacovi vakavuravura e vakalolovirataka na tagane kei na yalewa kei na yagodra, ia na bula vakawati veivolekati e vakacerecerea na tagane kei na yalewa ka taleitaka na yago ni sa dua na icocovi cecere ni bula oqo.

“Ena veiyacovi vakavuravura, e rawa ni vakila na tamata yadua ni sa vakayagataki, vakacacani, ka mai galili tu yani. Ena bula vakawati veivolekati, sa vakila vakalevu cake na watidra na duavata ka sa daulomani, domoni vakalevu ka kilaimatata.

“Sa kakana na veiyacovi vakavuravura ka vakarusa vakaoti na veiwekani. Na bula vakawati veivolekati e vaqaqacotaka na vakawati. E tokona, vakabula, ka vakarokorokotaka na bula ni veiwatini kei na nodrau vakamau. …

“Sa yaco na veiyacovi vakavuravura me dua na ivalavala matau sara baleta ni sega ni vakataucokotaka na kena yalayala. E sa ka lagilagi na ilesilesi va-Kalou ni bula vakawati veivolekati ka na tawamudu tu ki na turaga kei na marama vakawati muri-veiyalayalati” (“Loloma kei na Vakamau” [lotu e vuravura raraba, 8 ni Janu., 2017], broadcasts.ChurchofJesusChrist.org).

Vakatorocaketaki Noda Veivakavulici

Vakavakarau taumada “Ni ko tugana na sala era na vakalougatataki kina na lewe ni nomu kalasi mai na ivakavuvuli ni kosipeli o ivakavuvulitaka voli, ena basika mai na vakasama kei na veivakauqeti ki na nomu bula e veisiga—ni ko gole ki cakacaka, cakava na cakacaka e vale, se veimaliwai kei ira na matavuvale kei na veitokani. Kakua ni nanuma na vakavakarau vakayalo me dua na ka o cakava ena gauna galala ia me dua na ka o sa vakamatautaka tu” (Veivakavulici ena iVakarau ni iVakabula,12).