Na ivakaraitaki i Nifai ena valececere ni were mai vei Jerry Thompson

24–30 ni Okosita

Ilamani 7–12

“Mo Nanuma na Turaga”

A vakayaloqaqataki ira na nona tamata o Nifai me ra nanuma na Turaga. E rawa ni o cakava vakakina vei ira o vakavulica. Ni o wilika na Ilamani 7–12, vola na veivakauqeti me baleta na sala e rawa ni o vukei ira na lewe ni kalasi mera nanuma na Turaga.

Vola na Veika o Uqeti Kina

Sureta na Veiwasei

Sureti ira na lewe ni kalasi me ra vola ena vava ni volavola eso na ivakavuvuli ni kosipeli era kunea ena Ilamani 7–12, vata kei na ivurevure eso era kunei kina na ivakavuvuli oqo. Sa qai rawa ni o vakatulewataka vata vakalasi o cei vei ira na ivakavuvuli oqo kei na veitikina o na veivosakitaka.

Vakavulica na iVunau

Ilamani 7–11

Era vakatakila na parofita na inaki ni Kalou vei ira na tamata.

• Me vukea nomu kalasi me vulica na Ilamani 7–11 me baleta na itavi kei na ilesilesi ni parofita, sa rawa mo tekivu ena nomu wilika vata na itukutuku me baleta na “Parofita” ena iDusidusi ki na ivolanikalou (scriptures.ChurchofJesusChrist.org). Na lewe ni kalasi e rawa ni ra raica na nodra itavi na parofita e tukuni ka tuvai ira ena vava ni volavola. O rawa ni qai tarogi ira na lewe ni kalasi me ra railesuva yadudua e dua na wase mai na Ilamani 7–11. Kerei ira me ra vakaraica se a vakayacora vakacava o Nifai na vei itavi e volai toka ena vava ni volavola. Era vakayacora vakacava na noda parofita kei na iapositolo bula na itavi oqo? Me da tokoni ira beka vakacava ena nodra itavi?

• Na cava era dau vosa vakadoudou kina na parofita ena so na gauna me vaka a cakava o Nifai? Vakasamataka mo sureti ira na lewe ni kalasi mera wilika na Ilamani 7:11–29, ka vakasaqara na ivakasala ni qaqarauni a solia o Nifai kei na vuna a solia kina vakadoudou o koya. Na ivakasala vakaparofita cava so sa vakauqeti keda me veivutuni ka lako mai vua na Turaga? Ena “Ikuri ni iVurevure” o na raica kina e dua na ivakatakarakara ka a vakayagataka o Elder Neil L. Andersen me vukei keda me da kila na rerevaki ni kena guilecavi na veivakaro vakaparofita.

Ilamani 9:1–20; 10:1, 11–15

Na vakabauta me na tarai vakalevu cake ka sega mai na ivakatakilakila kei na cakamana walega.

• E dua na sala me veivosakitaki kina na veitikina oqo sai koya me ra wasei na kalasi ki na rua na ilawalawa ka sureta na ilawalawa yadua me wilika na Ilamani 9:1–20 ka vakasamataka vakai ira ni ra tu ena itutu ni lima na tamata se na turaga ni lewa lelevu. Na cava beka era a vakila na tamata oqo? Na cava beka e vakauqeta na ilawalawa yadua mera ciqoma vakaduidui e dua vataga na parofisai veivakurabuitaki oya? Eda na vakadeitaka vakacava ni cakacaka mana e tara cake na noda ivakadinadina, ia me kakua ni yaco me kena yavu duadua ga vei ira? Eda na kila vakacava ke sa dina na nona vosa na parofita ena noda gauna?

Ilamani 10:1–12

Na Turaga e solia na kaukauwa vei ira era vakasaqara na Nona lewa ka muria na Nona ivakaro.

• Na itukutuku ni nona vakalougatataki Nifai na Turaga ena Ilamani 10 e rawa ni vakauqeti ira na lewe ni nomu kalasi mera gumatua vakalevu cake ena vakasaqarai kei na muri ni lewa ni Turaga. Me ra wilika na lewe ni kalasi na tikina e 1–12, ka vakasaqara na cava a cakava o Nifai me rawata kina na nona veivakabauti na Turaga kei na ivakarau e vakalougatataki koya kina na Turaga. Me ra qai wasea eso tale na ivakaraitaki ni tamata era “sega ni guce ena” vakasaqara ka muria na lewa ni Turaga (Ilamani 10:4), mai na ivolanikalou se na nodra bula. E vakalougatataki ira vakacava na tamata oqo na Turaga e na kaukauwa me ra “bale sobu” na veiulunivanua vakaibalebale (Ilamani 10:9) ena nodra bula? Solia vei ira na lewe ni kalasi na gauna mera vakasamataka na sala e rawa ni ra vakasaqara vakavinaka cake kina na lewa ni Turaga ka muria na Nona ivakaro.

Ilamani 12

E vinakata na Turaga meda dau nanumi Koya.

• E levu na lewe ni nomu kalasi era a sa cakava na veiyalayalati mera dau nanumi Jisu Karisito tikoga. E rawa ni ra veiwaseitaka vakai ira na veika eso e vukei ira mera “daunanumi koya tikoga” (Moronai 4:3; VV 20: 77), e na gauna ni sautu kei na gauna ni dredre. Me ra qai vakasaqara na lewe ni kalasi ena Ilamani 12 na vuna era dau guilecava kina na Turaga o ira na tamata. Eda na vorata rawa vakacava na ivakarau e vakamacalataki tiko ena wase ni ivola oqo? E sa vukei keda vakacava na dredre meda nanuma na Kalou? (raica Ilamani 11:4–7).

• Mo vakaraitaka na igu e gadrevi me da nanuma matua e dua na ka, sa rawa mo solia vei ira na lewenikalasi e vica na miniti me ra vakaraica na Ilamani 12. Mo qai tarogi ira ena veika eso mai na wase oqori me laurai na cava era nanuma rawa. E na rawa beka ni ra wasea na veika era sa cakava mera nanuma tiko na itukutuku me baleta e dua na veitarogi. E tautauvata vakacava oqo kei na sasaga e gadrevi me da “nanuma na Turaga”? (Ilamani 12:5). E duidui vakacava? Sureta na kalasi me vakaraica e dua na tikina se dua na malanivosa mai na Ilamani 12 ka na rawa ni ra vakaraitaka ena nodra vuvale se wiligusutaka me vakananumi ira me ra dau nanuma tiko na vinaka kei na kaukauwa ni Kalou.

Vakayaloqaqataka na Vuli e Vale

Me vakauqeti ira na lewe ni kalasi mera wilika na Ilamani 13–16, sa rawa mo vakamatatataka ni parofisai nei Samuela na Leimanaiti ni veika ena yaco ena sucu kei na vakoti ena kauveilatai ni iVakabula e rawa ni vakatauvatani ki na veika ena yaco ena noda gauna ni bera na iKarua ni Lesu Mai ni iVakabula.

iKuri ni iVurevure

Vakarorogo ki na veidusimaki ni parofita.

A wasea o Elder Neil L. Andersen na veika a sotakaya oqo:

“O ira era digitaka me ra qarava na Turaga ena dau vakarorogo vagumatua ka vakatabakidua ki vei ira na Parofita. …

“… Me’u vakaraitaka e dua na ka sotavi. Na neitou vuvale a bula voli ena vuqa na yabaki ena yasayasa vaka Florida. Baleta ni o Florida e levu kina na nuku, na vei lomanibai e kea e dau tei kina e dua na co levu drauraba ka vakatokai na Saint Augustine. E dua na meca rerevaki ni dua na lomanibai e Florida sai koya e dua na manumanu lailai, masikuvui ka vakatokai na mole cricket.

“Ena dua na yakavi ni keirau tu ena noqu matanivale kei na noqu itokani, a raica o koya e dua na manumanu lailai ni takosova na noqu gaunisala. ‘Ena vinaka mo suiya nomu lomanibai,’ a veivakaroti o koya. ‘E lako o ya e dua na mole cricket.’ Au a sa suiya na lomanibai ena wainimate‑ni‑manumanu‑ca ena vica walega na macawa sa oti, ka’u vakila ni sega vei au na gauna se na ilavo me’u se baci cakava tale.

“Ena rarama ni mataka ka tarava, au a vakaraica vakavoleka sara na noqu lomanibai. E a cokaidrauna ka totoka na kena drokadroka. Au raica sobu na veico me’u raica kevaka au na kunea rawa e dua vei ira na manumanu lalai. Au a sega ni raica rawa e dua. Au nanuma ni’u a vakasamataka, ‘Io, e rairai na mole cricket lailai o ya a takosova wale tikoga na noqu lomanibai ena ilakolako ki na lomanibai ni noqu itokani.’ …

“Ia, na italanoa, e laki cava ena rarawa. Au a lako mai ki tuba ena mata ni katuba e liu ena dua na mataka, rauta e 10 na siga ni oti na veitalanoa vata kei noqu itokani. Ka ni kidroa, me vaka beka e a yaco ena lomaloma ga ni bogi, na noqu lomanibai e sa robota na veitikina dravu. Au a cici yani ki na sitoa, volia na wainimate‑ni‑manumanu‑ca, ka suiya sara vakatotolo, ia e sa bera. A sa vakacacani na lomanibai, ka na gadrevi na itei vou, na cakacaka vakabalavu, kei na ilavo levu, me vakalesui tale ki na kena itutu e liu.

“Na ivakasala nei noqu itokani e a usutu ki na bula vinaka ni noqu lomanibai. A raica o koya na veika au a sega ni raica rawa. A kila o koya e dua na ka au sega ni kila. A kila o koya ni mole crickets era bula e lomaniqele ka dau yavala ga ena bogi, ka sega kina ni yaga na noqu a vakaraici ira ena siga. A kila o koya ni ra sega ni kania na drau ni co na mole crickets ia e tiko na kedra kakana ena wakana. A kila o koya ni manumanu lalai dua-na-idi oqo e rawa na kania e levu na waka-ni-co ni bera ni’u raica rawa na kena revurevu e dela ni qele. Au a sauma e dua na isau levu me baleta na noqu vakilakila. …

“… Era tu na mole crickets vakayalo ka ra dau keli qara ena ruku ni noda lalaga veitaqomaki ka ravuta na wakada vakamareqeti. E vuqa vei ira na manumanu lalai caka cala oqo e ra rairai somidi sara, ka so na gauna e voleka ni sega ni laurai rawa. …

“Me da kakua ni muria na ivakarau au a vakaraitaka ena sotavi ni noqu mole crickets ni Florida. Me da kakua sara ni beca na ivakasala ni qaqarauni. Me kakua sara ni da dau vakilakila vakai keda ga. Me da dau vakarorogo ka vuli ena yalomalumalumu kei na vakabauta e veigauna, ka maqusa sara me da veivutuni ke veiganiti” (“Na Parofita kei na Mole Crickets Vakayalo,” Ensign, Nove. 1999, 16–18).

Vakatorocaketaki Noda Veivakavulici

Vakaraitaka na loloma. “Se cava na kemu ituvaki o sotava, ni ko vakaraitaka na nomu lomani ira o vakavulica sa tukuna tiko na nomu vakacaucautaki ira vakaidina, nomu sa kauwaitaka na nodra bula, vakarogoci ira vakamatua, vakaitavitaki ira ena lesoni, cakava na veiqaravi baleti ira, se kidavaki ira ena loloma ni ko raici ira” (Veivakavulici ena iVakarau ni iVakabula, 6).