Rua na Udolu na Gone Yaloqaqa mai vei Arnold Friberg

10–16 ni Okosita

Alama 53–63

“Maroroi ena Nona Kaukauwa Veivakurabuitaki”

Ni o vakadikeva na iwalewale ni veivakavulici ena ituvatuva oqo, nanuma na cava ena mana ki na nomu kalasi, ka vakamatautaka se moica na itaviqaravi me sotava na nodra gagadre na lewe ni kalasi.

Vola na Veika o Uqeti Kina

Sureta na Veiwasei

Me vakayaloqaqataki ira na lewe ni kalasi me ra wasea na veika era sa vulica mai na Alama 53–63, o na kerei ira beka mera vakasaqara ena veiwase ka raica e dua na tikina e rawa ni ra wasea vua e dua e sotava tiko na bolebole eso. Sureti ira mera wasea na tikina oqo vua e dua ena taudaku ni kalasi.

Vakavulica na iVunau

Alama 53:17–21; 56:43–48, 55–56; 57:20–27; 58: 39–40

Ni da cakacakataka na vakabauta kei na veivakabauti vua na Kalou, ena vakaukauwataki keda O Koya.

• Sa rawa mo vakuria na tale katoa ni veitalanoa me baleti ira na cauravou yaloqaqa nei Ilamani ni ko dreta na ka era vulica mai vale na lewe ni kalasi. Dua na sala me vakayacori kina oqo oya mera sureti na lewe ni kalasi me ra wasea na nodra ivakarau ni bula na cauravou yaloqaqa e vakauqeti ira (eso vei ira oqo e rawa ni kunei ena Alama 53:17–21; 56:45–48; 57:20–21, 26–27; 58:40). E vukei ira vakacava na cauravou yaloqaqa na nodra ivakarau ni bula ena nodra gauna ni ivalu? Era rawa me vukei keda vakacava ena noda ivalu vakayalo? Era rawa talega ni wasea na lewe ni kalasi na italanoa ni “bati yaloqaqa” ni gauna oqo.

• Era na rairai nuitaka beka na itubutubu ena nomu kalasi ni ra na tara cake na luvedra na vakabauta me vakataki ira na cauravou qaqa nei Ilamani. Me vukei ira na itubutubu kei ira na itubutubu ni mataka ena nomu kalasi mera vuli mai na nodra italanoa, sa rawa ni o tuva e dua na isoso ni tamata yadua era rawa ni wasea na vakasama eso me baleta na tarai cake ni vakabauta vei ira na gone. Kerei ira na lewe ni isoso oqo me ra wilika taumada na Alama 56:47–48 kei na 57:20–27 ka vakarau ni wasea na kila eso me baleta na cava a vukei ira na cauravou yaloqaqa me vakatorocaketaka na nodra vakabauta. Solia vei ira na lewe ni kalasi na gauna mera wasea kina na nodra raikiloma ni ra vakaraitaka tiko na nodra vakasama na lewe ni isoso. Na ivurevure tale eso e rawa ni vakavinakataka na veitalanoa oqo e oka kina na vosa nei Sister Joy D. Jones ena “iKuri ni iVurevure” kei na itukutuku nei Peresitedi Russell M. Nelson “E Dua na Kerekere Vei Ira na Marama” (Ensign se Liaona, Nove. 2015, 95–97). Ni mai cava na veitalanoa, e rawa ni o solia vei ira na lewenikalasi e vica na miniti mera tugana na taro eso oqo: O cei e rawa ni vakararavi tu ki na nomu ivakadinadina? Na cava o rawa ni kaya ka cakava me vaqaqacotaki ira?

Tamataqaqa (Vakatavulici mai vei Tinadra), mai vei Liz Lemon Swindle

Alama 58:1–12, 30–37; 61

Sa rawa ni da digitaka meda nanuma na vinaka duadua baleti ira na tani ka kakua ni vakacudrui.

• Na yalo i Ilamani ni sa sega ni ciqoma tiko na nona mataivalu na veitokoni sa rawa ni dua na ivakaraitaki kaukauwa vei keda ni vakilai tu ni da sa cavilaki. Me vakauqeta na veitalanoa me baleta na nona ivakaraitaki, e rawa ni o sureta e dua na lewe ni kalasi me vakarau me mai umana na ituvaki nei Ilamani kei na vuna esa sega ni rogoca kina na matanitu na nona gagadre (raica Alama 58:1–9, 30–37; 61:2–8). E rawa mo vola ena vava ni volavola Na isau ni taro nei Ilamani kei na So tale na isau. Mo qai sureti ira na kalasi me ra vakasaqaqara ena Alama 58:1–12 kei na 30–37 ka vola ena ruku yadua na ivakamacala ni ulutaga ni veika e vakasamataka o Ilamani, tukuna, ka cakava me isau ni nona ituvaki, ena kena veibasai, na cava e rawa ni vakasamataka, tukuna, se cakava. Na cava e rawa ni da cakava me da muria na ivakaraitaki nei Ilamani ni vakilai eda sa cavilaki se vakawaleni?

• Ena gauna e a vakalewai Paorani kina o Moronai ena Alama 60, e a wawa ni digia me cudru o Paorani. Ia a sauma ga o koya ni sa “sega ni cudruva” ka “[marautaka] na cecere ni yaloi [Moronai]” (Alama 61:9). Me vukei ira na lewe ni kalasi mera vuli mai na ivakaraitaki nei Paorani, e rawa ni o kerei ira me ra raitayaloyalotaka ni ra kerei mera vola e dua na itukutuku me baleta e dua na mekasini ni Lotu ka yavutaki mai na ivakaraitaki nei Paorani ena Alama 61 me vakavulica na levei ni vakacudrui mai vei ira na tani. Ko rawa ni qai wasewasei ira na lewe ni kalasi ki na ilawalawa eso ka kerei ira mera wilika na Alama 61:3–14 ka vola na veika eso e rawa ni ra okata ena nodra itukutuku. Na ivakasala nei David A. Bednar ena “iKuri ni iVurevure” e rawa talega ni veivuke.

Alama 60:7–14

Sa dua na noda itavi meda laveti ira era tu wavoliti keda.

• E a vola o Moronai ni na tarogi Paorani na Kalou me sauma kevaka e kila ka vakawalena na nodra gagadre na mataivalu ni Nifaiti. Vakasamataka mo sureti ira na lewe ni kalasi me ra wilika vata na Alama 60:7–14 ka qai kerei ira me ra vakasamataka e dua era kila ka na rairai gagadre voli ka vakila tu ni sa vakawaleni. Na cava e rawa ni da cakava me da kidava ka sotava kina na nodra gagadre na tani? Sa sotavi vakacava na veika eda gadreva mai vei ira tale eso, oka kina na tacida kei na ganeda dauveiqaravi?

Alama 62:39–41, 48–51

Sa dodonu meda nanuma na Turaga ena gauna ni dredre kei na bula sautu.

• Na nodra imoimoi na Nifaiti ena veigauna dredre kei na sautu (raica na Alama 62:39–41, 48–51) e vakaraitaka ni rawa ni da digitaka meda yalomalumalumu se da sotava tiko na dredre se na bula sautu. Sa rawa mo sureti ira na lewe ni kalasi me ra wilika na veitikina oqo ka wasea na veika era vakauqeti kina. Sa rawa mo sureti ira me ra veitalanoataka veisasa na nodra nanuma ni bera ni o kerea e vica mera wasea ki na kalasi taucoko.

Vakauqeta na Vuli e Vale

Me vakauqeta na malele ki na Ilamani 1–6, e rawa ni o vakamacalataka ki na kalasi ni ena veiwase oqo era sa yaco me ivalavala ca ko ira na Nifaiti ka ra sa ivalavala dodonu na Leimanaiti. Na veisau ni itutu oqo e tu kina na lesoni bibi vei keda ena veisiga rerevaki emuri oqo.

iKuri ni iVurevure

Cakava mera vorata na ivalavala ca na luveda.

E wasea o Sister Joy D. Jones, na Peresitedi Raraba ni Lalai, na idola eso oqo me tuberi kina e “dua na itabatamata ka vorata na ivalavala ca”:

“Me tekivutaki, … sa dodonu me da vukei ira [na luveda] me ra kila ka sega ni lomatarotaro ni o ira na luvena tagane ka luvena yalewa na Tamada Vakalomalagi dauloloma ka sa tu Vua na nanamaki vakalou ena vukudra.

“iKarua, e sa ka bibi na kilai vakamatata ni ivunau ni veivutuni me vorati rawa kina na ivalavala ca. Na vorata-na ivalavala ca e sega ni kena ibalebale me sega noda ivalavala ca, ia e kena ibalebale na veivutuni tikoga, kidakida tiko, ka yaloqaqa. E rairai yaco tu na vorati ni ivalavala ca me dua na veivakalougatataki mai na vorati veitaravi ni ivalavala ca.

“… Na ikatolu ni ki ni nodra vukei na itabagone me ra yaco mera vorata-na ivalavala ca sai koya me tekivu ni ra se gone sara ni vulica na yavu ni vunau ni kosipeli kei na ivakavuvuli eso—mai na ivolanikalou, na Yavu ni Vakabauta, na Me iSakisaki ni iTabagone ivolalailai, sere ni Lalai, serenilotu, kei na noda dui ivakadinadina—ka na tuberi ira na gone kivua na iVakabula. …

“… Nodra vukei na gone me ra kilamatata, cakava, ka maroroya na veiyalayalati tabu sai koya e dua tale na kena idola. … Vakavulici ira na gone me ra rokova na nodra yalayala rawarawa ni ra se gone ka ni na vakaukauwataki ira me ra maroroya na veiyalayalati tabu ena bula mai muri” (“A iTabatamata Dau Vorata na iValavala Ca,” Ensign se Liaona, Me 2017, 88–89).

Me levei vakacava na ^veivakacudrui. (P.54 in Galley, last subheading - file 32 in Trados)

Ena nona vosa “Ka Sega Na Ka Me Vakatarabetaki Ira” (Ensign se Liaona, Nove. 2006, 89–92), e a solia kina o Elder David A. Bednar na ivakasala oqo:

• Kidava ni sa dua na digidgi na noda vakacudrui. “Me vakabauti ni dua se dua na ka e rawa ni cakava me da vakacalai, cudru, rarawa, se yalo vakatani kina ena vakaseva na noda galala ni digidigi ka vukici keda meda iyaya dau vakayagataki. Ni da sa itini, e sa tiko na kaukauwa vei iko kei au ni cakacakataka ka digitaka na iwalewale meda sausaumi kina ki na dua na ituvaki veivakacudrui se veivakamavoataki.”

• Rai vua na iVakabula. “Na iVakabula sai koya na ivakaraitaki levu duadua ni noda imoimoi ki na veisoqo se ituvaki e rawa ni veivakacudrui” [raica na 1 Nifai 19:9].

• Mo na ciqoma na nodra malumalumu na tani. “E dua na ivakatakilakila levu duadua ni noda dui matua vakayalo e vakatakilai mai na noda imoimoi ki na nodra malumalumu, na lecaika kei na nodra ivalavala veivakacudrui na tani.”

• Veitaratara vakadodonu sara ga. “Kevaka e dua na tamata e kaya se cakava e dua na ka eda nanuma ni veivakacudrui, sa imatai ni noda itavi meda bese ni vakacudrui ka qai veitaratara vuni ga, ena lomadina, ka vakadodonu sara ga kei na tamata oqori. Na kena ivalavala oqori e sureta na veivakauqeti ni Yalo Tabu ka vakatara me vakamatatataki na nanuma cala ka kilai matata na inaki dina.”

Vakatorocaketaki Noda Veivakavulici

Dretaka mai na veika o sa sotava e vale. Me vaka ni vale e sa buturara ni kena vulici na kosipeli, navuca se na rawa ni yavutaki vakacava mai kea na ka e sotavi ena nomu rumu ni vuli. Me ivakaraitaki, e rawa ni o vakavoutaka e vuqa na itaviqaravi ena Lako Mai, Mo Muri Au—Baleta na Tamata Yadua kei na Matavuvale me ra vakayagataki ena nomu kalasi me vaqaqacotaka na vuli yadudua ni lewe ni kalasi kei na matavuvale.