Ko Moronai kei na Yavu ni Bula Galala

Me baleta na Veivakalougatataki ni Bulagalala, mai vei Scott M. Snow

3–9 ni Okosita

Alama 43–52

“Duri Dei ena Vakabauti Karisito”

Me ikuri ni nomu railesuva na itaviqaravi vakaturi tiko oqo, vakasaqara na nomu veivakauqeti vakai iko ni ko vulica ena masumasu na Alama 43–52 ka vakasamataka ko na vukei ira vakacava na lewe ni kalasi mera raica na ivakavuvuli e vakavulici tiko.

Vola na Veika o Uqeti Kina

ivakatakilakila ni veiwasei

Sureta na Veiwasei

Me sureti na lewe ni kalasi me ra wasea na veika era sa vulica mai na Alama 43–52, sa rawa mo kerei ira era na sauma vakacava vua e dua e kaya, “Au sega ni raica rawa na sala me veiganiti kina ki na noqu bula na ivalu eso e vakamacalataki tiko ena iVola i Momani.”

ivakatakilakila ni veivakavulici

Vakavulica na iVunau

Alama 43–52

Na ivalu ena iVola i Momani e vakavulici keda me baleta na noda ivalu kei na meca.

• Ena nodra vuli yadua ka vakamatavuvale ena macawa oqo, era sa na rairai tugana se vola tu na lewe ni kalasi na nodra nanuma ena iwalewale era a taqomaki ira vakavinaka kina na Nifaiti mai vei ira na Leimanaiti kei na sala era a ravuti ira kina na Nifaiti na Leimanaiti. Kevaka era kitaka oqo na lewe ni kalasi mai vale, sureti ira mera wasea na veika era sa kunea. Se o rawa ni solia vei ira na lewe ni kalasi na gauna me ra raica kina na raikiloma eso oqo ena kalasi ka vakayagataka na ivolanikalou me vaka era kunei ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Ni ra wasea tiko na lewe ni kalasi na veika era sa raica, vakayaloqaqataki ira mera veitalanoataka eda na rawa vakacava ni vakamuria na nodra ivakaraitaki na Nifaiti ena noda taqomaki keda mai na vereca kei na sala eda rawa ni kidava kina na ravuravu vakayalo i Setani kivei keda.

Alama 46:11–22

Kevaka meda yaloqaqa ena taqomaki ni noda vakabauta, eda na rawa ni vakauqeti ira na tani me ra yalodina tiko ga.

• E rawa vakacava mo vukei ira na lewe ni kalasi mera muria na ivakaraitaki i Moronai ena yaloqaqa ni tutaka na nodra vakabauta na kosipeli vakalesui mai i Jisu Karisito? Sa rawa ni wilika na lewe ni kalasi na Alama 46:11–22 ka raica na ka e vakayacora o Moronai kei na ka a vakavulica e sa vakauqeti ira na nona tamata me ra yalodina vakalevu cake. E rawa mo vola na veika oqo ena vava ni volavola ena ruku ni ulutaga Na iVakaraitaki i Moronai. E qai rawa mo kerei ira na lewe ni kalasi me ra tugana na ivalavala nei Moronai ka vakatura na cava eda rawa ni cakava edai me taqomaka na noda vakabauta. E rawa mo vola nodra raikiloma ena ruku ni ulutaga na Taqomaki Vaqaqa Tu na Kosipeli Nikua. Na dina kei na yaga cava soti e sa vakavulica wale toka ga na noda parofita e dodonu meda vakavulica ka taqomaka?

• O na vukei ira vakacava na lewe ni kalasi mera bulataka na veika a vakayacora o Moronai ena drotini ni tu galala ki na nodra bula vakai ira? Sureti ira mera wilika na Alama 46:11–22 ka raica na dina eso sa vakavulica ka kerea tiko o Moronai mera tokona na nona tamata. Na dina kei na yaga cava soti era vakabibitaka na iliuliu ni Lotu ena noda gauna? (E rawa beka ni o railesuva eso ena Me iSakisaki ni iTabagone, “Na Matavuvale: Ai Vakaro ki Vuravura Raraba,” se na itukutuku ni koniferedi raraba vovou oqo.) Na bolebole cava soti eda sotava tiko ena noda taqomaka na noda vakabauta ena vuravura edaidai? Na cava eda rawa ni vulica mai na ivakaraitaki i Moronai? Solia na madigi me ra bulia na lewe ni kalasi na nodra drotini ni tu galala ka na vakananumi ira me ra bulataka vaqaqa ka taqomaka na nodra vakabauta.

  Ra vala tiko na Nifaiti kei na Leimanaiti

  Minerva Teichert K. (1888–1976), Taqomaki ni dua na Koro ni Nifaiti, 1935, waiwai ena masonite, 36 x 48 na idi. Brigham Young University Museum of Art

Alama 47

Sa temaki ka dabui keda vakalalai tu o setani.

• E rawa ni yaga ki na nomu kalasi na nodra vulica na Alama 47, ka vakaraitaka na sala e vakatauvatani kina na ka e cakava o Setani me dabui keda ena lawaki qaseqase i Amalikaia. Sa rawa mo tekivu ena nomu kerea e dua me vakalekalekataka na itukutuku e tiko ena Alama 47. Me vakuria na kena taleitaki, sa rawa mo sureta e rua na lewe ni kalasi me raitayaloyalotaka mada ni sai Amalikaia kei Leonitai ka tukuna na italanoa. Na cava a vakayacora ko Amalikaia e vakananumi keda ena veika sa cakava o Setani me temaki keda kina? Vakayaloqaqataki ira na lewe ni kalasi mera raica na tikina bibi ni ra veivosakitaka na taro oqo. Na qaqanivosa mai na “iKuri ni iVurevure” e koto kina e dua tale na ivakaraitaki vinaka ena sala e dabui keda kina o Setani. Na ivakasala cava eda rawa ni veirogoci kina me vukei keda ni kidava na sala e temaki keda kina o Setani nikua? Na cava eda rawa ni cakava meda taqomaki keda kina?

Alama 48:7–17

Ni da segata tiko meda yalodina me vakataki Moronai, eda na vakataka cake na iVakabula.

• E dua na veitalanoa me baleta na itovoyaga nei Moronai e rawa ni vakauqeti ira na lewe ni kalasi me ra segata ni muria na nona ivakaraitaki. O rawa ni tekivu ena nomu vakaraitaka e dua na iyaloyalo kei Moronai, me vakataka na kena ena ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale. Mo qai sureti ira na lewe ni kalasi me ra vulica na Alama 44:3–4 kei na 48:7–13 ka vola ena vava ni volavola na vosa kei na malanivosa ka tukuni Moronai. O ni qai rawa ni wilika vata na Alama 48:17 ka veitalanoataka na itovoyaga cava soti nei Moronai, me vaka era sa volai tu ena vava ni volavola, a vakavuna vua me vorata na veivakayarayarataki nei Setani ka yaco me vakataki Jisu Karisito. E rawa vakacava meda vakataki Moronai vakalevu cake?

Alama 48:7–9; 49:1–9; 50:1–6

E rawa ni da viribaiti keda kei na noda matavuvale mai vua na meca.

• E rawa ni yaga vei ira na lewe ni nomu kalasi ena nodra veirogoci vakai ira ni veivosakitaka na sala era rawa ni taqomaki ira kina kei na nodra matavuvale mai na veidabui kei na veitemaki i Setani. Me vakauqeta e dua na veitalanoa, sa rawa mo ni wilika vata na Alama 48:7–9; 49:1–9; kei na 50:1–6. Ni da vakasamataka na gagadre ni noda tataqomaki vakayalo mai na ivalavala ca, na cava eda rawa ni vulica mai vei ira na Nifaiti ena nodra sasaga me ra taqomaki ira? E rawa vakacava ni da taracake na itataqomaki vakayalo me taqomaki keda kei na noda matavuvale mai na veivakayarayarataki ni ivalavala ca kei na meca? Vakayaloqaqataki ira na lewe ni kalasi me ra wasea na vakasama eso e sa cakacaka vei ira. Cava na vuna e bibi kina me “kakua ni tarovi na vakavakarau tiko”? (Alma 50: 1).

ivakatakilakila ni vuli

Vakauqeta na Vuli e Vale

E dua na sala me vakauqeti ira na lewe ni kalasi me ra wilika na Alama 53–63 oya me tukuna vei ira ni itukutuku e tiko ena veiwase oqo ena rawa ni vakauqeti ira kei na nodra matavuvale me ra talairawarawa vakalevu cake ka taracake na vakabauta kaukauwa cake.

ivakatakilakila ni ivurevure

iKuri ni iVurevure

Na vua ni rawai ena veitemaki lalai.

Me vakavulici ni “sa curuma na noda bula na ivalavala ca levu ni da sa soro taumada ki na veitemaki lalai”, a wasea vakakina o Peresitedi Spencer W. Kimball na itukuni oqo:

“[E dua] na kameli kei na nona itaukei … erau a kosova tiko na veinuku dravuisiga ni sa tubu mai e dua na cava. A vakaduria vakatotolo o vunituraga na nona valelaca ka curu kina, sogota na kedra ituvi me taqomaki koya mai na cava nuku cudrucudru, gata ka veimoici. E a biu dina tu ga e tautuba na kameli, ka gauna e sa kaburaka kina na kaukauwa ni cagi na nuku ki yagona kei na matana kei na ucuna sa sega ni qai taqeya rawa o koya ka kerea tu me curu ki na valelaca.

“‘Sa tiko ga na vanua me baleti au,’ a kaya o vunituraga.

“‘Ia e rawa beka ni curu ga na ucuqu me rawa niu ceguva na cagi e sega ni tawani nuku?’ a kerea na kameli.

“‘Io, sa na rawa mo cakava oqori,’ e sauma o vunituraga, ka dolava vakalailai sara na ituvi ka curu yani na ucu balavu ni kameli. Sa mai lomaloma vinaka yani na kameli! Ia sa yaco me voraki na kameli ena cawi ni nuku e matana kei na daligana … :

“‘Na nuku-cagina e sa vaka e dua na ivaro ki uluqu. E rawa beka niu biuta ga i loma na uluqu?’

“Vakadua tale, sa vakasamataka o vunituraga ni na sega ni vakavu leqa vua na nona lomasoli, ni sa rawa ni tikora na ulu ni kameli na tikina e cake ni valelaca ka sega ni vakayagataka tu o koya. Sa biuta sara ki loma na uluna na kameli ka sa yalovakacegu tale tu—ia vakalekaleka ga.

“‘Na yasaqu ga e liu,’ a vakamamasu o koya, ma ni sorova tale o vunituraga ka yaco me sa tu ena valelaca na tabana e liu kei na yava ni kameli. Kena itinitini, ena iwalewale vata ga ni vakamamasu kei na veisorovi, na tolo ni kameli, na yasana e muri kei na ka oti e sa tu e loma ni valelaca. Ia oqo e sa rui osooso kivei rau, ka sa caqeti vunituraga tani na kameli ki na cagi kei na cava” (Nodra iVakavuvuli na Peresitedi ni Lotu: Spencer W. Kimball [2006], 106–7).

Vakatorocaketaki Noda Veivakavulici

Sa veivakauqeti na nomu veikacivi. “Na veikacivi ni nomu veivakavulici e sa lako mai vua na Turaga. … Ko sa vakatikori ena nodra veidusimaki na matabete ka taura tu na kena idola; o koya sa tiko kina vei iko na dodonu ki na ivakatakila o gadreva tu mo rawaka kina. Na veivakalougatataki oqo e sa nomu ni ko vakasaqara, yalodina tikoga, ka segata mo bula kilikili tu” (Veivakavulici ena iVakarau ni iVakabula,5).